ဗိုလ်ချုပ်ရုပ်ရှင်အတွက် ရန်ပုံငွေ ကျပ် သိန်း တစ်သောင်းခုနစ်ထောင် ကျော်ရရှိ

သမိုင်းဝင်ဇာတ်ကောင်တွေနေရာမှာ သရုပ်ဆောင်မယ့်သူတချို့နဲ့ပတ်သက်လို့ ဝေဖန်သံတွေလည်း ကျယ်လောင်
ဗိုလ်ချုပ်ရုပ်ရှင် လို့ လူသိများတဲ့ 'အောင်ဆန်း' ရုပ်ရှင် ရိုက်ကူးဖို့ ရန်ပုံငွေ စုစုပေါင်း ကျပ်သိန်း တစ်သောင်းခုနစ်ထောင်ကျော် ရရှိထားပြီလို့ ဒါရိုက်တာလူမင်းက ပြောပါတယ်။

မူလက ရန်ပုံငွေ တစ်သောင်းနှစ်ထောင်ကျော်နဲ့ အမေရိကန်ဒေါ်လာ ၄၈၀၀ ကျော် ရရှိထားတာပါ။ စက်တင်ဘာ ၂၄ ရက်မှာ ပြုလုပ်တဲ့ ရုပ်ရှင်စတင်ရိုက်ကူးဖို့ အသိပေးတဲ့ အခမ်းအနားမှာ အလှူငွေ ကျပ်သိန်းငါးထောင် ထပ်မံရရှိတာကြောင့် စုစုပေါင်း ရန်ပုံငွေက သိန်း တစ်သောင်းခုနစ်ထောင်ကျော်သွားပြီ ဖြစ်ပါတယ်။

ဒီရုပ်ရှင်ကို ပြီးခဲ့တဲ့ ၂၀၁၂ ခုနှစ်တည်းက ဗိုလ်ချုပ်အောင်ဆန်းရုပ်ရှင်ဖြစ်မြောက်ရေးအဖွဲ့ ဖွဲ့ပြီး စတင် ရိုက်ကူးဖို့ ရုံးခန်းဖွင့်တာ၊ ရိုက်ကူးရေး တာဝန်ရှိသူတွေ ရွေးချယ်တာ၊ သရုပ်ဆောင်သစ်ရွေးချယ်တာ၊ ရန်ပုံငွေရှာဖွေတာတွေ လုပ်ခဲ့ပေမယ့် ခုနစ်နှစ်အကြာမှ အခုလို စတင်ရိုက်ကူးနိုင်တာဖြစ်ပါတယ်။

လက်ရှိ ထွက်ပေါ်လာတဲ့ ဒါရိုက်တာနဲ့ရိုက်ကူးရေးအဖွဲ့စာရင်းမှာ အရင် ရုပ်ရှင်ဖြစ်မြောက်ရေးအဖွဲ့ဝင်အများစု ပါဝင်လာခြင်းမရှိတာ တွေ့ရပါတယ်။

မူလက ဒါရိုက်တာမင်းထင်ကိုကိုကြီး ရိုက်ကူးဖို့ စီစဉ်ခဲ့ပေမယ့် ပြီးခဲ့တဲ့နှစ်တွေအတွင်း ဒါရိုက်တာနဲ့ဇာတ်ညွှန်းအဖွဲ့အပြောင်းအလဲတွေဖြစ်ခဲ့ပါတယ်။

ဗိုလ်ချုပ်နဲ့ ဒေါ်ခင်ကြည်အဖြစ် သရုပ်ဆောင်မယ့် ကျော်ကျော်မျိုးနဲ့ ဇာခြည်လင်း
၂၀၁၇ ခုနှစ်မှာ သာသနာရေးနဲ့ ယဉ်ကျေးမှုဝန်ကြီး သူရဦးအောင်ကို ဦးဆောင်တဲ့အဖွဲ့က ရုပ်ရှင်ထုတ်လုပ်ရေးလုပ်ငန်းကော်မတီကို ဖွဲ့ပြီးနောက် ဒီလိုအပြောင်းအလဲတွေရှိလာခဲ့တာပါ။

ဒီရုပ်ရှင်မှာ ဗိုလ်မင်းရောင်နေရာက သရုပ်ဆောင်မယ့် လူမင်းက ဒါရိုက်တာအဖြစ် ရိုက်ကူးမှာဖြစ်ပြီး သမိုင်းဝင်ဇာတ်ကောင်တွေနေရာမှာ သရုပ်ဆောင်မယ့် ဝါရင့်သရုပ်ဆောင်တချို့နဲ့ပတ်သက်လို့ ဝေဖန်သံတွေလည်း ကျယ်လောင်နေပါတယ်။

BBC Burmese
https://www.bbc.com
ဗိုလ်ချုပ်ရုပ်ရှင်အတွက် ရန်ပုံငွေ ကျပ် သိန်း တစ်သောင်းခုနစ်ထောင် ကျော်ရရှိ ဗိုလ်ချုပ်ရုပ်ရှင်အတွက် ရန်ပုံငွေ ကျပ် သိန်း တစ်သောင်းခုနစ်ထောင် ကျော်ရရှိ Reviewed by THITHTOOLWIN on 15:35 Rating: 5
Powered by Blogger.