ဥရောပက အမှာကုန်တွေမရလို့ အထည်ချုပ်လုပ်ငန်းပြန်ဦးမော့ဖို့ မဖြစ်နိုင်သေး



Share/Bookmark

COVID-19 ကပ်ရောဂါကြောင့် ကုန်ထုတ်လုပ်မှုတွေကို ထိခိုက်လာနေချိန်မှာ ပြည်ပတင်ပို့မှုအပေါ် အဓိက မှီခိုနေရတဲ့ မြန်မာနိုင်ငံက အထည်ချုပ် လုပ်ငန်းတွေ အထိနာနေတဲ့ အခြေအနေကို ကိုဇော်ထက် ပြောပြပါမယ်။

ကမ္ဘာတဝန်း ကပ်ရောဂါနဲ့ ကြုံနေရတာကြောင့် မြန်မာ့အထည်ချုပ်လုပ်ငန်းအတွက် အဓိကစျေးကွက်ဖြစ်တဲ့ ဥရောပကို တင်ပို့ဖို့ ဆိုင်းထားရသလို၊ ထုတ်လုပ်ဖို့ ကုန်ကြမ်းရရေး အခက်အခဲတွေလည်း ရှိနေတာကြောင့် လုပ်ငန်းရှင်တွေ စိုးရိမ်နေကြပါတယ်။ အဓိကစျေးကွက်ဖြစ်တဲ့ ဥရောက ကုန်အမှာတွေ ဆိုင်းငံ့ထားတာကို နောက်ထပ် သက်တမ်းထပ်တိုးနေတဲ့ အတွက်လည်း လုပ်ငန်းရှင်တွေအတွက် စိုးရိမ်စရာ ဖြစ်လာနေရတာလို့ ရန်ကုန်တိုင်း ရွှေလင်ဗန်းစက်မှုဇုံ ဥက္ကဋ္ဌ ဦးအေးသောင်းက ပြောပါတယ်။

“ဥရောပကို ပို့နေတဲ့ စက်ရုံတချို့က ချုပ်ပြီးသားအထည်တွေ မပို့ဖို့ တားနေတာ extension က တိုးတိုးလာတဲ့အခါကျတော့ ချုပ်ထားပြီးတဲ့ဟာတွေ တချို့ အခက်အခဲရှိတာပေါ့။ ဒါ့အပြင် order ထပ်ရဖို့ ကိစ္စလေးတွေကလည်း နည်းနည်းကလေး သူတို့ ( ဥရောပ)က ချင့်ချိန်နေပုံရတယ်ထင်ပါတယ်။ ကိုက်မှ ချုပ်မယ်ဆိုတဲ့ စနစ်ကို ကျနော်တို့က သွားလို့မရတော့ဘူး၊ ချုပ်ခနည်းတဲ့ order တွေကလည်း ထပ်ပြီးနည်းသွားမယ် ဆိုရင်တော့ နည်းနည်းတော့ ရပ်တည်ရ ခက်သွားတယ်လို့တော့ မြင်မိတာပေါ့နော်။”

မြန်မာနိုင်ငံ အထည်ချုပ်လုပ်ငန်းတွေဟာ တရုတ်နိုင်ငံက တင်ပို့တဲ့ ကုန်ကြမ်းတွေအပေါ် အားထားနေရပေမဲ့လည်း ကပ်ရောဂါကာလ အသွားအလာတွေ ကန့်သတ်ထားတဲ့အတွက် ကုန်ကြမ်းပြတ်လပ်မှာကို လုပ်ငန်းရှင်တချို့က စိုးရိမ်နေပါတယ်။ မြန်မာနိုင်ငံ စက်မှုလက်မှုနဲ့ ဝန်ဆောင်မှုပေါင်းစုံ အလုပ်သမားသမဂ္ဂက ဦးသက်နှင်းအောင်ကတော့ ကုန်ကြမ်းရရှိရေးထက် ကုန်ချောထုတ်လုပ် တင်ပို့နိုင်ဖို့က အဓိက ရင်ဆိုင်ရမယ့် စိန်ခေါ်မှု အဖြစ် မြင်ပါတယ်။

“ မြန်မာနိုင်ငံရဲ့ အထည်ချုပ်ကုန်ကြမ်းအများစုက တရုတ်ပြည်ကနေ လာတာဖြစ်တယ်ပေါ့နော်။ အဲဒီတော့ ဒီတရုတ်ပြည်နဲ့ မြန်မာနိုင်ငံနဲ့ ကုန်ကြမ်းပို့တဲ့ လမ်းကြောင်းကလည်း ပုံမှန်အခြေအနေမှာ ရှိနေတယ်လို့တော့ ကျနော်တို့က သိရတယ်။ တကယ့်တကယ် အခက်အခဲတွေ့မယ်ဆိုရင် မြန်မာနိုင်ငံကနေ ထုတ်လုပ်တဲ့ ကုန်ချောတွေကပဲ အနောက်ဥရောပစျေးကွက်အပေါ်မှာ မှီခိုနေရတာ ဖြစ်တာကြောင့် ဒီကုန်ချောတွေအပေါ်မှာပဲ နည်းနည်းလေး စိုးရိမ်ရတဲ့အနေအထားလို့ ကျနော်တို့က မြင်တယ် ခင်ဗျ။”

အထည်ချုပ် လုပ်ငန်းတွေမှာ ကုန်ကြမ်းရရှိရေးနဲ့ ကုန်ချောထုတ်လုပ် တင်ပို့မှုတွေမှာ အခက်အခဲတွေကြောင့် နောက်ဆက်တွဲ လုပ်ငန်းတွေ လျှော့ချရတဲ့ အခြေအနေမျိုးတွေ ကြုံရမှာကိုလည်း လုပ်ငန်းရှင်တွေ စိုးရိမ်နေပါတယ်။ ကပ်ရောဂါကာလမှာပဲ အထည်ချုပ်လုပ်သား သောင်းနဲ့ချီဟာလည်း အလုပ်လက်မဲ့ဖြစ်ခဲ့ရတာပါ။ လတ်တလော ရင်ဆိုင်နေရတဲ့ အကျပ်အတည်းတွေကို ကျော်လွှားနိုင်ဖို့ အတွက်လည်း အစိုးရ တာဝန်ရှိ သူတွေ၊ အထည်ချုပ်လုပ်ငန်းရှင်တွေနဲ့ ကုန်သည်တွေ ဒီရက်ပိုင်းတွေမှာ ဆွေးနွေးမှုတွေ ရှိခဲ့တယ်လို့လည်း ရွှေလင်ပန်းစက်မှုဇုံဥက္ကဋ္ဌ ဦးအေးသောင်းက ပြောပါတယ်။

“ဒီတလ၊ နှစ်လ နောက်ပိုင်းမှာတော့ ပြောရခက်သွားမလား ကျနော်လည်းမပြောရဲပါဘူးဗျ။ ဒီအချိန်မှာ ညီညွတ်မှုရှိဖို့တော့ လိုတာပေါ့။ လုပ်သားထုအနေနဲ့ပေါ့နော်။ အခက်အခဲရှိလာတဲ့ ကာလတွေမှာ သည်းခံပြီး ကြိုးစားပြီး လုပ်ပေးဖို့ကိုပဲ ကျနော်ကတော့ မေတ္တာရပ်ခံတောင်းဆိုချင်တယ်။ မကြာခင်မှာ ဒီကိစ္စတွေတကယ်သာ ကြုံတွေ့နိုင်ခဲ့ရင် စက်ရုံတွေ ချက်ချင်းပိတ်ဖို့တော့ မရှိပါဘူး၊ အလုပ်သမားတွေ လျှော့ချသွားမယ်၊ တဆင့်ချင်း လျှော့ပြီးတော့ နောက်ဆုံး ပိတ်ချင်လည်း ပိတ်သွားနိုင်တယ်ဆိုတာတော့ သတိချပ်ဖို့တော့ လိုပါတယ်။ လျှော့တဲ့အထဲမှာ ကိုယ်မပါဖို့တော့ ဒီအချိန်မှာ ကြိုးစားကြဖို့ ကိုယ့်ရဲ့ အရည်အချင်းကို ပြဖို့တော့ လိုပါတယ်။”

ရန်ကုန်မြို့က အထည်ချုပ်ငန်းတွေကိုတော့ အလုပ်သမား ၅သိန်း လောက်နဲ့ လည်ပတ်နေတာပါ။ ကပ်ရောဂါကာလ အကျပ်အတည်းတွေ ရင်ဆိုင်နေရတဲ့ အထည်ချုပ်လုပ်ငန်းတွေ ပြိုလဲ မသွားအောင် မြန်မာအစိုးရက စီးပွားရေး ပြန်လည်ကုစားရေး အစီအစဉ်တွေနဲ့ ကြိုးပမ်းနေတာတွေ ရှိနေသလို ဥရောပသမဂ္ဂလည်း အထည်ချုပ်လုပ်သားတွေအတွက် မြန်မာကျပ်ငွေ ၇.၉ ဘီလီယံ ထောက်ပံ့တဲ့ အစီအစဉ်တွေလည်း လုပ်ဆောင်ထားပါတယ်။

ဇော်ထက်  / ဗွီအိုအေ ( မြန်မာပိုင်း)
https://burmese.voanews.com/a/myar-garment-factory-eu-/5510479.html

Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ