မြန်မာအလံနဲ့ အောင်ပွဲခံတဲ့ ယူကေက သိုင်းပေါင်းစုံ ကစားသမား - မြန်မာ့စပါးအုံး နီကိုလာ

 မြန်မာ့ အလံကို လွှမ်းခြုံအောင်ပွဲခံတဲ့ နီကိုလာ

ကြိုးဝိုင်းအတွင်းမှာ အကြိတ်အနယ် ထိုးသတ်အနိုင်ယူအပြီး သူ အနိုင်ရတယ်လို့ ကြေညာခံရချိန်မှာ မြန်မာအလံကို ကိုယ်ပေါ်လွှမ်းခြုံ အောင်ပွဲခံခဲ့သူ နိုင်ငံခြားသူ အမျိုးသမီး တစ်ယောက် ရှိပါတယ်။

သူကတော့ ဗြိတိန်နိုင်ငံသူ ဖြစ်ပြီး Burmese Python ဆိုတဲ့ ပြိုင်ပွဲဝင် နာမည် ခံယူထားသူ အသက် ၂၅ နှစ် အရွယ် နီကိုလာ ဘာ့ခ် (Nicola Barke) ဖြစ်ပါတယ်။

နီကိုလာက HSBC ဘဏ်ကြီးမှာ ဈေးကွက် မန်နေဂျာ (ဒီဂျစ်တယ်) အလုပ် လုပ်နေရာက ဆုကြေးစား ကစ်ဘောက်ဆင် သမားအဖြစ် ခံယူဖို့ စိတ်ပိုင်းဖြတ်ထားသူ ဖြစ်ပါတယ်။ သူဘာကြောင့် မြန်မာ အလံနဲ့ အောင်ပွဲခံရတာပါလဲ။

သူ့အကြောင်း တစေ့တစောင်းသိရအောင် ဘီဘီစီက နီကိုလာ လေ့ကျင့်ရာ လန်ဒန်မြို့အနောက်မြောက်ဘက် မိုင် ၃၀ လောက် အကွာက Luton မြို့မှာ ရှိတဲ့ Storm Gym ကို သွားရောက်ပြီး တွေ့ဆုံ မေးမြန်းထားပါတယ်။

ဘီဘီစီ - နီကိုလာက Kickboxing ကို ဘာကြောင့် စပြီး ကစားဖြစ်လဲ။

နီကိုလာ - ကျွန်မ Kickboxing ကို အသက် ၁၅ နှစ်မှာ စပြီး ကစားခဲ့ပါတယ်။ အဲဒီ မတိုင်ခင်က တကယ်တော့ ဘဲလေးအကကို အရင်ဆုံး စသင်ခဲ့တာပါ။

အသက် ၁၅ နှစ်လောက်အထိ ဘဲလေး အက လေ့ကျင့်ခဲ့ပါတယ်။ ဒါပေမဲ့ သိပ်လည်း မကြိုက်တော့ ထူးထူးချွန်ချွန် မဖြစ်ခဲ့ပါဘူး။ နောက်တော့ ဘဲလေး မကချင်တော့ဘူး ဆိုတာ အဖေနဲ့ အမေကို ပြောမယ်လို့ ဆုံးဖြတ်လိုက်ပါတယ်။ သူတို့ကတော့ သူတို့ သမီးလေး ကနေတာကိုပဲ ကြည့်ချင် မြင်ချင်ကြတာလေ၊

ကျွန်မ ကတော့ ကိုယ် သိပ်မကြိုက်တဲ့ ဘဲလေး အကဘက်မှာ မတော်တော့ ဆန့်ကျင်ဖက် ကစားနည်း တစ်မျိုးပြောင်းရင် အောင်မြင်နိုင်တယ်လို့ ယူဆတာနဲ့ တိုက်ကွမ်ဒို ဘက်ပြောင်းမယ်ဆိုပြီး စ ကစားရာက သိုင်းပေါင်းစုံ လောကထဲ ဝင်လာဖြစ်ခဲ့ တာပါ။

၎ နှစ် ၅ နှစ်လောက် တိုက်ကွမ်ဒို ကစားပြီးနောက်မှာ အခု Storm Gym မှာ လာပြီး Kickboxing K 1 ကို စ ကစားခဲ့ပါတယ်။ Professional အနေနဲ့ကတော့ မနှစ်ကမှ စ ကစားဖြစ်ခဲ့ပါတယ်။

ဘဲလေးမှာ မတော်လို့ ကြိုးဝိုင်းထဲမှာ တစ်ယောက်ယောက်ကို ထိုးနှက်ရတဲ့ နေရာမျိုးမှာတော့ ထူးချွန်နိုင်တယ်လို့ တွေးပြီး ပြောင်းလိုက်ပေမဲ့ ကစားခါစ မှာတော့ ထင်သလို မဖြစ်ခဲ့ပါဘူး။ ဒါပေမဲ့ အချိန် နာရီတွေ အကြာကြီး အပြင်းအထန် လေ့ကျင့် ကြိုးစားရင်းနဲ့ ဒီအားကစားကို ချစ်မြတ်နိုး လာရုံသာမက ထူးထူးချွန်ချွန်လည်း ဖြစ် လာခဲ့ပါတယ်။

ရထားတဲ့ ဆုတွေနဲ့ အတူတွေ့ရတဲ့ နီကိုလာ

ဘီဘီစီ - Kickboxing လို ကြမ်းတမ်းတဲ့ ကစားနည်းမျိုးကို မိန်းကလေး တစ်ယောက် အနေနဲ့ကစားတော့ ဘာအခက်အခဲတွေ ရှိပါလဲ။

နီကိုလာ- ပြိုင်ပွဲတွေမှာ အမျိုးသမီးတွေ ပါဝင် ယှဉ်ပြိုင်တာ နည်းပါတယ်။ ဒါပေမဲ့ ပြီးခဲ့တဲ့ နှစ်တွေ အတွင်းမှာ မိန်းကလေးတွေ အများကြီး သိုင်း အားကစားကို ပိုလုပ်လာကြပါတယ်။ ဒါက မိန်းကလေးတွေ အတွက် အလားအလာကောင်းပါ။ ကျွန်မက အရပ်တော်တော်ရှည်တဲ့သူ ဆိုတော့ တစ်ခါတလေမှာ ကိုယ်နဲ့ လုံးတူ ဒေါက်တူ အရပ်အမောင်းနဲ့ ကိုယ်ထည် အတွဲညီသူကို ရှာရခက် တတ်ပါတယ်။

ဒါကလွဲရင်တော့ တခြား ဘာမှ အခက်အခဲ မရှိပါဘူး။

နီကိုလာရဲ့ မိခင်

ဘီဘီစီ - Kickboxing ကို professional အနေနဲ့ ထိုးမယ်လို့ မိသားစုကို ပြောတော့ မိသားစုက ဘယ်လို တုံ့ပြန်လဲ။

နီကိုလာ - မိသားစုရဲ့ တုံ့ပြန်မှုကတော့ ရောနေတာပေါ့လေ၊ မိသားစုဆိုတော့ ကျွန်မကို ချစ်တာပေါ့။ သူတို့ ချစ်တဲ့သူကို ထိခိုက် အနာတရ ဖြစ်တာမျိုး မမြင်ချင်ဘူးလေ။ ဒါပေမဲ့ တချိန်တည်းမှာပဲ အားပေးတာတော့ ရှိပါတယ်။ မိသားစုရဲ့ အားပေးမှုရတော့လည်း ကောင်းတာပေါ့။ ကျွန်မ အမေဆို ကျွန်မရဲ့ ပြိုင်ပွဲတွေကို လိုက်ကြည့်တာ ပါပဲ။

ပထမဆုံး တရုတ်ပြည်မှာ professional ပွဲထိုးတုန်းကလည်း အမေလိုက်လာပါတယ်။ သူက သူ့အလုပ်နဲ့သူ ဆိုတော့ တရုတ်ပြည်မှာ ၂၄ နာရီပဲ နေနိုင်တယ်။ လေယာဉ်ပေါ်ကဆင်း၊ ပြိုင်ပွဲလာကြည့် ပြီးတာနဲ့ တန်းပြန်ရတာ။ ဒီအားကစားကို professional အနေနဲ့ ကစားမယ်လို့ မိသားစုကို စပြောတော့ အမေနဲ့ အဖွားက အံ့သြ တုန်လှုပ် သွားတယ်။ တစ်ချိန်တည်းမှာပဲ ကျွန်မ သွားမယ့် ခရီးလမ်း အစ အတွက် စိတ်လှုပ်ရှား ခဲ့ကြပါတယ်။ ကျွန်မကတော့ သူတို့ရဲ့ အားပေးမှုလည်း လိုချင်တယ်လေ။

ဘီဘီစီ - ဒီအားကစားနည်းမှာ နီကိုလာ အတွက် အခက်ခဲဆုံးက ဘာလဲဆိုရင် ဘယ်လိုပြောမလဲ။

နီကိုလာ - အခက်ခဲဆုံးကတော့ စိတ်ပိုင်းဆိုင်ရာ ကြိုတင်ပြင်ဆင်မှုလို့ ပြောရမှာပါ။ ရုပ်ပိုင်း၊ ခန္ဓာကိုယ်ပိုင်း အနေနဲ့ကတော့ ကျန်းမာ ကြံ့ခိုင်ရမယ်၊ ကြိုးပမ်း အားထုတ်ရမယ်၊ ခံနိုင်ရည်ရှိအောင်လုပ်ထားရမယ်၊ လေ့ကျင့် ထိုးသတ်ရမယ်၊ တစ်ချိန်တည်းမှာ စိတ်ပိုင်းဆိုင်ရာ စိတ်ဓါတ်ပိုင်းကို တည်ငြိမ် မှန်ကန်အောင် ထားရမယ်၊ ကိုယ့်ကိုယ်ကိုယ်ယုံကြည်မှု ရှိရမယ်ပေါ့။

တစ်နေကုန် အလုပ်လုပ်ပြီး ပြန်လာတာနဲ့ မမောနိုင်မပန်းနိုင် လေ့ကျင့်ရတာ ပျော်နေတဲ့ နီကိုလာ

ဘီဘီစီ - နီကိုလာက HSBC ဘဏ်မှာလည်း အလုပ် လုပ်တယ်။ professional အနေနဲ့လည်း သိုင်းပေါင်းစုံ ကစားတယ်ဆိုတော့ တာဝန်ကြီးတဲ့ အလုပ် နှစ်ခုကို တစ်ပြိုင်တည်း လုပ်နိုင်ဖို့ကရော ဘယ်လောက် ခက်ခဲပါလဲ၊ ဘယ်လို အစီအစဉ်ချပြီး လုပ်ပါလဲ။

နီကိုလာ - ဒါက ကျွန်မရဲ့ ပြင်းပြတဲ့ဝါသနာ တစ်ခုပါ။ ဒီအားကစားကို ချစ်မြတ်နိုးတယ်၊ နှစ်သက်တယ်ဆို မလုပ်နိုင်စရာမရှိပါဘူး၊ လုပ်နိုင်ပါတယ်။ တကယ်တော့ လက်ရှိ အလုပ်ကနေ ထွက်ပြီး ထိုးသတ်ရတဲ့ အားကစား သက်သက်ပဲ လုပ်ရမယ် ဆိုရင်တောင် ကျွန်မ လုပ်နိုင်ပါတယ်။ အဲဒါ ကျွန်မရဲ့ အိပ်မက်ပါ။

နေ့စဉ် ပုံမှန် အလုပ်သွားဖို့ ဆိုရင် မနက် အစောကြီးထရတယ်။ တစ်နေ့တာ အတွက် အလုပ်ပြီးပြီဆိုတာနဲ့ ကျွန်မမှာ စိတ်အားတွေ ထက်သန်ပြီး Gym မှာသွား လေ့ကျင့်ဖို့ နောက်ထပ် ခွန်အားတွေ ရှိလာပြန်ရော၊ အားအင် အပြည့်နဲ့ ညနေဘက်မှာ ၄ နာရီ ၅ နာရီ လောက် နေ့စဉ် လေ့ကျင့်ပါတယ်။

ဒါက တကယ်တမ်း သိပ်တော့ မလွယ်လှ ပါဘူး။ ကျွန်မ အလုပ်က လန်ဒန်မြို့က HSBC Bank မှာ ပါ။ မနက် ၈ နာရီ ကနေ ညနေ ၄ နာရီ အထိ အလုပ်လုပ်ရပါတယ်။ မနက်တိုင်း အိမ်ကနေ လန်ဒန်မှာရှိတဲ့ အလုပ်ကို ၂ နာရီကြာ သွားရတယ်။ အပြန်လည်း ၂နာရီကြာတယ်။ အလုပ်က ပြန်ရောက်တာနဲ့ Gym ကို တန်းသွားပြီး လေ့ကျင့်တာပါပဲ။ ကိုယ်ချစ်မြတ်နိုးတဲ့ အလုပ်ကို လုပ်ရတော့ လုပ်နိုင်ဖို့ သိပ်မခက်ပါဘူး။

ဒီအားကစားကို ကိုယ်က ချစ်မြတ်နိုးတော့ လေ့ကျင့်ခန်း ဆင်းတယ်ဆိုလည်း အဖွဲ့နဲ့ ဖြစ်ဖြစ် တစ်ယောက်ချင်းပဲ ဖြစ်ဖြစ် ပျော်တာပါပဲ။

နီကိုလာက သူလေ့ကျင့်တဲ့ Storm Gym မှာ လည်း မြန်မာ အလံကို အမြတ်တနိုးထားရှိ

ဘီဘီစီ - နီကိုလာက ပြိုင်ပွဲမှာ မြန်မာ အလံကို ခြုံပြတာ၊ လွှင့်ထူပြတာတွေ တွေ့မြင်ရပါတယ်။ ဒါက ဘာကို ပြချင်တာပါလဲ၊ ကိုယ်ဟာ မြန်မာနိုင်ငံကို ကိုယ်စားပြုသူ တစ်ယောက်ဖြစ်တယ်၊ မြန်မာဖြစ်ပါတယ်လို့ ပြချင်တာလား။

နီကိုလာ - မြန်မာ အလံကို လွှင့်ထူပြီး ကြိုးဝိုင်းထဲဝင်တဲ့ အကြောင်း တစ်ခုကတော့ ကျွန်မရဲ့ မျိုးရိုး စဉ်ဆက်ကြောင့်က တစ်ကြောင်း ဖြစ်ပါတယ်။ အမေက မြန်မာနိုင်ငံမှာ မွေးတယ်၊ ကျွန်မရဲ့ အဘိုး အဘွားတွေကလည်း မြန်မာနိုင်ငံမှာ မွေးတာပါ။ ကျွန်မကလည်း ကိုယ့်အမိမြေက မြန်မာ ဆိုတာကို ဂုဏ်ယူတယ်၊ နောက်တစ်ခုက ကျွန်မရဲ့ ပြိုင်ပွဲဝင် နာမည်ကို မြန်မာ့ စပါးအုံး Burmese Python ဆိုပြီး နည်းပြက ပေးထားပါတယ်။ Python ဆိုတဲ့ စပါးအုံးမြွေက အားမာန် တက်ကြွ ဖြတ်လပ်တယ်၊ ကြံ့ခိုင်တယ်။ ဆိုတော့ ဒီနာမည်ကို ကြိုက်တယ်။ ဒီနာမည်က ကျွန်မရဲ့ ထိုးသတ်ပုံ စတိုင်ကို ကိုယ်စားပြုသလို ကျွန်မအမေရဲ့ ဇာတိ ဇာစ်မြစ်ကိုလည်း ပြသရာ ရောက်ပါတယ်။

ဒါကြောင့် မြန်မာ နိုင်ငံကို ကိုယ်စားပြုပြီး မြန်မာ အလံကို လွှင့်ထူရတာ ဂုဏ်ယူပါတယ်။

ဘီဘီစီ - ဒါဆိုရင် နီကိုလာက ကိုယ့်ကိုကိုယ် မြန်မာတစ်ယောက်အနေနဲ့ သတ်မှတ် ခံယူလား။

နီကိုလာ - ကျွန်မက အင်္ဂလန်မှာ မွေးတာပါ။ ဒီတော့ British ဖြစ်ပါတယ်။ ဒါပေမဲ့ မူရင်း မျိုးရိုး ဇာစ်မြစ်က မြန်မာဆိုတော့ ကျွန်မရဲ့ မျိုးရိုး စဉ်ဆက်ကို မြန်မာလို့ပဲ ခံယူထားပါတယ်။ ဒါပေမဲ့ မြန်မာ စကားတော့ မတတ်ပါဘူး။

 ဗြိတိန်က Kick boxing K 1 ဆုတံဆိပ်နဲ့ ကမ္ဘာ့ အဆင့် တိုင်ကွမ်ဒို ဆုတွေ ဆွတ်ခူးထားတဲ့ နီကိုလာ

ဘီဘီစီ - အဲဒီ မြန်မာ့စပါးအုံးဆိုတဲ့ နာမည်နဲ့ ကမ္ဘာ့အဆင့် သိုင်းပေါင်းစုံပြိုင်ပွဲတွေ ယှဉ်ပြိုင်ထိုးသတ်ပြီး အောင်မြင်နေတဲ့သူ နောက်တစ်ယောက် ရှိသေးတယ် ဆိုတာကိုရော သိလား။

နီကိုလာ- သိပါတယ် သူက အမျိုးသား Burmese Python အောင်လအန်ဆန်ပါ။ သူက ကျွန်မကို မက်ဆေ့ခ်ျ ပို့ပြီး သူနဲ့ နာမည်ဆင်တူ နှစ်ယောက် ဖြစ်နေတာ သဘောကျတဲ့ အကြောင်း ပြောပါတယ်။ သူက ကျွန်မကို အားပေးပါတယ်။ သူက ကျွန်မကို ကြိုဆိုတဲ့ အတွက်လည်း သူ့ကို သိပ်ပြီး ကျေးဇူးတင်ပါတယ်။

ဘီဘီစီ -မြန်မာ့ ယဉ်ကျေးမှု ဓလေ့ကို ချစ်ရကောင်းမှန်း ဘယ်လိုလုပ် သိလာခဲ့တာလဲ၊ ဘယ်သူ့ရဲ့ အဓိက လွှမ်မိုးမှု ရှိခဲ့လဲ။

နီကိုလာ -အမေ့ဆီက ရတာလို့ပဲ အသေအချာ ပြောနိုင်ပါတယ်။ ကျွန်မတို့က မြန်မာ အစားအစာတွေ ကြိုက်တယ်။ အမေက အိမ်မှာပဲ ချက်တာ များတယ်။ အုန်းနို့ခေါက်ဆွဲလည်း ချက်တယ်၊ ကျွန်မတို့ တစ်အိမ်လုံး သိပ်ကြိုက်တယ်။

နီကိုလာရဲ့ ဟန်ရေးပြကွက်

ဘီဘီစီ- နီကိုလာကို မြန်မာ အသိုင်းအဝိုင်းကရော ဘယ်လောက် ကြိုဆိုကြတာရှိလဲ၊ ဘယ်လို လက်ခံကြတာ တွေ့ရလဲ။

နီကိုလာ- မြန်မာပရိသတ်တွေ၊ မြန်မာ အသိုင်းအဝိုင်းဆီက အားရစရာကောင်းတဲ့ တုံ့ပြန်မှု တွေရပါတယ်။ တကယ့်ကို ပီတိဖြစ်ရပါတယ်။ သူတို့ဆီက သတင်းစကားတွေ အများကြီး ရတယ်၊ ဝမ်းသာအားရ ထောက်ခံမှုတွေ၊ မေတ္တာတွေလည်း ရပါတယ်။ အဲဒီအတွက်လည်း စိတ်ထဲမှာ သိပ်ကို ဝမ်းသာ ကြည်နူးမိပါတယ်။

ဒီလို ထောက်ခံအားပေးမှုတွေ ရလိမ့်မယ်လို့ မျှော်လင့် မထားမိဘူး။ ကျွန်မ မှတ်မိသေးတယ်၊ တစ်နေ့ အိပ်ရာဝင်သွားပြီး နောက်တစ်နေ့မှာ နိုးလာတော့ မက်ဆေ့ခ်ျ တွေ အများကြီး ဝင်နေတာ တွေ့တော့ တစ်ခုခုတော့ မှားနေပြီ ဆိုပြီး လန့်သွားမိတာ၊ နောက် ဖတ်ကြည့်တော့မှ လူတွေက ကျွန်မကို ချစ်တယ်၊ အားပေးတယ်၊ ကျွန်မအတွက် ဂုဏ်ယူတယ် ဆိုတာတွေ ရေးထားကြတာ တွေ့ရတော့ ပျော်သွားပါတယ်။

အဲဒီ အားပေးစကားတွေက ကျွန်မကို ပိုမို လေ့ကျင့်ဖို့ ခွန်အားတွေ ဖြစ်စေပါတယ်။ ဘာဖြစ်လို့လဲ ဆိုတော့ အခုဆို ကျွန်မ အတွက်၊ ကျွန်မမိသားစုအတွက်သာ ယှဉ်ပြိုင် ထိုးသတ်တာ မဟုတ်တော့ဘဲ မြန်မာတွေအတွက် ဂုဏ်ယူစရာ ဖြစ်အောင် လုပ်မယ် လို့ ခံစားမိနေလို့ပါ။ ထောက်ခံ အားပေးမှုတွေ အားလုံးကို ကျေးဇူး တင်ပါတယ်။

ဘီဘီစီ-မြန်မာနိုင်ငံကိုသွားပြီး ပြိုင်ပွဲဝင်ဖို့ ယှဉ်ပြိုင်ထိုးသတ်ဖို့ အစီအစဉ်ရော ရှိလား။

နီကိုလာ- မြန်မာနိုင်ငံမှာ ဒီနှစ်ကုန် သွားပြိုင်နိုင်လိမ့်မယ်လို့ ယူဆပါတယ်။ နေ့ရက် အတည်ပြုနိုင်ဖို့အတွက် စောင့်နေပါတယ်။ စိန်ခေါ်မှု အသစ်ဖြစ်လို့လည်း စိတ်လှုပ်ရှားပါတယ်။ ဘယ်သူနဲ့ ပြိုင်မယ် ဆိုတာတော့ မသိသေးပါဘူး။

BBC Burmese
https://www.bbc.com/burmese