မောက်မယ်မှာ စစ်တပ်ရိုက်လို့ နားရွက်ပြတ်

ဒဏ်ရာရသွားလို့ ဆေးရုံမှာ ကုသခံရတဲ့ ပအိုဝ်းအမျိုးသား ခွန်ငှား

ရှမ်းပြည်နယ် မောက်မယ်မြို့နယ် ကဒူးကြီးကျေးရွာအုပ်စု ပုံစုပ်ရွာက ဒေသခံ အမျိုးသား ၄ ဦးကို မေလ ၁ဝ ရက်တုန်းက ကျွဲကျောင်းနေတုန်း တပ်မတော် စစ်ကြောင်းတကြောင်းရဲ့ တပ်ဖွဲ့ဝင်တွေက ရိုက်နှိက်ခဲ့ပါတယ်။

ပအိုဝ်းလူမျိုး ၃ ဦးနဲ့ ရှမ်းအမျိုးသားတဦးကို ခြေလျင်တပ်ရင်း ခလရ ၄၃ဝ စစ်ကြောင်းက သူတို့ဟာ လက်နက်ကိုင် အဖွဲ့တွေနဲ့ ဆက်စပ်မှုရှိတယ် ဆိုပြီး အထင်မှားရိုက်နှက်ခဲ့တာ ဖြစ်တယ်လို့ ရိုက်နှက်ခံရသူအချို့နဲ့ တွေ့ဆုံခဲ့တဲ့ မောက်မယ်မြို့နယ်က ရှမ်းပြည်နယ်လွှတ်တော် ကိုယ်စားလှယ် နန်းဖွေးဟွမ်ဦးက ဘီဘီစီကို ပြောပါတယ်။

ရိုက်နှက်ခံရတဲ့ ရွာသားတွေထဲက တဦးဟာ ခေါင်းကွဲသွားပြီး တဦးကတော့ နားရွက်ပြတ်သွားတဲ့အတွက် မောက်မယ်မြို့နယ် ပြည်သူ့ဆေးရုံမှာ တက်ရောက် ဆေးကုသခံနေရပါတယ်။

နားရွက် ပြတ်သွားတဲ့ အမျိုးသား က ခွန်ဌားဆိုသူ ပအိုဝ်းအမျိုးသားဖြစ်ပြီး သူတို့ကို ခြိမ်းခြောက်မှုတွေ ရှိတဲ့အတွက် အမှုဖွင့်တာ၊ ပစ်ခတ်တိုက်ခိုက်မှုရပ်စဲရေး ပူးတွဲကော်မတီ JMC ကို တိုင်ကြားတာလည်း မလုပ်ရဲကြဘူးလို့ လွှတ်တော်အမတ်က ပြောပါတယ်။

မေလ ၈ ရက်နေ့ကလည်း အဲဒီ ရွာနဲ့ မလှမ်းမကမ်း တောစပ်နားမှာ ရှမ်းပြည်ပြန်လည်ထူထောင်ရေး ကောင်စီတပ် အာစီအက်စ်အက်စ်နဲ့ အစိုးရတပ်အကြား တိုက်ပွဲဖြစ်ခဲ့တယ်လို့ သိရပါတယ်။

အဲဒီကဒူးကြီးဒေသမှာ ပအိုဝ်းအမျိုးသား လွတ်မြောက်ရေ အဖွဲ့ချုပ် ပီအန်အယ်လ်အိုလည်း လှုပ်ရှားပြီး ရံဖန်ရံခါ PNLO တပ်တွေနဲ့ အာစီအက်စ်အက်စ်တပ်တွေ အကြား ပစ်ခတ်မှုတွေလည်း ရှိတတ်တယ်လို့ ဒေသခံတွေက ပြောပါတယ်။

BBC Burmese
http://www.bbc.com/burmese