ရန်ကုန်အခြေစိုက် ကန်နဲ့ တရုတ်သံရုံးတွေရဲ့အပြန်အလှန်စာ

တောင်တရုတ်ပင်လယ်တွင်း ကင်းလှည့်နေတဲ့ တရုတ် ကမ်းခြေစောင့်ရေယာဉ်တစီး။ (ဇွန် ၁၃၊ ၂၀၁၄)

တောင်တရုတ်ပင်လယ်အတွင်း တရုတ်နိုင်ငံရဲ့ ပြုမူဆောင်ရွက်ချက်တွေဟာ မြန်မာနိုင်ငံအတွက် အလှမ်းဝေးတယ် ဆိုပေမယ့် မြန်မာအပါအဝင် တရုတ်ရဲ့ အိမ်နီးနားချင်းနိုင်ငံတွေ၊ အမေရိကန်ရဲ့ မိတ်ဆွေနိုင်ငံတွေနဲ့ မဟာမိတ်နိုင်ငံတွေအတွက် သတိထားစရာတွေ ဖြစ်လာနေတယ်လို့ ရန်ကုန်မြို့ အမေရိကန်သံရုံး၊ သံရုံး ယာယီတာဝန်ခံ George Sibley က ပြောပါတယ်။

သံရုံးယာယီတာဝန်ခံ George Sibley က တောင်တရုတ်ပင်လယ်က မြန်မာအပေါ် ဘယ်လိုသက်ရောက်မလဲဆိုတဲ့ ခေါင်းစဉ်နဲ့ ရေးသားထားတဲ့ ဆောင်းပါးကို အမေရိကန်သံရုံးက ဇူလိုင် ၁၈ ရက် ရက်စွဲနဲ့ ထုတ်ပြန်ချက်မှာ COVID-19 ကြောင့် ကမ္ဘာတလွှား ရုန်းကန်နေရချိန်မှာ တရုတ်နိုင်ငံရဲ့ ဒီမိုကရေစီစနစ်ကို နှိမ်နင်းမှုနဲ့ တခြားနိုင်ငံတွေရဲ့ အချုပ်အခြာ အာဏာကို မလေးမစား လုပ်နေတာတွေက စိတ်အနှောင့်အယှက် ဖြစ်လာရတယ်ဆိုပြီး သတိပေးထားပါတယ်။

ဒါ့အပြင် မြန်မာနိုင်ငံအတွင်း စည်းကမ်းကြပ်မတ်မှုမရှိဘဲ စိုက်ပျိုးတဲ့ တရုတ် ငှက်ပျောခင်းတွေ၊ သတ္တုနဲ့ သစ်တောလုပ်ငန်းတွေမှာ ရင်းနှီးမြှုပ်နှံရာမှာ အကျင့်ပျက် ခြစားမှုတွေ ပေါ်ပေါက်အောင် လုပ်ဆောင်နေမှုတွေနဲ့ အခြေခံ အဆောက်အအုံတွေ တည်ဆောက်မယ့်အစား အကြွေးပိုထူလာအောင်လုပ်ပြီး မြန်မာထက် တရုတ်ကို အကျိုးရှိစေမယ့် အထူးစီးပွားရေးဇုန်တွေ ဖော်ထုတ်နေတာတွေ ရှိနေတယ်လို့လည်း ထောက်ပြ သတိပေးထားပါတယ်။

ဒါဟာ သိသိသာသာ မဟုတ်ပေမယ့် တဖြည်းဖြည်းချင်းနဲ့ အဲဒီနည်းသုံးပြီး အချုပ်အခြာအာဏာ ဆုံးရှုံးစေမယ့် ခေတ်သစ်နည်းတခု ဖြစ်တယ်လို့လည်း ​မြန်မာနိုင်ငံဆိုင်ရာ အမေရိကန်သံရုံး ယာယီတာဝန်ခံ George Sibley က ရေးပါတယ်။

ဒီရေးသားချက်အပေါ်မှာ ရန်ကုန်မြို့ တရုတ်သံရုံး ပြောခွင့်ရသူက ပြင်းပြင်းထန်ထန် တုံ့ပြန်ထားရာမှာ ဒီဆောင်းပါးဟာ တရုတ်အပေါ် တမင်သက်သက် နာမည်ဖျက်ရုံသာမကဘဲ တရုတ်-မြန်မာ ပူးပေါင်းဆောင်ရွက်မှုနဲ့ နှစ်နိုင်ငံ ဆက်ဆံရေးကို သွေးခွဲတဲ့လုပ်ရပ်လို့ စွပ်စွဲထားပါတယ်။

အမေရိကန်ဟာ မြန်မာနိုင်ငံအပေါ် အရေးယူဒဏ်ခတ်မှုတွေ လုပ်ခဲ့ပြီး မြန်မာဖွံ့ဖြိုးရေးကို ထိခိုက်စေရုံမက မြန်မာနဲ့ နိုင်ငံတကာ ဆက်ဆံရေးပျက်အောင် ဖြစ်စေခဲ့တယ်လို့လည်း တုံ့ပြန် ရေးသားထားပါတယ်။

မြန်မာနိုင်ငံတွင်း တရုတ်နိုင်ငံရဲ့ ရင်းနှီးမြှုပ်နှံမှုတွေ အပေါ်မှာလည်း အမေရိကန်ဘက်က နာမည်ဖျက် တိုက်ခိုက်တာတွေ ရှိခဲ့တယ်လို့ တုံ့ပြန် စွပ်စွဲထားပါတယ်။

အမေရိကန်ပြည်ထောင်စုနဲ့ တရုတ်နိုင်ငံအကြား တောင်တရုတ်ပင်လယ်ပြင် အရေးနဲ့ ပတ်သက်လို့ ဒေသတွင်း တင်းမာမှုတွေ တိုးလာချိန်မှာပဲ မြန်မာနိုင်ငံအခြေစိုက် သံရုံးကြီးနှစ်ခုအကြား အခုလို အပြန်အလှန် ရေးသားချက်တွေ ဖြစ်လာတာပါ။

ဗွီအိုအေ (မြန်မာပိုင်း)
https://burmese.voanews.com/a/us-embassy-china-embassy-in-yangon/5508711.html