မိုးကြီးတာကြောင့် ရှမ်းနဲ့ စစ်ကိုင်းတို့မှာ ရေကြီးရေလျှံမှုတွေ ဖြစ်ပေါ်

ရှမ်းပြည်နယ် တောင်ကြီးမြို့မှာ ရေကြီး ရေလျှံနေသည်ကို တွေ့ရစဉ်။ Photo: Aung Myo - facebook

စစ်ကိုင်းတိုင်းဒေသကြီး၊ ကနီမြို့နယ်မှာ မနေ့က မိုးကြီးခဲ့တာကြောင့် ရေကာတာ ၂ ခု၊ တံတား တစ်စင်း နဲ့ လမ်းပိုင်းတစ်ချို့ ပြိုကျ ပျက်စီးခဲ့ပါတယ်။

မုဌောအနောက်ကျေးရွာမှာ ပေ ၄၀ နဲ့ ပေ ၃၀ ရှိတဲ့ ရေကာတာ ၂ ခု ကျိုးကျပျက်စီးခဲ့သလို မြေသားလမ်း တချို့ လည်း ပျက်စီးခဲ့တယ်လို့ စစ်ကိုင်းတိုင်း ကယ်ဆယ်ရေးနဲ့ ပြန်လည် နေရာချထားရေးဦးစီးဌာန ညွှန်ကြားရေးမှူး ဦးစ၀ီလီဖရန့်စ် က ပြောပါတယ်။

"၅ ရက်နေ့ည ၁ နာရီလောက်ကစပြီးတော့ မိုးတွေသည်းတဲ့အတွက်ကြောင့် ကနီက ၁၂ နေရာပေါ့၊ ထိခိုက် ပျက်စီးမှုတွေ ဖြစ်တာပေါ့နော်၊ မုဌောကျေးရွာအုပ်စု၊ မုဌောအနောက်ကျေးရွာမှာ ပြုလုပ်ထားတဲ့ ကျောက်စီ ရေကာတာ ၂ ခု ကျိုးသွားတာပေါ့နော်၊ ပေ ၄၀ ရှိတဲ့ ရေကာတာရယ်၊ ပေ ၃၀ ရှိတဲ့ ရေကာတာရယ်ပေါ့နော်၊ ပျက်စီးတာပေါ့၊ နောက် သမင်ခြံကျေးရွာအုပ်စု ချောင်းမ-ကနီလမ်းပေါ်မှာရှိတဲ့ မိုင်တိုင်အမှတ် ၂၀/၂ တံတား ချဉ်းကပ်မြေသားလမ်း ၁၅ ပေလောက် ပျက်စီးသွားတာပေါ့နော်"

ကနဲကျေးရွာမှာလည်း ချင်းတွင်းမြစ်ကမ်းပါး ရေတိုက်စားပြီး ပြိုကျခဲ့တာကြောင့် နေအိမ် ၃ လုံး ပြောင်းရွှေ့ရမယ့် အနေအထားရှိနေပြီး ရွှေ့ပြောင်းရမယ်ဆိုရင် ကူညီထောက်ပံ့ပေးသွားမှာဖြစ်တယ်လို့ ဦးစ၀ီလီဖရန့်စ် က ပြောပါတယ်။

ကနီမြို့နယ်အတွင်းက မုဌော၊ ကျွဲသောက်ကန်၊ သရက်ပင်၊ ကဲဒေါင်၊ ကျွန်းပင် နဲ့  အမှတ် ၃ ရပ်ကွက် စတဲ့ နေရာတွေက မြေပဲ၊ နှမ်း၊ ငှက်ပျော နဲ့ ပဲစင်းငုံစိုက်ခင်းတွေ ရေနစ်မြုပ်ခဲ့တာကြောင့် ပျက်စီးဆုံးရှုံးမှုတွေ ရှိခဲ့ပါတယ်။

လာမယ့် မိုးရာသီကာလအတွင်း ရေဘေးဒဏ်ကြုံလာရင် ထောက်ပံ့ပေးဖို့အတွက် ပြည်ထောင်စုအစိုးရဆီကနေ စစ်ကိုင်းတိုင်းအတွက် ငွေကျပ်သိန်း ၅၀၀ တောင်းထားတယ်လို့ ဦးစ၀ီလီဖရန့်စ် က ပြောပါတယ်။

အလားတူ မနေ့က မိုးသည်းထန်စွာ ရွာသွန်းခဲ့တာကြောင့် ရှမ်းပြည်နယ် တောင်ကြီးမြို့က ရပ်ကွက်အတော်များများ ရေကြီးရေလျှံမှုတွေ ရှိခဲ့ပြီး ၁၀ နှစ်အရွယ် ကလေးငယ်တစ်ဦး ရေထဲမျောပါသေဆုံးခဲ့ပါတယ်။

စစ်ကိုင်းတိုင်းဒေသကြီး အောက်ပိုင်း၊ မန္တလေးတိုင်းဒေသကြီး၊ မကွေးတိုင်းဒေသကြီး၊ တနင်္သာရီတိုင်းဒေသကြီး၊ မွန်ပြည်နယ်နဲ့ ကရင်ပြည်နယ်တို့မှာ မနက်ဖြန်အထိ နေရာကွက်ပြီး မိုးကြီးနိုင်တယ်လို့ မိုးလေ၀သနဲ့ ဇလဗေဒ ညွှန်ကြားမှု ဦးစီးဌာနက ထုတ်ပြန်ထားပါတယ်။

RFA Burmese
https://www.rfa.org/burmese