လုံခြုံရေးတပ်ဖွဲ့ ထိပ်တန်းခေါင်းဆောင် ၇ ယောက်ကို အီးယူ အရေးယူ

ရခိုင်မြောက်ပိုင်း အရေး အစိုးရ လုံခြုံရေး တပ်ဖွဲ့တွေမှာ တာဝန် ရှိတယ်လို့ အီးယူ ယူဆ

မြန်မာစစ်ဘက်နဲ့ ရဲဘက် အရာရှိ ၇ ယောက် အပေါ် ဥရောပ သမဂ္ဂ အီးယူက ပိတ်ပင် ကန့်သတ်တဲ့ အရေးယူမှုတွေကို ဇွန်လ ၂ ၅ ရက် ဒီကနေ့ တရားဝင် ချမှတ် လိုက်ပါတယ်။

ရခိုင်ပြည်နယ်မြောက်ပိုင်းမှာ မြန်မာ အစိုးရ လုံခြုံရေးတပ်ဖွဲ့တွေနဲ့ နယ်ခြားစောင့်တပ်ဖွဲ့ဟာ လူ့အခွင့်အရေး ချိုးဖောက်မှုတွေ ဆိုးဆိုးရွားရွား ကျူးလွန်ခဲ့သလို၊ နိုင်ငံတကာ အကူအညီ အထောက်အပံ့တွေကိုလည်း လိုအပ်နေတဲ့ အရပ်သားတွေဆီ မရောက်အောင် ဟန့်တားခဲ့ကြောင်း အီးယူက တွေ့ရှိ ခဲ့ပြီး ဖြစ်တယ်လို့ ဆိုပါတယ်။

ဒါ့အပြင် လူ့အခွင့်အရေး ချိုးဖောက်မှုတွေ အပေါ် လွတ်လပ်တဲ့ စုံစမ်း စစ်ဆေးရေး ပြုလုပ်လို့ မရနိုင်အောင် နှောင့်ယှက် ဟန့်တားမှုတွေ အတွက်လည်း အဲဒီ တပ်ဖွဲ့တွေမှာ တာဝန် ရှိတယ်လို့ အီးယူရဲ့ ဆုံးဖြတ်ချက်ထဲ တွေ့ရပါတယ်။

အီးယူက အရေးယူလိုက်သူတွေထဲ အမှတ် ၃ စစ်ဆင်ရေး အထူးတပ်ဖွဲ့မှူး တာဝန်ယူခဲ့တဲ့ ဒုတိယဗိုလ်ချုပ်ကြီး အောင်ကျော်ဇောနဲ့ အနောက်ပိုင်းတိုင်း စစ်ဌာနချုပ် တိုင်းမှူး ဖြစ်ခဲ့တဲ့ ဗိုလ်ချုပ်မောင်မောင်စိုး အပါအဝင် စစ်ဘက် ခေါင်းဆောင် ၅ ယောက် ပါဝင်သလို၊ ရဲမှူးချုပ် ဖြစ်ခဲ့တဲ့ သူရစန်းလွင်နဲ့ နောက် ရဲ အဆင့်မြင့် အရာရှိ တစ်ဦး ပါဝင်ပါတယ်။

လူပုဂ္ဂိုလ်တွေ အပေါ်မှာပါ အရေးယူမှု ချမှတ်

အဲဒီ ၇ ယောက်ရဲ့ ပိုင်ဆိုင်မှုတွေကို ထိန်းချုပ်တာမျိုး၊ ဥရောပ သမဂ္ဂဝင် နိုင်ငံတွေဆီ ခရီးသွားလာခွင့် ပိတ်တာမျိုးတွေ ပြုလုပ်ဖို့ အီးယူက ဆုံးဖြတ်တာ ဖြစ်ပါတယ်။

မြန်မာနိုင်ငံကို စစ်လက်နက်ပစ္စည်းနဲ့ ခဲယမ်းမီးခြောက်တွေ၊ စစ်သုံးယာဉ်တွေ အပါအဝင် ပြည်တွင်း ဖိနှိပ်မှုတွေမှာ အသုံးချလို့ ရနိုင်တဲ့ ဘယ်လို ပစ္စည်းမျိုး၊ နည်းပညာမျိုးကိုမှ ရောင်းချတာ၊ ထောက်ပံ့တာ၊ ကြားဝင် ဆောင်ရွက်ပေးတာမျိုး မလုပ်ဖို့ အီးယူက ဆုံးဖြတ် ထားခဲ့ပြီး အခုလို ပုဂ္ဂိုလ် တစ်ဦးချင်းစီကိုပါ ထည့်သွင်းလာတာ ဖြစ်ပါတယ်။

အီးယူရဲ့ အရေးယူ ပိတ်ပင်မှုထဲ လူပုဂ္ဂိုလ် တစ်ဦးချင်းစီ အနေနဲ့ ထည့်သွင်း ခံရသူ ၇ ဦး ကတော့

၁။ ဒုတိယ ဗိုလ်ချုပ်ကြီး အောင်ကျော်ဇော

သူဟာ အမှတ် ၃ စစ်ဆင်ရေး အထူးအဖွဲ့မှူး အနေနဲ့ အနောက်ပိုင်းတိုင်း စစ်ဌာနချုပ်ရဲ့ လှုပ်ရှားမှုတွေကို ၂ဝ၁၅ ဩဂုတ်ကနေ ၂ဝ၁၇ အကုန်အထိ ကြီးကြပ်ခဲ့ရသူ ဖြစ်လို့ အဲဒီ ကာလ အပိုင်းအခြား အတွင်း ရိုဟင်ဂျာတွေ အပေါ် ကျူးလွန်တဲ့ ရက်စက်မှုတွေ အတွက် တာဝန် ရှိတယ်လို့ အီးယူက ယူဆတာ ဖြစ်ပါတယ်။

၂။ အနောက်ပိုင်းတိုင်း စစ်ဌာနချုပ် တိုင်းမှူး အဖြစ် ဆောင်ရွက်ခဲ့တဲ့ ဗိုလ်ချုပ် မောင်မောင်စိုး

၃။ ခြေမြန်တပ်မ ၉၉ ရဲ့ တပ်မမှူး ဗိုလ်မှူးချုပ် သန်းဦး

၎။ ခြေမြန်တပ်မ ၃၃ ရဲ့ တပ်မမှူး ဗိုလ်မှူးချုပ် အောင်အောင်

၅။ ဘူးသီးတောင် အခြေစိုက် အမှတ် ၁၅ စစ်ဆင်ရေး ကွပ်ကဲမှု ဌာနချုပ်မှူး ဗိုလ်ချုပ် ခင်မောင်စိုး

၆။ နယ်ခြားစောင့် တပ်ဖွဲ့မှူး ရဲမှူးချုပ် သူရ စန်းလွင်

၇။ အမှတ် ၈ လုံခြုံရေး ရဲတပ်ဖွဲ့မှူး သန့်ဇင်ဦး တို့ ဖြစ်ပါတယ်။

BBC Burmese
http://www.bbc.com/burmese