ယာဉ်တစ်စီးချောက်ထဲသို့ထိုးကျ၍ လူတစ်ဦးသေဆုံး နှစ်ဦးဒဏ်ရာရ

တွန်းဇံ - အောက်တိုဘာ ၄

ချင်းပြည်နယ်၊ တွန်းဇံမြို့နယ်၊ တွီးတူမ်းကျေးရွာအနီးတွင် ၂၀၁၈ ခုနှစ်၊ အောက်တိုဘာလ (၄)ရက်နေ့ ညနေ(၃)နာရီ(၄၀)မိနစ်အချိန် တွန်းဇံ-ကျီခါး လမ်းပေါ်ရှိ ကီလိုမီတာ(၅၀-၅၁)အကြားတွင် ယာဉ်တစ်စီးချောက်ထဲသို့ထိုးကျ၍ လူတစ်ဦးသေဆုံး နှစ်ဦးဒဏ်ရာ ရရှိမှု ဖြစ်ပွားခဲ့သည်။

ဖြစ်စဉ်မှာ ယာဉ်မောင်း ဇမ်ရှင်းဟောက်(၁၉)နှစ်(ဘ)ဦးပေါင်ဆွင်းခမ်သည် ယာဉ်အမှတ်(7L/----) SKAT(ဖြူ)ဖြင့် နတ်ဇန်ကျေးရွာမှသဲများ တင်ဆောင်ကာ နောက်လိုက် ဆွင်ဗျက်ဆန်(၂၀)နှစ် (ဘ)ဦးဇင့်ရှင်းထန်နှင့် ဒါလ်းဇကပ်(၂၀)နှစ်(ဘ)ဦးထန်ဆွင်းထောင်နှင့်အတူ တွန်းဇံမြို့သို့ ပြန်တက် လာခဲ့ကြသည်။

 ကျီခါး-တွန်းဇံလမ်း ကီလိုမီတာ(၅၀-၅၁)ကြား တွန်းဇံမြို့မှ(၅)ဖာလုံခန့်အကွာတွင် အရှိန်မထိန်းနိုင်ဘဲ ချောက်ထဲသို့ (၁၂၀)ပေခန့် ထိုးကျတိမ်းမှောက်လျက်ရှိခဲ့ရာ ယာဉ်မောင်း ဇမ်ရှင်းဟောက်(၁၉)နှစ်(ဘ)ဦးပေါင်ဆွင်းခမ်သည် ဦးခေါင်းနောက်စေ့ဖူးရောင်ဒဏ်ရာနှင့် ကျောကုန်း ညိုမဲဒဏ်ရာဖြင့် အခင်းဖြစ်ပွားသည့်နေရာတွင် သေဆုံးလျက်ရှိသည်။

 ယာဉ်နောက်လိုက် ဆွင်ဗျက်ဆန်(၂၀)နှစ် (ဘ)ဦးဇင့်ရှင်းထန်သည် ၀ဲဘက်ခြေသလုံးရိုးကျိုးဒဏ်ရာ(မစိုးရိမ်ရ)ရရှိသည့်အပြင် ဒါလ်းဇကပ်(၂၀)နှစ်(ဘ)ဦးထန်ဆွင်းထောင်သည် ၀ဲဘက်မျက်ခုံး ပေါက်ပြဲဒဏ်ရာ(မစိုးရိမ်ရ)ရရှိခဲ့သည်။

 ယာဉ်အားမဆင်မခြင်မောင်းနှင်ပြီး ချောက်ထဲပြုတ်ကျကာ နာကျင်ဒဏ်ရာများနှင့်အသက်သေစေအောင် မောင်းနှင်ခဲ့သူ ဇမ်ရှင်းဟောက်အား ယာဉ်(ပ)၂/၂၀၁၈ ရာဇသတ်ကြီးပုဒ်မ ၃၃၇/၃၃၈/၃၀၄ တို့ဖြင့် အရေးယူဆောင်ရွက်သွားမည်ဖြစ်ကြောင်း သိရသည်။

သတင်း - ဓါတ်ပုံ ။  ။ တွန်းဇံ သတင်း