ကော့သောင်းမြို့တွင် မော်တော်ကားနှင့်ဆိုင်ကယ်ယာဉ်တိုက်မှုဖြစ်ပွား နှစ်ဦး သေဆုံး


ကော့သောင်း ဇူလိုင် ၃၁

ကော့သောင်းမြို့ ဘန်းကချွန်းကျေးရွာ မိုင်တိုင်အမှတ် (၁၈) အလွန် ကော့သောင်း-ဘုတ်ပြင်း ပြည်ထောင်စုလမ်းမကြီးပေါ်တွင် ဇူလိုင် ၃၀ ရက် ယမန်နေ့ ညနေပိုင်းက ထရပ်မော်တော်ယာဉ်နှင့် မော်တော်ဆိုင်ကယ် မျက်နှာချင်းဆိုင်တိုက်မှုဖြစ်ပွားရာ မော်တော်ဆိုင်ကယ်မောင်းနှင်သူနှင့် နောက်တွင် လိုက်ပါစီးနင်းသူ နှစ်ဦးလုံး ပွဲချင်းပြီး သေဆုံးခဲ့ကြောင်းသိရသည်။

ဖြစ်စဉ်မှာ အဆိုပါနေ့ညနေပိုင်းက ကော့သောင်းမြို့နယ် စူငယ်ဘာလိုင်း ကျေးရွာအုပ်စု ဘာလိအော် ကျေးရွာနေ သန်းထွေး ၄၅ နှစ်ဆိုသူ မောင်းနှင်သော CANTER အဖြူရောင်မော်တော်ယဉ်သည် ကော့သောင်းမှ ဘုတ်ပြင်းဘက်သို့ တဖက်ယာဉ်ကြောလမ်းမှန်အတိုင်း မောင်းနှင်လာစဉ် ခမောက်ကြီးမြို့ အမှတ်(၁)ရပ်ကွက် နေ မျိုးမင်း(၃၅)နှစ် မောင်းနှင်လာပြီး တစ်ရပ်ကွက် တည်းနေ ကုလား(၂၁)နှစ် နောက်မှစီးနင်းလိုက်ပါလာသော နံပတ်မပါ Scoopy အဖြူရောင်ဆိုင်ကယ်သည် မျက်နှာချင်းဆိုင် တဖက်ယာဉ်ကြောမှ အရှိန်ပြင်းစွာ မောင်းနင်းလာရာမှ အရှိန်မထိန်းနိုင်ဖြစ်ကာ အခြားတဖက်ယာဉ်ကြောသို့ ရောက်ရှိပြီး မော်တော်ယာဉ်အား ဝင်ရောက်တိုက်မိခြင်းဖြစ်ပြီး ဆိုင်ကယ် မောင်းနှင်သူနှင့်အတူလိုက်ပါလာသူ နှစ်ဦးလုံးပွဲခြင်းပြီးသေဆုံးရခြင်းဖြစ်သည်။

ဖြစ်စဉ်နှင့်စပ်လျဉ်း၍ ဆိုင်ကယ်မဆင်မခြင်မောင်းသူ မျိုးမင်းအား ကော့သောင်းမြို့ မရဲတပ်ဖွဲ့စခန်းမှ အမှုဖွင့်အရေးယူ ဆောင်ရွက်လျက်ရှိကြောင်း သတင်းရရှိပါသည်။

ကျော်စိုး (ကော့သောင်း)
Myanmaalinn
https://www.facebook.com/MYANMAALINNNEWS

ယင်းမာပင်ဒေသခံအချို့နဲ့ လုံခြုံရေး ရဲတို့ ပဋိပက္ခဖြစ်စဉ်တွင် ဒေသခံလေးဦး သေနတ်ဒဏ်ရာ ရရှိ


မုံရွာ၊ဇူလိုင်-၃၁

စစ်ကိုင်းတိုင်းယင်းမာပင်မြို့နယ်အတွင်း ကျေးရွာမီးလင်းရေး ဆောင်ရွက်ခြင်းကို ကန့်ကွက်ရာမှ ဒေသခံနှင့် ရဲတို့ ပဋိပက္ခဖြစ်ကာ ဒေသခံ ၄ဦး သေနတ်ကျည်ဆံဒဏ်ရာရရှိခဲ့သည့် ဖြစ်စဉ် ယနေ့ဖြစ်ပွားခဲ့သည်။


ပြန်လှည့်ကျေးရွာမှ ကိုယ်ထူကိုယ်ထစနစ်ဖြင့်တည်ထားသော လျှပ်စစ်မီးအားအုန်းတောရွာကို လျှပ်စစ် ဓာတ်အားပေးရန် ဌာနဆိုင်ရာမှ ရဲအင်အားဖြင့် လာရောက်လုပ်ကိုင်စဉ် တားဆီးသဖြင့် သေနတ်ဖြင့် ပစ်ခံရခြင်း ဖြစ်သည်ဟု ပြန်လှည့်ကျေးရွာဒေသခံများထံမှ သိရသည်။

"အမှတ် ၉လမ်းမှာလာပြီး မီးတိုင်စိုက်တာ။အန္တရာယ်များတယ်။ကျွန်မတို့က လက်မခံနိုင်ဘူး။ရွာအပြင်ကနေ ကြိုးဆွဲရင် လက်ခံနိုင်တယ်။ရွာက အမျိုးသမီးတစ်ယောက်ကို အရင် အချုပ်ကားပေါ် တင်တယ်။ကျွန်မတို့က လိုက်ပြီး ဆွဲလို့ ပါမသွားတာ။ပြီးတော့ သေနတ်တွေနဲ့ ပစ်တော့တာပဲ"ဟု ဒေသခံ ဒေါ်သွယ်က ပြောသည်။


မနက် ကိုးနာရီကတည်းက မီးတိုင်လာစိုက်ခြင်းဖြစ်ပြီး နေ့လည် ၂နာရီခန့်တွင် ထိုကဲ့သို့ပဋိပက္ခဖြစ်ပွားခဲ့ခြင်းဖြစ်သည်။

သေနတ်ဒဏ်ရာ ရရှိသူ လေးဦးမှာ အမျိုးသားများဖြစ်ပြီး ရင်ဘက်၊ဝမ်းဗိုက်၊လက်မောင်းနှင့် မျက်နှာတို့တွင် ရရှိခဲ့ကြသည်။

အဆိုပါ ဖြစ်စဉ်နှင့်ပတ်သက်ပြီးယင်းမာပင်ခရိုင်ရဲတပ်ဖွဲ့မှာ အစည်းအဝေးလုပ်နေပြီး ဖြေကြားနိုင်ခြင်းမရှိသကဲ့သို့ လုံခြုံရေးနှင့်နယ်စပ်ရေးရာဝန်ကြီးမှာလည်း အစီရင်ခံစာမတက်သေးသဖြင့် ဂဃနဏ မသိရှိသေးဘူးဟု မုံရွာဂေဇက်အား ပြန်လည်ဖြေကြားသည်။

အိအိမွန်
Monywa Gazette
https://www.facebook.com/monywagazette
 

ဖွဲ့စည်းပုံ ပြင်ဆင်ရေး အစီရင်ခံစာ အပေါ် တပ်မတော်သား ကိုယ်စားလှယ်များ အမည်စာရင်း ပြန်ရုပ်သိမ်း

BBC- တပ်မတော်သား ကိုယ်စားလှယ်များ
အခြေခံ ဥပဒေ ပြင်ဆင်ရေး အစီရင်ခံစာ ဆွေးနွေးရန် တင်သွင်းထားသော တပ်မတော်သား ကိုယ်စားလှယ် (၇၈) ဦး ၏အမည်စာရင်း များအား ဒုတိယ အကြိမ် ပြည်ထောင်စု လွှတ်တော် ၁၃ကြိမ်မြောက် ပုံမှန် အစည်းအဝေး ဆဋ္ဌမနေ့ ဇူလိုင်လ ၃၀ ရက်နေ့က တပ်မတော်ဘက်မှ ပြန်လည် ရုပ်သိမ်းခဲ့သည်။

အဆိုပါ ကိစ္စ နှင့် ပတ်သတ်ပြီး တပ်မတော်သား ကိုယ်စားလှယ် တဦး ဖြစ်သည့် ဗိုလ်မှူးချုပ် မောင်မောင် က “ လွှတ်တော် အစီအစဉ် အတိုင်းပါပဲ။ ကျနော်တို့ အစီအစဉ် တိုင်းပဲ ဆက်ကြည့်ပါ။ သီးခြားပြောစရာ မရှိပါဘူး။ ကျနော်တို့ အစီအစဉ် တိုင်း ဆက်လုပ်မှာ ဖြစ်တယ်။ အာဂျင်ဒါ (မှတ်တမ်း) မှာ ပါတယ်လေ။ ကျနော်တို့ မဆွေးနွေး ဘူးဆိုပြီးတော့” ဟု မီဒီယာ များကို ပြန်လည် ဖြေကြားခဲ့သည်။

ဖွဲ့စည်းပုံ အခြေခံဥပဒေ အပေါ် သက်ဆိုင်ရာ အခန်းအလိုက် ပြင်ဆင် ခြင်း၊ ပယ်ဖျက်ခြင်း၊ အသစ်ဖြည့်စွက်ခြင်း တို့ကို ဆောင်ရွက် ခဲ့ကြရာတွင် နိုင်ငံရေးပါတီ အသီးသီးမှ ကိုယ်စားလှယ်များ စိတ်အားထက်သန်စွာ ပါဝင်ဆောင်ရွက် ခဲ့ကြသော်လည်း တပ်မတော် သားလွှတ်တော်ကိုယ်စားလှယ် များဖက်က တဦးတယောက်မျှ ပါဝင် ဆောင်ရွက်ခဲ့ခြင်းမရှိ ကြောင်း သျှမ်းတိုင်းရင်းသား များ ဒီမိုကရေစီ အဖွဲ့ချုပ် (SNLD)၊ သိန္နီ မဲဆန္ဒနယ် ပြည်သူ့ လွှတ်တော် ကိုယ်စားလှယ် စိုင်းခမ်းဦး က ယမန်နေ့ကျင်းပသည့် ၁၃ကြိမ်မြောက် ပြည်ထောင်စု လွှတ်တော်အစည်းအဝေး တွင် ပြောကြားခဲ့သည်။

အစီးရင်ခံစာ ကို တပ်မတော်သား လွှတ်တော်ကိုယ်စားလှယ်များ အစုအဖွဲ့ ကိုယ်စားလှယ် များ၏ သဘောထားမှတ်ချက် အရ ပြင်ဆင်ရေး ပူးပေါင်းကော်မတီ ဖွဲ့စည်းဆောင်ရွက်ခဲ့ခြင်းသည် ဖွဲ့စည်းပုံ အခြေခံ ဥပဒေ ၏ အခန်း ၁၂ နှင့် ကိုက်ညီ မှု မရှိကြောင်း၊ အဆိုတင်သွင်းခဲ့ စဉ်ကတည်း က ၎င်း တို့က ကန့်ကွက်ခဲ့ကြောင်း သိရသည်။

မြန်မာနိုင်ငံ ကို တန်းတူ သော ဖက်ဒရယ် ပြည်ထောင်စု အမြင် တည်ဆောက်သွားနိုင်ရေး၊ နိုင်ငံတော် ကြီး တခုလုံး တပြေးညီ ဖွံ့ဖြိုး တိုးတက်စေရေး ကောင်းမွန်ပြီး အထူးသဖြင့် လက်ရှိ ၂၀၀၈ ဖွဲ့စည်းပုံ အခြေခံ ဥပဒေ ကို လက်တွေ့ ပကတိ အခြေအနေ နှင့်ကိုက်ညီမည့် အနေအထား သို့ ရောက်ရှိလာအောင် ပြင်ဆင်သွားနိုင်ရေး သည် ပြည်သူ တရပ်လုံး ၏ မျှော်လင့်ချက်များ ဖြစ်သည် ဟု စိုင်းခမ်းဦး က ပြောသည်။

တန်းတူညီမျှသည့် ဖက်ဒရယ် ဒီမိုကရေစီ စံနှုန်းများ နှင့် ကိုက်ညီသည့် ဖွဲ့စည်းပုံ အခြေခံ ဥပဒေ တရပ် ပေါ်ထွန်းလာရေးသည် လည်း တိုင်းရင်းသားများ ၏ မျှော်လင့်ချက်ဖြစ်သည်ဟု စိုင်းခမ်းဦး က ထည့်သွင်းပြောဆိုခဲ့သည်။

ဖွဲ့စည်းပုံ အခြေခံ ဥပဒေ ပြုပြင်ရေးသည် တိုင်းရင်းသားများ ၏ အမြင်တွင် ငြိမ်းချမ်းရေး ဖြစ်စဉ် နှင့် တွဲမြင်နေကြောင်း SNLD သီပေါမြို့ မဲဆန္ဒနယ် ပြည်သူ့လွှတ်တော် ကိုယ်စားလှယ် စိုင်းသန့်ဇင် ကလည်း ယမန်နေ့ ပြည်ထောင်စု လွှတ်တော် တွင် ပြောကြားခဲ့သည်။

“ အစီရင်ခံစာ ပြင်ဆင်ချက်တွေ များနေရခြင်း က သမိုင်း အဆက်ဆက် တာဝန်ရှိတဲ့ တိုင်းရင်းသားတွေ အတွက် ဆက်လက်ပြီး တာဝန်ထမ်းဆောင် ကြရမှာ ဖြစ်ပါတယ်။ အနာဂတ်ပြည်ထောင်စု ကြီးကို ရဲရဲကြီး ပုံဖော် တည်ဆောက် ကြရမယ့် အချိန် အခါလည်း ဖြစ်ပါတယ်။ အရင်ခေတ်တွေလို စိုးရိမ်စိတ်များစွာ နဲ့ ဆက်လက်ပြီး ခရီးမဆက်ချင်ပါဘူး။ ကျနော် တို့တိုင်းရင်းသားတွေ အနေနဲ့ အိပ်မက်ဆိုးတွေ ဆက်မမက်ချင်တော့ဘူး” ဟု စိုင်းသန့်ဇင် ကဆိုသည်။

ဖွဲ့စည်းပုံ အခြေခံ ဥပဒေ ပြင်ဆင်ရေး ပူးပေါင်း ကော်မတီ အစီရင်ခံစားကို တပ်မတော်သားလွှတ်တော် ကိုယ်စားလှယ်များ မဆွေးနွေးလျှင် အချိန်ကုန်သက်သာ မည်ဟုလည်း အမျိုးသား ဒီမိုကရေစီ အဖွဲ့ချုပ်(NLD) အမတ် ဦးအောင်ကြည်ညွှန့် က မီဒီယာများကို ယမန်နေ့တွင် ပြောဆိုလိုက်သည်။

၂၀၀၈ ဖွဲ့စည်းပုံ အခြေခံ ဥပဒေ ပြင်ဆင်ရေး လုပ်ငန်းစဉ် တရပ် အောင်မြင်ဖြစ်ထွန်း လာစေဖို့ အတွက် ပြည်ထောင်စုလွှတ်တော် အတွင်း ရှိသည့် တပ်မတော်သား လွှတ်တော် ကိုယ်စားလှယ်များနှင့်တကွ အဓိက ကျသည့် အင်အားစု များ အနေဖြင့် ပြည်သူ့ မျက်နှာကို ရှေ့ရှုပြီး ပြည်သူ တရပ်လုံး ၏ အကျိုးစီးပွားအတွက် ပြည်သူလူထု ဖက်မှ ရပ်တည် ကာ စိတ်ကောင်းစေတနာများဖြင့် တိုင်ပင်ညှိနှိုင်း ပူးပေါင်းဆောင်ရွက်ပေးကြရန် စိုင်းခမ်းဦး က တိုက်တွန်း ပြောဆိုခဲ့သည်။

၂၀၀၈ ဖွဲ့စည်းပုံ အခြေခံ ဥပဒေ ပြင်ဆင်ရေး အစီရင်ခံစာ ၏ အကြံပြုချက် ၃၇၆၅ ချက် ရှိသည့် အနက် သျှမ်းတိုင်းရင်းသား များ ဒီမိုကရေစီ အဖွဲ့ချုပ် (SNLD) မှ ၁၁၁၂ ချက် ပြင်ဆင်ရန် အကြံပြုချက် အများဆုံးပေးခဲ့ကြောင်းသိရသည်။

Panglong(Burmese)
https://www.facebook.com/ShanNewsBurmese

တရုတ်ပြည် မှ ပြန်လာသည့် ကျောက်မဲသူတဦး နမ့်ခမ်းမြို့ မြစ်ဆိပ်တွင်သေဆုံး


ဇူလိုင်လ ၃၁ ရက် ၂၀၁၉

သျှမ်းပြည်နယ်မြောက်ပိုင်း နမ့်ခမ်းမြို့နယ် တရုတ်နယ်စပ် ကွန်ဟိုင်းရွာ နှင့် နောင်ခမ်းရွာ လမ်းကြား မြစ်ဆိပ်ဘေးတွင် တရုတ်ပြည်မှပြန်လာသည့် အမျိုးသမီးတဦး၏ အလောင်းကို ရွာသားများတွေ့ရှိကြောင်းသိရသည်။

ဇူလိုင် ၃၀ ရက်နေ့ကတွေ့ရသော အမျိုးသမီး၏ အလောင်းမှာ အသက် ၂၇ နှစ်ရှိ ကျောက်မဲမြို့သူ မစန္ဒာဝင်း ဆိုသူဖြစ်ကြောင်း၊ ၄င်းသည်တရုတ်နိုင်ငံ တွင် သွားရောက် အလုပ်လုပ်ကိုင် ကာ မြန်မာပြည်သို့ ပြန်လာစဉ် လမ်းတွင် သေဆုံးသွားပုံရကြောင်း မျက်မြင်ရွာသားများပြောကြားချက် အရ သိရသည်။

သေဆုံးသူ မစန္ဒာဝင်း ရုပ်အလောင်းကို မူဆယ်မြို့ ဂရုဏာ လူမှု ကူညီရေး အသင်းမှ တာဝန်ရှိသူများက ကျောက်မဲမြို့ သို့ ပို့ဆောင်ပေးခဲ့သည်။

“ မနေ့က ကျနော်တို့ကို နမ့်ခမ်း ဘက် က အကူအညီတောင်းလာလို့ မစန္ဒာဝင်း ရုပ်အလောင်းကို ညနေ ပိုင်းမှာ သွားသယ်ပါတယ်။ ညတွင်းချင်း ကျောက်မဲကို ရုပ်အလောင်း သွားပို့ပါတယ်။ ကျောက်မဲမြိ့ ရန်ကင်း ရပ်ကွက် ကပါ” ဟု မစန္ဒာဝင်း ရုပ်အလောင်းကို ပို့ဆောင်ပေးသည့် မူဆယ်မြို့ ဂရုဏာ လူမှု အသင်း မှ တာဝန်ရှိသူတဦးက သျှမ်းသံတော်ဆင့်ကို ပြောပြသည်။

တရုတ်ပြည် တွင် အလုပ်လုပ်ကိုင်ကာ အပြင်းဖျားနာပြီး နေရပ်သို့ ပြန်စဉ် သေဆုံးခဲ့သည် ဟု သိရသည်။

ယခုနှစ်ဆန်းက သျှမ်းပြည် မြောက်ပိုင်း ကျောက်မဲမြို့နယ် အတွင်း လက်နက်ကိုင် ပဋိပက္ခ များဖြစ်ပွားမှုကြောင့် မိသားစုဝမ်းရေးအတွက် ကျောက်မဲ ဒေသခံ များ သည် တရုတ်နိုင်ငံသို့ သွားရောက် အလုပ်လုပ်ကိုင်ကြကြောင်း ကျောက်မဲဒေသခံများပြောပြချက်အရ သိရသည်။

Panglong(Burmese)
https://www.facebook.com/ShanNewsBurmese
 

ရှေးဟောင်းပုဂံ UNESCO စာရင်းဝင်မှု သီတဂူဆရာတော် မိန့်ကြားချက် ဝေဖန်မှုတွေ ထွက်ပေါ်

သီတဂူဆရာတော် (ဓါတ်ပုံ - Facebook-Sitagu/Thegon Sayadaw)
ပုဂံရှေးဟောင်းယဉ်ကျေးမှုနယ်မြေကို ကုလသမဂ္ဂလက်အောက်ခံ UNESCO အဖွဲ့ကြီးက ကမ္ဘာ့အမွေအနှစ်စာရင်းမှာ ထည့်သွင်းအသိအမှတ်ပြုလိုက်တဲ့ကိစ္စကို သီတဂူဆရာတော် အရှင်ဉာဏိဿရ ရဲ့ မကြာသေးခင် ရက်ပိုင်းက တုံ့ပြန်ဟောပြောချက်တွေမှာ အချက်အလက်တွေ လွဲမှားနေတဲ့အတွက် ဝေဖန် ကန့်ကွက်မှုတွေ ပြင်းပြင်းထန်ထန် ထွက်ပေါ်ခဲ့ပါတယ်။

ပုဂံကို ကမ္ဘာ့အမွေအနှစ်အဖြစ် အသိအမှတ်ပြုတာကို လက်မခံတဲ့အကြောင်း သီတဂူဆရာတော်က ဇူလိုင်လ ၂၇ ရက်နေ့က ပြင်ဦးလွင်က တရားဟောပွဲမှာ မိန့်ကြားခဲ့ရာမှာ ဘယ်လို အချက်အလက်တွေ လွဲမှားနေသလဲဆိုတဲ့ တုန့်ပြန်ချက်တွေကို အင်ကြင်းနိုင်က စုစည်းတင်ပြထားပါတယ်။

ကုလသမဂ္ဂ ပညာရေး၊ သိပ္ပံနဲ့ ယဉ်ကျေးမှုဆိုင်ရာအဖွဲ့ဖြစ်တဲ့ UNESCO ကနေ ဇူလိုင်လ က ပုဂံရှေးဟောင်းနယ်မြေကို ကမ္ဘာ့အမွေအနှစ်စာရင်းထဲ ထည့်သွင်းကြေညာခဲ့တာကို မြန်မာပြည်သူအများစုက ဂုဏ်ယူနေချိန်မှာ သီတဂူဆရာတော်က သူ့အနေနဲ့ ဒီလို ကမ္ဘာ့အမွေအနှစ်စာရင်းထဲ ထည့်လိုက်တာကို လက်မခံကြောင်း ဇူလိုင်လ ၂၇ ရက်နေ့၊ ပြင်ဦးလွင်မြို့ အောင်ချမ်းသာကျောင်းတိုက် တရားပွဲမှာ မိန့်ကြားခဲ့တာပါ။

ဒီလို လက်မခံရတဲ့ အကြောင်းရင်းထဲမှာ UNESCO ကို OIC အစ္စလာမ်မစ် နိုင်ငံများ ပူးပေါင်းဆောင်ရွက်ရေးအဖွဲ့က အဓိက ထောက်ပံ့နေတဲ့ အဖွဲ့ဖြစ်နေတယ်ဆိုတဲ့ အချက်ကို ကိုးကားပြောဆိုရာမှာ အမေရိကန်ပြည်ထောင်စုက ၁၉၈၄ခုနှစ်ကတည်းက UNESCO အဖွဲ့ဝင်နိုင်ငံအဖြစ်ကနေ နုတ်ထွက်ခဲ့တာကြောင့် ရန်ပုံငွေအများအပြားလိုအပ်နေရာမှာ OIC ကထောက်ပံ့ခဲ့ပြီး UNESCO ဌာနချုပ်ရုံးကိုလည်း အီရန်နိုင်ငံနားက အဇာဘိုင်ဂျန်နိုင်ငံကို ပြောင်းရွှေ့ခဲ့တယ်လို့ မိန့်ကြားခဲ့ပါတယ်။

“ဒါဖြင့် အမေရိကန်နိုင်ငံက ရန်ပုံငွေမထည့်ရင် ခန်းခြောက်သလောက်ဖြစ်သွားတယ်။ အဲဒီတော့ ဘယ်က ၀ိုင်းထည့်သလဲဆိုတော့ ရှင်းနေတယ်… လေ့လာတဲ့ လူတိုင်းသိတယ်။ OIC က အများကြီးထည့်တယ်။ Organization of Islamic Countries အဲဒီကနေ အများကြီးထည့်တယ်။ အာရပ်လောကကြီးက အများကြီး။ ရေနံသူဌေးတွေ ၀ိုင်းထည့်တာပေါ့။ မွတ်ဆလင်တွေကြီးပဲ။ အဲဒါကြောင့် အဲဒီအသင်းရဲ့ ဌာနက ဘယ်ရောက်သွားသလဲဆိုတော့ အဇာဘိုင်ဂျန်ကို ရောက်သွားတယ်။ United Nations နယူးရောက်မဟုတ်တော့ဘူး။ အဇာဘိုင်ဂျန်ကို ရောက်သွားတယ်။”

UNESCO ရုံးဌာနချုပ်ရုံး ဟာ သီတဂူဆရာတော် ပြောသလို အဇာဘိုင်ဂျန်ကို ရွှေ့ပြောင်းခြင်းမရှိပဲ ၁၉၄၅ခုနှစ်ကတည်းကနေ အခုချိန်ထိ ပြင်သစ်နိုင်ငံ ပဲရစ်မြို့မှာပဲ ရှိနေတာပါ။ ဒါအပြင် တကယ်တမ်း အမေရိကန်ပြည်ထောင်စုအနေနဲ့ UNESCO ကနေ ၁၉၈၄ ခုနှစ် သမ္မတ ရောနယ်လ်ရေဂင်လက်ထက်မှာ နုတ်ထွက်ခဲ့တယ်ဆိုပေမဲ့ ၂၀၀၂ ခုနှစ် သမ္မတ George W. Bush လက်ထက်မှာ အဖွဲ့ဝင်နိုင်ငံပြန်ပြီးဖြစ်လာခဲ့ပြီးနောက် ၂၀၁၉ခုနှစ် ဇန်န၀ါရီလမှာ သမ္မတ Donald Trump အစိုးရကနေ UNESCO ရဲ့ ဆုံးဖြတ်ချက်တချို့ကို လက်မခံနိုင်တဲ့အတွက် အစ္စရေးနိုင်ငံနဲ့ အတူ နုတ်ထွက်ခဲ့တာဖြစ်ပါတယ်။ ဒါအပြင် အဲဒီလို နုတ်ထွက်ချိန်မှာ အမေရိကန်အနေနဲ့ UNESCO ကိုပေးရမယ့် ရံပုံငွေ အကြွေးဟာ ဒေါ်လာ သန်း ၅၀၀ ကျော် ရှိနေတာပါ။ UNESCO က တရားဝင်ထုတ်ပြန်ထားတဲ့ အဖွဲ့အတွက် ရန်ပုံငွေထည့်ဝင်တဲ့ နိုင်ငံတွေစာရင်းမှာ OIC ကို ဖေါ်ပြထားတာ မတွေ့ရပဲ ထိပ်ဆုံးနိုင်ငံတွေအဖြစ် ဂျာမနီ၊ ဂျပန်၊ ပြင်သစ်၊ ဗြိတိန်၊ ဘရာဇီး၊ တရုတ်၊ အီတလီ၊ ကနေဒါ၊ ရုရှား စတာတွေပဲ ထည့်သွင်းထားပါတယ်။

အခုလို သီတဂူဆရာတော် မိန့်ကြားချက်တွေထဲ အချက်အလက်တွေ လွဲမှားနေတဲ့အပေါ် ကနေဒါ အခြေစိုက် အပြည်ပြည်ဆိုင်ရာ မြန်မာ သံဃာတော်များ အဖွဲ့ ဥက္ကဌ ဆရာတော် အရှင်ကောဝိဒ ရဲ့တုံ့ပြန်မိန့်ကြားချက်ကတော့-

“အမေရိကန်နဲ့ အစ္စရေးက UNESCO က ထွက်သွားတယ်ဆိုတာ သူတို့အကြောင်းနဲ့ သူတို့ရှိပါလိမ့်မယ်။ အစ္စရေးမှာတော့ ထားပါတော့ သူကလည်း စစ်ဖြစ်နေတဲ့ နိုင်ငံ ဆိုတော့ သူတို့အကြောင်းနဲ့ သူတို့ရှိမှာပေါ့။ ဘာပဲဖြစ်ဖြစ် ပြောသွားတာတွေကတော့ ဘုန်းဘုန်းတို့လည်း ဒီဆရာတော်ကြီးကို ကြည်ညိုပါတယ် ဒီကိုတောင် လာသွားသေးတာပဲ။ ဒါပေမယ့်လည်း အဇာဘိုင်ဂျန် မှာလုပ်လို့ မွတ်ဆလင်ဖြစ်သွားမယ် ၊ မွတ်ဆလင်က ထောက်ပံ့တယ်ဆိုတာက မဟုတ်ပါဘူး။ အဇာဘိုင်ဂျန် က သူ့အလှည့်ကျလို့ လုပ်တာပါ။ လာမယ့်နှစ်တွေဆိုရင်လည်း သူ့အလှည့်ကြမယ့်နိုင်ငံ တရုတ်နိုင်ငံထင်တယ် အဲလို လုပ်ကြမှာပါ။ အဲဒီတော့ ဘာမှ မဆိုင်ပါဘူး။ အဲဒါတွေကတော့ ဘုန်းဘုန်းတို့အနေနဲ့ကတော့ အဲဒီပြောသွားတဲ့ အချက်အလက်တွေကတော့ ဆရာတော်ကြီး ဘာဖြစ်လို့ ပြောသွားတာလည်း မသိဘူးလို့ ။ ပညာရှိ သတိဖြစ်ခဲ ဖြစ်သွားသလားမသိဘူး အဲလိုပဲ သုံးသပ်မိပါတယ်။”

လူအများကိုးကွယ်ဆည်းကပ်ကိုးကွယ်မှုကို ခံရတဲ့ သံဃာတော်တပါးအနေနဲ့ ကမ္ဘာ့ရေးရာ၊ နိုင်ငံရေးရာ ကိစ္စတွေမှာ အချက်အလက်တွေ လွဲမှားပြောဆိုတာဟာ အတော်ဆိုးရွားတဲ့ လုပ်ရပ်ဖြစ်ကြောင်း ဗြိတိန် အခြေစိုက် မြန်မာ့သမိုင်းပညာရှင် ဒေါက်တာအောင်ခင်က သုံးသပ်ပါတယ်။

“မြန်မာပြည်မှာ ကုလသမဂ္ဂက ကူထားတာတွေက အများကြီးရှိတာကြီး UNESCO ပုဂံတင်မကဘူး။ ကျန်တဲ့ UNICEF ၊ WHO အများကြီးရှိတယ် လုပ်တာက မရေမတွက်နိုင်တာ။ ဒါလေးတခုတည်းကို ကြည့်ပြီးတော့ ကုလသမဂ္ဂက အဖွဲ့အစည်းကို ရှုံ့ချတယ်ဆိုရင် အင်မတန်သေးသိမ်တဲ့ ကိစ္စပဲ။ နောက်တခုက မြန်မာပြည်မှာ ဘုန်းကြီးတွေက နေရာတကာမှာ ပါနေတယ်။ ကုလသမဂ္ဂ အကြောင်းလည်း ပါမယ် အကုန်ပါမယ်ဆိုတော့ မြန်မာပြည်ရဲ့ ပြဿနာက ဘုန်းကြီးကို ပြန်ပြောခွင့်မရှိဘူး။ အနောက်နိုင်ငံမှာ ဘုန်းကြီးက ဒီလိုပြောတယ်ဆိုရင် သတင်းစာတွေမှာ ၀ိုင်းပြီးတော့ ပြောမယ် မဟုတ်ရင် မဟုတ်သလို။ မြန်မာပြည်မှာက အဲလို ဘုန်းကြီး မဟုတ်တာပြောတယ်ဆိုတာကို ပြန်ပြောမယ့် လူတွေရှိဖို့ လိုတယ် အဲဒါမဟုတ်ပဲနဲ့ ဘုန်းကြီးပြောသမျှ တဖက်သက်ကြီးပဲ ခံနေလို့ရှိရင်တော့ အမြင်မှန်တော့ရမှာမဟုတ်ဘူး။”

UNESCO လိုအဖွဲ့ကြီးရဲ့ ကမ္ဘာ့အမွေအနှစ်စာရင်းမှာ ပုဂံကို ထည့်သွင်းဖေါ်ပြထား တဲ့အတွက် အကျိုးရလာဒ်တွေရှိနေတဲ့ အကြောင်းကို အရှင်ကောဝိဒက အခုလို မိန့်ကြားပါတယ်။

“UNESCO အသိအမှတ်ပြုခံရဖို့ ကြိုးစားနေတာ တော်တော်ကြာပြီလေ။ အရင်ကလည်း ဦးသိန်းစိန်အစိုးရ လက်ထက်တုန်းကလည်း တခါကြိုးစားခဲ့ဖူးတယ်။ နောက် သူတို့ မကြေနပ်တာနဲ့ အသိအမှတ်ပြုမခံခဲ့ရဘူး။ အခုတခါ ပြန်ကြိုးစားတော့ ရလာတယ်။ ရလာတော့ ဘုန်းဘုန်းတို့ အကုန်လုံးရော ၀မ်းသာနေကြတယ်။ ဒီလို ကမ္ဘာ့ Heritage အသိအမှတ်ပြုခံရတယ်ဆိုရင် အဲဒီအဖွဲ့အစည်းကြီးရဲ့ ကူညီထောက်ပံမှုကိုခံရမယ်လေ။”

မြန်မာ့ ရှေးဟောင်းယဉ်ကျေးမှုအမွေအနှစ်တွေထဲ UNESCO က ကမ္ဘာ့အမွေအနှစ်အဖြစ် အသိအမှတ်ပြုခဲ့တဲ့အထဲမှာ ပုဂံရှေးဟောင်းနယ်မြေအပြင် လွန်ခဲ့တဲ့နှစ်ပေါင်း ၂,၀၀၀ ကျော်က ပေါ်ပေါက်ခဲ့တဲ့ ရှေးဟောင်းပျုမြို့သုံး မြို့ကို ကမ္ဘာ့ယဉ်ကျေးမှုအမွေအနှစ် မြို့ကြီးတွေအဖြစ် ၂၀၁၄ခုနှစ်က ကာတာနိုင်ငံ ဒိုဟာမြို့မှာ ကျင်းပခဲ့တဲ့ UNESCO ရဲ့ (၃၈)ကြိမ်မြောက် ညီလာခံအတွင်း ကြေညာခဲ့ပါတယ်။

အင်ကြင်းနုိုင်/ ဗွီအိုအေ (မြန်မာပိုင်း)
https://burmese.voanews.com

ကလေးစစ်သားအသုံးပြုစဲ နိုင်ငံတွေထဲ မြန်မာ ပါဝင်


၂၀၁၈ ခုနှစ်အတွက် ကမ္ဘာတဝှမ်း လက်နက်ကိုင်ပဋိပက္ခတွင်း ကလေးစစ်သား အသုံးပြုမှုဆိုင်ရာ အစီရင်ခံစာအရ ကလေးငယ်ပေါင်း တသောင်းကျော် သေဆုံး ဒါမှမဟုတ် ထိခိုက်မှု ရှိနေတယ် ဆိုတာသိရတဲ့အတွက် အထူးတုန်လှုပ်မိကြောင်း ကုလသမဂ္ဂအတွင်းရေးမှူးချုပ် António Guterres က ပြောကြားလိုက်ပါတယ်။

မြန်မာနိုင်ငံမှာတော့ တပ်မတော်ကရော တိုင်းရင်းသား လက်နက်ကိုင်အဖွဲ့တွေကပါ ကလေးစစ်သား စုဆောင်းမှုတွေ ရှိနေကြောင်း အစီရင်ခံစာမှာ ဖေါ်ပြထားပါတယ်။ မြန်မာနိုင်ငံမှာ တိုက်ပွဲတွေ ဆက်ရှိနေသမျှ ကလေးစစ်သား အသုံးပြုမှုဆက်ရှိနေမှာ ဖြစ်တဲ့အတွက် လက်နက်ကိုင် ပဋိပက္ခတွေ အမြန်ချုပ်ငြိမ်းအောင် လုပ်ဖို့ လိုအပ်တယ်လို့ အာရှလူ့အခွင့်ရေးအဖွဲ့က ပြောပါတယ်။ အပြည့်အစုံကို ဒေါ်ခင်မျိုးသက်က ပြောပြပေးမှာပါ။

၂၀၁၈ ဇန်နဝါရီလကနေ ဒီဇင်ဘာလအတွင်း ပဋိပက္ခတွင်း ကလေးစစ်သားအသုံးပြုမှု အတွက် ကုလသမဂ္ဂက ကောက်ယူခဲ့တဲ့စစ်တမ်း ကနေ အစီခံစာ ထုတ်ပြန်လိုက်တာ ဖြစ်ပြီး ဒီအစီရင်ခံစာက အတွင်းရေးမှူးချုပ်ကို အထူးတုန်လှုပ်စေခဲ့တယ်လို့ အတွင်းရေးမှူးချုပ်ရုံး လက်ထောက် ပြောခွင့်ရ Farhan Haq က ဇူလိုင်လ ၃၀ အင်္ဂါနေ့သတင်းစာရှင်းလင်းပွဲမှာ ပြောပါတယ်။

“ဒီအစီရင်ခံစာနဲ့ ပတ်သက်ပြီး အတွင်းရေးမှူးချုပ်ကို အထူးတုန်လှုပ်စေတာကတော့ မနှစ်က နိုင်ငံပေါင်း ၂၀ မှာ လက်နက်ကိုင်ပဋိပက္ခတွင်း ကလေးစစ်သား အသုံးပြုမှုကြောင့် ကလေးသူငယ် သေဆုံး ဒါမှမဟုတ် ထိခိုက်ဒဏ်ရာရမှု အရေအတွက်က ယောင်္ကျားလေးနဲ့ မိန်းကလေး စုစုပေါင်း ၁၂၀၀၀ ကျော် အထိဖြစ်သွားပြီး ဒါဟာ မကြုံစဖူး သိပ်ကိုများနေတာကြောင့်ပါ။”

ဒါကြောင့် တိုက်ပွဲတွေဖြစ်နေတဲ့ လက်နက်ကိုင် အဖွဲ့အစည်းအားလုံး အနေနဲ့ ကုလသမဂ္ဂနဲ့ လက်တွဲ ဆောင်ရွက်ကြဖို့နဲ့ ကလေးသူငယ်တွေကို ကာကွယ်ဖို့ တာဝန်ရှိတယ်ဆိုတာ မမေ့ကြဖို့ လည်း တိုက်တွန်းလိုက်ပါတယ်။

ကမ္ဘာတဝှမ်း လက်နက်ကိုင်တိုင်ပွဲတွေအတွင်း ကလေးစစ်သားအသုံးပြုတဲ့ ဆိုးဝါးတဲ့ နိုင်ငံတွေထဲမှာ ဆိုမာလီယာ၊ ယီမင်၊ ဆီးရီးယား၊ အာဖဂန်နစ်စတန်နဲ့ တောင်ဆူဒန်တို့ပါ ပါဝင်ပြီး မြန်မာနိုင်ငံမှာလည်း ကလေးစစ်သား အသုံးပြုမှုတွေ ရှိနေတယ်လို့ အစီရင်ခံစာမှာ ဖေါ်ပြထားပါတယ်။

ကလေးစစ်သား အသုံးပြုနေတဲ့ နိုင်ငံတွေ အနေနဲ့ ကုလသမဂ္ဂနဲ့ ပူးပေါင်းဆောင်ရွက်ကြဖို့ ကုလအတွင်းရေးမှူးချုပ်ရဲ့ ပဋိပက္ခတွင်း ကလေးစစ်သား အသုံးပြုမှုဆိုင်ရာ အထူးကိုယ်စားလှယ် Virginia Gamba က ပြောပါတယ်။

"ပြီးခဲ့တဲ့နှစ်က ငြိမ်းချမ်းရေး သဘောတူညီမှုတွေ ၊ ငြိမ်းချမ်းရေး ဆွေးနွေးပွဲတွေကို စံချိန်ချိုး ကျင်းပခဲ့ပါတယ်။ ယီမင်၊ မြန်မာ၊ တောင်ဆူဒန် စသဖြင့်တို့မှာ ပြုလုပ်ခဲ့ကြတာပါ။ကလေးတွေကို အကာအကွယ်ပေးဖို့ ကျမတို့ ဆောင်ရွက်နေကြသူတွေအနေနဲ့ လက်နက်ကိုင် တပ်ဖွဲ့တွေနဲ့ ဆွေးနွေးကြဖို့ ကျမတို့ အနေနဲ့ Joint Action Plan ပူးတွဲအရေးယူတဲ့အစီအစဉ် သဘောတူ လက်မှတ်ရေးထိုးဖို့ နားချနိုင်ခြင်းအားဖြင့် အပြန်အလှန် ယုံကြည်မှု တိုးလာပြီး ကလေးတွေ ပြန်လွတ်မြောက်လာစေဖို့ ကိုလည်း အထောက်အကူပြုပါတယ်။ ဒါကြောင့် Joint Action Plan လုပ်ခြင်းအားဖြင့် ကလေးစစ်သားတွေ ပြန်လွတ်လာတာ တွေ့ရပါတယ်။”

အခုထုတ်ပြန်လိုက်တဲ့ ကလေးသူငယ်များနဲ့ လက်နက်ကိုင်ပဋိပက္ခဆိုင်ရာ ကုလသမဂ္ဂ အတွင်းရေးမှူးချုပ် ရဲ့ အစီရင်ခံစာထဲမှာ မြန်မာနိုင်ငံနဲ့ ပတ်သက်ပြီး ကလေးစစ်သားတွေကို စုဆောင်း အသုံးပြုနေတာနဲ့ အထူးသဖြင့် မြေမြှုပ်မိုင်းတွေ၊ စစ်ပွဲအကြွင်းအကျန် ပေါက်ကွဲ စေတဲ့ပစ္စည်းတွေနဲ့ လက်လုပ် ဖောက်ခွဲရေးပစ္စည်းတွေကြောင့် ကလေးတွေ ထိခိုက်ဒဏ်ရာရ နေတဲ့အပေါ် အထူး စိုးရိမ်ကြောင်း ဖေါ်ပြထားပါတယ်။ ဒါ့အပြင် ဘက်အားလုံးက ကျူးလွန်တဲ့ ဆိုးရွားတဲ့ ချိုးဖောက်မှု တွေကို ပြစ်တင်ရှုတ်ချတဲ့အကြောင်းလည်း ဖော်ပြထားပါတယ်။

ဆိုးရွားတဲ့ချိုးဖောက်မှုတွေအဖြစ် ဖော်ပြထားတဲ့ထဲမှာ ၂၀၁၈ ခုနှစ်အတွင်း တပ်မတော်က ကလေး ၇ ယောက်ကို စစ်သားအဖြစ် စုဆောင်းခဲ့ပြီး၊ ၆၄ ယောက်ကို စစ်သားတွေအဖြစ် အသုံးပြုနေခဲ့တဲ့ အကြောင်းနဲ့ အရင်တုန်းက ကလေးစစ်သား ၂၆ ယောက် စုဆောင်း ခဲ့တာကို ၂၀၁၈ ခုနှစ်မှာ အတည်ပြုနိုင်ခဲ့တယ် လို့လည်းဆိုပါတယ်။

လူမျိုးစုလက်နက်ကိုင်တပ်ဖွဲ့တွေက ကလေးစစ်သားစုဆောင်းတဲ့ဖြစ်ရပ် ၁၁ ခုရှိခဲ့ပြီး ယောက်ျားလေး ၁၄ ယောက်၊ မိန်းကလေး ၃ ယောက်၊ စုစုပေါင်း ၁၇ ယောက်ကို ကလေးစစ်သားအဖြစ် အသုံးပြုနေတာ တွေ့ရတယ်လို့လည်း ဖော်ပြထားပါတယ်။ ကလေး စစ်သားစုဆောင်းတဲ့ ဖြစ်ရပ်တွေထဲက ၉ ခုကို ကချင်လွတ်မြောက်ရေးတပ်မတော် KIA ကလုပ်ခဲ့တာဖြစ်ကြောင်းနဲ့ တအာန်း အမျိုးသား လွတ်မြောက်ရေးတပ် TNLA က ၁ ခု၊ ကရင်အမျိုးသား လွတ်မြောက်ရေးတပ် KNLA က တခု လုပ်ခဲ့တာလို့ ဖော်ပြ ထားပါတယ်။ ဒါ့အပြင် ညီညွတ်သော ဝပြည် တပ်မတော် UWSA ပါဝင်ပတ်သက်တဲ့ ကလေးစစ်သားစုဆောင်းမှုဖြစ်ရပ် နှစ်ခုရှိတာကို မှတ်တမ်းတင်ထားတယ်လို့လည်း အစီရင်ခံစာမှာ ဖော်ပြထားပါတယ်။

အတွင်းရေးမှူးချုပ်ရဲ့ အထူးကိုယ်စားလှယ် Virginia Gamba ဟာ မနှစ်က ၂၀၁၈ မေလထဲမှာ မြန်မာနိုင်ငံကို ၂ ရက်ကြသွားရောက်ပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ရော တပ်မတော်က ဒုတိယဗိုလ်ချုပ်မှူးကြီး စိုးဝင်းနဲ့ပါ တွေ့ဆုံခဲ့တာပါ။

အစိုးရအနေနဲ့ မြန်မာနိုင်ငံမှာ ကလေးစစ်သားစုဆောင်းမှု မရှိအောင်ကာကွယ်ဖို့နဲ့ အဆုံးသတ်စေဖို့ ကုလသမဂ္ဂနဲ့ ၂၀၁၂ ခုနှစ်တုန်းက လက်မှတ်ရေးထိုးခဲ့တဲ့ ပူးတွဲလုပ်ငန်းအစီအစဉ်ကို အကောင်ထည် ဖေါ်ဖို့ အပြင် ကလေးသူငယ် အခွင့်အရေးဆိုင်ရာ ဥပဒေပြဌာန်းရေးကို ဦးစားပေး လုပ်ဆောင်ဖို့လည်း သူ့ရဲ့ ခရီးစဉ်အတွင်း တိုက်တွန်းခဲ့တယ်လို့ အစီရင်ခံစာမှာ ဖေါ်ပြထားပါတယ်။

မြန်မာနိုင်ငံမှာ တိုက်ပွဲတွေ ဆက်ရှိနေသမျှ ကလေးစစ်သား အသုံးပြုမှုဆက်ရှိနေမှာ ဖြစ်တဲ့အတွက် လက်နက်ကိုင် ပဋိပက္ခတွေ အမြန်ချုပ်ငြိမ်းအောင် လုပ်ဖို့ လိုအပ်တယ်လို့ အာရှလူ့အခွင့်ရေးအဖွဲ့က ရှေ့နေဦးမင်းလွင်ဦးက ပြောပါတယ်။

" ကလေးစစ်သားတွေ မစုဆောင်းနိုင်အောင် ပြည်တွင်းစစ် အမြန်ရပ်စဲဖို့ လိုတာပေါ့နော်။ ပြည်တွင်းစစ် မငြိမ်းချမ်းသေးလို့သာ ကလေးစစ်သားတွေ ပေါ်ပေါက်နေရတာဖြစ်တယ်။ ပြည်တွင်းစစ် ဖြစ်တဲ့အခါမှာ တိုင်းရင်းသားနယ်မြေတွေမှာ တိုင်းရင်းသားတွေဘက်ကလည်း မိဘတွေ ဆုံးပါးသွားတာတွေရှိတယ်။ နောက်ပိုင်းကျတော့ လက်နက်ကိုင်အဖွဲ့အစည်းတွေနဲ့ နီးစပ်တဲ့အခါကျတော့ ကလေးတွေကိုယ်တိုင်က လက်နက်တွေနဲ့ ယဉ်ပါးပြီးတော့ စစ်သားတွေအဖြစ် တိုင်းရင်းသား အဖွဲ့အစည်းတွေမှာတော့ စုဆောင်းယူတာတွေ ကျနော်တို့ တွေ့ရတယ်။ တပ်မတော်မှာကျတော့ ထိုနည်းတူစွာပဲ တိုက်ပွဲတွေဖြစ်ပွားတဲ့အခါမှာ ကျန်ရစ်ခဲ့တဲ့ ကလေးတွေကို စောင့်ရှောက်ထိန်းသိမ်းရာကနေပြီးမှ လူငယ်တွေအတွက် သင်တန်းတွေပေးရင်းကနေပြီးတော့ အခုအချိန်အထိ တပ်မတော်ထဲမှာလည်း ရှိနေတယ်။”

မြန်မာနိုင်ငံမှာ တပ်မတော်နဲ့ လက်နက်ကိုင်အဖွဲ့တွေကြား တိုက်ပွဲတွေ ဆက်ဖြစ်နေသလို ရှမ်း၊ ကချင်နဲ့ ရခိုင်ပြည်နယ်တွေ မှာတော့ တိုင်းရင်းသား လက်နက်ကိုင်အချင်းချင်းကြား တိုက်ပွဲတွေ ဆက်လက်ဖြစ်ပွားနေတာ တွေ့ရကြောင်း အစီရင်ခံစာမှာ ဖေါ်ပြထားပါတယ်။

ရခိုင်နဲ့ ချင်းပြည်နယ်တွေအတွင်း တပ်မတော်နဲ့ AA ရခိုင်လက်နက်ကိုင်တွေကြား ၂၀၁၈ နှစ်မကုန်ခင်ကစပြီး ခုချိန်ထိ တိုက်ပွဲတွေ ဖြစ်ပွားနေသလို ARSA ရိုဟင်ဂျာလက်နက်ကိုင် အဖွဲ့ကလည်း တပ်မတော်နဲ့ နယ်ခြားစောင့်တပ်တွေကို ဝင်ရောက်တိုက်ခိုက်မှုတွေ ရှိနေကြောင်း လည်း အစီရင်ခံစာမှာ ဖေါ်ပြထားပါတယ်။

ဒေါ်ခင်မျိုးသက်/ ဗွီအိုအေ (မြန်မာပိုင်း)
https://burmese.voanews.com

DVB သတင်းထောက် ခွန်ဇော်ဦးကို အာမခံပေး

DVB သတင်းထောက် ခွန်ဇော်ဦး ကို တွေ့ရစဉ်
လိုင်စင်မဲ့ ကားစီးလို့ဆိုပြီး အမှုရင်ဆိုင်နေရတဲ့ DVB သတင်းထောက် ခွန်ဇော်ဦးကို လားရှိုးမြို့နယ်တရားရုံးက ဒီကနေ့ အာမခံနဲ့ ပြန်လွှတ်ပေးလိုက်ပါတယ်။

ဂုဏ်သိက္ခာရှိ လူပုဂ္ဂိုလ်နှစ်ဦးက အာမခံပေးတာ၊ ခွန်ဇော်ဦးအနေနဲ့ အများပြည်သူနဲ့ သက်ဆိုင်တဲ့ လုပ်ငန်းဆောင် ရွက်နေတဲ့ ဂုဏ်သိက္ခာကို ငဲ့ကွက်တာ၊ မှုခင်းကျဆင်းရေးနဲ့ အချုပ်သားလျော့ပါးရေး စီမံချက်တို့ကြောင့် အာမခံနဲ့ ပြန်လွှတ်ပေးလိုက်တာလို့ သိရပါတယ်။

လားရှိုးမြို့က အလုပ်သမား ၁၅ ယောက်ဟာ ၂၀၁၈ ခုနစ် အောက်တိုဘာလက Gold Luck Water Park ရေပန်းဥယျာဉ် ကစားကွင်းမှာ ဆေးသုတ်ဖို့အတွက် အလုပ်ရှင်နဲ့ စာချုပ်ချုပ်ဆို လုပ်ကိုင်ခဲ့ကြပေမယ့် စာချုပ်ထဲမှာ မပါတာတွေကိုလည်း လုပ်ကိုင်ပေးခဲ့ရပြီး အဲဒီအတွက် လုပ်အားခငွေကျပ် ၁၃၄ သိန်းရရှိဖို့ ကျန်နေတယ်ဆိုတဲ့ သတင်းနဲ့ပတ်သက်လို့ သတင်းထောက် ခွန်ဇော်ဦးဟာ လုပ်ငန်းရှင် ဦးရဲနိုင် ကို သတင်းမေးမြန်းဖို့သွားရာမှာ လိုင်စင်မဲ့ကားစီးလို့ဆိုပြီး အဲဒီလုပ်ငန်းရှင်က တိုင်ကြားတာဖြစ်ပါတယ်။

လုပ်ငန်းရှင် ဦးရဲနိုင်က သူ့ခြံထဲအရောက်မှာ တံခါးပိတ် ခြိမ်းခြောက်ခဲ့တယ်ဆိုပြီးလည်း DVB သတင်းထောက် ခွန်ဇော်ဦးက လားရှိုးမြို့ အမှတ်၁ ရဲစခန်းမှာ ပြန်လည်တိုင်ကြားခဲ့ပါတယ်။

အဲဒီတိုင်ကြားမှုကြောင့် ဦးရဲနိုင်ကို စခန်းမှာ ခေါ်ယူစစ်ဆေးပြီး ခံဝန်နဲ့ ပြန်လွှတ်ပေးထားတယ်လို့ လားရှိုးမြို့ အမှတ် ၁ ရဲစခန်းက ဒုရဲမှူးမြင့်ကျော် က ပြောပါတယ်။

RFA Burmese
https://www.rfa.org

ရုရှားက အင်စတာဂရမ် နာမည်ကျော် အီကာတရီးနား ကာရာဂလာနိုဗာအလောင်းကို ခရီးဆောင်အိတ်ထဲတွေ့

ဆရာဝန်ပေါက်စ အီကာတရီးနား ကာရာဂလာနိုဗာဟာ လူမှုကွန်ရက်မှာ ကျော်ကြားသူဖြစ်
အင်စတာဂရမ်ဝက်ဆိုက်မှာ ပုံတွေ ဗီဒီယိုတွေတင်တဲ့ ရုရှားက နာမည်ကြီး အမျိုးသမီးတယောက် အလောင်းကို မော်စကိုက သူငှားထားတဲ့ တိုက်ခန်းမှာ ဓားဒဏ်ရာတွေနဲ့ တွေ့ခဲ့ရတယ်လို့ ရဲက ပြောပါတယ်။ ခရီးဆောင်သေတ္တာထဲမှာ တွေ့ခဲ့ရတာပါ။

၂၄ နှစ် အရွယ် အီကာတရီးနားကာရာဂလာနိုဗာ သူတို့နဲ့ အဆက်အသွယ်မလုပ်တာ ရက်တွေနဲ့ချီ ရှိနေတာကို သတိထားမိတဲ့ သူ့မိဘတွေက သောကြာနေ့ကမှ သူ့အလောင်းကို တွေ့ခဲ့တာ ဖြစ်ပါတယ်။

သူ့က အင်စတာဂရမ်မှာ နောက်လိုက် ၈၅ဝဝဝ ကျော် ရှိပြီး ဆေးကျောင်းပြီးစ ဆရာဝန်တယောက်လည်း ဖြစ်ပါတယ်။

ဒီအမှုမှာ မနာလိုမှု အရင်းခံပြီး သတ်ဖြတ်တာ ဖြစ်နိုင်တယ်လို့ ရဲက ပြောဆိုပါတယ်။

ကာရာဂလာနိုဗာဟာ မကြာခင်ကမှ ရည်းစားသစ်တယောက် ရခဲ့ပြီး ဇူလိုင် ၃ဝ ရက်ကျရောက်တဲ့ သူ့မွေးနေ့ကို နယ်သာလန်မှာ ဆင်နွှဲဖို့ ပြင်ဆင်ခဲ့တယ်လို့ ရုရှားသတင်းစာတစောင်က ရေးပါတယ်။

katti_loves_life/Instagram
နောက် ခရီးမထွက်ခင်ရက်ပိုင်းမှာ သမီးနဲ့ အဆက်အသွယ်လုပ်ဖို့ ကြိုးစားတာ မရဖြစ်နေတဲ့ မိဘတွေက စိတ်ပူလာခဲ့ကြပြီး သမီး အခန်းပိုင်ရှင်ကို အခန်းထဲ ဝင်ကြည့်ခွင့်ပေးဖို့ တောင်းဆိုခဲ့ကြပါတယ်။

အဲဒီမှာ အခန်းကူးတဲ့ လမ်းကြားထဲ သမီးအလောင်းထည့်ထားတဲ့ ခရီးဆောင် သေတ္တာကို တွေ့ခဲ့ကြတာပါ။ ဖခင်ဖြစ်သူက လူနာတင်ကား ခေါ်ခဲ့ပေမယ့် ကာရာဂလာနိုဗာဟာ လည်ပင်းလှီးခံရတဲ့ ဒဏ်ရာနဲ့ သေဆုံးခဲ့ပြီဖြစ်တယ်လို့ သိရပါတယ်။

သူ့တိုက်ခန်းထဲမှာ ရုန်းရင်းဆန်ခတ် ဖြစ်ထားတဲ့ သက်သေအထောက်အထား မတွေ့ရဘူးလို့လည်း ရဲက ဆိုပါတယ်။ အခင်းဖြစ်ရာ နေရာမှာ လက်နက်ရယ်လို့လည်း မတွေ့ရဘူးလို့ MK ဆိုတဲ့ ရုရှားသတင်းစာက ရေးပါတယ်။

ဒီအမျိုးသမီး ပျောက်သွားတဲ့ ရက်ပိုင်းလောက်က သူ့ရည်းစားဟောင်း အမျိုးသားတယောက် သူ့အခန်းကို ခဏလာတဲ့ပုံရိပ်တွေကို စီစီတီဗီ ရုပ်သံကနေ ဖမ်းယူမိခဲ့တာကိုလည်း ပြခဲ့ပါတယ်။ ဒါကို ဆက်ပြီး စုံစမ်းတယ်လို့တော့ မသိရပါဘူး။

ကာရာဂလာနိုဗာဟာ သူ့ပုံတွေကို အင်စတာဂရမ်မှာ ပုံမှန်တင်လေ့ရှိပါတယ်။ သူ့မျက်နှာက ခေတ်ဟောင်း မင်းသမီးကြီး အော်ဒရေဟပ်ဘန်းနဲ့ တူတယ်ဆိုပြီး သူ့ပရိသတ်တွေက သဘောကျကြပါတယ်။

မတ်လက သူတင်ခဲ့တဲ့ ပို့စ်တခုမှာတော့ သူ့တိုက်ခန်းကို ပြန်ပြီး မွမ်းမံမယ့်အကြောင်း၊ နိုင်ငံခြား ခရီးတွေ သွားမယ့်အကြောင်း ရေးထားပါ တယ်။ ပြီးတော့ အခုမပြောသေးတဲ့ အရေးကြီးကိစ္စတခု စဉ်းစားနေတာ ရှိတယ်လို့လည်း သူကဆိုပါတယ်။

katti_loves_life katti_loves_life
သူတင်တဲ့ပို့စ်တွေမှာ ဥရောပတလွှား သူသွားခဲ့တဲ့ နိုင်ငံစုံက မြင်ကွင်းတွေလည်း တွေ့ရပါတယ်။

သူနောက်ဆုံးတင်ခဲ့တဲ့ ပို့စ်မှာတော့ ဂရိနိုင်ငံ ကော်ဖူးကျွန်းမှာ ရိုက်ထားတဲ့ပုံနဲ့အတူ ခရီးခဏခဏ သွားချင်ပေမယ့် တနိုင်ငံမှာ ၃ ရက်၊ ၅ ရက်ထက် ကျော်ပြီး မနေတတ်ဘူးလို့ သူက ရေးခဲ့ပါတယ်။

သူ့ရဲ့ အင်စတာဂရမ် စာမျက်နှာအပြင် ကာရာဂလာနိုဗာမှာ နာမည်ကြီးတဲ့ ခရီးသွားဘလောက်တခုလည်း ရှိပါတယ်။ အဲဒီမှာလည်း လာဖတ်သူတွေ ထောင်နဲ့ချီ ပါတယ်။

မော်စကို ဆေးတက္ကသိုလ်မှာ အလုပ်သင် ဆရာဝန် ဆင်းခဲ့ပြီးနောက် အရေပြားအထူးကု ဆရာဝန်အဖြစ် အသက်မွေးနေတာ ဖြစ်ပါတယ်။

BBC Burmese
https://www.bbc.com

ကိုအောင်ကိုထွေးအစ်မနဲ့ ၀န်းရံသူ နှစ်ဦး အမှု

ကိုအောင်ကိုထွေးအစ်မ မနေဇာထွန်းနဲ့ ဝန်းရံသူတွေကို အချုပ်ကားပေါ်မှာ ၂၀၁၉ ဇူလိုင် ၃၀ ရက်နေ့ကတွေ့ရစဉ် / Photo: Aung Thain Kha/RFA
ကလေးစစ်သားဟောင်း ကိုအောင်ကိုထွေးရဲ့ အစ်မဖြစ်သူ မနေဇာထွန်းနဲ့ ဝန်းရံသူ နှစ်ဦး အမှုမှာ တရားလို တင်သွင်းတဲ့ သက်သေခံပစ္စည်းကို တရားစွဲဆိုခံရသူတွေဘက်က ကန့်ကွက်လိုက်ပါတယ်။

ဓာတ်ပုံနဲ့ အသံဖိုင်တွေပါဝင်တဲ့ CD တစ်ခွေကို တရားလိုဖြစ်တဲ့ ရဲမှူးချုပ်မောင်မောင်က ဒီနေ့ တရားရုံးကို တင်သွင်းခဲ့တဲ့အပေါ် ကန့်ကွက်ခဲ့တာလို့ စွပ်စွဲခံရသူတွေရဲ့ တရားလွှတ်တော် ရှေ့နေ ဦးဇော်မင်းလှိုင်က ပြောပါတယ်။ သက်သေခံတင်သွင်းတဲ့ လုပ်ထုံးလုပ်နည်းနဲ့ မညီတာကြောင့် ကန့်ကွက်ခဲ့တာလို့ ဆိုပါတယ်။

နိုင်ငံတော်အကြည်ညိုပျက်စေမှု၊ ရုန်းရင်းဆန်ခတ်ဖြစ်စေရန် ရည်ရွယ်ရန်စမှုတွေနဲ့ တရားစွဲဆိုခံထားရတဲ့ မနေဇာထွန်းအပါအဝင် ၃ ဦးကို ဒဂုံမြို့သစ် ဆိပ်ကမ်းမြို့နယ် တရားရုံးမှာ ဒီနေ့ရုံးထုတ်ခဲ့တာဖြစ်ပါတယ်။

ဒီနေ့ ရုံးထုတ်လာသူတွေက ၂၀၀၈ ဖွဲ့စည်းပုံပြင်ဆင်ရေးအတွက် ပြည်သူတွေ အားလုံးပါဝင်ပေးဖို့ တောင်းဆိုခဲ့ ကြပါတယ်။ ကိုအောင်ကိုထွေးရဲ့ အစ်မဖြစ်သူ မနေဇာထွန်းဟာ အစာအိမ်မကောင်းတဲ့အတွက် ထောင်အတွင်းမှာ ကျန်းမာရေးမကောင်းဖြစ်နေကြောင်း ထောင်အတွင်းမှာ ကျန်းမာရေးစောင့်ရှောက်မှုနဲ့ ပတ်သက်လို့ ဂရုစိုက်မှုအား နည်းကြောင်း မနေဇာထွန်းက ပြောပါတယ်။

နောက်ထပ်ရုံးချိန်းကို သြဂုတ်လ ၆ ရက်နေ့မှာ ပြန်လည် ချိန်းဆိုထားပါတယ်။

RFA Burmese
https://www.rfa.org

တပ်ပါဝင်မှုနှုန်း တိုးမြှင့်ဖို့ ကြံ့ခိုင်ဖံွ့ဖြိုးရေးပါတီ ဆွေးနွေး

ပြည်ထောင်စုလွှတ်တော်မှာ တပ်မတော်သား လွှတ်တော်ကိုယ်စားလှယ်တွေကို တွေ့ရစဉ်
Photo: RFA
လွှတ်တော်တွင်းမှာ တပ်မတော်သားပါဝင်မှုကို လက်ရှိ ၂၅ ရာခိုင်နှုန်းကနေ ၅၀ ရာခိုင်နှုန်းအထိ တိုးမြှင့်သင့်တယ် လို့ ကြံ့ခိုင်ဖံွ့ဖြိုးရေးပါတီ လွှတ်တော်ကိုယ်စားလှယ်တွေက ဒီနေ့ ပြည်ထောင်စုလွှတ်တော် အစည်းအဝေးမှာ တိုက်တွန်းလိုက်ပါတယ်။

ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီရဲ့ အစီရင်ခံစာကို ဒီကနေ့ ပြည်ထောင်စုလွှတ်တော်မှာ ကိုယ်စားလှယ် ၁၇ ဦးက စတင်ဆွေးနွေးရာမှာ ကြံ့ခိုင်ဖံွ့ဖြိုးရေးပါတီ ကိုယ်စားလှယ်တွေက တိုက်တွန်း ဆွေးနွေးခဲ့တာဖြစ်ပါတယ်။

ဒီအစီရင်ခံစာမှာ လက်ရှိအာဏာရ အင်န်အယ်လ်ဒီပါတီက လွှတ်တော်တွင်းက တပ်မတော်သားပါဝင်မှုကို ရာခိုင်နှုန်းအလိုက်လျှော့ချဖို့ အဆိုပြုထားပြီး ရခိုင်အမျိုးသားပါတီအပါအ၀င် ပါတီတချို့ကတော့ လုံးဝမပါဝင်ဖို့ အဆိုပြုထားတာရှိပါတယ်။

ကြံ့ခိုင်ဖွံ့ဖြိုးရေးပါတီ၊ မင်းကင်းမြို့နယ်၊ ပြည်သူ့လွှတ်တော်ကိုယ်စားလှယ် ဦးမောင်မြင့်ကတော့ လွှတ်တော်တွင်းမှာ တပ်မတော်သားကိုယ်စားလှယ်တွေလျှော့ချဖို့ မဖြစ်နိုင်ကြောင်း၊ လက်ရှိ ၂၅ ရာခိုင်နှုန်းကနေ ၅၀ ရာခိုင်နှုန်းအထိ တိုးမြှင့်သင့်ကြောင်း တိုက်တွန်းဆွေးနွေးခဲ့ပါတယ်။

ဒီအစီရင်ခံစာကို တပ်မတော်သားလွှတ်တော်ကိုယ်စားလှယ် ၇၈ ဦးအပါအ၀င် ကိုယ်စားလှယ် ၁၀၀ ကျော်က ပါဝင်ဆွေးနွေးဖို့ အမည်စာရင်းပေးထားပေမယ့် တပ်မတော်သားကိုယ်စားလှယ်တွေက မဆွေးနွေးတော့ဘူးဆိုပြီး ရုပ်သိမ်းသွားတဲ့အတွက် ကိုယ်စားလှယ် ၄၇ ယောက်ကသာ ပါဝင်ဆွေးနွေးမှာဖြစ်ပါတယ်။

ဒီအစီရင်ခံစာကို ပါဝင်ဆွေးနွေးခြင်းမရှိတော့တဲ့ အကြောင်းအရင်းကို တပ်မတော်သားကိုယ်စားလှယ်အစုအဖွဲ့က ဗိုလ်မှူးချုပ်မောင်မောင်က အတိအကျ ဖြေကြားတာမရှိပါဘူး။

ဒီနေ့အစည်းအဝေး အစီအစဉ်မှာတော့ ကိုယ်စားလှယ် ၂၁ ဦး စတင်ဆွေးနွေးဖို့ လျာထားပေမယ့် ၁၇ ဦးသာ ဆွေးနွေးနိုင်ခဲ့ပြီး ကျန်တဲ့ကိုယ်စားလှယ်တွေက နောက်ရက်တွေမှာ ဆက်လက်ဆွေးနွေးမှာဖြစ်တယ်လို့ သိရပါတယ်။

အစီရင်ခံစာဟာ ဖွဲ့စည်းပုံပါ အခန်း ၁၂ နဲ့ မညီညွတ်ဘူးဆိုပြီး ကြံ့ခိုင်ဖွံ့ဖြိုးရေးပါတီ ကိုယ်စားလှယ်တွေက ကန့်ကွက်ဆွေးနွေးပေမယ့် အင်န်အယ်လ်ဒီပါတီ ကိုယ်စားလှယ်နဲ့ ကိုယ်စားလှယ်အချို့ကတော့ ဖွဲ့စည်းပုံပြင် ဆင်ရေးကို ထောက်ခံဆွေးနွေးကြတာတွေ့ရပါတယ်။

ဒီနေ့မှာတော့ ကြံ့ခိုင်ဖွံ့ဖြိုးရေးပါတီက ၁၀ ဦး၊ အင်န်အယ်လ်ဒီပါတီက တစ်ဦး၊ SNLD ပါတီက နှစ်ဦး၊ တသီးပုဂ္ဂလကိုယ်စားလှယ် နှစ်ဦး အပါအ၀င် ကိုယ်စားလှယ် ၁၇ ဦးက စတင်ဆွေးနွေးတာပါ။

ဒီနေ့ဆွေးနွေးရာမှာ ကြံ့ခိုင်ဖွံ့ဖြိုးရေးပါတီကိုယ်စားလှယ် ဦးစိုင်းကျော်မိုးက ဖွဲ့စည်းပုံအခြေခံဥပဒေဆိုင်ရာ အကျပ်အတည်းဖြစ်အောင် လုပ်နေတာလား၊ တမင်သက်သက် လုပ်နေတာလားဆိုပြီး မေးခွန်းထုတ်ခဲ့ပါတယ်။

အဲဒီဆွေးနွေးချက်အပေါ် အင်န်အယ်လ်ဒီပါတီ ကိုယ်စားလှယ် ဦးအောင်ကြည်ညွန့်က အဲဒီလိုဆွေးနွေးချက်ဟာ အဖွဲ့အစည်းအချင်းချင်း စွပ်စွဲသလိုဖြစ်နေပြီး လွှတ်တော်မှတ်တမ်းက ပယ်ဖျက်ပေးဖို့ တင်ပြခဲ့တာကြောင့် ပြည်ထောင်စုလွှတ်တော်နာယက ဦးတီခွန်မြတ်က အဲဒီစကားရပ်ကို လွှတ်တော်မှတ်တမ်းက ပယ်ဖျက်ဖို့ အတည်ပြုလိုက်ပါတယ်။

ရခိုင်အမျိုးသားပါတီ၊ ကျောက်ဖြူမြို့နယ် ပြည်သူ့လွှတ်တော်ကိုယ်စားလှယ် ဦးဘရှိန် ကတော့ ဖွဲ့စည်းပုံပြင်ဆင်ဖို့ အချက်အလက်ပေါင်း ၃၀၀၀ ကျော် တင်သွင်းထားတာဟာ အသစ်ရေးသလိုဖြစ်နေတယ်ဆိုပြီး အစီရင်ခံစာကို ကန့်ကွက်ဆွေးနွေးပါတယ်။

ဒါ့အပြင် တပ်မတော်နဲ့ အင်န်အယ်လ်ဒီပါတီ ခေါင်းဆောင်တွေကြား ညှိနှိုင်းဆွေးနွေးပြီးမှ ဖွဲ့စည်းပုံအခြေခံဥပဒေပြင်ဆင်ရေးကို ဆောင်ရွက်ဖို့ကိုလည်း ဦးဘရှိန် က တိုက်တွန်းခဲ့ပါတယ်။

ဖွဲ့စည်းပုံပြင်ဆင်ရေးအစီရင်ခံစာမှာ ပြင်ဆင်၊ ဖြည့်စွက်၊ ပယ်ဖျက်ချက်ပေါင်း ၃၇၆၅ ချက်ပါဝင်တဲ့အထဲက ရခိုင်အမျိုးသားပါတီဟာ အချက်ပေါင်း ၈၅၈ ချက် တင်သွင်းထားပြီး ကာကွယ်ရေးနဲ့ လုံခြုံရေးကောင်စီကို ပယ်ဖျက်ဖို့နဲ့ တပ်မတော်သားကိုယ်စားလှယ်တွေ လွှတ်တော်မှာ မပါဝင်တော့ဖို့ အဆိုပြုထားတာလည်းဖြစ်ပါတယ်။

ဒီအစီရင်ခံစာမှာ အချက်ပေါင်း အများဆုံးတင်ထားတဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ်က ကိုယ်စားလှယ် ဦးစိုင်းသန့်ဇင် က ပြည်နယ်အုပ်ချုပ်ခွင့်ကိစ္စတွေကို ဆွေးနွေးခဲ့ပါတယ်။

ရှမ်းတိုင်းရင်းသားများ ဒီမိုကရေစီအဖွဲ့ချုပ်ဟာ ဖွဲ့စည်းပုံအခြေခံဥပဒေပြင်ဆင်ရေးကော်မတီ အစီရင်ခံစာမှာ အချက်ပေါင်း ၁၁၁၂ ချက်နဲ့ အများဆုံး တင်ပြထားတဲ့ပါတီလည်းဖြစ်ပါတယ်။

NLD ပါတီက ဖွဲ့စည်းပုံအခြေခံဥပဒေမှာ နိုင်ငံတော်ဖွဲ့စည်းတည်ဆောက်ပုံအခန်းကလွဲလို့ ကျန်တဲ့ ကဏ္ဍအကုန်လုံးမှာ ပြင်ဆင် ဖြည့်စွက် ပယ်ဖျက်ဖို့ တင်သွင်းထားတာဖြစ်ပါတယ်။

ကော်မတီရဲ့ အစီရင်ခံစာကို ဆွေးနွေးဖို့ကျန်ရှိတဲ့ကိုယ်စားလှယ်တွေဟာ လာမယ့်အနီးဆုံး ပြည်ထောင်စုလွှတ်တော်မှာ ထပ်မံဆွေးနွေးကြမှာဖြစ်ပြီး နေ့ရက်အတိအကျကို မသိရသေးပါဘူး။

RFA Burmese
https://www.rfa.org

၂၀၀၈ ဖွဲ့စည်းပုံ အခြေခံဥပဒေပြင်ရေး လွှတ်တော်မှာ စတင်ဆွေးနွေး

၂၀၀၈ ဖွဲ့စည်းပုံ အခြေခံဥပဒေပြင်ရေး လွှတ်တော်မှာ စတင်ဆွေးနွေး
၂ဝဝ၈ ဖွဲ့စည်းပုံအခြေခံဥပဒေ ပြင်ဆင်ရေး ပူးပေါင်းကော်မတီတင်သွင်းထားတဲ့ အစီရင်ခံစာအပေါ် ဒီကနေ့ စတင်ဆွေးနွေးရာမှာ ကန့်ကွက်မှုတွေရော၊ ထောက်ခံမှုတွေပါ ရှိခဲ့ပါတယ်။ လွှတ်တော်ကိုယ်စားလှယ် ၂၀ လောက် ဆွေးနွေးခဲ့ကြပေမဲ့ ပါဝင်ဆွေးနွေးဖို့ အမည်စာရင်း တင်သွင်းထားတာကို ရုပ်သိမ်းထားတဲ့အတွက် တပ်မတော်သား ကိုယ်စားလှယ်တွေတော့ မပါဝင်ခဲ့ပါဘူး။ အပြည့်အစုံကိုတာ့ ဗွီအိုအေ မြန်မာပိုင်း သတင်းထောက် မေခက သတင်းပေးပို့ထားပါတယ်။

နိုင်ငံရေးမှာ စစ်တပ်ရဲ့ အခန်းကဏ္ဍကို တဖြည်းဖြည်း လျှော့ချသွားဖို့ အပါအ၀င် ၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး အဆိုပြုချက်တွေ ထွက်လာပြီးနောက် ထောက်ခံမှုတွေ၊ ကန့်ကွက်မှုတွေ ပေါ်ပေါက်နေတာပါ။ ဒီကနေ့ ဆွေးနွေးရာမှာလည်း ပူးတွဲကော်မတီရဲ့ အစီအစဉ်ဟာ ဥပဒေနဲ့ မညီတဲ့ လုပ်ငန်းစဉ်အဖြစ် ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီက ဦးသိန်းထွန်း က ကန့်ကွက်ခဲ့ပါတယ်။

“ဥပဒေပြုအာဏာကို အမြင့်ဆုံးဆောင်ရွက်ခွင့်ရှိတဲ့ ပြည်ထောင်စုလွှတ်တော်ကြီးက ဥပဒေပြုတာမှာ ဥပဒေက ခွင့်ပြုထားတဲ့ အချက်များနဲ့ ဘောင်ကျော်လို့မရပါဘူး။ ဘောင်ကျော်ခဲ့ရင် နိုင်ငံတော်ရဲ့ အချုပ်အခြာအာဏာထိပါး ခဲ့ရင် ကျနော်တို့မှာတာဝန်ရှိလာပါလိမ့်မယ်။ လွှတ်တော်များက တည်ဆဲဥပဒေများကို ပြင်ဆင်ခြင်း၊ အစားထိုးခြင်း၊ ဖြည့်စွက်ခြင်း၊ ရုပ်သိမ်းခြင်းများကို လုပ်ပိုင်ခွင့်များရရှိပြီဖြစ်ကာ ဥပဒေ အတည်မပြုမချင်း တည်ဆဲဥပဒေကိုလေးစားကြရပါမယ်။ နိုင်ငံတော် ဖွဲ့စည်းပုံအခြေခံဥပဒေဟာ အချုပ်အခြာအာဏာပိုင်တဲ့နိုင်ငံတိုင်းအတွက် အထွဋ်အမြတ်ပါဘဲ။ ပြင်သင့်ပြင်ထိုက်တာတွေကိုပြင်ဆင်ရမှာပါ။ ကျနော်တို့အနေနဲ့လည်း ဖွဲ့စည်းပုံအခြေခံဥပဒေ ပြင်ဆင်ရေးကို ကြိုဆိုပါတယ်၊ ထောက်ခံပါတယ်။ ယခု ဆောင်ရွက်မယ့် ပူးပေါင်းကော်မတီ အစီရင်ခံစာက၂၀၀၈ ဖွဲ့စည်းပုံအခြေခံဥပဒေ ထဲက အခန်း ၁၂မှာပါတဲ့ ပုဒ်မ ၄၃၃၊ ပုဒ်မ ၄၃၄-၄၃၅- ၄၃၆ တို့ရဲ့ ပြင်ဆင်ဆောင်ရွက်ခြင်းကို အရပ်ထဲက စတစ်ကာကမ်ပိန်းအပေါ် အရေးကြီးအဆိုတင်ပြီး ပူးပေါင်းကော်မတီဖွဲ့စည်းကာ ဆောင်ရွက်ခြင်း ဖြစ်တဲ့အတွက်အစထဲက ကျနော်တို့ သဘောမတူကြောင်း ကန့်ကွက်ခဲ့ပါတယ်။”

လွှတ်တော်မှာ ဆွေးနွေးခဲ့ကြတဲ့ တိုင်းရင်းသားပါတီ ကိုယ်စားလှယ်တွေကတော့ တိုင်းရင်းသားတွေရဲ့ ရပိုင်ခွင့်တွေကို တင်ပြခဲ့ကြပါတယ်။ ရခိုင်အမျိုးသားလွှတ်တော်ကိုယ်စားလှယ် ဒေါ်ထုမေကတော့ ပြင်ဆင်ရေး ပူးပေါင်းကော်မတီ အစီရင်ခံစာမှာ တင်ပြချက်တွေကို ထိထိရောက်ရောက် ပြင်ဆင်နိုင်ဖို့ တိုက်တွန်းသွားပါတယ်။

“ကျမတို့နိုင်ငံကို ဒီမိုကရေစီဖက်ဒရယ်နိုင်ငံ တည်ဆောက်ဖို့ ဆိုရင် နိုင်ငံရဲ့ မိခင်ဥပဒေဖြစ်တဲ့ ဖွဲ့စည်းပုံအခြေခံဥပဒေဟာ ဒီမိုကရေစီ စံနှုန်းပြည့်ဝပြီး ဖက်ဒရယ် အစစ်အမှန်ကို ဖော်ဆောင်နိုင်တဲ့ အခြေခံဥပဒေကို မရှိမနေ ဆောင်ရွက်ရပါမယ်။ ဒါကြောင့် ကျန်ရှိနေတဲ့ လွှတ်တော်သက်တမ်းမှာ ဖွဲ့စည်းပုံအခြေခံဥပဒေ အခန်း ၁၂၊ ဖွဲ့စည်းပုံအခြေခံဥပဒေ ပြင်ဆင်ရေးဆိုင်ရာပုဒ်မတွေနဲ့ ပတ်သတ်ပြီး ပြင်ဆင်ဖို့အတွက် အဓိကထားဆောင်ရွက်ရပါမယ်။ အဆိုပါ အခန်း ၁၂ ကို ပြင်ဆင်လိုက်ခြင်းဖြင့်ကမ္ဘာမှာ ပြင်ဆင်ရ အခက်ခဲဆုံး အခြေခံဥပဒေအဖြစ်ကနေ ဒီမိုကရေစီ စံနှုန်းများနဲ့ ပြည့်ဝတဲ့ အခြေခံဥပဒေအဖြစ် ပြည်သူ့ဆန္ဒနဲ့ လိုက်လျောညီထွေ ပြင်ဆင်လာနိုင်မှာဖြစ်ကြောင်း ဆွေးနွေးလိုပါတယ်။ တကယ်လို့ အခြေခံ ဥပဒေ ပြင်ဆင်ခြင်း နည်းလမ်းဟာ နိုင်ငံတော်အခြေခံမှုကို အပြည့်အ၀ အောင်အောင်မြင်မြင် အကောင်အထည်ဖော်နိုင်ဖို့ အာမခံချက် မပေးနိုင်ဘူးဆိုရင် အခြေခံဥပဒေအသစ် ပြန်လည်ရေးဆွဲခြင်းဟာ ပိုမို ကောင်းမွန်တဲ့ နည်းလမ်းတခုဖြစ်မလားဆိုတာ ကျမတို့ ပြည်ထောင်စုလွှတ်တော်အနေနဲ့ လိုအပ်ရင်သုံးသပ်ရမှာဖြစ်ပါတယ်။ ဒါ့အပြင် ခေါင်းဆောင်များအကြား Political negotiation လို့ခေါ်တဲ့ နိုင်ငံရေးအရ ညှိနှိုင်းမှုများကို ဆောင်ရွက်ဖို့ကိုလည်း ကျမတို့ ပြည်ထောင်စုလွှတ်တော်က တိုက်တွန်းသင့်ပါတယ်။”

၂ဝဝ၈ ဖွဲ့စည်းပုံအခြေခံဥပဒေ ပြင်ဆင်ရေးပူးပေါင်းကော်မတီတင်သွင်း ထားတဲ့ အစီ ရင်ခံစာအပေါ် ဆွေးနွေးရာမှာ အမည်စာရင်း တင်သွင်းထားတာကို ရုပ်သိမ်းခဲ့တဲ့ တပ်မတော်သား ကိုယ်စားလှယ် တွေတော့ မပါခဲ့ပါဘူး။ အစောပိုင်းမှာတုန်းက ဆွေးနွေးဖို့ အမည်စာရင်း တင်သွင်းထားတဲ့ ကိုယ်စားလှယ် စုစုပေါင်း ၁၂၅ ယောက်အနက် တပ်မတော်သား ကိုယ်စားလှယ် ၇၈ ဦး လည်းပါဝင်ခဲ့တာပါ။ ဆုံးဖြတ်ချက်နဲ့ ပတ်သက်လို့ တပ်မတော်သား ကိုယ်စားလှယ် ဗိုလ်မှူးချုပ် မောင်မောင်ကို သတင်းထောက်တွေက မေးမြန်းရာမှာတော့ အခုလို တုံ့ပြန်ခဲ့ပါတယ်။

“ကျနော်တို့အစီအစဉ်က လွှတ်တော်အစီအစဉ်အတိုင်းပါဘဲ။ ကြေညာထားတာဘဲလေ။ ကျနော်တို့အစီအစဉ် တိုင်းဘဲဆက်ကြည့်ပါ။ ကျနော်တို့အစီအစဉ်အတိုင်းဘဲဆက်လုပ် မှာဆိုတော့ ထူးထူးခြားခြားပြောစရာမရှိပါဘူး”

NLD အမျိုးသားလွှတ်တော် ကိုယ်စားလှယ် ဦးအောင်ကြည်ညွှန့် ကတော့ တပ်မတော်သားကိုယ်စားလှယ်တွေ ပါဝင်ဆွေးနွေးမှု မရှိတဲ့ အတွက် လုပ်ငန်းစဉ်တခု အချိန်တိုတိုနဲ့ ပြီးသွားနိုင်တယ်လို့ မြင်တဲ့အကြောင်းပြောပါတယ်။

“လွှတ်တော်မှာ ဆွေးနွေးဖို့ဆိုတာကလည်း အမည်စာရင်းတင်ထားပြီး မဆွေးနွေးပဲနဲ့ အချိန်မရွေး ပြန်ရုပ်သိမ်းလို့ရတယ်။ အကယ်၍သတ်မှတ်ထားတဲ့ ရက်အတွင်းမှာ အမည်စာရင်း မတင်သွင်းရင်နောင် ဆွေးနွေးချင်ရင်တောင်မှ ဆွေးနွေးလို့မရဘူး။ အခုလောလောဆယ် အနေအထားနဲ့ ပြန်ပြီးတော့ မဆွေးနွေးဘူးဆို တာကျတော့ဘာတခုဖြစ်လဲဆိုရင် အချိန်အားဖြင့်အများကြီးသက်သာသွားတယ်။ နောက်အထူးအခုအခံ အတိုက်အခံများဖြစ်မလားပေါ့ အဲလိုစိုးရိမ်တယ်၊ အခုတော့ ပြန်ပြီးတော့ နုတ်ထွက်သွားတယ်ဆိုတော့ အဲလိုအခြေအနေမျိုးမပေါ်ပေါက်လာနိုင်တော့ဘူးလို့ မှန်းဆလို့ရတာပေါ့”

အဖွဲ့ဝင် ၄၅ ဦးပါဝင်တဲ့ ပူးပေါင်းကော်မတီဟာ ၂ဝဝ၈ ဖွဲ့စည်းပုံအခြေခံဥပဒေထဲက ပြင်ဆင်၊ ဖြည့်စွက်၊ ပယ်ဖျက်ဖို့ အချက်ပေါင်း ၃၇၆၅ ချက်ကို စုစည်းပြီး ပြည်ထောင်စုလွှတ်တော်မှာ ဇူလိုင်လ ၁၅ ရက်နေ့က အစီရင်ခံစာ တင်သွင်းခဲ့တာပါ။ ပြည်ခိုင်ဖြိုးပါတီကတော့ ပူးပေါင်းကော်မတီ ဖွဲ့စည်းဆောင်ရွက်တာဟာ ဖွဲ့စည်းပုံနဲ့ မကိုက်ညီဘူးလို့ ခံယူထားကြောင်းနဲ့ တပ်မတော်သား ကိုယ်စားလှယ်တွေလိုပဲ လွှတ်တော်ရဲ့ဆုံးဖြတ်ချက်ကို လေးစားလိုက်နာတဲ့ အနေနဲ့သာ ပူးပေါင်းကော်မတီမှာ ပါဝင်ခဲ့တာဖြစ်ကြောင်းလည်း သဘောထား မှတ်ချက်ပေးထားပါတယ်။

မေခ  / ဗွီအိုအေ (မြန်မာပိုင်း)
https://burmese.voanews.com

အမေရိကန်က ပိတ်ထားပေမယ့် ဟွာဝေးကုမ္ပဏီ ဝင်ငွေတိုး

စမတ်ဖုန်းတွေ ပို့ဆောင်ရတာကလည်း ၂၄ ရာခိုင်နှုန်း အထိ တိုးလာတယ်။
ကုမ္ပဏီရဲ့ ပထမနှစ်ဝက်မှာ ဝင်ငွေက ၂၃ ရာခိုင်နှုန်းအထိ မြင့်တက်သွားပြီး စမတ်ဖုန်းတွေ ပို့ဆောင်ရတာကလည်း ၂၄ ရာခိုင်နှုန်း အထိ တိုးလာတယ်လို့ ထုတ်ပြန်ပါတယ်။

ပြီးခဲ့တဲ့ မေလမှာ အမေရိကန် ကုမ္ပဏီတွေကို ဟွာဝေးနဲ့ ကုန်သွယ်တာတွေမလုပ်ဖို့ ဆိုပြီး အမေရိကန် အစိုးရကဟွာဝေးကုမ္ပဏီကို အမည်ပျက်စာရင်းသွင်း တားမြစ်ခဲ့ ပါတယ်။

ဒါ့အပြင် အမေရိကန် အစိုးရရဲ့ ခွင့်ပြုချက်မပါဘဲ ဟွာဝေးရဲ့ ထုတ်ကုန်တွေကို မဝယ်ယူဖို့လည်း အမေရိကန်ကုမ္ပဏီတွေကိုလည်း ညွှန်ကြားထားပါတယ်။

ဟွာဝေး ထုတ်ကုန်တွေကို တရုတ်အစိုးရက စောင့်ကြည့်တဲ့အနေနဲ့ အသုံးပြု နိုင်တယ်လို့ ယူဆပြီး လုံခြုံရေး အရ ခြိမ်းခြောက်မှု တွေရှိတယ်လို့ အမေရိကန် ဘက်က စွပ်စွဲခဲ့ပေမယ့် ကုမ္ပဏီဘက်ကတော့ ဒါကိုငြင်းဆန်ထား ပါတယ်။

အမေရိကန်နဲ့ ကုန်သွယ်ရေး စစ်ပွဲမှာ ဟွာဝေးဟာ ဓားစာခံ ဖြစ်တယ်လို့ တရုတ် နိုင်ငံသားတွေက မှတ်ယူပြီး ကုမ္ပဏီထုတ် ပစ္စည်းတွေကို ပိုမို ဝယ်ယူ အားပေးလို့ ဒီလို ဝင်ငွေတိုးလာတာလို့ ဘီဘီစီ သတင်းထောက်က သုံးသပ်ပါတယ်။

တရုတ်နိုင်ငံ ရှန်ကျင့် မြို့မှာ ကျင်းပတဲ့ သတင်းစာရှင်းလင်းပွဲမှာ ဟွာဝေး ကုမ္ပဏီ ဥက္ကဋ္ဌ လျန်ဟွာက အမေရိကန်က အမည်ပျက် စာရင်း သွင်းခဲ့ပေမယ့် ဒါက မထိရောက်ဘူးဆိုတာ သက်သေပြခဲ့ပြီး ဖြစ်တယ်လို့ ပြောပါတယ်။

မေလ ၁၆ ရက်က ထုတ်ပြန်ချက်ကြောင့် တရုတ်နိုင်ငံမဟုတ်တဲ့ နိုင်ငံခြား ဈေးကွက် တွေမှာ စမတ်ဖုန်း ရောင်းချမှုကို ထိခိုက်သွားပေမယ့် အခုတော့ ၈ဝ ရာခိုင်နှုန်း ပြန်ကောင်းလာပါတယ်လို့ သူက ပြောပါတယ်။

ဒါပေမဲ့ ရှေ့မှာ ကုမ္ပဏီအတွက် အခက်အခဲ တချို့ရှိနေပြီး ကုမ္ပဏီရဲ့ ရေတို တိုးတက်မှု အပေါ် သက်ရောက်မှုရှိတယ်လို့လည်း သူက သတိပေးလိုက်ပါတယ်။

ဇွန်လတုန်းကလည်း နိုင်ငံတကာမှာ ဟွာဝေး လက်ကိုင်ဖုန်းတွေ ရောင်းချရမှုက ၄ဝ ရာခိုင်နှုန်းအထိ ကျသွားပြီး ဒါဟာ နှစ်စဉ် ဝင်ငွေကို ထိခိုက်နိုင်တယ်လို့ ဟွာဝေးတည်ထောင်သူ ရန်ကျန့်ဖေးက ပြောဆိုခဲ့ပါတယ်။

အခု နှစ်ဝက်ဝင်ငွေတိုးတက်ခဲ့တဲ့ ရလဒ်ကို ကြည့်ရင် ဟွာဝေးရဲ့ ရည်မှန်းချက်ဖြစ်တဲ့ ပဉ္စမမျိုးဆက် မိုဘိုင်း ဖုန်းကွန်ရက် (5G) အကောင်ထည်ဖော် လုပ်ဆောင်နေ တာကို မထိခိုင်ဘူးလို့ဆိုပါတယ်။

ပဉ္စမမျိုးဆက် မိုဘိုင်း ဖုန်းကွန်ရက်နဲ့ ပတ်သက်လို့ ကမ္ဘာတဝန်းမှာ ကုမ္ပဏီ ၅ဝ နဲ့ စာချုပ် ချုပ်နိုင်ခဲ့ပြီး အခြေစိုက် စခန်း တသိန်း ငါးသောင်းနီးပါး ဆောက်လုပ်ဖို့ ပစ္စည်းတွေ သယ်ယူပို့ဆောင် ထားတယ်လို့ ဟွာဝေးက ထုတ်ပြန်ထားပါတယ်။

BBC Burmese
https://www.bbc.com

အိန္ဒိယကနေ မြန်မာ ရေငုပ်သင်္ဘော ဒီနှစ်အတွင်း ရမယ်

 Vizag မှာ ဒီသင်္ဘောကို အဆင့်မြှင့်တင်နေပြီး ဒီနှစ် မကုန်ခင်မှာ ပြီးဆုံးမယ်လို့ သတင်းတွေမှာ ဖော်ပြပါ တယ်။
အိန္ဒိယနိုင်ငံက ပထမဆုံးအနေနဲ့ ရေငုပ်သင်္ဘောတစီးကို မြန်မာနိုင်ငံကို ဒီနှစ် အတွင်းမှာ လွဲပြောင်း ပေးအပ်သွားမှာ ဖြစ်ပါတယ်။

မြန်မာကို ပေးမယ့် INS Sindhuvir လို့အမည်ပေးထားတဲ့ ရေငုပ်သင်္ဘောကို အိန္ဒိယက ရုရှားထံကနေ ၁၉၈ဝ ပြည့်နှစ် နောက်ပိုင်းက ဝယ်ယူခဲ့တာလည်း ဖြစ်ပါ တယ်။

လက်ရှိမှာတော့ Vizag မှာ ဒီသင်္ဘောကို ဟိန္ဒူစတန် သင်္ဘောကျင်း လီမိတက်က အဆင့်မြှင့်တင်နေပြီး ဒီနှစ် မကုန်ခင်မှာ ပြီးဆုံးမယ်လို့ သတင်းတွေမှာ ဖော်ပြပါ တယ်။

ဒီရေငုပ်သင်္ဘောကို ဘယ်လောက်နဲ့ တပ်မတော်က ဝယ်ယူခဲ့သလဲဆိုတာကို ရှင်းရှင်းလင်းလင်း မသိရပါဘူး။

အိန္ဒိယက မြန်မာကို ရေငုပ်သင်္ဘော ပေးမယ့်အပေါ် သင့်တော်တဲ့ အချိန်မှာ သတင်း ထုတ်ပြန်ပေးသွားမှာ ဖြစ်ပြီး ရေငုပ်သင်္ဘောတစီးကို တာဝန်ယူဖို့လည်း လေ့ကျင်မှု တွေအများကြီး လိုတယ်လို့ တပ်မတော် သတင်းမှန် ပြန်ကြားရေး အဖွဲ့ အတွင်းရေးမှူး ဗိုလ်မှူးချုပ် ဇော်မင်းထွန်းက ဘီဘီစီကို ပြောပါတယ်။

'လေ့ကျင်မှုတွေကို အရင်ဦးဆုံးစလုပ်မှာ ဖြစ်တယ်၊ ဘယ်နိုင်ငံမှာ မဆို ရေငုပ် သင်္ဘော တစီး စတင်ဝယ်လိုက်ပြီဆိုရင် ဘယ်သူမှတော့ အသစ်မဝယ်ဘူး၊ အသစ်ဝယ်တယ်ဆိုတာ တော်တော်ရှားပါတယ်၊ သင်တန်းရပြီးသားကတော့ အသစ်ဝယ်တာပေါ့၊ အဟောင်းပဲယူယူ အသစ်ပဲယူယူ ဘယ်သူမှတော့ အလကား မပေးပါဘူး' လို့ သူက ပြောပါတယ်။

တပ်မတော်ရေအတွက် ရေပေါ်၊ ရေအောက်နဲ့ ရေကနေမြေပေါ် စစ်ဆင်ရေးဆိုပြီး စစ်ဆင်ရေး သုံးမျိုးရှိရာမှာ ရေအောက် စစ်ဆင်ရေးက အရေးပါတဲ့ စစ်ဆင်ရေး ဖြစ်တယ်လို့လည်း ဗိုလ်မှူးချုပ် ဇော်မင်းထွန်းက ရှင်းပြပါတယ်။

'ရေငုပ်သင်္ဘောတစီးပိုင်ဆိုင်ခြင်းဟာ ကိုယ့်ရဲ့ ရေပြင်ပိုင်နက်ကို အာမခံချက် ရရှိစေပါတယ်၊ နောက်တခုက မြန်မာနိုင်ငံသည် ပင်လယ် ကမ်းစပ်နဲ့ထိနေတဲ့ နိုင်ငံဖြစ်တယ်၊ နိုင်ငံတော်စီးပွားရေး လုပ်ငန်းတွေ သယံဇာတတွေ အများကြီး ရှိပါတယ်၊ ဒါတွေကို ကာကွယ်နိုင်ဖို့က ရေပေါ်ကာကွယ်ရေးတွင် မကဘူး ရေအောက် ကာကွယ်ရေးတွေလည်း ရှိရမှာ ဖြစ်တယ်'လို့ သူက ပြောပါတယ်။

ရေငုပ်သင်္ဘော ပိုင်ဆိုင်သွားပါက ဟန့်တားနိုင်တဲ့ စွမ်းအင်မှာ တပ်မတော်အနေနဲ့ ပိုမို တိုးတက်သွားမှာ ဖြစ်တယ်လို့လည်း ဆိုပါတယ်။

မြန်မာတပ်မတော်အနေနဲ့ ရေငုပ်သင်္ဘောတစီးကို ပိုင်ဆိုင်ဖို့ အရင်ကတည်းက အိမ်မက် မက်ခဲ့တာလည်းဖြစ်ပါတယ်။

ရုရှား ဒါမှမဟုတ်ရင် တရုတ်နိုင်ငံကနေ ဝယ်ယူမယ်ဆိုတဲ့ သတင်းတွေလည်း ထွက်ခဲ့ပါတယ်။
ဒီအတွက်လည်း ရုရှား ဒါမှမဟုတ်ရင် တရုတ်နိုင်ငံကနေ ဝယ်ယူမယ်ဆိုတဲ့ သတင်းတွေလည်း ထွက်ခဲ့ပါတယ်။

ဧပြီလ ၂၆ ရက်က ရုရှားနိုင်ငံ၊ စိန့်ပီတာစဘတ်မြို့ ရုရှားရေတပ်စခန်းရဲ့ အက်မာ တိုင်စကီဗာဖီ သင်္ဘောကျင်းမှာ ရေငုပ်သင်္ဘော ထုတ်လုပ်နေမှု အခြေအနေတွေနဲ့ ရေငုပ်သင်္ဘောတွေ ပြုပြင်ထိန်းသိမ်းတဲ့ အခြေအနေတွေကို ဗိုလ်ချုပ်မှူးကြီး မင်းအောင်လှိုင်နဲ့ အဖွဲ့ဝင်တွေ သွားရောက် ကြည့်ရှုခဲ့ပြီးတဲ့နောက် တပ်မတော်က ရေငုပ်သင်္ဘော တစီးကို မကြာခင် ဝယ်ယူနိုင် မယ်ဆိုတဲ့ သတင်းတွေထွက် ပေါ်ခဲ့ပါတယ်။

ဇူလိုင်လ အစောပိုင်းမှာ အိန္ဒိယ အစိုးရထံကနေ ဒေါ်လာ ၃၈ သန်းတန် ရေငုပ်သင်္ဘောဖျက် တော်ပီဒို ဒုံး လက်နက်တွေကို မြန်မာ ရေတပ်က လက်ခံရရှိခဲ့ပါတယ်။

မြန်မာတပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဟာလည်း အိန္ဒိယနိုင်ငံ ရောက်ရှိ နေပြီး အိန္ဒိယ ဝန်ကြီးချုပ် အပါအဝင် အိန္ဒိယ ကြည်းတပ်၊ ရေတပ်ဦးစီးချုပ်တွေနဲ့လည်း တွေ့ဆုံခဲ့ပါ တယ်။

ဇူလိုင် ၂၉ ရက်u မြန်မာနဲ့အိန္ဒိယနိုင်ငံအကြား စစ်ရေးအရ နှစ်နိုင်ငံ ပူးပေါင်း ဆောင်ရွက်ဖို့ သဘောတူညီမှုတခု လက်မှတ်ရေး ထိုးခဲ့တယ်လို့လည်း ဆိုပါတယ်။

BBC Burmese
https://www.bbc.com

ဖားကန့်မှာ တောင်ကမ်းပါယံပြိုကျမှု သေဆုံးသူ ၂၀ အထိရှိနေ

ဖားကန့်မြို့နယ် ဆိပ်မူအုပ်စု ကောင်းစံ၊ ကရင်ချောင်နဲ့ ချောင်းဖျားကျေးရွာနားက ကျောက်ကျောမြေစာပြို ၂၀၁၉ ဇူလိုင် ၂၈ ရက်နေ့ ကပြိုကျခဲ့စဉ် / Photo: Hpakan Township Info Committee NLD
ကချင်ပြည်နယ် ဖားကန့်မြို့နယ် ဆိပ်မူအုပ်စု ကောင်းစံ၊ ကရင်ချောင်နဲ့ ချောင်းဖျားကျေးရွာနားက အမြင့်ပေ တစ်ထောင်လောက်ရှိတဲ့ ကျောက်စိမ်းတွင်း တောင်ကမ်းပါးယံ မြေစာပုံ ပြိုကျခဲ့တဲ့အတွက် သေဆုံးသူ စုစုပေါင်း ၂၀ ဦးအထိ ရှိနေပြီလို့ အဲဒီနေရာမှာ ရှာဖွေကယ်ဆယ်ရေး ဆောင်ရွက်နေတဲ့ ဖားကန့် မြို့နယ် ရဲမှူး သန်းဝင်းက RFA ကို ပြောပါတယ်။

ဇူလိုင်လ ၂၈ ရက်နေ့က ဖားကန့်မြို့နယ် ဆိပ်မူအုပ်စု ကောင်းစံ၊ ကရင်ချောင်နဲ့ ချောင်းဖျားကျေးရွာနားက အမြင့်ပေ တစ်ထောင်လောက်ရှိတဲ့ ကျောက်စိမ်းတွင်း တောင်ကမ်းပါးယံ မြေစာပုံ ပြိုကျခဲ့တဲ့အတွက် ကျောက်မျက်တူးဖော်ရေး ကုမ္ပဏီဝန်ထမ်းတွေ နဲ့ အဲ့ဒီအနီးနားမှာ လုံခြုံရေးဆောင်ရွက်နေတဲ့ ရဲတပ်ဖွဲ့ဝင်တွေ ပျောက်ဆုံးခဲ့တာဖြစ်ပါတယ်။

ဒေသခံတွေကတော့ မြေစာပုံပြိုကျမှုမှာ ပျောက်ဆုံးသူ ၅၀ လောက်ရှိတယ်လို့ ဆိုကြပါတယ်။

မြေစာပုံပြိုကျမှုဖြစ်စဉ်မှာ ရဲတပ်ဖွဲ့ဝင် ၅ ဦးပျောက်ဆုံးခဲ့တဲ့ထဲက နှစ်ဦးကိုတော့ အသက်ရှင်လျက် ကယ်ဆယ်နိုင်ခဲ့ပြီး သုံးဦးကတော့ သေဆုံးသွားတဲ့ ရုပ်အလောင်းကို ရှာဖွေတွေရှိခဲ့တယ်လို့ ရဲမှူးသန်းဝင်းကပြောပါတယ်။

ဒါ့အပြင် မီးသတ်တပ်ဖွဲ့ ၊ လူမှုကူညီရေးအသင်းတွေနဲ့ အင်အားထပ်တိုးပြီး ကယ်ဆယ်ရေးလုပ်ငန်း တွေကို ဆက်လက် ဆောင်ရွက်နေတယ်လို့လည်း ပြောပါတယ်။

ဖားကန့်ဒေသမှာ မြေပြိုကျမှုဖြစ်စဉ်တွေ နှစ်စဉ် ဖြစ်ပွားနေပြီး လူထိခိုက်သေဆုံးမှု အများဆုံးကတော့ ပြီးခဲ့တဲ့ ဧပြီလ ၂၂ ရက်နေ့ညက မှော်ဝမ်းကြီးအနီးမှာရှိတဲ့ ကျောက်စိမ်း လုပ်ကွက် ကျင်းဟောင်း နွံကန်ပေါက်ကျတာကြောင့် ကျောက်တူးဖော်ရေးလုပ်သား ၅၄ ဦး ထိခိုက်သေဆုံးခဲ့တာပဲဖြစ်ပါတယ်။

ကချင်ပြည်နယ်အစိုးရကတော့ ဖားကန့်ဒေသမှာ မြေပြိုကျနိုင်တဲ့ အန္တရာယ်ရှိနေရာ ၆ ခု ကို သတ်မှတ်လိုက်ပြီး အဲဒီနေရာတွေမှာ ရေမဆေးကျောက်မရှာဖွေဖို့ကိုလည်း တားမြစ်ထားပါတယ်။

ဖားကန့်မြို့နယ်မှာ ကျောက်စိမ်းတူးဖော်ရေးလုပ်ငန်းတွေကို ဇူလိုင်လ ၁ ရက်နေ့ကနေ စက်တင်ဘာလကုန်ထိ ရပ်နားထားဖို့လည်း သဝံဇာတနဲ့ သဘာဝပတ်ဝန်းကျင် ထိန်းသိမ်းရေးဝန်ကြီးဌာန ပြည်ထောင်စု အဆင့်က ညွှန်ကြားချက် ထုတ်ပြန်ထားပါတယ်။

RFA Burmese
https://www.rfa.org/burmese

မနီလာသိန်းအပါအ၀င် ၅ယောက်အမှု မစစ်ဆေးဖြစ်

ဗိုလ်တထောင်မြို့နယ်တရားရုံးကို ရောက်လာတဲ့ မနီလာသိန်းတို့ကို ၂၀၁၉ ဇူလိုင် ၃၀ ရက်နေ့ကတွေ့ရစဉ် / Photo: Thant Zin Oo/RFA
ဒေါင်းတို့မျိုးဆက် သံချပ်အဖွဲ့တွေရဲ့ ရုံးချိန်းမှာ ရုန်းရင်းဆန်ခတ်ဖြစ်ပွားခဲ့တာကြောင့် ပုဒ်မ နှစ်ခုနဲ့ တရားစွဲခံထားရတဲ့ ၈၈ မျိုးဆက်ငြိမ်းချမ်းရေးနဲ့ ပွင့်လင်းလူ့အဖွဲ့အစည်းက မနီလာသိန်း အပါအ၀င် ငါးယောက်ရဲ့အမှုအတွက် တရား လိုဖြစ်တဲ့ ဗိုလ်တထောင်မြို့နယ်ရဲတပ်ဖွဲ့မှူး ရဲမှူးနေဝင်း ကို ဒီကနေ့ ဗိုလ်တထောင်မြို့နယ်တရားရုံးမှာ စတင် စစ်ဆေးဖို့ ကနဦး စီစဉ်ထားပေမယ့် မစစ်ဆေးဖြစ်ခဲ့ပါဘူး။

တရားရုံးလုပ်ငန်းစဉ်မြန်ဆန်အောင် ဆောင်ရွက်နေတဲ့ CNP လို့ခေါ်တဲ့ တရားရုံးစာရွက်စာတမ်းတွေ အမှုဖြစ်စဉ်တွေနဲ့ပတ်သက်ပြီးပဲ ဒီကနေ့ရုံးချိန်းမှာ ရှင်းလင်းပြောဆိုတာ ဖြစ်တဲ့အတွက် မစစ်ဆေးဖြစ်တာလို့ သိရပါတယ်။

နောက်ရုံးချိန်းကို လာမယ့် သြဂုတ်လ ၆ ရက်နေ့ကို ပြန်လည်ချိန်းဆိုလိုက်ပါတယ်။

မနီလာသိန်းတို့ဘက်ကနေ လိုက်ပါဆောင်ရွက်ပေးမယ့် ရှေ့နေ ဒေါ်စန်းစန်းမြင့် က ဒေါင်းတို့မျိုးဆက်အမှု ရုံးချိန်းနဲ့ တစ်ရက်တည်းဖြစ်အောင် ဒီကနေ့တင်ပြခဲ့တယ်လို့ ပြောပါတယ်။

သူတို့ ငါးယောက်ကို ဇူလိုင်လ ၂၃ ရက်နေ့က ဗိုလ်တထောင်မြို့နယ် တရားရုံးမှာ ဗိုလ်တထောင်မြို့နယ်ရဲတပ်ဖွဲ့မှူး ရဲမှူးနေဝင်းက တရားလိုပြုလုပ်ပြီး ပြည်သူ့ဝန်ထမ်း တာဝန်ထမ်းဆောင်စဉ် လက်ရောက်မှု ပုဒ်မ ၃၅၃၊ ပြည်သူ့ ၀န်ထမ်း တာဝန်ထမ်းဆောင်စဉ် သာမန်ဒဏ်ရာရရှိစေမှု ပုဒ်မ ၃၃၂ တို့နဲ့ တရားစွဲဆိုတင်ပို့ခဲ့တာဖြစ်ပါတယ်။

အင်းစိန်ထောင်အချုပ်ကနေ တရားရင်ဆိုင်နေရတဲ့ ဒဂုံတက္ကသိုလ်ကျောင်းသား ကိုမင်းဟန်ထက်ကလွဲလို့ ကျန်တဲ့ ၄ ယောက်ကို တရားရုံးက ကျပ်သိန်း ၂၀ စီနဲ့ အာမခံပေးထားတာဖြစ်ပါတယ်။

ရဲတပ်ဖွဲ့ဝင်တွေကို ကိုယ်ထိလက်ရောက်နာကျင်စေမှု ပုဒ်မ ၃၃၂ ဟာ အမြင့်ဆုံးထောင်ဒဏ် ၃ နှစ်ဖြစ်ပြီး တာဝန် ထမ်းဆောင်နေတဲ့ ပြည်သူ့ဝန်ထမ်းကို ဟန့်တားနှောင့်ယှက်မှု ပုဒ်မ ၃၅၃ ကတော့ အမြင့်ဆုံးထောင်ဒဏ် ၂ နှစ် အထိချမှတ်နိုင်သလို ငွေဒဏ်တွေလည်း ချမှတ်နိုင်ပါတယ်။

RFA Burmese
https://www.rfa.org

ချင်းပြည်နယ်မှာ ဖမ်းဆီးခဲ့သူ ၁၂ ယောက် ပြန်လွှတ်ပေးဖို့ AA တပ်ဖွဲ့ ကတိပေး

A ရခိုင်လက်နက်ကိုင်အဖွဲ့ (ဓါတ်ပုံ -ရက္ခိုင့်တပ်မတော် - သတင်းနှင့် ပြန်ကြားရေးဌာန)
ချင်းပြည်နယ်၊ ပလက်ဝမြို့နယ်မှာ တပ်မတော်နဲ့ ဖြစ်ပွားတဲ့ တိုက်ပွဲအတွင်း ဖမ်းဆီးခဲ့သူတွေနဲ့ ကုလားတန် စီမံကိန်း လုပ်ငန်းခွင်ကနေ ဖမ်းဆီးခဲ့တဲ့ ၀န်ထမ်းတွေကို ပြန်လွှတ်ပေးသွားမှာဖြစ်ကြောင်း AA ရခိုင်လက်နက်ကိုင်အဖွဲ့က ပြောဆိုလိုက်ပါတယ်။ သက်ဆိုင်ရာ မိသားစုဝင်တွေကတော့ ၄ လလောက်ကြာအောင် ဖမ်းဆီးခံထားရတဲ့အပေါ် စိုးရိမ်နေကြတာပါ။ စစ်ရေးတင်းမာမှုတွေကြောင့် ချင်းပြည်နယ်အတွင်း အရပ်သားတွေနဲ့ ဒေသဖွံ့ဖြိုးရေး လုပ်ငန်းတွေမှာ အခက်ကြုံနေရတဲ့ အခြေအနေတွေကိုတော့ ဗွီအိုအေမြန်မာပိုင်း သတင်းထောက် နိုင်ကွန်းအိန် ကဆက်သွယ် စုံစမ်းပြီး သတင်းပေးပို့ ထားပါတယ်။

ချင်းပြည်နယ်၊ ပလက်ဝမြို့နယ်အတွင်း AAရခိုင်လက်နက်ကိုင်အဖွဲ့ကနေဖမ်းဆီးထားတဲ့ အင်ဂျင်နီယာ(၄)ဦးနဲ့ ဆုထူး စံကုမ္ပဏီဝန်ထမ်းအလုပ်သမား(၈)ဦးကိုပြန်လွှတ်ပေးဖို့ AA ဌာနချုပ်ကအမိန့်ပေးထားပြီးပေမဲ့ နယ်မြေလုံခြုံရေး အခြေ အနေအရ ပြန်လွှတ်ဖို့ကြန့်ကြာနေတယ်လို့AAပြန်ကြားရေးတာဝန်ခံ ခိုင်သုခကပြောပါတယ်။

“ကျွန်တော်တို့တော့ သူတို့ကိုလွှတ်ပေးဖို့အတွက် အောက်ခြေတပ်ဖွဲ့ကိုပြောပြီးပြီး။ ဒါပေမဲ့လို့ ဟိုမှာ ဗမာစစ်တပ်ဖက် က ထိုးစစ်အရှိန်အဟုန်က ပြင်းလာတဲ့အခါကျတော့ အဲဒီမှာကျွန်တော်တို့က လုပ်ပေးဖို့က လုံခြုံရေးအရ အခြေအနေမ ကောင်းဘူးဖြစ်တယ်။ ဒီအတိုင်းကြီးလွှတ်ပေးလိုက်ရင်လဲ တခုခုဖြစ်သွားရင် ကျွန်တော်တို့မှာအပြစ်မကင်းဘု။ သူတို့ အတွက်လုံခြုံရေးစိုးရိမ်ရတဲ့ အတွက်ကြောင့်မို့လို့ ကျွန်တော်တို့ကကြန့်ကြာတာ။ မတ်လ(၉)ရက်နေ့တုန်းက အဲဒီဗမာ စစ်တပ်ရဲ့ဗျူဟာစခန်းကို ကျွန်တော်တို့တက်ပြီးသိမ်းတဲ့အချိန်မှာ ဖမ်းမိတဲ့ဥစ္စာထဲက (၁၁)ထဲမှာနေပြီးမှ(၇)ယောက် လွှတ်ပြီးပြီး။ (၄)ယောက်ကျန်သေးတာပေါ့နော်။ သူတို့က စစ်အင်ဂျင်နီယာဌာနက လူတွေလို့ပြောတယ်။ နောက်တခု ရှိတာက ဆုထူးစံကုမ္ပဏီနဲ့ ပက်သက်တဲ့ လူတွေပေါ့။ အဲဒီမှာသူတို့(၈)ယောက်။ အကုန်လုံးပေါင်းလိုက်ရင် အဲဒီမှာ(၁၂) ယောက်လို့ အကြမ်းဖျင်း ပြောလို့ရတယ်။”

ပြီးခဲ့တဲ့ မတ်လ (၉)ရက်နေ့က ပလက်ဝမြို့နယ်၊ ပီချောင်းဒေသ တပ်မတော်ဗျူဟာကုန်းကို AAတပ်ဖွဲ့ကနေ ၀င်ရောက် စီးနင်းတိုက်ခိုက်ခဲ့ပြီး စခန်းတွင်းလူတွေကိုဖမ်းဆီးသွားခဲ့သလို မတ်လ(၃၀)ရက်မှာလဲ ပလက်ဝမြို့နယ် တွင်းကင်း အလောင်းရွာမှာ လမ်းလုပ်ငန်းဆောင်ရွက်နေတဲ့ဆုထူးစံကုမ္ပဏီဝန်ထမ်းလမ်းဖေါက်အလုပ်သမား(၈)ဦးကို AAအဖွဲ့က နေ ဖမ်းဆီးခေါ်ဆောင်သွားခဲ့ပါတယ်။

AAဖက်ကဖမ်းဆီးထားတဲ့ လမ်းဖောက်အလုပ်သမား(၈)ဦးထဲမှာ ချင်းလူမျိုးနှစ်ဦးပါဝင်နေပြီး လက်ရှိပြန်မလွတ်သေး တာကြောင့်မိသားစုဝင်တွေစိုးရိမ်နေတယ်လို့ ချင်းလူ့အခွင့်အရေးအဖွဲ့က ဒါရိုက်တာ ကိုတေးရာကပြောပါတယ်။။

“ကုလားတန် ပရောဂျက်အလုပ်လုပ်တဲ့လူ။ အခုသူတို့ဟာ ထိန်းသိမ်းထားနေဆဲပါ။ သူတို့ပြန်မလွတ်သေးဘူးနော။အရမ်းစိုးရိမ်စိတ် သူတို့မိသားစုဝင်တွေပေါ့နော်။”

ဆုထူးစံကုမ္ပဏီဟာ မြန်မာ-အိန္ဒိယနှစ်နိုင်ငံပူးပေါင်းပြီး ကုလားတန်မြစ် ဘက်စုံဖွံ့ဖြိုးရေးစီမံကိန်းထဲကတခုအပါ အဝင် ဖြစ်တဲ့ ချင်းပြည်နယ်ပလက်ဝမြို့နယ်- မီဇိုရမ်ပြည်နယ်(အိန္ဒိယ) ဆက်သွယ်ရေးကားလမ်းဖောက်လုပ်နေတဲ့ ကုမ္ပဏီ တခု ဖြစ်ပါတယ်။

ပလက်ဝမြို့နယ်အတွင်း မြန်မာစစ်တပ်နဲ့ရခိုင်လက်နက်ကိုင်အဖွဲ့AAတို့အကြားဖြစ်ပွါးနေတဲ့ စစ်ရေးပဋိပက္ခဟာ နယ် မြေဒေသဖွဲ့ဖြိုးမှုလုပ်ဆောင်ရေးအတွက် အနှောက်အယှက်ဖြစ်နေတယ်လို့ချင်းပြည်နယ်အစိုးရအဖွဲ့ဝန်ကြီး ဦးမန်ဟင်း ဒါရ်ကပြောပါတယ်။

“လုပ်ငန်းတော့ တော်တော်လေးအနှောက်ယှက်ဖြစ်ပါတယ်။ ဖွံ့ဖြိုးရေးလုပ်ငန်းပေါ့နော်။ လမ်းလုပ်ငန်း အဆောက်အဦး လုပ်ငန်းဘာညာတွေကတော့ တော်တော်လေးကို လုပ်ရခက်တဲ့ အနေအထားမှာရှိပါတယ်။ ”

မတ်လ(၁၆)ရက်နေ့တုန်းက ကုလားတန်းမြစ်ကူးတံတားအတွက် အသုံးပြုဖို့ ရန်ကုန်ကနေသင်္ဘောနဲ့တင်ဆောင်လာ တဲ့ တံတားသံဘောင် တန်ချိန် (၃၀၀) နီးပါးကို AAအဖွဲ့ကနေ မီးရှို့ဖျက်စီးခဲ့တဲ့အတွက် ဆောက်လုပ်ရေးလုပ်ငန်းကြန့် ကြာနေဆဲ လို့ သူကဆိုပါတယ်။

ရခိုင်လက်နက်ကိုင်အဖွဲ့AAအနေနဲ့က ကုလားတန်မြစ် ဘက်စုံဖွံ့ဖြိုးရေးစီမံကိန်း နဲ့ ပက်သက်ပြီးအဖွဲ့အနေနဲ့ဆန့်ကျင် တာမရှိဘူးလို့ AAပြန်ကြားရေးတာဝန်ခံခိုင်သုခကပြောပါတယ်။

“အဲဒီတိုက်ပွဲဖြစ်တဲ့ဥစ္စာကို သူတို့ထိုးစစ်ဆင်လို့ဖြစ်တဲ့ဥစ္စာကို ကုလားတန်ပရောဂျက်ကို အကြောင်းပြတယ်။ ကျွန်တော် တို့က အဲဒီကုလားတန်စီမံကိန်းကို ဆန့်ကျင်စရာ အကြောင်းဘာမှမရှိဘူး။ ကျွန်တော်တို့AA ကဘဲ အတားဆီးလုပ်နေ တယ်ဆိုပြီးတော့မှ အိန္ဒိယဘက်ကို သတင်းအမှားပေးတဲ့ ဥစ္စာတွေလဲရှိတယ်။ ဆိုတော့ဒီစီမံကိန်းဟာပြည်သူလူထုတွေ အတွက် အကျိုးရှိမယ် ဆိုလို့ရှိရင်တော့ ကျွန်တော် တို့က ဘာမှဆန့်ကျင်စရာအကြောင်းမရှိဘူး။”

ချင်းပြည်နယ် ပလက်ဝမြို့နယ်အတွင်း ပြီးခဲ့တဲ့အပတ်က တိုက်ပွဲတွေဖြစ်ပွားခဲ့ပါတယ်။

မြန်မာစစ်တပ်နဲ့ AAတို့အကြား တိုက်ပွဲကြောင့် ချင်းပြည်နယ်၊ ပလက်ဝမြို့နယ်အတွင်း စစ်ရှောင်ဦးရေ(၃၀၀၀)ခန့်တိုးပွားနေပြီး စားသောက်ရေးမှာ ဆန်ကိုအကန့်အသတ်နဲ့သာ ၀ယ်ယူခွင့်ပြုနေတဲ့ အတွက် အခက်တွေ့နေတယ်လို့ ချင်းလူ့အခွင့်အရေး အဖွဲ့ တာဝန်ရှိသူတွေက ပြောပါတယ်။

ဒီရက်ပိုင်းမှာ ရခိုင်ပြည်နယ်အတွင်းမှာလည်း တိုက်ပွဲတွေငြိမ်သက်နေတယ်လို့ AAတာဝန်ရှိသူတွေကပြောပါတယ်။

မြန်မာစစ်တပ်နဲ့AAတို့တိုက်ပွဲဖြစ်စဉ်အတွင်း ရခိုင်ပြည်နယ် ဘူးသီးတောင်၊ ရသေ့တောင်၊ ပုဏ္ဏားကျွန်း၊ မြောက်ဦး၊ မင်းပြား ကျောက်တော်မြို့နယ်က ဒေသခံ(၅၅၀၀၀)ကျော် နေရပ်စွန့်ခွာ တိမ်းရှောင် နေကြရတယ်လို့ စစ်တမ်းကောက် ယူထားတဲ့ ရခိုင်တိုင်းရင်းသားမျိုးနွယ်များအစည်းအရုံး ကနေ ဒီကနေ့မှာသတင်းထုတ်ပြန်ထားပါတယ်။

နိုင်ကွန်းအိန်/ ဗွီအိုအေ (မြန်မာပိုင်း)
https://burmese.voanews.com

မြန်မာနိုင်ငံတွင်း ကလေးစစ်သား အသုံးပြုမှု ကုလအတွင်းရေးမှူးချုပ် စိုးရိမ်

ကုလသမဂ္ဂအတွင်းရေးမှူးချုပ် António Guterres
မြန်မာနိုင်ငံမှာ ကလေးစစ်သားတွေကို စုဆောင်း အသုံးပြုနေတာနဲ့ အထူးသဖြင့် မြေမြှုပ်မိုင်းတွေ၊ စစ်ပွဲအကြွင်းအကျန် ပေါက်ကွဲ စေတဲ့ပစ္စည်းတွေနဲ့ လက်လုပ် ဖောက်ခွဲရေးပစ္စည်းတွေကြောင့် ကလေးတွေ ထိခိုက်ဒဏ်ရာရနေတဲ့အပေါ် အထူးစိုးရိမ်တဲ့ အကြောင်း ကုလသမဂ္ဂအတွင်းရေးမှူးချုပ် က ပြောပါတယ်။

ဒါ့အပြင် ဘက်အားလုံးက ကျူးလွန်တဲ့ ဆိုးရွားတဲ့ ချိုးဖောက်မှုတွေကို ပြစ်တင်ရှုတ်ချတဲ့အကြောင်းလည်း ဒီကနေ့ထုတ်ပြန်တဲ့ ကလေးသူငယ်များနဲ့ လက်နက်ကိုင်ပဋိပက္ခဆိုင်ရာ ကုလသမဂ္ဂအတွင်းရေးမှူးချုပ်ရဲ့ အစီရင်ခံစာထဲမှာ ဖော်ပြထားပါတယ်။

ဆိုးရွားတဲ့ချိုးဖောက်မှုတွေအဖြစ် ဖော်ပြထားတဲ့ထဲမှာ ၂၀၁၈ ခုနှစ်အတွင်း တပ်မတော်က ကလေး ၇ ယောက်ကို စစ်သားအဖြစ် စုဆောင်းခဲ့ပြီး ၆၄ ယောက်ကို စစ်သားတွေအဖြစ် အသုံးပြုနေခဲ့တဲ့အကြောင်းနဲ့ အရင်တုန်းက ကလေးစစ်သား ၂၆ ယောက် စုဆောင်းခဲ့တာကိုလည်း ၂၀၁၈ ခုနှစ်မှာ အတည်ပြုနိုင်ခဲ့တယ်ဆိုတဲ့ အချက်လည်း ပါဝင်ပါတယ်။

လူမျိုးစုလက်နက်ကိုင်တပ်ဖွဲ့တွေက ကလေးစစ်သားစုဆောင်းတဲ့ဖြစ်ရပ် ၁၁ ခုရှိခဲ့တာနဲ့ ယောက်ျားလေး ၁၄ ယောက်၊ မိန်းကလေး ၃ ယောက်၊ စုစုပေါင်း ၁၇ ယောက်ကို ကလေးစစ်သားအဖြစ် အသုံးပြုနေတာကိုလည်း ဖော်ပြထားပါတယ်။ ကလေး စစ်သားစုဆောင်းတဲ့ဖြစ်ရပ်တွေထဲက ၉ ခုကို ကချင်လွတ်မြောက်ရေးတပ်မတော် KIA ကလုပ်ခဲ့တာဖြစ်ကြောင်းနဲ့ တအာန်း အမျိုးသား လွတ်မြောက်ရေးတပ် TNLA က ၁ ခု၊ ကရင်အမျိုးသားလွတ်မြောက်ရေးတပ် KNLA က တခု လုပ်ခဲ့တာလို့ ဖော်ပြ ထားပါတယ်။ ဒါ့အပြင် ညီညွတ်သော ဝပြည်တပ်မတော် UWSA ပါဝင်ပတ်သက်တဲ့ ကလေးစစ်သားစုဆောင်းမှုဖြစ်ရပ် နှစ်ခုရှိတာ ကို မှတ်တမ်းတင်ထားတယ်လို့လည်း အစီရင်ခံစာမှာဖော်ပြထားပါတယ်။

မြန်မာနိုင်ငံ နေရာအနှံ့အပြားမှာ ဖြစ်ပွားနေတဲ့ တိုက်ပွဲတွေကနေ ကလေးတွေ သေဆုံး ဒဏ်ရာရတဲ့ ဖြစ်စဉ်တွေကိုလည်း ကုလသမဂ္ဂအတွင်းရေးမှူးချုပ်ရဲ့ အခု အစီရင်ခံစာထဲမှာ ဖော်ပြထားပါတယ်။

ဗွီအိုအေ (မြန်မာပိုင်း)
https://burmese.voanews.com

မဘသအမည်ပြောင်းအဖွဲ့ ကို အစိုးရ ဘယ်လို အရေးယူမှာလဲ

 အင်းစိန်ရွာမကျောင်း ဆရာတော် ရောက်မလာတဲ့အတွက် သံဃာ့အဖွဲ့အစည်းဥပဒေ နဲ့ဆက် အရေးယူဖို့ မဟနက ဇူလိုင်လ ၂၉ ရက် မှာဆုံးဖြတ်
မဘသအမည်ပြောင်းအဖွဲ့ ကို နိုင်ငံတော်သံဃမဟာနာယက မဟနက ဓမ္မစက် ကုန်ပြီလို့ပြောလိုက်ပါတယ်။

မဟန ဆီမှာ ဆုံးမသြဝါဒခံယူဖို့ ခေါ်ယူထားတဲ့ အင်းစိန်ရွာမကျောင်း ဆရာတော်အရှင် တိလောကာဘိဝံသ ရောက်မလာတဲ့အတွက် သံဃာ့အဖွဲ့အစည်းဥပဒေ၊ လူပုဂ္ဂိုလ်ဆိုင်ရာဥပဒေနဲ့ ဆက် အရေးယူဖို့ မဟနက ဇူလိုင်လ ၂၉ ရက် နေ့မှာ ထပ်မံဆုံးဖြတ် လိုက်ပြီး အစိုးရ သာသနာရေး ဝန်ကြီးဌာန ဘက်ကို လွှဲပါတယ် ။

"အစိုးရဘက် ကတော့ မဟန ဆုံးဖြတ်တဲ့ အတိုင်းဆောင်ရွက်မှာပါ၊အစည်းအဝေးဆုံးဖြတ်ချက် ကဇူလိုင်လ ၂၉ ရက် ကထွက်လာတာဆိုတော့ ဘယ်လိုအရေးယူမယ်ဆိုတာကို အထက်ကို တင်ပြ ပြီးဆုံးဖြတ်သွားဖို့ရှိပါတယ် "လို့ သာသနာရေး နဲ့ ယဉ်ကျေးမှု ကြီးဌာန ဒုတိယ အမြဲတန်း အတွင်းဝန် ဦးဇာနည်ဝင်းက ဘီဘီစီကို ပြောပါတယ်။

နိုင်ငံတော်သံဃမဟာနာယ ကတော့ ဗုဒ္ဓဓမ္မပရဟိတဖောင်ဒေးရှင်းနဲ့ ပတ်သက်လို့ ၂၀၁၈ခုနှစ် ဇူလိုင်လကတည်းက အဲဒီအဖွဲ့ကို တရားမဝင် အဖွဲ့အဖြစ် ဆုံးဖြတ်ထားပြီး၊ အဖွဲ့ဝင်အားလုံးလည်း အဖွဲ့နာမည်ကိုသုံးပြီး ဘာကိစ္စကိုမှမလုပ်ဖို့ကို မဟနက တားထားပါတယ် ။

ဇွန်လ ၁၆ ရက်နေ့ နဲ့ ၁၇ ရက်နေ့ မှာ ရန်ကုန်မြို့မှာ မဘသ အမည်ပြောင်း အဖွဲ့က နှစ်ပတ်လည်ညီလာခံ ကျင်းပခဲ့ပါတယ်။

သံဃာ့အဖွဲ့အစည်း ဆိုင်ရာဥပဒေ ၂၀/၉၀

ဒါ့အပြင် မြန်မာပြည် အနှံ့က ဗုဒ္ဓဓမ္မပရဟိတဖောင်ဒေးရှင်းအဖွဲ့ဆိုင်းဘုတ်တွေကို ဖြုတ်သိမ်းဖို့ နဲ့ ဆုံးဖြတ်ချက်ကို မလိုက်နာရင် သံဃာဆိုပါက သံဃာ့အဖွဲ့အစည်း ဆိုင်ရာဥပဒေ ၂၀/၉၀ နဲ့အရေး ယူပြီး၊ လူပုဂ္ဂိုလ်ဆိုရင်လည်း လူပုဂ္ဂိုလ်ဆိုင်ရာဥပဒေနဲ့ အရေးယူဖို့၂၀၁၈ တည်းက ဆုံးဖြတ်ထားခဲ့ပြီး ဖြစ်ပါတယ်။

သံဃာ့အဖွဲ့အစည်း ဆိုင်ရာဥပဒေ ၂၀/၉၀ ဆိုတာ ကစစ်အစိုးရလက်ထက် က သံဃာ့အဖွဲ့အစည်း တွေနဲ့ ပတ်သက်လို့ ထုတ်ပြန်ခဲ့တဲ့ ဥပဒေ ဖြစ်ပါတယ်။ဗုဒ္ဓဓမ္မပရဟိတဖောင်ဒေးရှင်း ကို သံဃာ့အဖွဲ့အစည်း ဆိုင်ရာဥပဒေ ၂၀/၉၀ နဲ့အရေး ယူဖို့ မဟန က မနှစ်ကတည်းက ထုတ်ပြန်ပြီးဖြစ်ပါတယ်။

ဇွန်လ ၁၆ ရက်နေ့ နဲ့ ၁၇ ရက်နေ့ မှာ ရန်ကုန်မြို့မှာ အဲဒီ မဘသ အမည်ပြောင်း အဖွဲ့က နှစ်ပတ်လည်ညီလာခံ ကျင်းပခဲ့ပါတယ် ။ဒီလိုကျင်းပခဲ့တာနဲ့ ပက်သက်လို့ ဗုဒ္ဓဓမ္မပရဟိတဖောင်ဒေးရှင်းဥက္ကဌ အင်းစိန်ရွာမဆရာတော် နဲ့ ဒုဥက္ကဌ မော်ကျွန်းဆရာတော်တို့ကို နောက်ဆုံးအကြိမ်အဖြစ် ခေါ်ယူဆုံးမသြဝါဒပေးဖို့ နိုင်ငံတော်သံဃမဟာနာယကအဖွဲ့က ဇူလိုင်၂၈ ရက်နေ့စွဲနဲ့ ပင့်လျှောက်ထားခဲ့ပါတယ်။

ဇူလိုင်၂၉ ရက် ပင့်ဖိတ်တဲ့နေရာကို ရွာမဆရာတော် ရောက်မလာလို့ မဟန က နောက်ဆုံးအကြိမ် သြဝါဒ ပေးမယ့် အစီစဉ် ကို မလုပ်တော့ဘဲ ဓမ္မစက် ကုန်ပြီလို့ပြောလိုက်တာဖြစ်ပါတယ်။

မဘသ အမည်ပြောင်းအဖွဲ့ညီလာခံဟာ အစိုးရဘက် ကို ပြင်းပြင်းထန်ထန် ဝေဖန် သလို လက်ရှိအစိုးရကိုရတဲ့နည်းနဲ့ဆန့်ကျင် ကြဖို့ လှုံ့ဆော်မှုတွေ ရှိ ခဲ့။

ဓမ္မစက် ကုန်ရင် ဘာတွေလုပ်နိုင်လဲ

ဓမ္မစက်ကုန်ရင်တော့ သာသနာရေးဘက် က သံဃာ့ အဖွဲ့စည်းဆိုင်ရာ ဥပဒေ ၂၀/၉၀ နဲ့ အရေးယူဖို့ လူပုဂ္ဂိုလ် ဖြစ်ပါက သက်ဆိုင်ရာ တည်ဆဲဥ ပဒေတွေနဲ့ အရေးယူလို့ ရပါတယ်။

သံဃာ့အဖွဲ့အစည်း ဆိုင်ရာ ၂၀/၉၀ ကတော့ အနည်းဆုံး ထာင် ဒဏ်၆ လ ကနေ ၃ နှစ် အထိ အရေးယူလို့ရ ပါတယ် ။

"နိုင်ငံတော် တည်ဆောက်ရေးနဲ့ တည်ငြိမ်အေးချမ်းရေးကို အဓိကထားရတာဖြစ်လို့ ကျွန်တော် တို့သိမ်သိမ်မွေ့မွေ့နဲ့ ကိုင်တွယ်မှာပါ။မဟန ဘက်က သဘောထားကို အထက်ကို ဆက်တင်မှာဖြစ်လို့ ဘယ်လို သိမ်သိမ်မွေ့မွေ့နဲ့နဲ့ကိုင်တွယ် မလဲ ဆိုတာ ကလည်း အခုနေ ပြောဖို့ အင်မတန် ခက်ပါတယ် "လို့လည်း ဦးဇာနည်ဝင်းက ဘီဘီစီကို ပြောပါတယ်။

မဘသ အမည်ပြောင်းအဖွဲ့ညီလာခံဟာ အစိုးရဘက် ကို ပြင်းပြင်းထန်ထန် ဝေဖန်သလို လက်ရှိအစိုးရကို ရတဲ့နည်းနဲ့ဆန့်ကျင် ကြဖို့ လှုံ့ဆော်မှုတွေ ရှိ ခဲ့ပါတယ် ။

အောင်ဆန်းတောရ တပ်ဦးကျောင်းမှာ ကျင်းပတဲ့ ညီလာခံကို သံဃာ တထောင်ကျော် တက်ရောက် ခဲ့ပြီး ဦးဝီရသူကို နိုင်ငံတော်အကြည်ညိုပျက်စေမှု ပုဒ်မ ၁၂၄(က)ဖြင့် အမှုဖွင့်ထားတာ အစိုးရက ဥပဒေမဲ့ ဆောင်ရွက်ခြင်း ဖြစ်တဲ့အတွက် ပြင်းပြင်းထန်ထန် ကန့်ကွက်ရှုတ်ချကြောင်းလည်း ဗုဒ္ဓ ဓမ္မ ပရဟိတ ဖောင်ဒေးရှင်း (ဗဟို)က ထုတ်ပြန်ခဲ့ပါတယ်။

"တကယ်အရေးမယူသေးလို့ အခုထက်ထိတော့ သူတို့ကို အရေးမယူဘူး ထင်နေတယ် ထင်ပါတယ်။ အခုတစ်ခါတော့ အရေးယူလိမ့်မယ်" လို့ မဟနအဖွဲ့က ဆရာတော်တပါးက ပြောထားပါတယ် ။

ဥပဒေအတိုင်းအရေးယူမှာလား။

တရားမဝင် အသင်းအဖွဲ့တစ်ခုက အများပြည်သူရွေးချယ်တင်မြှောက်ထား တဲ့ ဒီမိုကရေစီအစိုးရကို ဖျက်လိုဖျက်ဆီးဆောင်ရွက်ရန်ဖို့ စိန်ခေါ်တာဟာ တားဆီး ကာကွယ်ဖို့လိုတယ်လို့ သာသနာရေးနဲ့ ယဉ်ကျေးမှု ဝန်ကြီး ဌာနကဇွန်လတွင်းကထုတ်ပြန်ထားပါတယ် ။

ဒါ့အပြင် ဝရမ်းပြေးကြေညာခြင်းခံထား ရတဲ့ ဦးဝီရသူကို ဗုဒ္ဓဓမ္မပရဟိတဖောင်ဒေးရှင်းက သူရဲကောင်းလို့ သဘောသတ်မှတ်ထုတ်ပြန်တာတွေရှိပါတယ်။

သာသနာရေးနဲ့ယဉ်ကျေးမှုဝန်ကြီးဌာန ဘက် က ဒုတိယ အမြဲတန်းအတွင်းဝန် အပြောအရ ဆိုရင့်တော့ ဘာသာရေး ကိစ္စ ဖြစ်လို့အထက်ကို တင်ပြပြီး သိမ်သိမ်မွေ့ မွေ့ ကိုင်မယ့်သဘောရှိပါတယ် ။

ဒီတော့ မဟန ကပြောတဲ့ ဥပဒေ ၂၀ /၉၀ အတိုင်းအရေးယူမှာလား။

ဒုတိယ အမြဲတန်းအတွင်းဝန် ဦးဇာနည်ဝင်းကတော့" ဒီဥပဒေတွေနဲ့ အရေးယူမယ် အရေးမယူဘူး လားဆိုတာက တော့ အထက် ကဆုံးဖြတ်မှာပါ ကျွန်တော့်အနေနဲ့ အခုအချိန်မှာ ပြောဖို့ ကစောပါသေးတယ်"လို့ ဘီဘီစီကို ပြောပါတယ်။

BBC Burmese
https://www.bbc.com

ဝတောင်ပိုင်းမှာ ဝတပ်သားတွေအပါအဝင် လူ ၂၀ အဆိပ်သင့်

လယ်သမားတွေသုံးတဲ့ မြက်ဖျန်းဆေးပါတဲ့ရေကိုသောက်မိကြတာလို့ပြော
တောင်ကျရေနဲ့ အတူ မြက်ဖျန်းဆေးရေပါနေတဲ့ ခမ်းပါစမ်းချောင်းက ရေတွေကို သောက်မိလို့ ဇူလိုင်လ ၂၉ ရက်နေ့ နေ့လယ်ပိုင်းလောက်က ရှမ်းပြည်နယ် ဝ ဒေသတောင်ပိုင်း ခမ်းပါမြို့နယ်ထဲမှာ ဝတပ်သားတွေအပါအဝင် စုစုပေါင်း လူ အယောက် ၂၀ လောက် အဆိပ်သင့်ခဲ့ပါတယ်။

အဲဒီလို အဆိပ်သင့်ခဲ့တဲ့သူတွေကို ထိုင်းနိုင်ငံဘက်မှာ ဆေးကုသမှုပေးခဲ့ပြီး အဲဒီလူတွေထဲက ၁၀ယောက်က သက်သာလို့ ပြန်ရောက်နေပြီလို့ ဝတပ်ဖွဲ့က ပြောခွင့်ရ ဦးညီရမ်းက ဘီဘီစီကို ပြောပါတယ်။

"ဝပြည်နယ်တောင်ပိုင်း ခမ်းပါမြို့နယ်မှာ ဖြစ်တာ။ အစာအဆိပ်သင့်တာ မဟုတ်ပါဘူး။ မြက်ဖျန်းဆေးတွေ ရေနဲ့ရောပါပြီးမှ သူတို့ သောက်မိတယ်ထင်တယ်။ အသက်အန္တရာယ်တော့ မရှိပါဘူး။ ကျွန်တော်တို့ ပြည်သူတွေပါပဲ။ ဖြစ်တာက မနေ့က နေ့လယ် ဖြစ်တာ။ ဖြစ်ဖြစ်ချင်း ယိုးဒယား ဘက်ကမ်းမှာ သွားကုတယ်။ ၁၀ ယောက်တောင် ပြန်လာပြီ။ ကျန်တဲ့ ၁၀ ယောက် မနက်ဖြန် ပြန်လာမယ်"

အခုလို ဖြစ်ခဲ့တဲ့နေရာတလျောက်ဟာ ဝ ပြည်သွေးစည်းညီညွတ်ရေးတပ်မတော်က တပ်သားတွေအများစုနေထိုင် တဲ့နေရာတွေဖြစ်လို့ ရေသောက်မိပြီး အဆိပ်သင့်တဲ့သူတွေ အများစုကတော့ ဝ တပ်သားတွေ ဖြစ်တယ်လို့ ဝဒေသ တောင်ပိုင်း ဆက်ဆံရေးမှူး ဦးစံလောက်က ဘီဘီစီကိုပြောပါတယ်။

လယ်သမားတွေ ဖျန်းတဲ့ မြက်ဖျန်းဆေးပါတဲ့ရေကို ရဲဘော်တွေ မသိလို့ သောက်မိရာက အဆိပ်သင့်တာလို့လည်း သူက ပြောပါတယ်။

ထိုင်းနဲ့မြန်မာ နယ်စပ်က ရော်ဘာစိုက်ခင်း တစ်ခု
အခုအသုံးပြုကြတဲ့ မြက်ဖျန်းဆေးတွေကို ဝတောင်ပိုင်းမှာ ပုံမှန်သုံးစွဲနေကြတဲ့ ဆေးတွေဖြစ်ပြီး အဲဒီဆေးတွေက မိုးရေနဲ့အတူ သောက်သုံးရေအဖြစ်သုံးနေတဲ့ ရေထဲကိုပါသွားရာက အခုလိုဖြစ်တာလို့ ဦးစံလောက်က ရှင်းပြပါတယ်။

ဒီလို အဆိပ်သင့်တာ ဖြစ်ခဲ့ပေမဲ့ ဆေးဖျန်းတဲ့သူတွေကို ဝ တပ်ဖွဲ့ကနေပြီး စုံစမ်းစစ်ဆေးတာတွေလုပ်ဖို့ မရှိဘူးလို့ သူကဆိုပါတယ်။

အခုလိုအဆိပ်သင့်တာအပါအဝင် ဒေသခံ အများစုထိခိုက်မှုဖြစ်ခဲ့တာဟာ ဝဒေသမှာ အခုနှစ်အတွင်း ဒုတိယအကြိမ်မြောက်ဖြစ်ပါတယ်။ အခုဖြစ်ရပ်မှာတော့ လူအသေအပျောက်မရှိခဲ့ပါဘူး။

မတ်လအတွင်းကဖြစ်ခဲ့တဲ့ တရုတ်နိုင်ငံသားပိုင် ဆောက်လုပ်ရေးလုပ်ငန်းက သိုလှောင်ထားတဲ့ ဂက်စ်အိုးတွေ ပေါက်ကွဲမှုမှာတော့ လူ ၁၆ဦးအထိသေဆုံးခဲ့ပါတယ်။ ဒါပေမဲ့ အဲဒီသေဆုံးမှုနဲ့ ပတ်သက်ပြီးတော့ မတော်တဆမှုလို့ သတ်မှတ်ခဲ့ပြီး အရေးယူတာတွေမလုပ်ခဲ့ပါဘူး။

BBC Burmese
https://www.bbc.com

အေးသာယာမြို့၌ အမျိုးသားတစ်ဦးကြိုးဆွဲချသေဆုံး


တောင်ကြီး၊ ဇူလိုင် ၃၀

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့၊ ရပ်ကွက် (၄)၊ အထက(၁)ကျောင်း နောက်ဖေးလမ်းကြားရှိ စိန်ပန်းပင်မှာ ဇူလိုင်လ၂၉ရက် မနက်၁၀နာရီ အချိန်က အမျိုးသားတစ်ဦး ကြိုးဆွဲချ သေဆုံးမှု ဖြစ်ပွားခဲ့တယ်လို့ သိရပါတယ်။

အေးသာယာမြို့၊ ရပ်ကွက် (၆) နေ ကိုမျိုးလွင်၊ (၄၇)နှစ်ဟာ ဇူလိုင်လ၂၉ရက်နေ့ မနက် ၉နာရီ အချိန်ခန့်မှာ ရပ်ကွက် (၄)၊ အထက ၁ ကျောင်းအနောက်ဖက်ရှိ လမ်းဘေးစိန်ပန်းပင်မှာ လက်သန်းလုံးခန့်ရှိသော ပလပ်စတစ်ကြိုး ချည်ထားပြီးမြေပြင်မှ ခြေထောက် (၄ပေ ၆ လက်မ)အကွာမှာ ကြိုးဆွဲချ သေဆုံးနေတာ ဖြစ်တယ်လို့ သိရပါတယ်။

"အမှုကတော့ သေမှုသေခင်းဖွင့်ထားတယ်။ မိသားစုကိစ္စအဆင်မပြေမှုလို့ ယူဆရပါတယ်။ သူ့အင်္ကျီထဲမှာ အိမ်ထောင်ရေး အဆင်မပြေတဲ့အကြောင်း ရေးထားတဲ့ သေတမ်းစာတွေ့ရပါတယ်" လို့ တောင်ကြီးမြို့နယ် ရဲတပ်ဖွဲ့မှုး ရဲမှူးမောင်မောင်နိုင်က ရွှေတြိဂံဒေသသတင်းဌာနကို ပြောပါတယ်။

သေဆုံးသူရဲ့ အင်္ကျီ ယာဘက်အိတ် အတွင်းမှာ သေဆုံးသူကိုယ်တိုင် ရေးသားထားတဲ့ သေတမ်းစာ စာတစောင်တွေ့ရှိရပြီး အဆိုပါသေဆုံးသူမှာ ၄င်းတို့ အိမ်ထောင်ရေး အဆင်မပြေမှုနဲ့ ပတ်သက်လို့ ရေးသားထားခဲ့တာဖြစ်တယ်လို့ သိရပါတယ်။

အဆိုပါဖြစ်စဉ်နဲ့ ပါတ်သက်ပြီး ဓမ္မတာအတိုင်း သေဆုံးခြင်းဟုတ်/မဟုတ် စစ်ဆေးနိုင်ရန် အေးသာယာနယ်မြေရဲစခန်းမှာ သေမှုသေခင်း ရေးဖွင့်စစ်ဆေး ဆောင်ရွက်လျက်ရှိတယ်လို့ သိရပါတယ်။

သတင်း - ရဲရင့်ဇွဲ(ရွှေတြိဂံ)
ရွှေတြိဂံဒေသသတင်းလွှာ
https://www.facebook.com/GoldenTriangleRegionalNews

ဖွဲ့စည်းပုံပြင်ဆင်ရေး အစီရင်ခံစာအပေါ် တပ်မတော်သားကိုယ်စားလှယ်တွေ မဆွေးနွေးတာကြောင့် အချိန်ကုန် သက်သာတယ်လို့ NLD အမတ်ပြော


နေပြည်တော်၊ ဇူလိုင် ၃၀

ဖွဲ့စည်းပုံအခြေခံ ဥပဒေ ပြင်ဆင်ရေး ပူးပေါင်းကော်မတီရဲ့ အစီရင်ခံစာကို တပ်မတော်သား လွှတ်တော်ကိုယ် စားလှယ်တွေက မဆွေနွေးတော့တာကြောင့် အချိန်ကုန်သက်သာ သွားတယ်လို့ NLD အမတ် ဦးအောင်ကြည် ညွှန့်က ပြောဆိုလိုက်ပါတယ်။

ဒီကနေ့ ကျင်းပတဲ့ ဒုတိယအကြိမ် ပြည်ထောင်စုလွှတ်တော် ၁၃ ကြိမ်မြောက် ပုံမှန်အစည်းအဝေး ဆဋ္ဌမနေ့ အစီအစဉ်အပြီးမှာ မီဒီယာတွေကို ဖြေကြားခဲ့တာ ဖြစ်ပါတယ်။

" အခုဟာက ပြန်ပြီးတော့ နုတ်ထွက်တယ်ဆိုတော့ အဲ့ဒီလို အခြေအနေမျိုး ပြန်ပြီးတော့ မပေါ်ပေါက်နိုင်တော့ ဘူးလို့ မှန်းဆလို့ရတာပေါ့။ အချိန်ကုန် သက်သာသွားတာပေါ့။ နောက်ပြီးတော့ အကြိတ်အနယ် ဖြစ်စရာတွေ အခုခံ ဖြစ်စရာတွေ မရှိတော့ဘူးဆိုတော့ လုပ်ငန်းစဉ်လေးမှာ ဒီအဆင့် တစ်ဆင့်မှာတော့ အချိန်တိုတိုနဲ့ ပြီး သွားနိုင်တာပေါ့ " လို့ မီဒီယာများကို ဖြေကြားလိုက်တာပါ။

ဦးအောင်ကြည်ညွှန့်က တပ်ကိုယ်စားလှယ်တွေက မဆွေးနွေးတော့ဘူးလို့ ဆုံးဖြတ်လိုက်တာကြောင့် အချိန် အားဖြင့် သက်သာသွားစေသလို အခုအခံ ပြုလုပ်တာမျိုးလဲ စိုးရိမ်နေကြသလို ဖြစ်မလာနိုင်တော့ဘူးလို့ ပြော ဆိုခဲ့ပါတယ်။


တပ်မတော်သား ကိုယ်စားလှယ်တစ်ဦးဖြစ်သူ ဗိုလ်မှူးချုပ် မောင်မောင်ကတော့ "လွှတ်တော် အစီအစဉ်တိုင်း ပါပဲ။ အားလုံးသတင်းတွေမှာ ပါပြီးသားပဲလေ။ ကျွန်တော်တို့ အစီအစဉ်တိုင်းပဲ ဆက်ကြည့်ပါ။ သီးခြားပြောစ ရာမရှိပါဘူး။ ကျွန်တော်တို့ အနေနဲ့ကတော့ ကျွန်တော်တို့ အစီအစဉ်တိုင်း ဆက်လုပ်မှာ ဖြစ်တယ်။ အာဂျင်ဒါမှာ ပါတယ်လေ ကျွန်တော်တို့ မဆွေးနွေးဘူးဆိုပြီးတော့" လို့ ပြောပါတယ်။

အခြေခံဥပဒေ ပြင်ဆင်ရေး အစီရင်ခံစာကို ဆွေးနွေးဖို့ တပ်မတော်သား ကိုယ်စားလှယ် (၇၈) ဦးက အမည် စာရင်း တင်သွင်းခဲ့ပေမယ့် လက်ရှိမှာတော့ တပ်မတော်ဘက်မှ ဆွေးနွေးမယ့် အမည်စာရင်းကို ပြန်လည်ရုပ် သိမ်းသွားခဲ့တာ ဖြစ်ပါတယ်။


ရွှေတြိဂံဒေသသတင်း
https://www.facebook.com/GoldenTriangleRegionalNews

အလုပ်သမား လုပ်အားခ သတင်းရေးသားသည့် လားရှိုး သတင်းထောက် ပို့ကုန်၊သွင်းကုန် ဥပဒေဖြင့် တရားစွဲခံရ


ဇူလိုင်လ ၃၀ ရက် ၂၀၁၉

သျှမ်းပြည်နယ် မြောက်ပိုင်း လားရှိုးမြို့ ရှိ Gold Luck Water Park ရေကစားကွင်း အလုပ်သမား လုပ်အားခ မရသေးသည့် ကိစ္စ နှင့်ပတ်သက်ပြီး သတင်းရေးသားသည့် သတင်းထောက် ခွန်ဇော်ဦး ပို့ကုန်၊သွင်းကုန် ဥပဒေ နှင့် အမှုဖွင့်ခံရကြောင်း သတင်းရရှိသည်။

လွန်ခဲ့သည့် ဇူလိုင် ၂၂ ရက်နေ့တွင် Gold Luck Water Park ရေကစား ကွင်းမှ အလုပ်သမားများ လုပ်အားခ မရရှိသေးသည့် ကိစ္စနှင့် ပတ်သက်ပြီး ပိုင်ရှင် ဦးရဲနိုင်ဆီ အင်တာဗျူး သွားရာ မှ အမှုဖွင့်ခံခဲ့ရခြင်းဖြစ်ကြောင်း သတင်းလိုက်ပါ ယူသည့် အလွတ်တန်းသတင်းထောက် မြတ်မိုးသူ က သျှမ်းသံတော်ဆင့် သို့ ပြောသည်။

Gold Luck Water Park အလုပ်သမား များ လုပ်အားခ မရရှိကာ အလုပ်သမားရုံးကို တိုင်ကြားနေသည် ဟု ဇူလိုင် ၂၂ ရက်နေ့တွင် သတင်းထောက် ခွန်ဇော်ဦး က သူ၏ လူမှုကွန်ရက်စာမျက်နှာပေါ်တွင်ရေးသားခဲ့သည်။

ထိုရေးသားမှုကြောင့် Gold Luck Water Park ပိုင်ရှင် ဦးရဲနိုင် က မကျေမနပ်ဖြစ်ကာ အင်တာဗျူးပေးစဉ်တွင် အခြေအတင်း စကားများရာမှ၊ သက်ဆိုင်ရာ အာဏာပိုင်ဆီ ဖုန်းဆက်ကြောင်း သတင်းထောက် မမြတ်မိုးသူ က ပြောသည်။

“ကျမ တို့ ဝင်ဝင်ချင်းပဲ။သူ(ဦးရဲနိုင်) က သူနာမည်နဲ့ ဖေ့ဘွတ်စ်ပေါ်တင်တာလဲ လို့ စပြောပါတယ်။ နောက် သူ့တပည့်တွေကို ခြံတံခါးတွေ ပိတ်ခိုင်းတယ်။ မင်း(ခွန်ဇော်ဦး)ကို တရားစွဲရုံမကဘူး ထောင်ပါချမယ်လို့ လည်းခြိမ်းခြောက်ပါတယ်” ဟု မမြတ်နိုးသူ က ဆိုသည်။

နေ့စားအလုပ်သမားများ လစာ မရရှိမှု နှင့် ပတ်သတ်ပြီး သွားရောက် အင်တာဗျူးသည်ကိုလည်း ရုပ်သံ၊ဗွီဒီယို မရိုက်ခိုင်းခဲ့ကြောင်း၊ အင်တာဗျူး မပြီးခင် အချိန်တွင် ယာဉ်ထိန်းရဲ မှ ခြံထဲသို့ ဝင်ရောက်ကာ ဦးရဲနိုင်မှ ကားများ လိုင်စင်ရှိ၊ မရှိ အားလုံးစစ်ပါဆိုပြီး ပြောဆိုခဲ့ကြောင်း သိရသည်။

“ ကျမ က အင်တာဗျူးလာတာ လို့ပြောတော့ သူ (ဦးရဲနိုင်) က ဓာတ်ပုံမရိုက်၊ ဗွီဒီယိုမရိုက်ခိုင်းဘူး။ ရီကော်တာနဲ့ ပဲလုပ်ခဲ့တယ်။ အင်တာဗျူးမပြီးခင်မှာပဲ ယာဉ်ထိန်းရဲက လာတယ်။ ကျမတို့ စီးလာတဲ့ ကားက လိုင်စင်မဲ့ဆိုတာ သိနေတော့ စစ်စရာမလို့ပါဘူးလို့ ကျမ ယာဉ်ထိန်းရဲကို ပြောလိုက်တယ်။နောက် သော့ ပေးလိုက်ပါတယ်” ဟု မမြတ်မိုးသူက ပြောသည်။

ထို့ပြင် သျှမ်းပြည်နယ် မြောက်ပိုင်း လားရှိုး အခြေစိုက် ဒီဗွီဘီ သတင်းထောက် ခွန်ဇော်ဦး ကို ယာဉ်ထိန်းရဲ မှခေါ်ဆောင်သွားကာ ဇွန် ၂၈ ရက်နေ့ တွင် လားရှိုး အမှတ်(၁) ရဲစခန်းမှ ပ (၂၈၀/၂၀၁၉ ) ပို့ကုန်၊ သွင်းကုန် ဥပဒေ ဖြင့် အရေးယူ အမှုဖွင့်ထားကြောင်း ရဲစခန်းမှ သိရသည်။

“ ဒီကိစ္စ က နယ်သတင်းထောက်တွေကို တဖက်လှည့် ခြိမ်းခြောက်လိုက်တာပါပဲ။ သတင်းနဲ့ မဆိုင်တာ ဆွဲ ထည့်လိုက်တာပါပဲ။ သတင်းထောက် အနေနဲ့ အရမ်းထိခိုက်တယ်” ဟု မမြတ်နိုးသူကဆိုသည်။

သတင်းထောက်အား လိုင်စင်မဲ့ကားအမှုဖြင့်ဖမ်းဆီးအရေးယူခြင်းအပေါ် မြို့နယ်အသီးသီးရှိ သတင်း ထောက်များအဖွဲ့များက ကန့်ကွက်ရှုပ်ချကြောင်းကြေငြာချက်များထုတ်ပြန်ခဲ့ပြီး သတင်းသမားများခြိမ်းခြောက်ခံနေရမှုအပေါ် သတင်းမီဒီယာအဖွဲ့အစည်းအသီးသီးမှ မြန်မာနိုင်ငံသတင်းမီဒီယာကောင်စီသို့လည်း တင်ပြသွားမည်ဖြစ်ကြောင်းသိရသည်။
သျှမ်းပြည်နယ်အတွင်းရှိ လိုင်စင်မဲ့ကားများမှာ ရောင်းဝယ်ရာတွင်ဈေးသက်သာပြီး ဒေသတွင်းသွားလာရလွယ်ကူသဖြင့် သျှမ်းပြည်တွင်းကားများ ၈၀ ရာခိုင်နှုန်း မှာ လိုင်စင်မဲ့ ကားများဖြစ်ကြောင်းသိရသည်။

Panglong(Burmese)
https://www.facebook.com/ShanNewsBurmese

လုပ်အားခ သိန်းတရာ ကျော် မရသေးသည့် Gold Luck Water Park လုပ်ငန်းရှင်ကို အလုပ်သမားများ ဆန္ဒပြ


ဇူလိုင်လ် ၃၀ ရက် ၂၀၁၉

သျှမ်းပြည်နယ် မြောက်ပိုင်း လားရှိုးမြို့ Gold Luck Water Park လုပ်ငန်းရှင် မှ အလုပ်သမားများကို လုပ်အားခ သိန်းတရာကျော် ပေးချေရန်ကျန်ရှိမှု နှင့် ပတ်သက်ပြီး အလုပ်သမားများက ဆန္ဒထုတ်ဖော်တောင်းဆိုကြကြောင်း သိရသည်။

ဇူလိုင်လ ၃၀ ရက် ယနေ့ မနက်ပိုင်း ၉ နာရီခွဲက ရပ်ကွက်(၁) ဗျူဟာလမ်းဆုံ မှ မြို့တော် ခန်းမရှေ့အထိ လုပ်အားခ မရသည့် Gold Luck Water Park မှအလုပ်သမား များက စီတန်းလှည့်လည် ဆန္ဒထုတ်ဖော်ခဲ့သည်။

Gold Luck Water Park ပိုင်ရှင် ဦးရဲနိုင် မှ ဆေးသုတ်လုပ်အားခ များအား အမြန်ဆုံးရှင်းပေးရန်၊ နေ့စားအလုပ်သမားများအား အနိုင်ကျင့်စော်ကားခြင်း ဘဝမှ အမြန်ဆုံးလွှတ်မြောက်ပေးရန် ၊ ဦးရဲနိုင်မှ မိသားစုချင်းကိုယ်ချင်းစာစိတ်ထားပေးရန်စသည့် ပို့စတာများ ကိုင်ဆောင်ပြီး ဆန္ဒ ထုတ်ဖော်ခဲ့ကြသည်။

“ ကျနော်တို့ ဆေးသုတ် အလုပ်သမား ၁၅ယောက် လုပ်အားခ သိန်း ၁၃၀ကျော်မရသေးဘူး။ ၃လပိုင်း(မတ်) လကတည်းက ရရမယ့် ငွေတွေပါ” ဟု ဆန္ဒပြသည့် ခေါင်းဆောင် ကိုယောဟန် က ပြောသည်။

ရေပန်းဥယျာဉ် ပိုင်ရှင် မှ လုပ်အားခ မပေးဆောင်သည့် ကိစ္စနှင့် ပတ်သက်ပြီး ဇူလိုင် ၂၂ရက်နေ့တွင် အလုပ်သမားညှိနှိုင်းဖြန်ဖြေရေး ကော်မတီ ကို တင်ပြထားကြောင်း ကိုယောဟန် က ပြောပြသည်။

ထို့ပြင် ဇူလိုင် ၂၈ ရက်နေ့တွင် Gold Luck Water Park ပိုင်ရှင် ဦးရဲနိုင်မှ လုပ်အားခ ကိစ္စ ရှင်းရန် အတွက် သတင်းစာတွင် ထည့်သွင်း ကြေငြာ ခဲ့သည် ဟု သိရသည်။

“ ကျနော် တို့ကို တွေ့ဖို့ အတွက် သတင်းစာကနေ ကြေညာတယ်။ ကျနော်တို့လုံခြုံရေးအရ ကျနော်မသွားနိုင်ဘူး။ ကျနော်တို့ရှေ့မှာတင် သတင်းသမား တယောက်ဖြစ်ခဲ့ပြီးပြီ။ ကျနော်ကတော့ အလုပ်သမား ဖြန်ဖြေရေး ကော်မတီ ကနေဘဲ ရှင်းမယ်လို့ ပြောထားပါတယ်” ဟု ကိုယောဟန် က ဆိုသည်။

ရေပန်းဥယျာဉ်တွင် ဆေးသုတ် သည့် အလုပ်သမား အလုပ်လစာ စာရင်းဇယား ရှင်းလင်းရန် အတွက် မြန်မာအလင်းသတင်းစာ မှတဆင့် ခေါ်ခဲ့ကြောင်း၊ ငွေကြေးများကို ရှင်းပေးမည် ဟု Gold Luck Water Park ပိုင်ရှင် ဦးရဲနိုင် က သျှမ်းသံတော်ဆင့် ကို ပြောသည်။

“ ကျနော် အနေနဲ့ ကန်ထရိုက် ကိုယောဟန် အနေနဲ့ စာရင်းဇယားတွေ လာရှင်းဖို့ သတင်းစာကနေခေါ်ထားတယ်။ မရှင်းဘူးဆိုတာတော့ မဟုတ်ပါဘူး။ ဒါကတော့ လုပ်ငန်း သဘော ဆိုတာ ရှိသေးတယ်။ ရှင်းမှာပါ” ဟု ဦးရဲနိုင် က ဆိုသည်။

အဆိုပါ ဆေးသုတ် လုပ်အားခ မရသေးသည့် အလုပ်သမား သတင်း ရေးသားရန် Gold Luck Water Park ပိုင်ရှင် ဦးရဲနိုင် အား ဒီဗွီဘီ အလွတ်တန်းသတင်းထောက် ခွန်ဇော်ဦး နှင့် မြန်မာတိုင်းလ် အလွတ်တန်းသတင်းထောက် မမြတ်မိုးသူတို့ ဇူလိုင် ၂၂ ရက်နေ့တွင် သွားရောက် တွေ့ဆုံမေးမြန်းမှုပြုခဲ့သည်။

ဇူလိုင်လ ၂၈ ရက်နေ့တွင် သတင်းထောက် ခွန်ဇော်ဦး ကို လိုင်စင်မဲ့ ကားမောင်းနှင်းမှုဖြင့် ယာဉ်ထိန်းရဲ က အရေးယူတိုင်ကြားခဲ့ကြောင်း သိရသည်။

Panglong(Burmese)
https://www.facebook.com/ShanNewsBurmese

လူမဲအများစုနေထိုင်ရာ Baltimore မြို့ နဲ့ လွှတ်တော်အမတ်အပေါ် Trump ဆက်လက်ဝေဖန်

လွှတ်တော်အမတ်Elijah Cummings
အမေရိကန်သမ္မတ Donald Trump ဟာ အာဖရိကနွယ်ဖွား အမေရိကန်နိုင်ငံသား အများစုနေထိုင်တဲ့ Baltimore မြို့တော်နဲ့ အဲဒီဒေသ ကိုယ်စားပြု ထင်ရှားတဲ့ လွှတ်တော်အမတ်Elijah Cummings ကို ဦးတည်တိုက်ခိုက်မှုတွေ ဆက်လုပ်နေတာ ဖြစ်ပြီး ဒါဟာ လူမျိုးရေးခွဲခြားမှု တခု အဖြစ် Trump ကိုဝေဖန်သူတချို့ ကပြောဆိုနေကြတာပါ။

လွှတ်တော်အမတ် Elijah Cummings ဟာ သမ္မတ မိသားစု ဝင်တွေ အပါအဝင် အိမ်ဖြူတော် အရာရှိတွေရဲ့ ဆက်သွယ်မှုတွေနဲ့ ပတ်သက်ပြီး အချက်လက်တွေ ရယူဖို့ ကြိုးစားနေတဲ့ အောက်လွှတ်တော်ရဲ့ အင်အားကြီးတဲ့ စောင့်ကြည့်ရေးနဲ့ ပြုပြင်ပြောင်းလဲရေး ကော်မတီဝင် တဦးဖြစ်ပါတယ်။

လူမဲအောက်လွှတ်တော်အမတ်ဖြစ်တဲ့ Cummings ကို ဝေဖန်တိုက်ခိုက်နေပြီး သူဟာ ရက်စက်ပြီး ဗိုလ်ကျတဲ့ သူအဖြစ် တိုက်ခိုက်ပြောဆိုသလို သူ့ရဲ့ မဲဆန္ဒနယ်မြေ Baltimore ဟာလည်း ရွံရှာဖွယ်ဖြစ်ပြီး ကြွက်တွေ သောင်းကျန်းနေတဲ့ နယ်မြေဖြစ်တယ်လို့ Trump ဟာ သူ့တွစ်တာကနေ တဆင့်တိုက်ခိုက်ပြောဆိုခဲ့တာ ဖြစ်ပါတယ်။

သမ္မတကို ဝေဖန်နေသူ နောက် တဦးဖြစ်တဲ့ Baptist တရားဟောဆရာလည်းဖြစ် ပြည်သူ့အခွင့်ရေးလှုပ်ရှားတဲ့ ထင်ရှားသူ Al Sharpton ကိုလည်း Trump က တနင်္လာနေ့ အစောပိုင်းမှာ တွစ်တာကတဆင့် ပြစ်တင်ဝေဖန်ခဲ့ပါတယ်။

Baltimore မှာ ရောက်ရှိနေတဲ့ Al Sharpton က Trump ဟာ ကလေးဆန်ပြီး သူ့ကို တယောက်ယောက်က တခုခု ပြောတိုင်း ပြန်တုန့်ပြန်လေ့ ရှိကြောင်း ခံနိုင်ရည် နဲပြီး ရင့်ကျက်မှု မရှိကြောင်း လူမဲတွေနဲ့ အသားရောင်ရှိ လူမျိုးတွေ အပေါ် အထူးသဖြင့် တိုက်ခိုက် ပြောဆိုလေ့ ရှိကြောင်း ဝေဖန်လိုက်ပါတယ်။

တနင်္လာနေ့ ညနေပိုင်းက Trump ဟာ ဆင်းရဲမွဲတေတဲ့ မြို့တွေက တရားဟော ဆရာ ၂၀ ခန့်နဲ့ ၂ နာရီကြာ တွေ့ဆုံခဲ့ပါတယ်။ အခုလို တွေ့ဆုံမှု အတွင်း သူက စကားသိပ်မပြောပဲ ပိုပြီး နားထောင်ခဲ့တယ်လို့ အစည်းဝေးကို တက်ရောက်ခဲ့တဲ့ အာဖရိကန် အမေရိကန် တရားဟော ဆရာများ ဆိုင်ရာ ညွန့်ပေါင်းအဖွဲ့ ဥက္ကဌာ Bill Owens က ပြောပါတယ်။ အခုလို တွေ့ဆုံမှုဟာ Cummings ကို မတိုက်ခိုက်ခင်မှာ စီစဉ်ထားတာ ဖြစ်ပါတယ်။

ဗွီအိုအေ (မြန်မာပိုင်း)
https://burmese.voanews.com

မြန်မာလိပ်ငယ်တွေအပေါ် ပလပ်စတစ်ရဲ့ အန္တရာယ်

စွန့်ပစ်အမှိုက် ပလပ်စတစ်များ (credit Friedor Jeske/Thant Myanmar)
မြန်မာနိုင်ငံမှာ လိပ်ပေါက်ကလေးတွေ အတွက် အန္တရာယ်သိပ်ကြီးတဲ့ အနေအထားရှိနေချိန်မှာပဲ နောက်ထပ်တခု အဖြစ် ပလပ်စတစ် အန္တရာယ်ပါ တိုးလာနေတယ်လို့ စစ်တမ်း အသစ်တခုမှာ ဖေါ်ပြထားပါတယ်။

ဒီစစ်တမ်းကို Fauna & Flora International (FFI) နဲ့ သန့်မြန်မာ အဖွဲ့တို့ ပူးတွဲပြီး ဧရာဝတီမြစ်ဝကျွန်းပေါ်ဒေသက သောင်ပြင်တွေမှာ ကောက်ယူခဲ့တာ ဖြစ်ပြီး အဲဒီမှာ တနေ့ကို ပလပ်စတစ် တန်ချိန်ပေါင်း ၁၁၉ တန်အထိ တွေ့နေရတယ်လို့ ဖေါ်ပြထားပါတယ်။


လိပ်ပေါက်ကလေးတွေ အတွက် အကောင်မပေါက်ခင် သူတို့ရဲ့ အသိုက်တွေဟာ ပူပြင်းတဲ့ ရာသီဥတု ဒဏ်ကို ခံကြရသလို လိပ်ဥတူးသူတွေရဲ့ အန္တရာယ်ပါ ရှိနေတာ ဖြစ်ပြီး သူတို့လက်က လွှတ်သွားရင်တောင် ပေါက်ခါစ အကောင်လေးတွေ ဟာ အခုဆို ပလပ်စတစ် ဘူးအဖုံးတွေ၊ ကော်ဖီမှုန့်ထည့်တဲ့ အိတ်တွေနဲ့ အစားအသောက် ထည့်တဲ့ အိတ်တွေနဲ့ ပြည့်နေတဲ့ သောင်ပြင်မှာ အသက်မသေအောင် ရုန်းကန်ပြီး ပင်လယ်ပြင်ထဲ အရောက် သွားနေရတာပါ။


ဧရာဝတီအထက်ပိုင်းမှာ နေ့စဉ် ပလပ်စတစ် တန်ချိန် ၅၈ တန်လောက် ရှိနေသလို မြစ်ဝကျွန်းပေါ်အောက်ပိုင်းဒေသက တနေ့ ၃၂ တန် နဲ့ မြို့တော် ရန်ကုန်တဝိုက် မှာတော့ တနေ့ကို ၂၉ တန်လောက် ရှိနေတယ်လို့ စစ်တမ်းမှာ ဖေါ်ပြပါတယ်။ ဒါဟာ ပလပ်စတစ် စွန့်ပစ်ပစ္စည်း ဆိုင်ရာ စီမံခန့်ခွဲမှု ညံ့ဖျင်းတာကြောင့် ဖြစ်နိုင်တယ်လို့ ဆိုပါတယ်။

တွေ့ရတဲ့ ပလပ်စတစ် အမျိုးအစားတွေထဲမှာ အဓိကက ပလပ်စတစ် အမာစားနဲ့ လုပ်ထားတဲ့ ဘူးအဖုံးတွေဖြစ်ပြီး ကျန်ပလပ်စတစ်တွေက အပျော့စားနဲ့ လုပ်ထားတဲ့ အစားအစာ ထုပ်ပိုးတာနဲ့ တခါသုံး အထုပ်ကလေးတွေ ဖြစ်ပါတယ်။ မိုးရာသီမှာဆို ခြောက်သွေ့ရာသီထက် ပလပ်စတစ်အမှိုက် ၁၇ ဆ ပိုတွေ့ရကြောင်းလည်း ဖေါ်ပြထားပါတယ်။

ဗွီအိုအေ (မြန်မာပိုင်း)
https://burmese.voanews.com

တရုတ်လက်နက် သန်း ၄ဝ ဖိုး ကမ္ဘောဒီးယား ဝယ်ယူ

(ကမ္ဘောဒီးယား ဝန်ကြီးချုပ် ဟွန်ဆင်နဲ့ တရုတ်သမ္မတ ရှီကျင့်ပင်တို့ ၂၀၁၉၊ ဧပြီ ၂၉ ရက်နေ့က တရုတ်နိုင်ငံ၊ ဘေဂျင်းမှာ တွေ့ဆုံခဲ့စဉ်)
ကမ္ဘောဒီးယား ဝန်ကြီးချုပ် ဟွန်ဆင်က တရုတ်နိုင်ငံကနေ လက်နက်ခဲယမ်း အရေအတွက် ထောင်ပေါင်းများစွာ ဝယ်ယူခဲ့တယ်လို့ ဒီကနေ့ ထုတ်ပြန်ပြောဆိုပါတယ်။

အဲဒီ လက်နက်တွေကို မိမိတို့ နိုင်ငံ တင်ပို့လိုက်ပြီဖြစ်တယ်။ ဒီနှစ်အတွင်း တရုတ်ပြည်ကနေ လက်နက်ခဲယမ်း အမေရိကန် ဒေါ်လာ သန်း ၄ဝ ဖိုး ဝယ်ယူခဲ့တယ်လို့လည်း သူက ပြောပါတယ်။

ကမ္ဘောဒီးယားဟာ တရုတ်ပြည်ကနေ အရင်ကလည်း ဒေါ်လာ သန်း ၂၉ဝ ဖိုး လက်နက်တွေ ဝယ်ယူခဲ့ပြီး ဖြစ်ပါတယ်။

RFA Burmese
https://www.facebook.com/rfaburmese/

လွှတ်တော်အမတ်ကို တရားစွဲတဲ့ မိန်းကလေး လုပ်ကြံခံရဟု မိသားစုပြောကြား

(အာဏာရ BJP ပါတီ က လွှတ်တော်အမတ် Kuldeep Singh Sengar ကို တွေ့ရစဉ်)
အိန္ဒိယနိုင်ငံမှာ ထိပ်တန်း နိုင်ငံရေးသမား တစ်ဦးက သူမကို အဓမ္မပြုကျင့်ခဲ့တယ်ဆိုပြီး တရားစွဲခဲ့တဲ့ ဆယ်ကျော်သက်ရွယ် မိန်းကလေးတစ်ဦး ကားတိုက်မှုကြောင့် အသက်ဘေးလုနေရပြီး အဲဒီကိစ္စဟာ သာမန် ကားတိုက်မှုမဟုတ်ဘဲ တမင်ကြံရွယ်လုပ်ဆောင်တာဖြစ်တယ်လို့ သတင်းထွက်လာတဲ့ အတွက် ရဲတပ်ဖွဲ့က စုံစမ်းစစ်ဆေးနေပါတယ်။ အဲဒီ အသက် ၁၉ နှစ်ရှိတဲ့ မိန်းကလေး လိုက်ပါလာတဲ့ ကားကို ကုန်တင်ကားတစ်စင်းက တနင်္ဂနွေနေ့က ဝင်တိုက်ခဲ့ရာမှာ သူ့ရဲ့ ဆွေမျိုး နှစ်ဦးသေဆုံးပြီး သူနဲ့ သူ့ရှေ့နေက ဒဏ်ရာပြင်းထန်စွာ ရရှိခဲ့ပါတယ်။

အာဏာရ BJP ပါတီ က လွှတ်တော်အမတ် Kuldeep Singh Sengar ကူလ်ဒိ ဆင်း ဆင်ဂါး က သူမကို ပြီးခဲ့တဲ့ ၂ဝ၁၇ မှာ မုဒိန်းကျင့်ခဲ့တယ်လို့ မ်ိန်းကလေးက တိုင်ကြားခဲ့ရာမှာ ရဲစခန်းက ပထမပိုင်းမှာ အမှုကို လက်မခံခဲ့ပါဘူး။ အမှုဖွင့်ဖို့ကြိုးစားခဲ့တဲ့ သူမရဲ့ ဖခင်ကို ရဲတပ်ဖွဲ့က ဖမ်းဆီးခဲ့ပြီး လွှတ်တော်အမတ် ဆင်ဂါး ရဲ့ ညီက အချုပ်ခန်းထဲ ဝင်ရောက်ရိုက်နှက်လို့ သေဆုံးခဲ့ရပါတယ်။

မိန်းကလေးကည်း သူမကို သူမ မီးရှို့ဆန္ဒပြခဲ့ပါတယ်။ အဲဒီနောက်မှာ အိန္ဒိယ နိုင်ငံတစ်ဝန်း ဆန္ဒပြကြတဲ့အတွက် ဒီအမှုကို အစိုးရက ပြည်ထောင်စု စုံစမ်းထောက်လှမ်းရေးအဖွဲ့ကို လွှဲပြောင်း တာဝန်ပေးခဲ့ပါတယ်။ ဖမ်းဆီးခံခဲ့ရတဲ့ အမတ် ဆင်ဂါး ကတော့ သူ့မှာ အပြစ်မရှိဘူးလို့ ငြင်းဆိုခဲ့ပါတယ်။

အခု ဖြစ်ပွားခဲ့တဲ့ ကားတိုက်မှုဟာ ကလေးမကို နှုတ်ပိတ်ရန် ရည်ရွယ်ပြီး လုပ်ကြံခဲ့တာဖြစ်တယ်လို့ မိသားစုဝင်တွေက ပြောပါတယ်။

အတိုက်အခံပါတီဝင်တွေက ဒီကိစ္စကို မနေ့က လွတ်တော်အစည်းအဝေး ကျင်းပနေစဉ် အော်ဟစ် ဆန္ဒပြကန့်ကွက်ခဲ့ကြတဲ့အတွက် အိန္ဒိယလွှတ်တော်ကို ခေတ္တ ရပ်နားထားခဲ့ရပါတယ်။

ကုန်တင်ကားမောင်းသူကို ရဲက အခု ဖမ်းဆီး စစ်ဆေးနေတယ်လို့ ပြောပါတယ်။

RFA Burmese
https://www.facebook.com/rfaburmese/

ကယ်လီဖိုးနီးယားပြည်နယ် မြောက်ပိုင်းတွင် ပွဲတော်တစ်ခုအတွင်း သေနတ်ပစ်ခတ်မှုကြောင့် လူ ၄ ဦးသေဆုံး၊ ၁၅ ဦး ဒဏ်ရာရ

Gilroy Garlic Festival ပွဲတော်မြင်ကွင်းအား တွေ့ရစဉ် (ဓာတ်ပုံ-အင်တာနက်)
ဆန်ဖရန်စစ္စကို၊ ဇူလိုင် ၂၉ ရက် (ဆင်ဟွာ)

အမေရိကန်နိုင်ငံ ကယ်လီဖိုးနီးယားပြည်နယ် မြောက်ပိုင်းရှိ Gilroy ကြက်သွန်ဖြူပွဲတော် (Gilroy Garlic Festival) နှစ်ပတ်လည်အခမ်းအနား၌ သေနတ်ပစ်ခတ်မှုဖြစ်ပွားခဲ့ရာ လူ ၄ ဦးသေဆုံးပြီး အခြားလူ ၁၅ ဦး ဒဏ်ရာရရှိခဲ့ကြောင်း Gilroy ရဲတပ်ဖွဲ့က သတင်းစာရှင်းလင်းပွဲတွင် ပြောကြားခဲ့သည်။

ပွဲတော်လာသူများက အခင်းဖြစ်ပွားရာနေရာမှ ကြောက်လန့်တကြား ထွက်ပြေးနေကြပြီး ပုန်းခိုရန်နေရာများ ရှာဖွေနေသည်ကို ရိုက်ကူးထားသည့် ဗီဒီယိုအား လူမှုမီဒီယာပေါ်တွင် ပြသထားသည်။

သေနတ်သမားက ဆီမီးအော်တိုရိုင်ဖယ်သေနတ်ဖြင့် လူများအား ပစ်ခတ်ခဲ့ကြောင်း မျက်မြင်သက်သေတစ်ဦးက ပြောခဲ့သည်။

အဆိုပါ ဖြစ်ရပ်နှင့်ပတ်သက်ဆက်နွယ်သူတစ်ဦးတစ်ယောက်ကိုမျှ ဖမ်းမိခဲ့ခြင်းမရှိကြောင်း သိရသည်။

ဇူလိုင်လ ၂၈ ရက်သည် သုံးရက်ကြာ ကျင်းပသည့် ပွဲတော်၏ နောက်ဆုံးရက်ဖြစ်ကြောင်း၊ ကြက်သွန်ဖြူချစ်သူများစွာအား မကြာခဏဆွဲဆောင်လျက်ရှိကြောင်း သိရသည်။

(Xinhua)
http://www.xinhuamyanmar.com

ကနေဒါနိုင်ငံရှိ နေအိမ်အတွင်း လူလေးဦးသေဆုံးနေသည်ကို တွေ့ခဲ့ရပြီးနောက် အမျိုးသားတစ်ဦး ဖမ်းဆီးခံရ

ကနေဒါနိုင်ငံတွင် အခင်းဖြစ်ပွားရာနေရာအား လုံခြုံရေးစည်းတားထားသည်ကို တွေ့ရစဉ် (ဓာတ်ပုံ-အင်တာနက်)
 အော့တဝါ၊ ဇူလိုင် ၂၉ ရက် (ဆင်ဟွာ)

ကနေဒါနိုင်ငံ အွန်တာရီယိုပြည်နယ် မာ့ခ်ဟမ်မြို့ရှိ နေအိမ်တစ်လုံးတွင် လူလေးဦး သေဆုံးနေသည်ကို တွေ့ရှိခဲ့ပြီးနောက် အသက် ၂၀ နှစ်အရွယ် အမျိုးသားတစ်ဦးအား ဇူလိုင်လ ၂၈ ရက် မွန်းလွဲပိုင်းက ထိန်းသိမ်းခဲ့ကြောင်း ကနေဒါရဲတပ်ဖွဲ့က ဇူလိုင်လ ၂၈ ရက်က ပြောခဲ့သည်။

ဒေသခံရဲတပ်ဖွဲ့က ပြောကြားခဲ့ရာတွင် ၎င်းတို့အနေဖြင့် ဇူလိုင်လ ၂၈ ရက်မွန်းလွဲပိုင်းက လူများဒဏ်ရာရရှိနေကြောင်း သတင်းများလက်ခံရရှိပြီးနောက် ယင်းနေအိမ်သို့သွားရောက်ခဲ့ကြောင်း၊ ရဲအရာရှိများက နေအိမ်၏ အခန်းရှေ့တွင် အမျိုးသားတစ်ဦးနှင့် တွေ့ခဲ့ပြီး နေအိမ်အတွင်း ထပ်မံရှာဖွေခဲ့ရာ သေဆုံးနေသူ ၄ ဦးအား တွေ့ရှိခဲ့ကြောင်း သိရသည်။

ဖမ်းဆီးခံရသူအနေဖြင့် မည်သည့်စွဲချက်များနှင့် ရင်ဆိုင်ရမည်ကို ရှင်းရှင်းလင်းလင်း မသိရသေးပေ။

(Xinhua)
http://www.xinhuamyanmar.com
အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ