တာချီလိတ်တွင် တရားမဝင် လက်နက်ကိုင်ဆောင်သူ တဦး ဖမ်းဆီးရမိ

ဇူလိုင်လ ၁၁ ရက် ၂၀၁၉

သျှမ်းပြည်နယ် အရှေ့ပိုင်း တာချီလိတ်မြို့ တွင် တရားမဝင် လက်နက် ကိုင်ဆောင်သူ တဦး ဖမ်းဆီးရမိကြောင်း တာချီလိတ်မြို့မ ရဲစခန်း မှ စုံစမ်းသိရသည်။

ဇူလိုင်လ ၉ ရက်နေ့ ည ၈ နာရီခွဲက တာချီလိတ်မြို့ ဝိန်းကျောက် ရပ်ကွက် မြို့ပတ်လမ်း တွင် တာချီလိတ်မြို့ ရဲတပ်ဖွဲ့ဝင်များ နှင့် ပူးပေါင်း အဖွဲ့များက လှည့်ကင်း စစ်ဆေးဆောင်ရွက်နေစဉ် အသက် ၃၀ နှစ် မိုင်းခတ်မြို့ နေသူ အိုက်လာ မောင်းလာသည့် ကားပေါ်တွင် တရားမဝင် လက်နက် ခဲယမ်း များ ဖမ်းဆီး ရမိကြောင်း သိရသည်။

အသက် ၃၀ နှစ်အရွယ် အိုက်လာ ဆိုသူ မောင်းလာသည့် မော်တော်ယာဉ် တွင် Ruger အမျိုးအစား သေနတ် 375-41566 နံပတ်ပါ 380 Auto သေနတ် တလက် နှင့် ကျည်အိမ် အတွင်း တွင် ကျည် ၅တောင့်၊ 380 Auto PMC စာတမ်းပါ ကျည် ၉ တောင့် တို့ ကို သိမ်းဆည်းရမိကြောင်း တာချီလိတ်မြို့ မရဲစခန်းမှ သိရသည်။

တရားမဝင် လက်နက် ကိုင်ဆောင်သည့် အိုက်လာ ကို တာချီလိတ်မြို့ မရဲစခန်း မှ (ပ) ၃၇၃/ ၂၀၁၉ သျှမ်းလက်နက် ၁၂(က) /၁၂(ဂ) အရ အမှုဖွင့် အရေးယူ ဆောင်ရွက် ထားရှိကြောင်း သိရသည်။

သျှမ်းပြည်နယ် အရှေ့ပိုင်း ဘက်တွင် တရားမဝင် လက်နက်ကိုင်ဆောင်သူ များရခြင်းမှာ နယ်စပ်ဒေသ ဖြစ်သည့် အလျောက် လက်နက်ကို လွယ်ကူစွာ ဝယ်ယူနိုင်ခြင်း၊ မူးယစ်ဆေးဝါး ရောင်းဝယ်ဖောက်ကားမှုကြောင့် လက်နက်ကိုင် ဆောင် ခြင်း တို့ ဖြစ်သည် ဟု တာချီလိတ်ဒေသခံများက ပြောဆိုသည်။

“ ဒီမှာ က ဘာသေနတ် အမျိုးအစားလိုချင်လဲ လွယ်လွယ်နဲ့ ဝယ်လို့ရတယ်။ သေနတ်ကိုင်တဲ့သူတွေကလည်း မူးယစ်ဆေးဝါး နဲ့ ဆက်နွယ်တဲ့ သူတွေပါ။ သက်ဆိုင်ရာ က သေချာ စိစစ်ဖို့လိုတယ်” ဟု တာချီလိတ်ဒေသခံ စိုင်းတစ် က ပြောသည်။

သျှမ်းပြည်နယ် အရှေ့ပိုင်း တွင် လက်နက်ကိုင်သည့်အဖွဲ့အစည်း များလည်း ရှိသဖြင့် မည်သည့် အဖွဲ့ သည် တရားဝင် လက်နက်ကိုင် ဆောင်ခွင့် ပြုထားသည် ကို သေချာ စိစစ်သင့်ပြီး၊ တရားမဝင် လက်နက်ကိုင်ဆောင်သူများကိုလည်း ထိရောက်စွာ အရေးယူသင့်ကြောင်း၊ စိုင်းတစ်က ပြောသည်။

Panglong(Burmese)
https://www.facebook.com/ShanNewsBurmese