မြန်မာ ဗီယက်နမ် နှစ်နိုင်ငံပူးပေါင်းဆောင်ရွက်ရေးဆွေးနွေး

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဗီယက်နမ် ၀န်ကြီးချုပ် Nguyen Xuan Phuc နဲ့ တွေ့ဆုံ ( ဧပြီ ၁၉-၂၀၁၈)

နိုင်ငံတော် ခရီးစဉ်အဖြစ် ဗီယက်နမ်နိုင်ငံကို ရောက်နေတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဟာ ဒီနေ့မှာတော့ ဗီယက်နမ် ၀န်ကြီးချုပ် Nguyen Xuan Phuc နဲ့ တွေ့ဆုံပြီး ၂ နိုင်ငံကြား ပူးပေါင်းဆောင်ရွက်ရေး ကိစ္စတွေကို ဆွေးနွေးခဲ့ကြပါတယ်။ ၂ နိုင်ငံကြား ပူးပေါင်းဆောင်ရွက်မှုတွေ တိုးမြှင့်ဖို့ ရည်ရွယ်ထားတဲ့ ခရီးစဉ်အစနေ့မှာပဲ ဒေါ်အောင်ဆန်းစုကြည်နဲ့ ဗီယက်နမ်ဝန်ကြီးချုပ်တို့ဟာ ဟနွိုင်မြို့မှာ ၂ နိုင်ငံကြား တယ်လီဖုန်းဆက်သွယ်ရေးနဲ့ သတင်းလုပ်ငန်းဆိုင်ရာ နားလည်မှု စာချွန်လွှာ လက်မှတ်ရေးထိုးပွဲကိုလည်း တက်ရောက်ခဲ့ကြတာပါ။

လက်မှတ်ရေးထိုးပွဲ

ဗီယက်နမ် ၀န်ကြီးချုပ် Nguyen Xuan Phuc ရဲ့ ဖိတ်ကြားချက်အရ ရောက်ရှိနေစဉ် ၂ နိုင်ငံ ခေါင်းဆောင်တွေ တွေ့ဆုံရာမှာ ဗီယက်နမ်ကွန်မြူနစ်ပါတီ အထွေထွေ အတွင်းရေးမှူး Nguyen Phu Trong ရဲ့ ပြီးခဲ့တဲ့နှစ်ထဲ မြန်မာနိုင်ငံ ခရီးစဉ်အတွင်း ပူးပေါင်းဆောင်ရွက်ရေး သဘောတူထားတဲ့ အစီအစဉ်တွေကို ပြန်လည်သုံးသပ်ကြမှာ ဖြစ်ကြောင်းလည်း မြန်မာနိုင်ငံဆိုင်ရာ ဗီယက်နမ်သံအမတ်ကြီး Luan Thuy Duong က ခရီးစဉ် မတိုင်မီမှာပဲ ပြောဆိုထားပါတယ်။

နိုင်ငံရေး၊ ကုန်သွယ်ရေး၊ ရင်းနှီးမြှုပ်နှံမှု၊ ခရီးသွားလုပ်ငန်း အပါအ၀င် ၂ နိုင်ငံကြား စီးပွားရေး ပူးပေါင်းဆောင်ရွက်မှုတွေအပြင် လူထုအကြား အပြန်အလှန် ဖလှယ်ရေး အစီအစဉ်တွေကိုလည်း ဆွေးနွေးလိမ့်မယ်လို့လည်း မျှော်လင့်ထားကြတာပါ။ ဒေသတွင်း ကိစ္စတွေနဲ့ ပတ်သက်လို့ အမြင်ချင်းဖလှယ်ဖို့ ရှိသလို၊ ၂ နိုင်ငံအကျိုးစီးပွားနဲ့ ငြိမ်းချမ်းရေး၊ တည်ငြိမ်မှုတွေ အားကောင်းလာစေမယ့် အစီအစဉ်တွေကိုလည်း ဆွေးနွေးကြမှာဖြစ်ကြောင်း ဗီယက်နမ်သံအမတ်ကြီးက ပြောပါတယ်။

မြန်မာနိုင်ငံမှာ ပြည်ပက ရင်းနှီးမြုပ်နှံလုပ်ကိုင်ကြတဲ့ နိုင်ငံတွေအနက် အဆင့် ၇ မှာရှိနေပြီး၊ ကုန်သွယ်မှုမှာ အဆင့် ၉ နေရာမှာရှိနေတဲ့ ဗီယက်နမ်နိုင်ငံဟာ မြန်မာနိုင်ငံနဲ့ စီးပွားရေး ပူးပေါင်းဆောင်ရွက်မှုတွေ တိုးမြှင့်လာရာက အပြန်အလှန် ကုန်သွယ်မှု ပမာဏဟာ ၂၀၁၆ ခုနှစ်ကထက် ၅၁ ရာခိုင်နှုန်းတိုးပြီး၊ ၂၀၁၇ ခုနှစ်ထဲမှာ အမေရိကန်ဒေါ်လာ ၈၂၈ သန်းကျော် ရှိခဲ့ကြောင်းလည်း တရားဝင် ကိန်းဂဏန်းတွေက ဖော်ပြကြပါတယ်။

VOA (မြန်မာပိုင်း)
https://burmese.voanews.com