စင်္ကာပူ နိုင်ငံ မှာ စီးပွားရေး၊ ရခိုင်အရေး နဲ့ ဒီမိုကရေစီ ပြောင်းလဲရေး ကို ဟောပြောမယ်

၂၁ ရာစု ပင်လုံညီလာခံမှာ မိန့်ခွန်း ပြောကြား စဉ်

အရှေ့တောင် အာရှ ဆိုင်ရာ သုတေသန ဌာန မြန်မာ လေ့လာရေး အစီအစဉ် က နိုင်ငံတကာ ခေါင်းဆောင်တွေကို ဖိတ်ကြားလေ့ ရှိပြီး သူတို့အမြင်တွေကို ဟောပြော ပို့ချလေ့ ရှိရာမှာ လာမယ့် သြဂုတ် ၂၁ ရက်နေ့မှာ ဟောပြောဖို့ မြန်မာနိုင်ငံက အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို ဖိတ်ကြားခဲ့ပါတယ်။

မြန်မာနိုင်ငံ ဒီမိုကရေစီအသွင်ကူးပြောင်းရေး ဆိုင်ရာ စိမ်ခေါ်မှု နဲ့ ရှေ့အလားအလာ Myanmar 's Democratic Transition: Challenges and Way Forward ခေါင်းစဉ် နဲ့ လာရောက် ပြောကြားပေးဖို့ စင်ကာပူ အခြေစိုက် သုတေသန ဌာနက ဖိတ်ကြားခဲ့တာ ဖြစ်ပါတယ်။

 ပြန်ကြားရေး ၀န်ကြီးဟောင်း ဦးရဲထွဋ်

နိုင်ငံတကာက ပုဂ္ဂိုလ်တွေကို ရွေးချယ် ဖိတ်ကြားခဲ့ရာမှာ ဒေါ်အောင်ဆန်းစုကြည်ဟာ ၄၃ ယောက်မြောက် ပုဂ္ဂိုလ် ဖြစ်တယ်လို့ အဲဒီဌာနမှာ Senior Visiting Fellow အဖြစ်ရောက်နေတဲ့ မြန်မာ ပြန်ကြားရေး ဝန်ကြီးဟောင်း ဦးရဲထွဋ် က ပြောပါတယ်။

တက်ရောက်သူတွေ အနက် ယေဘုယျအားဖြင့် ပညာရှင်တွေ အများစု ဖြစ်ပြီး ၊ သံတမန် အသိုင်းအဝိုင်း ၊ စင်ကာပူ အစိုးရက တာဝန်ရှိသူတွေ ၊ စင်ကာပူက စီးပွားရေး လုပ်ငန်းရှင်တွေ ၊ တခြား စင်ကာပူ တက္ကသိုလ်က ပညာရှင်တွေ အပြင် စင်ကာပူ ရောက် မြန်မာ နိုင်ငံသားတွေ နဲ့ စင်ကာပူမှာ ကျောင်းတက်နေတဲ့ မြန်မာ ကျောင်းသူ ကျောင်းသားတွေကို ဖိတ်ကြားမှာ ဖြစ်တယ်လို့ သူက ဆိုပါတယ်။

ဒီပွဲမှာ ဒေါ်အောင်ဆန်းစုကြည် အနေနဲ့ လက်ရှိ မြန်မာ နိုင်ငံမှာ လာရောက် ရင်းနှီး မြုပ်နှံကြဖို့ ၊ မြန်မာ နိုင်ငံ အပေါ် ယုံကြည်မှုတွေ ရှိလာစေဖို့ အပြင် မြန်မာ နိုင်ငံ ရဲ့ အလားအလာတွေကို ဟောပြော လိမ့်မယ်လို့ ယူဆ ရကြောင်း ဦးရဲထွဋ် က ပြောပါတယ်။

အဓိက ကတော့ စီးပွားရေး ၊ ရခိုင် ပြည်နယ် အရေး နဲ့ ငြိမ်းချမ်းရေး တည်ဆောက်နေမှု အခြေအနေတွေကို ဒေါ်အောင်ဆန်းစုကြည်က ရှင်းလင်း ပြောကြားလိမ့်မယ်လို့ ထင်ကြောင်း သူက ဆိုပါတယ်။

BBC Burmese
https://www.bbc.com/burmese