တတိယပင်လုံသဘောတူညီချက်ကို ပြည်ထောင်စုလွှတ်တော် အတည်ပြု

၂၁ ရာစုပင်လုံ တတိယအစည်းအဝေး ဒုတိယနေ့ကို နေပြည်တော်က မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန(၂)မှာ ၂၀၁၈ ဇူလိုင်လ ၁၂ ရက်နေ့က ကျင်းပခဲ့စဉ်/ Photo: Thiha Tun

တတိယအကြိမ် ၂၁ ရာစု ပင်လုံညီလာခံကနေ ရရှိထားတဲ့ ပြည်ထောင်စုသဘောတူညီချက်ကို ဒီနေ့ ပြည်ထောင်စု လွှတ်တော်မှာ ကန့်ကွက်သူမရှိ အတည်ပြုလိုက်ပါတယ်။

ပြီးခဲ့တဲ့ ဇူလိုင်လ ၁၁ ရက်နေ့ကနေ ၁၆ ရက်နေ့အထိ ကျင်းပခဲ့တဲ့ ၂၁ ရာစု တတိယပင်လုံအစည်းအဝေးမှာ ကဏ္ဍလေးရပ်က အချက် ၁၄ ချက်ကို သဘောတူခဲ့တာဖြစ်ပါတယ်။ အဲဒီသဘောတူညီချက်ကို ပြည်ထောင် စုရှေ့နေချုပ် ဦးထွန်းထွန်းဦးက လွှတ်တော်ထံ တင်ပြခဲ့ပါတယ်။

ပြီးခဲ့တဲ့ တတိယပင်လုံအစည်းအဝေးမှာ အစိုးရ၊ လွှတ်တော်၊ တပ်မတော်၊ တိုင်းရင်းသားလက်နက်ကိုင်အဖွဲ့တွေ နဲ့ နိုင်ငံရေးပါတီအစုအဖွဲ့တို့က နိုင်ငံရေး၊ စီးပွားရေး၊ လူမှုရေး၊ မြေယာနဲ့ သဘာဝပတ်ဝန်းကျင် စတဲ့ ကဏ္ဍလေးခု ကို ဆွေးနွေးခဲ့ပါတယ်။

နိုင်ငံရေးကဏ္ဍမှာ အချက် ၄ ချက်၊ စီးပွားရေးကဏ္ဍ တစ်ချက်၊ လူမှုရေးကဏ္ဍ ၇ ချက်နဲ့ မြေယာနဲ့ သဘာဝပတ် ၀န်းကျင်ကဏ္ဍ ၂ ချက် စုစုပေါင်း ၁၄ ချက်ကို သဘောတူညီနိုင်ခဲ့ပေမယ့် လုံခြုံရေးကဏ္ဍကိုတော့ မဆွေးနွေးနိုင် ခဲ့ပါဘူး။

၂၀၁၇ ခုနှစ်က ကျင်းပခဲ့တဲ့ ဒုတိယအကြိမ် ပင်လုံညီလာခံမှာ သဘောတူညီချက် ၃၇ ချက် ရှိထားတဲ့အတွက် အခုဆိုရင် သဘောတူညီချက် ၅၁ ချက်ရှိသွားပြီဖြစ်ပါတယ်။

၂၀၁၅ ခုနှစ် အောက်တိုဘာလမှာ အစိုးရနဲ့ တိုင်းရင်းသားလက်နက်ကိုင် ၈ ဖွဲ့တို့ NCA လက်မှတ်ရေးထိုးပြီးနောက် ဒီဇင်ဘာလမှာ ကျင်းပမယ့် ပြည်ထောင်စုလွှတ်တော်မှာ အတည်ပြုခဲ့ပါတယ်။

အရင်အစိုးရလက်ထက် ၂၀၁၆ ခုနှစ်၊ ဇန်န၀ါရီလနဲ့ အစိုးရသစ်လက်ထက် သြဂုတ်လမှာ ကျင်းပတဲ့ ငြိမ်းချမ်းရေးညီလာခံတွေမှာ သဘောတူညီချက်တွေ ချမှတ်နိုင်တာမရှိခဲ့ပါဘူး။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ၂၀၂၀ ပြည့်နှစ် မတိုင်ခင်မှာ ဒီမိုကရေစီ ဖယ်ဒရယ်ဆိုင်ရာမူဝါဒတွေ အပြီးသတ်ဆွေးနွေးပြီး ငြိမ်းချမ်းရေးညီလာခံကို အနည်းဆုံး ၃ ကြိမ်ကျင်းပနိုင်ဖို့ တိုက်တွန်းထားပါတယ်။

RFA Burmese
https://www.rfa.org/burmese