ဖိနပ်ဘူးထဲက တရုတ်ပန်းအိုး ယူရို ၁၆ သန်းနဲ့ အရောင်းထွက် |
ပဲရစ်မြို့မှာ ရှိတဲ့ Sotheby's လေလံပွဲမှာ ရောင်းချခဲ့တဲ့ ပန်းအိုးဟာ အရင်က ယူရို ၅ သိန်းကနေ ၇ သိန်းကြား ရောင်းချရမယ်လို့ ခန့်မှန်းထားခဲ့ပေမယ့် အခုတော့ ခန့်မှန်းဈေးနှုန်းထက် အဆ ၂၀ ကျော် ပိုရောင်းချခဲ့တာ ဖြစ်ပါတယ်။ ဒီပန်းအိုးကို မိသားစုတစုက အမွေရရှိခဲ့တာ ဖြစ်ပြီး အိမ်ရဲ့ ထပ်ခိုးအောက်မှာ ရှာဖွေတွေ့ရှိခဲ့တာလို့ ဆိုပါတယ်။
Sotheby'sက အာရှ အနုပညာရေးရာ ကျွမ်းကျင်သူ Olivier Valmierက ပန်းအိုးကို ရောင်းဖို့ ရောင်းတဲ့သူက ရထားတတန်၊ ကားတတန်နဲ့ ခြေကျင်တသွယ် လမ်းလျှောက်ပြီး လာခဲ့တာလို့ ပြောပါတယ်။ ဒီပန်းအိုးကိုလည်း ဖိနပ်ထည့်တဲ့ ဘူးထဲမှာ သတင်းစာလေးနဲ့ ပတ်ပြီး ထည့်လာတာလို့ သူက ဆိုပါတယ်။
ဒီပန်းအိုးဘူးလေးကို ဖွင့်လိုက်တဲ့အချိန်မှာ ပန်းအိုးပေါ်မှာ ဆွဲထားတဲ့ အနုပညာ လက်ရာကို ကြည့်ပြီး အံအားသင့်ခဲ့ရတယ်လို့လည်း မစ္စတာ Valmierက ပြောပါတယ်။
မီးသီးသဏ္ဍာန်ရှိတဲ့ ပန်းအိုးကို အစိမ်းရောင်၊ အပြာရောင်၊ အဝါရောင်၊ ခရမ်းရောင်တွေနဲ့ ခြယ်သထားပြီး တရုတ် Qing မင်းဆက် လက်ထက်က ပြုလုပ်ခဲ့တာ ဖြစ်ပါတယ်။
၁၇၃၆ ခုနှစ်ကနေ ၁၇၉၅ ခုနှစ် အတွင်း တရုတ်နိုင်ငံကို အုပ်စိုးခဲ့တဲ့ Qianlong ဧကရာဇ်ရဲ့ အမှတ်အသားတွေ ပန်းအိုးပေါ်မှာ တွေ့ရတယ်လို့ ဆိုပါတယ်။
ဒါအပြင် တောအုပ်ထဲမှာ သမင်၊ ဌက်နဲ့ တခြားတိရစ္ဆာန်ပုံတွေကို ပန်းအိုးပေါ်မှာ ရေးဆွဲထားတာကို တွေ့ရပါ တယ်။ ဒီပန်းအိုးဟာ တစုံတရာ ထိခိုက်မှုမရှိဘဲ အကောင်း ပကတိရှိနေတယ်လို့ မစ္စတာ Valmierက ဆိုပါတယ်။
ပန်းအိုးပိုင်ရှင်က သူတို့ရဲ့ အဘိုးအဘွားတွေအပါအဝင် သူတို့ကိုယ်တိုင်လည်း ပန်းအိုးကို မကြိုက်ဘူးလို့ ပြောပါတယ်။ လေလံပွဲဟာ မိနစ် ၂၀ ကြာခဲ့ပြီး လေလံဆွဲသူ အများစုက ပန်းအိုးကို ဝယ်ယူဖို့ ကြိုးစားနေပါ တယ်။ ပန်းအိုးကို ဝယ်ယူတဲ့သူရဲ့ နာမည်ကိုတော့ ထုတ်ဖော်ပြောဆိုခဲ့ခြင်း မရှိပါဘူး။
BBC Burmese
http://www.bbc.com/burmese
ဖိနပ်ဘူးထဲက တရုတ်ပန်းအိုး ယူရို ၁၆ သန်းနဲ့ အရောင်းထွက်
Reviewed by THITHTOOLWIN
on
07:37
Rating: