မြောင်းမြမြို့နယ်တွင်၊ ဆင်လိမ္မာတစ်ကောင်က ဗေဒင်ဆရာတစ်ဦးကို နှာမောင်းဖြင့် ညှစ်၍ အစွယ်ဖြင့်ထိုးသတ်မှု ဖြစ်ပွား ၊ ဆင်ဦးစီးကို လူသေမှုဖြင့် အမှုဖွင့်

PHOTO - YWM (ဆင်ထီး ဂိုးပလိပ်မောင် ကို မြင်တွေ့ရစဉ်)

မြောင်းမြ၊ မတ် ၈။

ဧရာဝတီတိုင်း၊ မြောင်းမြမြို့နယ်တွင် ဆင်လိမ္မာတစ်ကောင်က ဗေဒင်ဆရာတစ်ဦးကို နှာမောင်းဖြင့် ညှစ်၍ အစွယ်ဖြင့်ထိုးသတ်မှု တစ်ခု ယနေ့ မတ်လ ၈ ရက်နေ့က ဖြစ်ပွားခဲ့ကြောင်း မြောင်းမြမြို့မရဲစခန်းမှ တာဝန်ကျရဲဝန်ထမ်းတစ်ဦးက ယနေ့ ညနေပိုင်းတွင် AHN သို့ပြောသည်။

“မြောင်းမြမြို့နယ်၊ ကံကြီးကျေးရွာ အုပ်စု၊ ကံကြီးကျေးရွာ ဘောလုံးကွင်းဘေးမှာလူတစ်ဦး ဆင်စွယ်နဲ့ အထိုးခံရပြီးသေဆုံးနေတယ်ဆိုတဲ့သတင်းရလို့သွားရောက် စစ်ဆေးခဲ့တာပါ။ သေဆုံးသူဟာ ကံကြီးကျေးရွာ မှာနေထိုင်တဲ့ အသက် ၆၅ နှစ်အရွယ်၊ ဗေဒင်ဆရာတစ်ဦးဖြစ်သူ ဦးစိန်အောင်မင်းဖြစ်တယ်ဆိုတာကို စစ်ဆေးသိရှိခဲ့ရပါတယ်။ ၀ဲဘက် ဂျိုင်းအောက်ထိုးသွင်း ဒဏ်ရာ၊ ယာဘက်ပေါင်ရင်းထိုးသွင်း တို့နဲ့သေဆုံးနေတာကိုတွေ့ရှိရပါတယ်။ ဖြစ်စဉ်ကိုဆက်လက်စုံစမ်းရာမှာတော့ ကံကြီးကျေးရွာ ဘောလုံးကွင်း အနီးဝါးရုံပင်အောက်မှာ အောင်ပင်လယ်ဆပ်ကပ်အဖွဲ့ကဆင်ဦးစီး၊ ကို …..(၃၁) နှစ်က သူ့ရဲ့ဆင်ကို ကြိုးနဲ့ချည်ပြီးထိန်းကျောင်းနေခဲ့တယ်လို့သိရပါတယ်။ ဆင်နာမည်က ဂိုးပလိပ်မောင်ပါ။ အသက်က ၉ နှစ်ပါ။ ဒေါက် အမြင့် ၇ ပေရှိပါတယ်။ အမည်းရောင် ဆင်ထီးပါ။ သေဆုံးသူ ဦးစိန်အောင်မင်းက လမ်းလျှောက်လာရင်း ဆင် အနီး ကိုရောက်တော့ ဆင်က နှာမောင်း နဲ့ပတ်ချည် ညှစ်တာကြောင့်ဆင်စွယ်နဲ့ထိုးမိပြီး သေဆုံးခဲ့တာဖြစ်တယ်လို့စစ်ဆေးသိရှိရပါတယ်။ သေဆုံးသူရဲ့ရုပ်အလောင်းကို မြောင်းမြမြို့လူမှုကူညီရေးအသင်းက ကားနဲ့မြောင်းမြဆေးရုံကိုပို့ဆောင်ပေးခဲ့ပါတယ်။ ဆင်ကို ပေါ့ဆ စွာထိန်းကျောင်းတဲ့ ဆင်ဦးစီး ကို…(၃၁) နှစ်ကို မြောင်းမြမြို့ကရဲစခန်းက ဖမ်းဆီးပြီး၊ ( ပ) ၃၄၆/၁၈၊ ပုဒ်မ ၃၀၄ ကနဲ့ အမှုဖွင့်ထားပါတယ် “ ဟု ၄င်းကပြောသည်။

သေဆုံးသူဗေဒင်ဆရာမှာ မျက်မမြင်တစ်ဦးဖြစ်ပြီး ဆင်မှာလည်း အလှူမင်္ဂလာပွဲများတွင်လိုက်ပါလေ့ရှိသည့်ဆင်လိမ္မာတစ်ကောင်ဖြစ်ကြောင်း မြောင်းမြမြို့ခံတစ်ဦးကပြောသည်။

“သေဆုံးသူက မျက်မမြင် ဗေဒင်ဆရာဖြစ်တယ်လို့ သေဆုံးသူရဲ့ဆွေမျိုးတွေက ကျွန်တော့်ကိုပြောပြပါတယ်။ သူဟာ တုတ် ကောက်ကို အသုံးပြုပြီး လမ်းလျှောက်လေ့ရှိပါတယ်။ ဆင် ရှိနေတာကို မသိဘဲဆင်ကိုဝင်တိုက်မိတာကြောင့်ဆင်ကတိုက်ခိုက်ခဲ့တာ ဖြစ်နိုင်တယ်လို့ ဒေသခံတွေကတော့ သုံးသပ်မှုတွေရှိနေပါတယ်။ ထို့အတူဆင်ဟာလည်းဆင်လိမ္မာတစ်ကောင်ဖြစ်ပါတယ်။ ဆပ်ကပ်ပွဲတွေမှာဖျော်ဖြေလေ့ရှိတဲ့ဆင်ဖြစ်ပြီး၊ အလှူ မင်္ဂလာပွဲတွေကို လိုက်ပါလေ့ရှိတဲ့ဆင်တစ်ကောင်ဖြစ်တယ်လို့လည်းဆင်ပိုင်ရှင်တွေက ကျွန်တော့်ကိုပြောပြပါတယ် ။ အခုတော့ဆင်ကိုလည်း ထူး ခတ်ပြီး ထိန်း သိမ်း ထားပါတယ် “ ဟု ၄င်းကပြောသည်။

ရဝေမောင် ( မြောင်းမြ)
The Asia Heart News
https://www.facebook.com/The-Asia-Heart-News