အမရပူရရေဘေး တားနိုင်ပြီ



Share/Bookmark
ဇူလိုင်၂၀ ရက်နေ့ ည ၇ နာရီမှာတားနိုင်
လူဦးရေ ၄,၀၀၀ကျော် ရေးဘေးဒဏ် ရင်ဆိုင်နေရတဲ့ အမရပူရရေဘေးရဲ့ အဓိက ပြဿနာဖြစ်တဲ့ တာရိုးကျိုးပေါက်တာကို ဇူလိုင်၂၀ ရက်နေ့ ည ၇ နာရီမှာတားနိုင်ပြီလို့ မန္တလေး မြို့တော်ဝန်က သူ့ရဲ့ လူမှုကွန်ရက်မှာ ပြောပါတယ်။

အဆိုပါ တာဘောင်ဟာ တောင်မြောက် ပေ ၆၀၊ အနက် ပေ ၃၀နဲ့ လမ်းသားအကျယ်က ပေ ၁၀၀ခန့် ကျယ်ဝန်းပါတယ်။အဆိုပါ အကျယ်အဝန်းရှိ တာဘောင်ကို ဘက်ဟိုး၊ ဘူဒိုဇာများ အသုံးပြုပြီး ကျောက်များချကာ ပိတ်ဆို့ခဲ့ခြင်း ဖြစ်ပါတယ်။

ဇူလိုင်၁၉ ရက်နေ့ ညပိုင်းက စစ်ကိုင်း -မန္တလေးလမ်းမှာရှိတဲ့ ရွှေဂဲရေထိန်းတံခါး တာရိုးကျိုးပေါက်ပြီး မြစ်ရေဝင်ရောက်လာလို့ အိမ်ထောင်စုဦးရေ ၁,၄၀၀ ကျော် လူဦးရေ ၄,၀၀၀ကျော် ရေးဘေးဒဏ် ရင်ဆိုင် ခဲ့ရတာဖြစ်ပါတယ်။

မန္တလေးတိုင်း အမရပူမြို့နယ် ရွှေဂဲရေထိန်းတံခါးဟာ ဇူလိုင်လ ၁၉ရက်နေ့ ည ၇ နာရီအချိန်လောက်က စတင်ယိုစိမ့် ကျိုးပေါက်မှု ဖြစ်ခဲ့ပြီး ဇူလိုင် ၂၀ ရက်နေ့ မနက် ၃ နာရီအချိန်လောက်မှာတော့ နှစ်ဖက် အလုံးစုံ ကျိုးကျ သွားခဲ့ပါတယ်။

ရေဝင်ရောက်နေတဲ့နေရာတွေကို ရေဘေးအန္တရာယ် သတိပေးတာ၊ ဒေသခံတွေ နေရာရွှေ့ပြောင်း ပေးတာတွေကို တိုင်းအစိုးရ၊ တပ်မတော်နဲ့ မီးသတ်ဌာန၊ လူမှုကူညီရေးအသင်းတွေက ဆောင်ရွက်ပေးခဲ့ရပါတယ်။
ရပ်ကွက်အတွင်းရှိသူများ ပြောင်းရွှေ့ရေးအတွက် မီးသတ်တပ်ဖွဲ့ဝင်၊တပ်မတော် နဲ့လူမှုကူညီရေး အသင်းများက ကူညီဆောင်ရွက်ပေး
တာရိုးကျိုးသွား ခဲ့တဲ့ အတွက် စစ်ကိုင်း -မန္တလေးလမ်း သွားတဲ့ ကားတွေဟာ အမရပူရ မြို့တွင်းကနေ သွားလာနေကြတဲ့ အတွက် အမရပူရ မြို့တွင်းမှာ ကားတွေ ပြည့်ကျပ်နေတယ်လို့လည်း ဒေသခံတွေကပြောပါတယ်။

ဒီရေဘေးကြောင့် အနည်းဆုံး ရွာ၄ ရွာလောက် ရေဘေးသင့် ခဲ့ပြီး နှစ်ပေါင်းနှစ်ဆယ်ကျော်အတွင် ဆိုးဆိုးရွားရွား ရေဘးသင့်ခံရတာလို့လည်း ရေဘေးဒဏ်သင့်သူတွေကပြောပါတယ်။

လက်ရှိမှာ ဧရာဝတီမြစ်ရေတိုးချိန်လည်းဖြစ်လို့ အနီးတစ်ဝိုက်ကရပ်ကွက်နဲ့ကျေးရွာတွေကို အချိန်တိုတွင်း ခုလို ဧရာဝတီ မြစ်ရေ ဝင်ရောက်သွားတာဖြစ်ပါတယ်။

အခုလို တာရိုးကျိုးပေါက်တာဟာ မကြာသေးခင်က ရေထိန်းတံခါးကို တာဝန်ရှိသူတွေ ပြုပြင်ခဲ့တာနဲ့ ဆက်စပ်တယ်လို့ ဒေသခံတွေက ယူဆနေကြပါတယ်။
ပြိုကျတဲ့နေရာကို ခိုင်မာအောင် ပြုပြင်ပေးမယ်လို့ပြော
ရေဘေးသင့်တဲ့ အချို့နေရာတွေမှာ အိမ်ခေါင်အထိတက်နေရတာရှိတယ်လို့ ဒေသခံတွေက ပြောပါတယ်။

တာရိုးကျိုးပေါက်တဲ့နေရာကို ဒုတိယ သမ္မတ ဦးဟင်နရီ ဗန်ထီးယူ၊ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်၊ လူမှုဝန်ထမ်းကယ်ဆယ်ရေး နဲ့ ပြန်လည် နေရာချထားရေး ပြည်ထောင်စု ဝန်ကြီး ဒေါက်တာ ဝင်းမြတ်အေး တို့လည်း လာရောက်ခဲ့ပါတယ်။

မန္တလေးမြို့ ရေဆိုးထုတ်ဖို့ အတွက် ဆောက်လုပ်တဲ့ ရွှေဂဲရေဆိုးထုတ်စက်ရုံစီမံကိန်းအနီးမှာ ကလိုင်ပေါက်ဖြစ်ကာ ရေစိမ့်ပေါက်ဝင်ခဲ့ပြီး နောက် ဧရာဝတီမြစ်တာရိုး ကျိုးပေါက်မှုဖြစ်ပွားခဲ့တာ ဖြစ်တယ်လို့ ဒေသခံတွေက ဘီဘီစီကိုပြောပါတယ်။

ရေဘေးသင့်သူတွေကတော့ အမရပူရ မြို့ပေါ်က ဘုန်းကြီးကျောင်းတွေနဲ့ ဘုရားတွေမှာ နေထိုင်လျက်ရှိပါတယ်။

တာရိုးကျိုးပေါက်တဲ့နေရာကို ပိတ်လိုက်နိုင်ပြီးတဲ့နောက်မှာ လက်ရှိဧရာဝတီမြစ်ရေဟာ ဆက်မတိုးတော့ဘူး လို့လည်း ဒေသခံတွေပြောပါတယ်။

တာရိုးကျိုးပေါက်တဲ့ အမရပူရ ကမ်းနားလမ်းတစ်လျှောက် ဟာ အမရပူရ မြို့ပြစီမံကိန်းအတွက် လျာထားတဲ့နေရာလည်းဖြစ်ပါတယ်။

မန္တလေးတိုင်းဝန်ကြီးချုပ်ဒေါက်တာဇော်မြင့်မောင့် ကတော့ပြိုကျတဲ့နေရာကို ခိုင်မာအောင် ပြုပြင်ပေးမယ်လို့ပြောကြားခဲ့ပါတယ်။

BBC Burmese
https://www.bbc.com/burmese/53473252



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ