ဖွဲ့စည်းပုံပြင်ဆင်ရေးကော်မတီကို မဲခွဲဖွဲ့စည်း

၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီဥက္ကဋ္ဌ ဦးထွန်းထွန်းဟိန် ကို ၂၀၁၉ ဖေဖော်ဝါရီလ ၁၉ ရက်နေ့က ပြည်ထောင်စုလွှတ်တော်မှာတွေ့ရစဉ် ။ Credit: Pyidaungsu Hluttaw FB

၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီကို ဒီနေ့ ပြည်ထောင်စုလွှတ်တော်မှာ မဲခွဲဆုံးဖြတ်ပြီး အတည်ပြုလိုက်ပါတယ်။

မဲခွဲဆုံးဖြတ်ချက်မယူခင် တပ်မတော်သားကိုယ်စားလှယ်တစ်ဦး အပါအ၀င် ကိုယ်စားလှယ်တချို့က လွှတ်တော်တွင်း ဆွေးနွေးဖို့ မတ်တပ်ရပ် တောင်းဆိုခဲ့ပေမယ့် ပြည်ထောင်စုလွှတ်တော်နာယက ဦးတီခွန်မြတ် က ဆွေးနွေးခွင့်မပေးဘဲ ပယ်ချခဲ့ပါတယ်။

မဲပေးခွင့်ရှိသူ ၅၉၄ ဦးရှိတဲ့အနက် ၃၈၉ ဦးက ထောက်ခံခဲ့တာကြောင့် ကော်မတီဖွဲ့စည်းတာကို အတည်ပြုလိုက်တာဖြစ်ပါတယ်။

ကော်မတီမှာ အင်န်အယ်လ်ဒီပါတီက ၁၈ ဦး၊ တပ်မတော်သားအစုအဖွဲ့က ၈ ဦး၊ ကြံ့ခိုင်ဖွံ့ဖြိုးရေးပါတီ၊ ရခိုင်အမျိုးသားပါတီနဲ့ SNLD ပါတီက ၂ ဦးစီ၊ တစ်သီးပုဂ္ဂလကိုယ်စားလှယ် ၁ ဦး၊ လူနည်းစု တိုင်းရင်းသား ၁၀ ပါတီက တစ်ဦးစီပါဝင်ပြီး စုစုပေါင်း ၄၅ ဦး နဲ့ ဖွဲ့စည်းလိုက်တာပါ။

ကြံ့ခိုင်ဖံွ့ဖြိုးရေးပါတီက ကိုယ်စားလှယ် ၂ဦးနဲ့ တပ်မတော်သား ကိုယ်စားလှယ်တွေဘက်က ကိုယ်စားလှယ် ၈ဦးရဲ့ အမည်စာရင်းကိုတော့ မတင်သွင်းရသေးဘူးလို့ သိရပါတယ်။

အဲဒီကော်မတီမှာ ပြည်ထောင်စုလွှတ်တော်ဒုတိယနာယက ဦးထွန်းထွန်းဟိန် က ဥက္ကဋ္ဌအဖြစ်ဆောင်ရွက်ပြီး ကော်မတီသက်တမ်းကတော့ စတင်ဖွဲ့စည်းချိန်ကနေ ဥပဒေကြမ်းတင်သွင်းချိန်အထိ ဖြစ်တယ်လို့ သိရပါတယ်။

ကြံ့ခိုင်ဖွံ့ဖြိုးရေးပါတီက လွှတ်တော်ကိုယ်စားလှယ် ဦးသိန်းထွန်းအပါအ၀င် ကိုယ်စားလှယ် ၁၄၃ ဦးက ဖွဲ့စည်းပုံအခြေခံဥပဒေကို ဒုတိယအကြိမ်ပြင်ဆင်တဲ့ဥပဒေကြမ်းကို တင်သွင်းတဲ့အကြောင်း နာယက ဦးတီခွန်မြတ် က အသိပေးပြောကြားခဲ့ပါတယ်။

ဒီသတင်းကို RFA သတင်းထောက် ကိုဝင်းကိုကိုလတ် ပေးပို့တာပါ။

RFA Burmese
https://www.rfa.org/burmese