ပြီးခဲ့သည့် သြဂုတ်လက ရှမ်းပြည်နယ်အတွင်း ဖြစ်ပွားခဲ့သည့် တိုက်ပွဲများအတွင်း ထိခိုက်ဒဏ်ရာရသည့် အရပ်သားတဦး။ (သြဂုတ် ၂၅၊ ၂၀၁၉) |
ရှမ်းမြောက်အပါအဝင် စစ်တိုင်းဒေသကြီးငါးတိုင်းမှာ မြန်မာအစိုးရစစ်တပ်ဘက်က စက်တင်ဘာလ ၂၁ ရက်နေ့အထိ တဖက်သတ် အပစ်ရပ်ဆိုင်းထားမယ့်အချိန် တိုင်းရင်းသားလက်နက်ကိုင်တပ် ညီနောင်မဟာမိတ်အဖွဲ့ဘက်ကလည်း အောက်တိုဘာ ၈ ရက်နေ့အထိ တလတာ တဖက်သတ် အပစ်ရပ်မယ်လို့ နှစ်ဖက် ကြေညာချက် ထုတ်ပြန်ပြီး ကျိုင်းတုံမှာ စက်တင်ဘာ ၁၆-၁၇ တွေ့ဆုံဆွေးနွေးဖို့ ပြင်ဆင်နေချိန်မှာပဲ ရခိုင်-ပလောင် စတဲ့ တိုင်းရင်းဒေသတွေမှာ တိုက်ပွဲတွေ အပြင်းထန် ဖြစ်ပွားနေတာပါ။
ရှမ်းပြည်နယ်မြောက်ပိုင်း ပလောင်ကိုယ်ပိုင်အုပ်ချုပ်ခွင့်ရဒေသမှာ သောကြာနေ့ကစလို့ ဒီကနေ့ တနင်္ဂနွေနေ့အထိ မြန်မာစစ်တပ်နဲ့ ပလောင်ပြည်နယ် လွတ်မြောက်ရေးတပ်ဦး PSLF/တအာင်းတပ် TNLA တို့ကြား လက်နက်ကြီးနဲ့ရော ရဟတ်ယာဉ်တွေနဲ့ပါ ပစ်ခတ်တိုက်ခိုက်မှုတွေ ဆက်တိုက် ပြင်းပြင်းထန်ထန် ဖြစ်ပွားနေလို့ ဒေသခံတွေ စိုးရိမ်နေကြပါတယ်။ ပလောင်ကိုယ်ပိုင်အုပ်ချုပ်ခွင့်ရဒေသ ဦးစီးဌာန အလုပ်အမှုဆောင်အဖွဲ့ဝင် ဦးမိုင်းသိန်းဇော်က ဗွီအိုအေမြန်မာပိုင်းကို နောက်ဆုံးအခြေအနေ အခုလို ပြောပြပါတယ်။
“အခုလည်း ရဟတ်ယာဉ် ရှိနေတုန်းပဲ။ နမ့်ဆန်မှာ ရဟတ်ယာဉ်က လေးစီးပျံလာတယ်။ နှစ်စီးက လက်နက်ခဲယမ်းတွေ လာချတယ်၊ ပစ္စည်းတွေ လာချတာပေါ့။ ကျန်တဲ့နှစ်စီးက လားရှိုးမှာ ပြန်သွားပြီးမှ အခု ပြန်ရောက်နေတယ်။ အခု စပစ်နေတယ်။ အခုတော့ မြို့ခံတွေက နည်းနည်းတော့ ထိတ်လန့်နေကြတယ်။ လူတွေကတော့ ဒီမြို့နားတဝိုက်မှာ ကြောက်လန့်ပြီးတော့ နီးစပ်တဲ့ ဘုန်းကြီးကျောင်းမှာ လာနေကြတယ်။ နီးစပ်တဲ့အိမ်တွေမှာ လာနေကြတယ်။ လက်နက်ကြီးကျမှာ စိုးရိမ်တဲ့အခါကျတော့ စစ်ရှောင်နေရာမှာ အများစု စုတဲ့နေရာမှာ လာနေကြတယ်။”
မနေ့ စနေ့နေ့တုန်းက လက်နက်ကြီးကျည် နေအိမ်ပေါ် တည့်တည့်ကျလို့ အရပ်သားတဦး ထိခိုက်ဒဏ်ရာရခဲ့ပြီး လုံခြုံရေးအခြေအနေအရ ကူညီကယ်ဆယ်ရေး နှောင့်နှေးနေချိန်မှာပဲ သွေးထွက်လွန် သေဆုံးခဲ့ရပါတယ်။ ပလောင်ကိုယ်ပိုင်အုပ်ချုပ်ရေး တာဝန်ရှိသူတွေဘက်က ဒေသခံ ပလောင်ပြည်သူတွေကို ဘေးကင်းရာတွေကို တိမ်းရှောင်ကြဖို့နဲ့ လုံခြုံရေးအရ သတိထားနေကြဖို့ လတ်တလော စစ်ရှောင်ပြည်သူတွေအတွက် လိုအပ်တဲ့ စားနပ်ရိက္ခာနဲ့ ဆေးဝါးတွေ ကူညီစောင့်ရှောက်ပေးနေပါတယ်လို့ ပလောင်ကိုယ်ပိုင်အုပ်ချုပ်ခွင့်ရဒေသ ဦးစီးမှူးက ပြောပါတယ်။
“အဲဒီမှာ လက်နက်ကြီး ပစ်လိုက်တဲ့အခါကျတော့ အိမ်လည်း ပြာကျသွားတယ်။ သူကတော့ ခြေထောက်မှာ လက်နက်ကြီးထိတဲ့အခါကျတော့ လူမှုဖူလုံရေးအသင်းကို လွှတ်ပေးတဲ့အခါကျတော့ သွားလို့မရဘူး၊ လုံခြုံရေးမပေးတဲ့အခါကျတော့ နောက်ဆုံးက ဖြစ်တာက မနက်ပိုင်းပေါ့။ ညနေ လေးနာရီလောက်က သွေးထွက်လွန်တဲ့အခါကျတော့ ဆုံးသွားတာပေါ့။ လုံခြုံရေးအတွက်ကတော့ တပ်မတော်ဘက်မှာပဲ တာဝန်ရှိတယ်။ ကျနော်တို့ကတော့ လူထု စိတ်ဓာတ်မကျအောင် လူထုရဲ့ လိုအပ်ချက်လေးတွေ၊ သက်ဆိုင်ရာဌာနတွေ၊ သက်ဆိုင်ရာ လူမှုဖူလုံရေးအသင်းတွေ ခေါ်ပြီး တာဝန်ပေးတယ်ဗျ။ ဆက်သွားလို့ လုံးဝသွားလို့မရတဲ့ ဥပမာ နမ့်ဆန်မြို့နယ် ဇယန်းကြီးကျေးရွာအုပ်စုမှာ ဇယန်းကြီးတို့၊ အနောက်ပြင်ကျော်စုတို့ ဒီနေ့ကတေ့ စာရင်းသွားကောက်နေတယ်။ အခုထိ ပြန်မလာသေးဘူးဗျ။ စစ်ရှောင်အဖွဲ့တွေ နမ့်ဆန်မြို့နယ် တခုလုံးမှာ ဘယ်လောက်ရှိသလဲဆိုတာ သူတို့ပြန်ရောက်တဲ့အချိန်မှာ သိမှာပေါ့။”
ပလောင်ကိုယ်ပိုင်အုပ်ချုပ်ခွင့်ရဒေသတွင်း တိုက်ပွဲတွေကြောင့် တအာင်းဒေသ နမ့်ဆန်မြို့နယ် တောင်ရိုးဘုရားကုန်းပေါ်က သာသနိက အဆောက်အဦတွေပါ ပျက်စီးခဲ့ရသလို သံဃာတော်တွေ အပါအဝင် ဒေသခံပြည်သူတွေ ဘေးလွတ်ရာကို ပြေးခဲ့ကြရပြီး ဇယန်းကြီး ဘုန်းတော်ကြီးကျောင်းမှာ ယာယီခိုလှုံရေးစခန်းဖွင့်ထားပြီး စောင့်ရှောက်ပေးနေပါတယ်။ ဒုက္ခသည်တွေရဲ့ အခြေအနေ ပလောင်အုပ်ချုပ်ခွင့်ရဒေသက စစ်ရှောင်ပြည်သူတွေကို သွားကူညီပေးနေတဲ့ နမ့်ဆန်မြို့ မြို့မဂိုဏ်းချုပ်ဆရာတော်ဘုရား ဦးစီးတဲ့ ဘုန်းတော်ကြီးကျောင်းက ဦးဆောင်သံဃာတော်က မိန့်ပါတယ်။
“ဒီနေ့ကတော့ ရဟတ်ယာဉ်က လေးစီးလာတယ်။ ထပ်ပစ်တယ် အဲ့ဒီအနားတဝိုက်နော်။ ညနေ ၂ နာရီက။ နှစ်စီးက မြို့နားက လေယာဉ်ကွင်းရှိတယ်။ လူနာကို လာသယ်တာ။ အခုချိန်ထိ သူတို့က ဗုံးလာကြဲတယ်၊ လာပစ်တယ်။ စားဝတ်နေရေးတွေ အတွက်ကတော့ ဘုရားကြီးအနားကိုတော့ မသိဘူး။ ဒုက္ခသည်တွေက နမ့်ဆန်က ၂၀၀ ကျော်ရှိတယ်။ ဇယန်းကြီးမှာလည်း ၂၀၀ ကျော်။ ဒုက္ခသည်တွေများလာပြီး ဇယန်းကြီးရွာကြီးမှာ လာစုနေကြတယ်။ ဒီမှာက TNLA နဲ့ နားလည်မှုနဲ့ နေကြတယ်။ ဘာမှမဖြစ်ဘူး၊ ငြိမ်းချမ်းတယ်။”
တရုတ်နိုင်ငံရဲ့ ကြားဝင်စေ့စပ်ပေးမှုနဲ့ စက်တင်ဘာ ၁၆-၁၇ ရှမ်းပြည်နယ် ကျိုင်းတုံမြို့မှာ ညီနောင်မဟာမိတ်အဖွဲ့တွေနဲ့ အစိုးရ ငြိမ်းချမ်းရေးကိုယ်စားလှယ်တွေ တွေ့ဆုံဖို့ ပြင်ဆင်နေချိန် အခုလို ရှမ်းမြောက် ပလောင်ဒေသ အပါအဝင် တိုင်းရင်းဒေသတွေမှာ ထိုးစစ်ဆင်လာနေတဲ့အတွက် လက်ရှိ ငြိမ်းချမ်းရေးတည်ဆောက်မှု ဖြစ်စဉ်နဲ့ ရရှိထားတဲ့ တည်ငြိမ်မှု အခြေအနေတွေကို ထိခိုက်စေနိုင်ပြီး အခြေအနေတွေဟာ ပိုဆိုးရွားသွားနိုင်တယ်လို့ ပြည်သူလူထုနဲ့ သိသင့်သိထိုက်သူတွေကို အသိပေးကြောင်းလည်း ညီနောင်မဟာမိတ်အဖွဲ့ ၃ ဖွဲ့က မနေ့ စက်တင်ဘာလ ၁၄ ရက်နေ့ နေ့စွဲနဲ့ သဘောထားကြေညာချက် ထုတ်ပြန်ထားပါတယ်။
မဆုမွန်/ ဗွီအိုအေ (မြန်မာပိုင်း)
https://burmese.voanews.com
ပလောင်တိုက်ပွဲ အရပ်သားထိခိုက်သေဆုံး
Reviewed by THITHTOOLWIN
on
23:07
Rating: