နယ်မြေကျော် ဝင်ရောက်လို့ဆိုပြီး မြန်မာ ၂၅၇ ဦးကို တရုတ် လွှဲပြောင်းပြန်ပို့

ပြန်ပို့ခံရတဲ့ မြန်မာလုပ်သား

နယ်မြေကျော် ဝင်ရောက်လို့ဆိုပြီး တရုတ်နိုင်ငံဘက်က ထိန်းသိမ်းထားတဲ့ မြန်မာ ၂၅၇ ဦးကို ဇန်နဝါရီ ၂၁ ရက်က တရုတ် - မြန်မာနယ်စပ် မူဆယ် နန်းတော်ဂိတ်ကို လွှဲပြောင်း ပို့လိုက်ပါတယ်။

အရင်က တရုတ်ဘက်ကနေ အခုလို လွှဲပြောင်းပြန်ပို့တဲ့သူ အရေအတွက်ဟာ ဆယ်ဂဏန်းဝန်းကျင်သာ ရှိခဲ့ပြီး မနေ့က ပြန်ပို့ခံရတဲ့ အရေအတွက်ဟာ ဒီနှစ်ပိုင်းမှာ အများဆုံးလို့ ဆိုပါတယ်။

တရုတ်နှစ်ကူး နီးကပ်လာချိန်မှာ တရုတ်ဘက်က စီမံချက်တွေ စစ်ဆင်ရေးတွေ လုပ်ပြီး ရှာဖွေ စစ်ဆေးမှုတွေ လုပ်ကိုင်လာလို့ အခုလို လူပမာဏ များများ ပြန်ပို့ခံရတာလို့ လူဝင်မှုကြီးကြပ်ရေးဌာန မူဆယ်ဒေသ က ပြောပါတယ်။

တရုတ်ဘက်က ပြန်ပို့လာတဲ့သူတွေကို လူကုန်ကူး ပို့ဆောင်သူ၊ မှုခင်းကျူးလွန်တဲ့ မှတ်တမ်း ရှိမရှိ ပြန်လည် စီစစ်ပြီးမှ လက်ခံတယ်လို့ မူဆယ်ဒေသ လူဝင်မှု ကြီးကြပ်ရေးဌာန ဒုတိယဌာနခွဲရဲ့ လက်ထောက် ညွှန်ကြားရေးမှုး ဦးစောဝင်းလွင်က ဆိုပါတယ်။

သူတို့တွေ တရုတ်ဘက် သွားအလုပ်လုပ်ရာမှာလည်း အလည်အပတ် ဗီဇာ ၇ ရက်နဲ့သာ သွားရောက်ပြီး လုပ်ကိုင်ကြရသူတွေ ဖြစ်လို့ တရုတ်ဘက်က ဖမ်းဆီးစစ်ဆေးမှုတွေ ရှိလာချိန်မှာ ရက်ကျော်ဝင်ရောက် နေထိုင်မှု၊ ကန့်သတ် နယ်မြေတွေကို ဖြတ်ကျော် ဝင်ရောက်မှုတွေနဲ့ အရေးယူခံရလေ့ ရှိတယ်လို့ ဆိုပါတယ်။

နယ်မြေကျော် ဝင်ရောက် မြန်မာလုပ်သားတွေကို တရုတ်ပြည် စီကိုင်ထောင်မှာ ထိန်းသိမ်းခဲ့တယ်လို့ ဆိုပါတယ်။

ပြန်ပို့ခံရတဲ့ မြန်မာလုပ်သားတွေဟာ ပခုက္ကူ၊ မုံရွာ၊ ကလေး၊ တမူး၊ စစ်ကိုင်း၊ ရခိုင်ဒေသတွေက လာလုပ်ကြသူတွေ များပြီး အနည်းဆုံး လုပ်အားခ တရက်ကို ကျပ် ၂ သောင်း ဝန်းကျင်ရကြတဲ့အတွက် သူတို့နေရပ်တွေဆီ မပြန်ချင်ကြတာ တွေ့ရတယ်လို့ မူဆယ်မြို့ လူမှု ကူညီပေးနေသူတွေက ပြောပါတယ်။

တရုတ်ဘက်မှာရှိတဲ့ စိုက်ခင်းတွေ စက်ရုံတွေမှာ အလုပ်သမား လိုအပ်ချက်တွေ ရှိလို့ တရားမဝင် ဝင်ရောက် လုပ်ကိုင်နေတဲ့ မြန်မာလုပ်သား သိန်းချီ ရှိနေပြီလို့ သူတို့တွေက ပြောပါတယ်။

တရားဝင် သွားရောက်လုပ်ကိုင်ဖို့အတွက် တရုတ် - မြန်မာ နှစ်နိုင်ငံ အစိုးရကြား သဘောတူညီမှု MOU ရေးထိုးထားတာ မရှိလို့ အလုပ် သွားလုပ်ကြသူတွေဟာ ပွဲစားတွေ၊ တရုတ်လုပ်ငန်းရှင်တွေရဲ့ ဆက်သွယ် ခေါ်ယူမှုနဲ့ အလုပ်လုပ်ကြတာ ဖြစ်တယ်လို့ မူဆယ်မြို့ လူမှုကူညီရေး လှုပ်ရှားသူတွေက ပြောပါတယ်။

BBC Burmese
https://www.bbc.com/burmese