မန္တလေးတိုင်းမှာကျောင်းသားတွေမကြာခဏအသတ်ခံရလို့ ကျောင်းသားသမဂ္ဂကလုံခြုံရေးတောင်းဆို

မန္တလေးတိုင်းတွင် အသတ်ခံလိုက်ရသော တက္ကသိုလ်ကျာင်းသား ၃ ဦး / Photo-Ye Myo Swe(ABFSU)

မန္တလေးတိုင်းမှာ ၆ လအတွင်း တက္ကသိုလ်ကျောင်းသား ၃ ယောက်အသတ်ခံလိုက်ရတဲ့အတွက် ကျောင်းပရဝုဏ်တွေမှာ လုံခြုံရေးကောင်းအောင်စီစဉ်ပေးဖို့ ကျောင်းသားတွေတောင်းဆိုနေကြ ပါတယ်။

ပြီးခဲ့တဲ့ ဇွန်လ ၁၂ ရက်နေ့မှာ ကျောက်ဆည်တက္ကသိုလ်ကျောင်းသား ကိုထက်လင်းသန့် ဟာ တယ်လီဖုန်းအလုခံရပြီး ဓားထိုးအသတ်ခံလိုက်ရပါတယ်၊၊ သြဂုတ်လ ၂၉ ရက်နေ့မှာတော့  ဆိုက်ဘာစီးတီး တက္ကသိုလ်ကျောင်းသား ကိုနေမင်းထက်ဟာ မော်တော်ဆိုင်ကယ်အလုခံရပြီးအသတ်ခံရလိုက်ရပါတယ်။ ပြီးခဲ့တဲ့ ဒီဇင်ဘာလ ၂၅ ရက်နေ့မှာတော့ ရတနာပုံတက္ကသိုလ်က ကုန်ထုတ်ဓာတု နောက်ဆုံးနှစ်ကျောင်းသား ကိုစိုးမိုးဟိန်း အသတ်ခံလိုက်ရပါတယ်။ ဒီဖြစ်ရပ်အတွက် ထပ်တူဝမ်းနည်း ကြေကွဲရတဲ့ အကြောင်းကြားစာကို ပညာရေးဝန်ကြီးကိုယ်စား ဒုတိယဝန်ကြီး ဒေါက်တာဦးဝင်းမော်ထွန်းက ဒီဇင်ဘာလ ၂၆ ရက်နေ့စွဲနဲ့ ကိုစိုးမိုးဟိန်းရဲ့မိဘတွေဆီပေးပို့ခဲ့ပါတယ်။

ကျောက်ဆည်ကျောင်းသားအသတ်ခံရမှုမှာတော့ တရားခံ ၃ ယောက်မှာ တယောက်ကိုထောင်ဒဏ် တစ်သက်တစ်ကျွန်းနဲ့ ကျန်တဲ့ ၂ ယောက်ကို ထောင် ၁ဝ နှစ်စီချလိုက်တယ်လို့ ရတနာပုံတက္ကသိုလ် ဗကသများအဖွဲ့ချုပ်က ကိုရဲမျိုးဆွေကပြောပါတယ်။ ဆိုက်ဘာစီးတီး ကျောင်းသားအသတ်ခံရတဲ့အမှု မှာ တရားခံ ၅ ယောက်ပါပြီး၊ အဲဒီထဲက ၄ ယောက်ပဲမိထားပါတယ်၊ ၁ ယောက်လွတ်နေသေးတယ်လို့ ပြောပါတယ်။

အခုနောက်ဆုံးဖြစ်တဲ့ ကုန်ထုတ်ဓာတုနောက်ဆုံးနှစ်ကျောင်းသား ကိုစိုးမိုးဟိန်းအသတ်ခံရတဲ့အမှုမှာ ပတ်သက်တဲ့သူ ၄ ယောက်ရှိတယ်လို့ သူနဲ့အတန်းဖော်သူငယ်ချင်းတယောက်ကပြောပါတယ်။ ဒါပေမယ့် ခုချိန်ထိ တရားခံတယောက်မှမမိသေးဘူးလို့လဲ သမဂ္ဂခေါင်းဆောင် ကိုရဲမျိုးဆွေက ပြောပါတယ်။ ဒီကိစ္စနဲ့ပတ်သက်လို့ ရဲစခန်းကိုဆက်သွယ်ပေမယ့် ဆက်သွယ်လို့မရသေးပါဘူး။

ဒီလို ကျောင်းသားတွေမကြာခဏ အသက်အန္တရာယ်ကျနေတဲ့အတွက် မြို့စွန်မှာတည်ဆောက်ထားတဲ့ ကျောင်းတွေကို လုံခြုံရေးပိုယူပေးဖို့၊ ဒါမှမဟုတ် မြို့တွင်းကကျောင်းတွေနဲ့ပေါင်းပေးဖို့ ရတနာပုံ တက္ကသိုလ် ဗကသများအဖွဲ့ချုပ်က မကြာခဏဆန္ဒပြတောင်းဆိုနေပေမယ့် မန္တလေးတိုင်းအစိုးရက လျစ်လျူရှုထားတယ်လို့ ကိုရဲမျိုးဆွေကပြောပါတယ်။

RFA Burmese
https://www.rfa.org/burmese