မြိတ် သြဂုတ် ၂၄
တနင်္သာရီတိုင်းဒေသကြီး မြိတ်မြို့ နောက်လယ်ရပ်ကွက် ပိတောက်ရွှေဝါလမ်းမကြီးနှင့် နောက်လယ် (၉)လမ်းထောင့်ရှိ ကမ္ဘောဇဘဏ်ခွဲ(၃)၌ ယနေ့ နေ့လယ်(၁၂)နာရီခန့်က ဓါးရှည်ကိုင်ပြီး ဘဏ် အတွင်းဝင်ရောက်ကာ ခြိမ်းခြောက်၍ စုစုပေါင်းငွေ(၅)သိန်း လုယူသွားသူအား မြိတ်ခရိုင်ရဲတပ်ဖွဲ့မှ(၂)နာရီ အတွင်း ဖမ်းဆီးရမိခဲ့ကြောင်း သိရသည်။
ဓားပြခြိမ်းခြောက်ကာ ငွေလုယူသွားသူသည် မြိတ်မြို့ မြိတ်တောင်နယ်မြေ မြို့သစ်(၇)ရပ်ကွက် ယုဇနလမ်းနေ မင်းမင်းစိုး(ခ)မင်းစိုး ဖြစ်ကြောင်း မြိတ်ခရိုင်ရဲတပ်ဖွဲ့မှ သိရသည်။ ၎င်းအား အခင်းဖြစ်ပွားပြီးနောက် မြိတ်ခရိုင်ရဲတပ်ဖွဲ့မှူး ဒုတိယရဲမှူးကြီးတင်ထွန်း ကြီးကြပ်ကွပ်ကဲမှုဖြင့် ခရိုင်/မြို့နယ်/မြို့မစခန်း/နယ်ထိန်း/ နယ်မြေ ရဲတပ်ဖွဲ့ဝင်များသည် ၎င်း၏နေအိမ်အား သွားရောက်ရှာဖွေခဲ့ရာ ၎င်းအားနေအိမ်အရှေ့တွင် တွေ့ရှိရ သဖြင့် လိုက်လံဖမ်းဆီးစဉ် ၎င်းသည် ဦးကျားမောင် လှေဒေါက်အတွင်း ပြေးဝင်သွားခဲ့ပြီး ရဲတပ်ဖွဲ့ဝင်များအား ၎င်းကိုင် ဆောင်ထားသော ဓားမကောက်ဖြင့် ခုခံသောကြောင့် မြိတ်ခရိုင်ရဲတပ်ဖွဲ့ မှုခင်းအကူအဖွဲ့မှ ရဲအုပ်ခင်မောင်အေး က ၎င်းကိုင်ဆောင်သော သေနတ်ဖြင့် (၂) ချက် ပစ်ဖောက်ခြောက်လန့်ခဲ့ရာ ၎င်းသည် ယောကြီးဝချောင်း တောလှေဆိပ် တံတားအရှေ့ရှိ ငါးဝယ်ဗောတွင် တွယ်ကပ်နေစဉ် ဖမ်းဆီးရမိခဲ့ကြောင်း မြိတ်ခရိုင် ရဲတပ်ဖွဲ့မှ သိရသည်။
ဖြစ်စဉ်မှာ ဘဏ်အတွင်းသို့ အသားရောင်လျှာထိုး ဦးထုပ်ဆောင်းကာ အနက်ရောင် ဂျင်းဘောင်းဘီ အရှည်ဝတ်ဆင်ပြီး ၎င်းလက်ထဲ၌ အရိုး(၁)ပေခန့်၊ အသွား(၁)ပေခန့်ရှိ စတီးရိုးတပ် ဓားမကောက်အား ကိုင် ဆောင်ကာ ဘဏ်ငွေကောင်တာ(၂)မှ တစ်ထောင်ကျပ်တန်(၃)သိန်း၊ ကောင်တာ (၅)မှ တစ်ထောင်ကျပ်တန် (၂)သိန်း၊ စုစုပေါင်း(၅)သိန်းအား ဓားပြခြိမ်းခြောက်၍ ယူဆောင်ပြီး ဆိုင်ကယ် Dream 125 ရွှေလိုင်း အမျိုး အစား ကျောက်စိမ်းရောင် နံပါတ်မပါ ဆိုင်ကယ်(ဒူးကာနှစ်ဖက်မပါ)ဖြင့် မောင်းနှင်၍ ထွက်သွားခဲ့သည်။
မြိတ်မြို့ ကမ္ဘောဇဘဏ်ခွဲ(၃)မှ ဓားပြခြိမ်းခြောက်ပြီး ငွေလုယူသွားသူ မင်းမင်းစိုးအား မြိတ်ခရိုင်ရဲတပ်ဖွဲ့ မှ မွန်းလွဲ(၁)နာရီ(၅၅)မိနစ်တွင် ဖမ်းဆီးရမိခဲ့ပြီး ၎င်းအား မြိတ်မြို့မရဲတပ်ဖွဲ့ စခန်းမှ အမှုဖွင့် အရေးယူဆောင်ရွက်လျက်ရှိကြောင်း သတင်းရရှိသည်။
ခိုင်ထူး (မြိတ် ပြန်/ဆက်)
MOI Webportal Myanmar
https://www.facebook.com/MOIWebportalMyanmar
မြိတ်မြို့ ကမ္ဘောဇဘဏ်ခွဲ(၃)၌ ဓားပြခြိမ်းခြောက်ပြီး ငွေလုယူသူအား (၂)နာရီအတွင်း ဖမ်းဆီးရမိ
Reviewed by THITHTOOLWIN
on
20:55
Rating: