ဖက်ဒရယ်ဒီမိုကရေစီပြည်ထောင်စု ဖော်ဆောင်မယ့် အစီအစဉ်ကို KNU တင်ပြ

 နေပြည်တော်က အစိုးရနဲ့ KNU အစည်းအဝေး

မြန်မာအစိုးရနဲ့ တရားဝင်ငြိမ်းချမ်းရေးဆွေးနွေးမှု ရပ်ထားခဲ့တာ ၆ လ နီးပါးလောက် ရှိနေခဲ့တဲ့ ကရင်အမျိုးသားအစည်းရုံး KNU အဖွဲ့ဟာ ဧပြီလ ၁၁ ရက်နေ့မှာတော့ နေပြည်တော်မှာ အစိုးရငြိမ်းချမ်းရေး ကိုယ်စားလှယ်တွေနဲ့ တွေ့ဆုံဆွေးနွေးခဲ့ပါတယ်။

အဲ့ဒီဆွေးနွေးပွဲမှာတော့ KNU အနေနဲ့ ၂၁ ရာစု ပင်လုံညီလာခံကနေ အနာဂတ်ဖက်ဒရယ်ဒီမိုကရေစီပြည်ထောင်စုနိုင်ငံ ဖြစ်လာတဲ့အထိ သွားနိုင်မယ့် လုပ်ငန်းစဉ်တွေရေးဆွဲထားတဲ့ အစီအစဉ်ကို အစိုးရကို ပေးခဲ့တယ်လို့ KNUရဲ့ အထွေထွေအတွင်းရေးမှူး ဖဒိုစောတာဒိုမှူးက ပြောပါတယ်။

လက်ရှိမှာ အစိုးရ၊ တပ်မတော်နဲ့ တနိုင်ငံလုံးအပစ်ရပ်စာချုပ် NCA လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့တွေ အကြား ဆွေးနွေးကြတဲ့ ၂၁ ရာစု ပင်လုံညီလာခံအစည်းအဝေးတွေကို ဆက်လက်မကျင်းပနိုင်ဘဲ ရပ်နားထားတာ ၁ နှစ် နီးပါးလောက် ရှိနေပါပြီ။

အစိုးရအနေနဲ့ကတော့ NCA လမ်းကြောင်းကနေ ရရှိလာတဲ့သဘောတူညီချက်တွေကို အခြေခံပြီး ဖက်ဒရယ်ဒီမိုကရေစီစနစ်နဲ့ ကိုယ်ညီမယ့် ဖွဲ့စည်းပုံအခြေခံဥပဒေကို ပြင်ဆင်ဖို့ လုပ်ဆောင်နေပါတယ်။

အခု KNU က တင်ပြတဲ့ ဖက်ဒရယ်နိုင်ငံအထိသွားနိုင်ဖို့ အဆိုပြုချက်ကို အစိုးရအကြီးအကဲတွေဆီ တင်ပြပြီး ဆွေးနွေးကြရဦးမှာပါ။

နေပြည်တော်ရောက်နေတဲ့ KNU အဖွဲ့အနေနဲ့ တပ်မတော်နဲ့ အခုတခေါက်ဆွေးနွေးဖို့ရာမှာတော့ တပ်ဘက်က ဦးဆောင်ဆွေးနွေးမယ့် ခေါင်းဆောင်ရဲ့ ကျန်းမာရေးအခြေအနေကြောင့် တွေ့မယ့် အစီစဉ်ရက်ကို အနည်းငယ် နောက်ဆုံးထားရတယ်လို့ သိရပါတယ်။

BBC Burmese
https://www.bbc.com/burmese