ကျောက်စိမ်းအရိုင်းထည်ပေါ် အခွန်လျော့ဖို့လိုအပ်

ဖားကန့် ကျောက်တွင်း မြင်ကွင်း

လက်ရှိ အခွန်ကောက် ဥပဒေအရ ကျောက်စိမ်းအရိုင်းထည်တွေအပေါ် ၁၅ ရာခိုင်နှုန်း အခွန်ကောက်ခံနေတာကို ၁၀ ရာခိုင်နှုန်းလောက်ပဲ ကောက်ခံဖို့ အမျိုးသားလွှတ်တော် ကိုယ်စားလှယ်လဲ ဖြစ် အမျိုးသားလွှတ်တော် သတ္တုနဲ့ သယံဇာတ ကော်မတီအဖွဲ့ဝင် ဦးခင်မောင်မြင့်က တင်ပြခဲ့ပါတယ်။

မြန်မာနိုင်ငံမှာ ကျောက်စိမ်း ထွက်ပေမယ့် အခွန်ကောက်များတဲ့အတွက် ကုန်သည်တွေအနေနဲ့ မြန်မာနိုင်ငံမှာ မရောင်းချပဲ နည်းမျိုးနဲ့ တရုတ်နိုင်ငံဖက် သယ်ယူပြီး အခွန်သက်သာတဲ့ တရုတ်နိုင်ငံထဲ ရောင်းချနေတဲ့အတွက် တရုတ်မှာပဲ ကျောက်စိမ်းဈေးကွက်ကြီး ဖြစ်နေတာလို့လဲ သူက ပြောခဲ့ပါတယ်။

ကျောက်စိမ်းဈေးကွက်ကို အကြောင်းပြုပြီး တရုတ်နိုင်ငံမှာ ကွမ်ကျိုး ကြယ်ရာ ရွှေလီ အပါအဝင် မြို့ကြီး ၆မြို့နယ်တို့ဟာ ဖွံ့ဖြိုးသွားခဲ့ပေမယ့် ကျောက်စိမ်းထွက်တဲ့ ဖားကန့်ဒေသမှာတော့ ကတ္တရာလမ်း ကောင်းကောင်း မရှိသေးပဲ မကြာသေးခင်ကမှ လျှပ်စစ်မီး ရရှိခဲ့တာဖြစ်ပါတယ်။

ကျောက်စိမ်းကျောက်မျက်တွေအပေါ် အခွန်ကောက်ခံတဲ့နှုန်း မြင့်နေတဲ့အတွက် အချို့ကုန်သည်တွေဟာ နေပြည်တော်မှာ ကျင်းပတဲ့ ကျောက်မျက်ပြပွဲတွေမှာ မရောင်းချတော့တဲ့အတွက် တစ်ကြိမ်နဲ့ တစ်ကြိမ် ကျောက်မျက်ရောင်းချတဲ့ အတွဲတွေ လျော့နည်းလာနေတယ်လို့လဲ ကျောက်ကုန်သည်တစ်ချို့က ဆိုပါတယ်။

BBC Burmese
https://www.bbc.com