ရေတွင်းဟောင်းဆယ်ယူသူအောက်ဆီဂျင်ပြတ်မူးလဲသဖြင့် ကူညီကယ်တင်ရန် ရေတွင်းသို့ဆင်းသူနှစ်ဦးသေဆုံးပြီးတစ်ဦးမူးမေ့

မတ္တရာ ဧပြီ ၂၆

မန္တလေးတိုင်းဒေသကြီးပြင်ဦးလွင်ဦးလွင်ခရိုင် မတ္တရာမြို့နယ် ဝသုန္နရကျေးရွာတွင် နံနက် ၉နာရီ ၅၀မိနစ် အချိန်ကရေတွင်းဟောင်းဆယ်ယူရာမှ နှစ်ဦးသေဆုံးပြီးတစ်ဦးမူးမေ့လဲသွားခဲ့ကြောင်းသိရသည်။

ဖြစ်စဉ်မှာဝသုန္နရကျေးရွာနေဒေါ်ဌေး၏ နေအိမ်အနောက်ဘက်ရှိအကျယ် ၃ပေ ၃လက်မ အနက် ၂၄ပေရှိ ရေတွင်းဟောင်းအားနေလင်းထွန်း(၁၈)နှစ် ချောင်းကြီးကျေးရွာသပိတ်ကျင်းမြို့နယ်နေသူမှ တူးဖော်ရန် ဆင်းသွားခဲ့ရာရေတွင်းအောက်ခြေသို့အရောက်၌ အောက်ဆီဂျင်ပြတ်ပြီးမူးမေ့လဲသွားသဖြင့် ထွဋ်ခေါင်အောင်(၁၈)နှစ်နှင့် ကိုကြက်(ခ) မြင့်နိုင်ကျော်(၂၆)နှစ်တို့မှ ရေတွင်းအတွင်းဆင်းကာနေလင်းထွန်းအားအပေါ်သို့ ပို့ဆောင်ပေးစဉ် ၄င်းတို့နှစ်ဦးမှာ ပြန်မတက်နိုင်ဘဲမူးလဲနေသဖြင့် ဟန်လင်းထက်မှ ဆင်းဆယ်ရန် ကြိုးစားရာ ၄င်းကိုယ်သတိလစ်မလိုဖြစ်၍ ဆယ်ယူနိုင်ခြင်းမရှိဘဲတွင်းပေါ်သို့ ပြန်တက်လာခဲ့ကြောင်းသိရသည်။

ရေတွင်းထဲတွင် သေဆုံးသွားသည့် ထွဋ်ခေါင်အောင်၊ ကိုကြက်(ခ) မြင့်နိုင်ကျော်တို့နှစ်ဦးအားဆယ်ယူရန်အတွက် မြို့နယ်အုပ်ချုပ်ရေးမှူးဦးအောင်ကျော်နိုင်၊ မြို့နယ်ရဲတပ်ဖွဲ့မှူးရဲမှူးကျော်မိုးတို့ဦးဆောင်၍မြို့မရဲစခန်းမှတာဝန်ရှိသူများ၊ မြို့နယ်မီးသတ်တပ်ဖွဲ့မှ ဒုလက်ထောက်ဦးစီးမှူးဦးထွန်းနေနွယ်နှင့် တပ်ဖွဲ့ဝင်များ၊ ကျေးရွာသူ/ကျေးရွာသားများမှ ဝိုင်းဝန်းဆယ်တင်ခဲ့ကြရာ၁၁နာရီ ၄၅မိနစ် အချိန်တွင် ဆယ်ယူနိုင်ခဲ့သည်။သေဆုံးသူနှစ်ဦးအားမတ္တရာပြည်သူ့ဆေးရုံသို့ပို့ဆောင်ခဲ့ပြီးရေတွင်းဆယ်ယူသူနေလင်းထွန်းအားမတ္တရာပြည်သူ့ဆေးရုံမှတဆင့် မန္တလေးပြည်သူ့ဆေးရုံကြီးသို့ ဆက်လက်ပို့ဆောင်ခဲ့ကြောင်းသိရသည်။

စိုးကျော်သူထွေး(မတ္တရာ)
Myanmaalinn
https://www.facebook.com/MYANMAALINNNEWS