တိုက်ပွဲပြင်းထန်ဖြစ်ပွါးခဲ့သော သီပေါမြို့နယ်တွန်ကျိုင်းရွာတွင် ဒေသခံလယ်ယာသမားတဦး မိုင်းနင်းမိဒဏ်ရာရ

မေလ ၂၂ ရက် ၂၀၁၉

သျှမ်းပြည်မြောက်ပိုင်း သီပေါမြို့နယ်ရှိ မတ်လအတွင်းကတိုက်ပွဲပြင်းထန်ခဲ့သော နားမခေါ်အုပ်စု တွန်ကျိုင်းရွာတွင် ရွာသားတဦး လယ်ယာလုပ်ငန်းခွင်ဝင်ရာ မိုင်းပေါက်ကွဲထိမိဒဏ်ရာရရှိခဲ့ကြောင်းသိရသည်။

မေလ ၂၀ ရက်က တွန်ကျိုင်းရွာသား စိုင်းအဲန် အသက် ၁၉ နှစ်သည် တွန်ကျိုင်းရွာအနောက်ဘက်ရှိ ၄င်း၏ လယ်ယာအတွင်း လုပ်ငန်းခွင်ဝင်နေစဉ် မိုင်းနင်းမိသဖြင့် ထိမှန်ဒဏ်ရာရရှိခဲ့ရာ သီပေါဆေးရုံသို့ပို့ဆောင်ဆေးကုခဲ့ရကြောင်းသိရသည်။

သီပေါမြို့နယ် SNLD ပါတီဝင်တဦးက- ခြေထောက်၊ ကျော နဲ့ ပေါင်တွေမှာ ထိမှန်ဒဏ်ရာရတယ်။ ခုတော့ သီပေါဆေးရုံမှာ။ စိုးရိမ်ရတဲ့အနေအထားတော့မဟုတ်ပါဘူး။ ပရဟိတအဖွဲ့တွေ ၊ ကျားခေါင်းပါတီတွေ သွားရောက်ကြည့်ရှုပြီး ကူညီထောက်ပံ့မှုတွေ ပေးပါတယ်။- ဟု သျှမ်းသံတော်ဆင့်အားပြောသည်။

မိုင်းထိမှန်သည့် စိုင်းအဲန် အသက် ၁၉ နှစ်သည် ခိုင်းဟျိုးရွာသား လုံးစိုင်းပန် ၏ သားဖြစ်ပြီး တွန်ကျိုင်းရွာသူ နန်းဆိုင်မွမ်းနှင့်အိမ်ထောင်ပြုကာ တွန်ကျိုင်းရွာတွင်နေထိုင်ပါသည်။

နားမခေါ်ဒေသခံတဦးကလည်း- ဘယ်အဖွဲ့ရဲ့မိုင်းလည်းတော့မသိဘူး။ သူတို့ပြန်ဖြုတ်သွားဖို့မေ့တာလား သို့မဟုတ် တမင်တကာမဖြုတ်ဘဲထားတာလားတော့မသိဘူး။ ဒီနှစ်ဆန်းက ကျနော်တို့ သျှမ်းတပ် ၂ ဖွဲ့က လှုပ်ရှားသွားလာတယ် ပစ်ခတ်တိုက်ခိုက်တယ်လေဒီဒေသမှာ- ဟု သျှမ်းသံတော်ဆင့်အားပြောသည်။

၎င်းတို့ကြားပြင်းထန်သည့်တိုက်ပွဲများကြောင့်ဒေသခံလူထုထောင်နှင့်ချီနေရပ်မှ စွန့်ခွါထွက်ပြေးခဲ့ရသည်။

လက်ရှိတွင် သျှမ်းတပ် ၂ ဖွဲ့လုံး အပစ်ရပ်ရေး ၂ ဦးသဘောတူပူးပေါင်းကြေငြာချက်ထုတ်ပြန်ပြီး ၂ ဖက်တပ်များလည်း အဆိုပါဒေသမှ ဆုတ်ခွါနေကြောင်းသိရသည်။ သို့သော် မိုင်းများရှိနေသေးသဖြင့် မိမိမိုင်းများပြန်လည်ဖြုတ်သိမ်းပေးရန်ဒေသခံများက တောင်းဆိုနေကြပါသည်။

သျှမ်းသံတော်ဆင့်၊ ဟွမ်ဟိန်း
Panglong(Burmese)
https://www.facebook.com/ShanNewsBurmese