TNLA မှ နန်းမိုဟွမ်အား ထောင်ဒဏ် ၃ နှစ်ချမှတ်သည့်အပေါ် မိသားစုဝင်များမသိရဟုဆို

ဖမ်းဆီးသွားသော နန်းမိုဟွမ် နှင့် ၄င်းတို့၏ထုတ်ပြန်ချက်

သျှမ်းပြည်နယ် မြောက်ပိုင်း နမ့်ခမ်းသူ နန်းမိုဟွမ်အား တအာင်း ပလောင်  အမျိုးသားလွတ်မြောက်ရေးတပ်မတော်  TNLA  က အောက်တိုဘာ ၅ ရက်နေ့တွင် ထောင်ဒဏ် ၃ နှစ်ချလိုက်သည့်အပေါ် မိသားစုဝင်မှ မသိရှိရကြောင်း ဆိုပါသည်။

“မနေ့က သတင်းတွေထွက်လာတာတွေ့တယ်။ ဒီအကြောင်း ကျမတို့ဘာမှမသိရဘူး။ အကြောင်းကြားလာတာလဲ မရှိသေးဘူး။ ဒါကြောင့် ကျမတို့ဘက်က ဘာမှမပြောနိုင်သေးဘူး။ နန်းမိုဟွမ်ဘေးကင်းစွာနဲ့ အမြန်ဆုံးပြန်လည် လွှတ်မြောက်လာဖို့ ဘဲကျမတို့ဆုတောင်းနေတယ်။ ”- ဟု နန်းမိုဟွမ် ၏ မိသားစုဝင်တဦး ကပြော သည်။

နန်းမိုဟွမ်အား TNLA မှ ရာဇာသတ်ကြီး ပုဒ်မ ၃၃၃ ဖြင့် TNLA ဗဟို တရားရုံးမှ ထောင်ဒဏ် ၃နှစ် စီရင်ချက် ချလိုက်ကြောင်း၊ အဆိုပါ စီရင်ချက်ချ လိုက်သည့် နေ့တွင် နန်းမိုဟွမ် သည် သူမ ၏ မိသားစုဝင်များနှင့် မတွေ့ခဲ့ရကြောင်း TNLA မှ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က ပြောသည်။

“ နန်းမိုဟွမ်ကို ကျနော်တို့ ဗဟို တရားရုံးက အောက်တိုဘာ ၅ ရက်နေ့ ညနေပိုင်းမှာ ထောင်ဒဏ် ၃နှစ် ချလိုက်တာ ဟုတ်ပါတယ်။ သူ့မိသားစုဝင်တွေ နဲ့ ဘာလို့ပေးမတွေ့လဲဆိုတော့ ကျနော်လည်း မသိသေးဘူး။ သူ့ ကျန်းမာရေးကတော့ ကောင်းပါတယ်။ ကျနော်တို့ ဌာနမှာပဲထားထားပါတယ်။ ဒီလောက်ဘဲပြောနိုင်ပါတယ် ။ ဘာလို့လဲဆိုတော့ ကျနော် ဗဟိုနဲ့သွားမတွေ့ရသေးတော့ အသေးစိပ်မသိရသေးဘူး ” ဟု ဗိုလ်မှူး မိုင်းအိုက်ကျော်က ဆိုသည်။

နန်းမိုဟွမ်ကို ဖမ်းဆီး ထောင်ချခြင်းသည် လူမျိုးရေး နှင့်မဆိုင်ကြောင်း၊ TNLA ဥပဒေကို ချိုးဖောက်မှုကြောင့် ပြုလုပ်ရခြင်းဖြစ်ကြောင်း ဗိုလ်မှူး မိုင်းအိုက်ကျော်က ပြောသည်။

သို့သော် လက်ရှိအနေအထားအရ နန်းမိုဟွမ်ကို ထိုသို့ထောင်ဒဏ် ၃ နှစ်ချမှတ်လိုက်သည့်အပေါ် သမိုင်း တလျှောက်အတူတကွ ဒွန်တွဲနေထိုင်လာသည့် သျှမ်း နှင့် တအာင်းပလောင် လူမျိုး ကြား ပဋိပက္ခဖြစ်ပွားမည်ကို နမ့်ခမ်းဒေသခံများက စိုးရိမ်နေကြကြောင်း ၊ ထို့အတွက်အမြန်ဆုံးပြန်လည်လွှတ်ပေးစေလိုကြောင်း နမ့်ခမ်းဒေသခံ လူငယ်များကပြောဆိုနေကြသည်။

နန်းမိုဟွမ် ကို စက်တင်ဘာ ၁၇ ရက် နေ့ မနက် ၈ နာရီခွဲ အချိန် က သူမ၏ ကလေး အား ထမင်းကျွေးနေချိန် လက်နက်ကိုင်တအာင်းတပ်ဖွဲ့ဝင် ၅ ဦးက သူမအား သေနတ်ထိုးချိန်ကာ ကားပေါ် တင်ဖမ်းဆီး ခေါ်ဆောင်သွားခဲ့သည် ။

ယမန်နှစ်က နန်းမိုဟွမ် အိမ်မှ အခွန် ၁၁ သိန်းကောက်ခံပြီးအပြန် တအာင်းတပ်သား ၂ ဦးအား လမ်းတွင် အစိုးရတပ်မှ ချောင်းမြောင်းပစ်ခတ်ရာ တဦးသေ တဦးဖမ်းဆီးခံရသဖြင့် နန်းမိုဟွမ်အား တအာင်းအကောက်ခွန် ၀န်ထမ်းအား တာဝန်ဝတ္တရားနှောင့်ယှက်မှုဟုဆိုကာ ရာဇသတ်ကြီး ပုဒ်မ ၃၃၃ ဖြင့် အရေးယူမည်ဖြစ်ကြောင်း၊ မိဘများရှေ့မှောက်တွင်တရားစီရင်မည်ဖြစ်ကြောင်း TNLA ၏ ပြန်ကြားရေးဌာနက ကြေငြာချက်ထုတ်ပြန်သည်။

အဆိုပါ ဥပဒေပုဒ်မ သည် နုိုင်ငံတော်မှ အပ်နှင်းထားသည့် ဥပဒေလုပ်ပိုင်ခွင့်ရှိသူ (ရှေ့နေ သို့မဟုတ် တရားရုံးရှေ့ နေ ရှေ့ရပ် )တွင် တာ တရားစီရင်ရမည့်အပြင် တရားစီရင်ရေးပေးထားသည့် တရားရုံးတွင်သာ ပြည်သူ၏ ရှေ့မှောက်တွင် ပြဌာန်းထားသည့် ဥပဒေဖြင့် စီရင်ရမည်- ဟု ၄င်းဥပဒေပုဒ်မပါသည့် အခန်းတွင် ဖော်ပြထားကြောင်း ဥပဒေဘာသာရပ်ဖြင့်ကျောင်းပြီးထားသည့် သျှမ်းလူငယ်အဖွဲ့ဝင်တဦး ကပြောသည်။

တအာင်းတပ်ဖွဲ့ TNLA သည် မြောက်ပိုင်းမဟာမိတ်တပ်ဖွဲ့ဝင်တဖွဲ့ဖြစ်ပြီး အစိုးရနှင့် အပစ်ရပ်ငြိမ်းချမ်းရေး လက်မှတ်ရေးထိုးနိုင်ရန်ကြိုးစားနေသည့်အဖွဲ့ဖြစ်သည်။

Panglong(Burmese)
https://www.facebook.com/Panglong.burmese/
TNLA မှ နန်းမိုဟွမ်အား ထောင်ဒဏ် ၃ နှစ်ချမှတ်သည့်အပေါ် မိသားစုဝင်များမသိရဟုဆို TNLA မှ နန်းမိုဟွမ်အား ထောင်ဒဏ် ၃ နှစ်ချမှတ်သည့်အပေါ် မိသားစုဝင်များမသိရဟုဆို Reviewed by THITHTOOLWIN on 18:45 Rating: 5
Powered by Blogger.