တောင်အာရှရေကြီးမှု လူ ၁၀၀ ကျော်သေဆုံး


တောင်အာရှဒေသတစ်ဝှမ်း မုတ်သုံမိုး သည်းထန်စွာ ရွာသွွန်းနေပြီး ရေကြီးရေလျှံဖြစ်နေတာကြောင့် အခုအချိန်အထိ လူပေါင်း တရာကျော် သေဆုံးခဲ့ရချိန်မှာပဲ ကြာသပတေးနေ့ကတော့ အိန္ဒိယနိုင်ငံ မြောက်ပိုင်းက သဘာဝ တောရိုင်း ဥယျာဉ်ကြီး တစ်ခုလုံး ရေနစ် မြုပ်သွားခဲ့ရပါတယ်။

ဇူလိုင်က စက်တင်ဘာလအထိကြာမြင့်တဲ့ မုတ်သုံ ရာသီမှာ ရေကြီးတာနဲ့ မြေပြိုတာတွေကြောင့် နှစ်စဉ် လူ ရာချီ သေဆုံးရတာ ဖြစ် ပေမဲ့ ဒီနှစ်မိုးရာသီမှာတော့ ဘင်္ဂလားဒေ့ရှ်၊ အိန္ဒိယနဲ့နီပေါနိုင်ငံတွေမှာ ရေကြီးရေလျှံမှု အများဆုံး ကြုံတွေ့ ရနိုင်တယ်လို့ တာဝန်ရှိသူတွေ က ပြောပါတယ်။

မုတ်သုံရာသီ ရေဘေးဒဏ်ကို လူတွေလိုပဲတိရစ္ဆာန်တွေလည်း ရင်ဆိုင်နေရတာဖြစ်ပါတယ်။ အိန္ဒိယအနောက်မြောက်ပိုင်း အာသံ ပြည်နယ်က စတုရန်းကီလိုမီတာ ၄၃၀ကျယ်ဝန်းတဲ့ နာမည်ကြီး Kaziranga အမျိုးသားတောရိုင်းဥယျာဉ်ရဲ့ ၉၀ရာခိုင်နှုန်းရေလွှမ်းမိုး နေပြီး ကြံ့နဲ့ တောဝက်လို တောရိုင်းတိရစ္ဆာန်တွေ ရေဘေးလွတ်ရာပြေးနေရတယ်လို့ အာသံပြည်နယ် သစ်တောရေးရာဝန်ကြီး Parimal Suklabaidya က AFP သတင်းကို ပြောပါတယ်။ ကြံ့တွေ ရေလွတ်ရာ ကုန်းမြေပိုင်းကို ပြောင်းနေကြတာ မြင်ရသလို အမျိုးသား ဥယျာဉ်ရဲ့ အပြင်ဘက်ကို ရေကူးသွားတဲ့ ကျား သုံးကောင်ကို ဥယျာဉ်ထဲ ပြန်ပြီးမောင်းထုတ်ခဲ့ရတယ်လို့လည်း အာသံပြည်နယ် သစ်တောရေးရာ ဝန်ကြီး ပြောပါတယ်။ လူဦးရေလေးသန်း နီးပါးရှိတဲ့ အာသံပြည်နယ်မှာ မိုးများပြီး ရေကြီးတာကြောင့်၁၀ ရက်အတွင်း လူ ၃၃ ယောက် သေဆုံးခဲ့ရတာပါ။

ဘင်္ဂလားဒေ့ရှ်နိုင်ငံမှာတော့ နိုင်ငံရဲ့ ၃ ပုံ ၁ ပုံ ရေမြုပ်နေဆဲဖြစ်ပါတယ်။ ဗုဒ္ဓဟူးနေ့ကတော့ Brahmaputra မြစ်ရေလျှံလို့ အိန္ဒိယ နယ်စပ်အနားက မြို့ တစ်မြို့နဲ့ ရွာတော်တော်များများ ရေဘေးဒဏ် ခံကြရပါတယ်။

နီပေါနိုင်ငံမှာလည်း တနင်္ဂနွေနေ့ကတည်းက ရွာတဲ့မိုးကြောင့် ရေကြီး မြေပြိုမှုတွေဖြစ်ခဲ့လို့ လူ ၆၇ ဦး သေဆုံးခဲ့ရပါတယ်။ နောက်ထပ် လူ ၄၅ ဦး ပျောက်ဆုံး နေတာကြောင့် ရဲတပ်ဖွဲ့နဲ့ ကယ်ဆယ်ရေးအဖွဲ့တွေက အသက်ရှင်ကျန်ရစ်သူတွေကို ရှာဖွေနေရဆဲ ဖြစ်ပါတယ်။

ဗွီအိုအေ (မြန်မာပိုင်း)
https://burmese.voanews.com/a/over-hundred-people-die-because-of-flood/5506032.html
တောင်အာရှရေကြီးမှု လူ ၁၀၀ ကျော်သေဆုံး တောင်အာရှရေကြီးမှု လူ ၁၀၀ ကျော်သေဆုံး Reviewed by THITHTOOLWIN on 07:20 Rating: 5
Powered by Blogger.