ပုဏ္ဏားကျွန်းမြို့နယ်တွင်း ပေါက်ကွဲမှုတွေ ရက်ဆက်ဖြစ်ပွား

( သတင်းဓာတ်ပုံ- ရက္ခိုင့်တပ်မတော် - သတင်းနှင့် ပြန်ကြားရေးဌာန)
မြောက်ပိုင်းမဟာမိတ် လေး ဖွဲ့နဲ့ မြန်မာငြိမ်းချမ်းရေး ကိုယ်စားလှယ်အဖွဲ့တို့ ရှမ်းပြည်နယ် ကျိုင်းတုန်မြို့မှာ တွေ့ဆုံဆွေး နွေးနေဆဲ တချိန်ထဲမှာပဲ ရခိုင်ပြည်နယ်၊ ပုဏ္ဏားကျွန်းမြို့နယ်ဘက်မှာ နှစ်ရက်ဆက်တိုက် ဗုံးပေါက်ကွဲမှု ဖြစ်ပွါးခဲ့ကြောင်း နယ် မြေခံ လွှတ်တော်ကိုယ်စားလှယ်တွေနဲ့ ဒေသခံရွာသားတွေကပြောပါတယ်။ ဒီဗုံးခွဲတိုက်ခိုက်မှုမှာ ရခိုင်လက်နက်ကိုင် အဖွဲ့ကလို့ ဒေသခံတွေက ယူဆနေပေမဲ့ AA ဘက်က တစုံတရာပြောဆိုတာမရှိပါဘူး။ အလားတူ ဘူးသီးတောင်မြို့နယ်ဘက်မှာလည်း စာသင်ကျောင်းအနီး မပေါက်ကွဲ သေးတဲ့ မိုင်းနှစ်လုံးတွေ့ရှိခဲ့လို့ စာသင်ကျောင်းပိတ်ထားရတဲ့ အခြေအနေရှိနေပါတယ်။ ဗွီအိုအေမြန်မာပိုင်း သတင်းထောက်နိုင်ကွန်းအိန်ကနေ သတင်းပေးပို့ထားပါတယ်။

မတည်ငြိမ်မှုတွေ ဖြစ်ပေါ်နေတဲ့ ရခိုင်ပြည်နယ်အတွင်းက ပုဏ္ဏားကျွန်းမြို့နယ်ဘက်မှာ ဒီကနေ့မနက်ပိုင်းနဲ့ မနေ့ညနေပိုင်းမှာ ဗုံးပေါက်ကွဲမှု ဖြစ်ပွားခဲ့တဲ့အကြောင်း ပုဏ္ဏားကျွန်းမြို့နယ်မဲ ဆန္ဒနယ်က အမျိုးသားလွှတ်တော်ကိုယ်စားလှယ် ဦးခင်မောင်လတ်က ပြောပါတယ်။

“မိုင်းကွဲတဲ့ဖြစ်စဉ်က နှစ်ခုပေါ့။ ဒီနေ့ မနက်အစောပိုင်း ၃ နာရီမှာ တခုကွဲတယ်။ ကွဲတဲ့နေရာက ပျဉ်လျားရှည်ဆိုတဲ့ ရွာနဲ့ အောင်ဆိပ်ဆိုတဲ့ရွာကြားမှာ။ မိုင်းကွဲတယ်။ လက်နက်ငယ်ပစ်သံတွေက အများကြီးကြားရတယ်။ မနေ့ကညနေ ၃ နာရီ ကျော်မှာ အဲဒီလက်မဆိပ်က မင်းဇီချောင်းအသွားမှာ မိုင်းကွဲတယ်။ မိုင်းကွဲပြီးနောက် အဲဒီတပ်ဘက်က ပစ်တာ။ ဟိုဘက် ဒီဘက် ပစ်ပြီးတော့လေ။ အရပ်သား ထိခိုက်မှုတော့ မရှိဘူး။”

အောင်ဆိပ်ရွာသား တဦးကတော့ တပ်မတော် စစ်ကြောင်းကို မိုင်းခွဲတိုက်ခိုက်ခံရတာလို့ ပြောပါတယ်။

“တိုက်ပွဲတော့ မဟုတ်ပါဘူး။ သူတို့က မိုင်းထောင်တာ မိုင်းခွဲတာပဲ ရှိမယ်။ သူတို့က တပ်ကလာ မိုင်ခွဲပြေးတာ ဖြစ်မှာပါ။ ခွဲတဲ့လူက AA လား ဖြစ်မှာပါလေ။ တပ်မတော်သွားတဲ့ လမ်းကိုပဲ ခွဲပြေးတာကိုး။”

ဗုံးခွဲမှုဖြစ်ပွားပြီး မြန်မာစစ်တပ်ဘက်က လက်နက်တွေနဲ့ ပစ်ခတ်မှုကြောင့် လက်မဆိတ်နဲ့ မင်းဇီချောင်း ကျေးရွာသားတွေ ကြောက်လန့်စိတ်နဲ့ ရွာကနေ တိမ်းရှောင်နေကြရပါတယ်။

ပုဏ္ဏားကျွန်းမြို့နယ်ဘက် မိုင်းခွဲတိုက်ခိုက်မှုဖြစ်စဥ်အပါအ၀င် ဒီကနေ့ နှစ်ဘက်ထိတွေ့မှုအခြေအနေနဲ့ ပတ်သက်ပြီး AA ပြန်ကြားရေးတာဝန်ခံခိုင်သုခကို ဆက်သွယ်ခဲ့ရာမှာ။

“ကျနော်မေးထားတုန်းပဲ ရှိသေးတယ်။ ဟိုက ဘာမှအကြောင်း ပြန်မလာသေးဘူး။”

အနောက်ပိုင်းတိုင်း စစ်ဌာနချုပ်တပ်မတော်ပြောခွင့်ရ ဗိုလ်မှူးကြီးဝင်းဇော်ဦးကတော့ ဒီကနေ့မှာ တိုက်ပွဲဖြစ်ပွားတာ မရှိဘူးလို့ ပြောပါတယ်။

ဒီအတောအတွင်း မကြာသေးခင်က တိုက်ပွဲဖြစ်ပွားခဲ့တဲ့ ဘူးသီးတောင်မြို့နယ် သပိတ်တောင်ကျေးရွာက စာသင်ကျောင်းအနီး မပေါက်ကွဲသေးတဲ့ မိုင်း နှစ်လုံးတွေ့ရှိလို့ ဒီကနေ့မှာ စာသင်ကျောင်း ပိတ်ထားရတယ်လို့ သပိတ်တောင်ကျေးရွာ ဆရာတော် ဦးညာဏ၀ံသက အခုလိုမိန့်ပါတယ်။

“စာသင်ကျောင်းကတော့ ဒီနေ့တော့ ကျောင်းမဖွင့်ဘူးလေ။ ကျောင်းမတက်ကြဘူး ကလေးတွေက။ ဒီမှာမနေ့ညက ဗုံးလို့ ထင်ရတဲ့အရာဝတ္တု နှစ်ခုပေါ့။ အဲတာတွေ့ကြတယ်လေ မနေ့ညက။ ကျေးရွာ အုပ်ချုပ်ရေးမှူးကနေပြီးတော့ သက်ဆိုင်တဲ့ ဌာနတွေကို အသိပေးထားပါတယ်။ ပြောထားပါတယ်သူက။ မဖယ်ရသေးဘူး ရှိပါသေးတယ်။ သူတို့က ကြောက်ပြီးတော့ ရွာကလူတွေကလည်း မြို့ပေါ်ကို ဘူးသီးတောင်ကို ပြေးတဲ့သူလည်း ပြေးကြတယ်။ ညကျရင်ကိုယ့်ရွာရှိတဲ့ ဘုန်းကြီးကျောင်းကိုလည်း ကျန်တဲ့လူ လာအိပ်တယ် အဲဒီလိုပေါ့။”

ဒီလို ဗုံးတွေ့ရှိမှုကြောင့် ရွာသားတွေကလည်း စိုးရိမ်စိတ်နဲ့ ဘူးသီးတောင်မြို့ဘက်ကို တိမ်းရှောင်နေတယ်လို့ ဆရာတော်က မိန့်ပါတယ်။

ပြီးခဲ့တဲ့ တနင်္ဂနွေနေ့က သပိတ်တောင်နဲ့ ကင်းချောင်းကြား ဗုံးပေါက်ကွဲမှု ဖြစ်ပွားခဲ့အပြီး မြန်မာစစ်တပ်နဲ့ ရခိုင်လက်နက်ကိုင် AA အဖွဲ့တို့ တိုက်ပွဲဖြစ်ပွားခဲ့ပါတယ်။

အဲဒီ တိုက်ပွဲတွေအတွင်း သပိတ်တောင်မြောက် ရွာသား တဦး လက်နက်ထိမှန် သေဆုံးသွားတယ်လို့ ဆရာတော်က ဆက်မိန့်ပါတယ်။

“ပစ်ခတ်သံတွေတော့ ကြားလိုက်တာပဲ အဲဒီနေ့တုန်းက ဦးဇင်းတို့။ နာရီဝက်လောက်တော့ ပစ်ခဲ့တယ် ထင်တယ်။ သပိတ်တောင်ရွာက တောင်ရွာမြောက်ရွာအဲဒီလိုရှိနေတယ်။ အဲဒီမြောက်ဘက် ကုလားရွာကတော့ ကုလားတယောက်တော့ ဆုံးသွားတယ် ပြောတာပဲ။

တိုက်ပွဲတွေကြောင့် သပိတ်တောင် (မွတ်ဆလင်) ရွာက ရွာသား ဦးအဒူကော်ရီးမ် ၄၅ နှစ်ကတော့ ကျည်ထိမှန် သေဆုံးသွားခဲ့ပါတယ်။

သပိတ်တောင်နဲ့ ကင်းချောင်းကြား တိုက်ပွဲဖြစ်ပွားခဲ့ကြောင်း ရခိုင်လက်နက်ကိုင် AA ဘက်ကနေ တနင်္ဂနွေနေ့တုန်းက ဗွီအိုအေကို အတည်ပြု ပြောဆိုခဲ့ပါတယ်။

မနေ့ကလည်း မင်းပြားမြို့နယ်ဘက်မှာ မြန်မာစစ်တပ်နဲ့ AA အဖွဲ့တို့အကြား တိုက်ပွဲပြင်းထန်စွာ ဖြစ်ပွားခဲ့သလို မြန်မာ စစ်တပ်ဘက်က ရဟတ်ယာဉ် သုံးပစ်ခတ်ခဲ့တယ်လို့ AA ပြောခွင့်ရ ခိုင်သုခက ပြောပါတယ်။

ကိုနိုင်ကွန်းအိန်/ ဗွီအိုအေ (မြန်မာပိုင်း)
https://burmese.voanews.com

မှတ်ချက်ရေးသားလိုတဲ့ စာဖတ်ပရိတ်များ တောင်းဆိုချက်အရ ဖွင့်ပေးလိုက်ပါပြီ။ မှတ်ချက်များ ရေးသားနိုင်ပါပြီ။

အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ