လူခွန်ဟုဆိုကာ ဌာနေပြည်သူ့စစ်တပ်ဖွဲ့မှ လားရှိုး- ကျေးလက်လူထုထံပိုက်ဆံကောက်


သျှမ်းပြည်မြောက်ပိုင်း လားရှိုးမြို့နယ် မိုင်းကျက်အုပ်စုတွင် ဌာနေပြည်သူ့စစ်အဖွဲ့က အုပ်စုသား များထံ လူခွန်ဟုဆိုကာ ကျပ်ငွေသိန်း ၅၀ ပေးဆောင်ရန် ဆင့်ဆိုသည်ဟုသိရသည်။

လားရှိုးမြို့အရှေ့ဘက် မိုင် ၅၀ ကျော်အကွာ မိုင်းကျက်အုပ်စု ၁၃ ရွာအား မန်ပန်ဌာနေပြည်သူ့စစ်၏ ဒေသတွင်းအုပ်ချုပ်ရေးမှူးအဆင့်ရှိသူက မိုင်းကျက်ဒေသခံလူထုထံမှ အခွန်ငွေများ ဆင့်ဆိုကာ တပို့တွဲလဆန်း ၇ ရက်အပြီး ပေးဆောင်ရမည်ဟုပြောဆိုကြောင်း မိုင်းကျက်ဒေသခံ များကပြောသည်။

အမည်မဖော်လိုသည့် အသက် ၄၀ ကျော်အရွယ် ဒေသခံအမျိုးသမီးတဦးက- “ကျမတို့ဒေသမှာ ပိုက်ဆံလာကောက်တာ၊ လူထုကိုအမျိုးမျိုးဖိအားလာပေးနေတာကတော့ အုပ်ချုပ်ရေးမှူးအဆင့်ရှိ စိုင်းထွန်းနဲ့အဖွဲ့ပါဘဲ။ ကျပ် သိန်း ၅၀ တောင်တောင်းတယ်။ တပို့တွဲလဆန်း ၇ ရက်အပြီးပေးရ မယ်ဆိုတော့ ဂျန္နဝါရီလ ၂၃ ရက်နေ့ ပေါ့ ” – ဟု သျှမ်းသံတော်ဆင့်အားပြောသည်။

အဆိုပါပြည်သူ့စစ်တပ်ဖွဲ့သည် အစိုးရတပ် ခမရ ၃၆၈ နှင့်အတူ စခန်းချ သွားလာလှုပ်ရှား ကြောင်း သိရသည်။

“ဝမ်းစာကခက်ခဲတဲ့ကြားထဲ ကျနော်တို့နှစ်စဉ်နှစ်တိုင်း တခုပြီးတခု အခွန်တွေပေးဆောင်နေရတယ်။ သူတို့က အစိုးရတပ်နဲ့ပေါင်းထားတော့ တောင်းလာသမျှကျနော်တို့ဘက်ကတောင်းပန်လို့မှမရတာ၊ အကုန်ပေးရတာပေါ့။ ကျနော်တို့လူထု အခက်အခဲအရမ်းဖြစ်ရပါတယ်။ သက်ဆိုင်ရာအာဏာပိုင်များ၊ လွှတ်တော်အမတ်များ ကူညီဆောင်ရွက်ပေးကြဖို့ တောင်းပန်ပေးကြဖို့ တောင်းဆိုချင်ပါတယ်။” – ဟု လည်း လုံးစိုင်းကပြောသည်။

အဆိုပါ ပြည်သူ့စစ်တပ်ဖွဲ့သည် မန့်ပန်အခြေစိုက် ဗိုလ်မွန်းဦးဆောင်သည့်တပ်ဖွဲ့ဖြစ်ကြောင်း ဒေသခံများပြောပြချက်အရသိရပါသည်။

ထိုသို့သောလူထုအပေါ်ခြိမ်းခြောက် လုပ်အားခိုင်းစေခြင်းမျိုးမှာ ကနေ့ခေတ်တွင်မရှိသင့်တော့ကြောင်း ၊ လက်အောက်ငယ်သားများ ထိုသို့ကျူးလွန်နေမှုအပေါ် ပြည်သူ့စစ်တပ်ဖွဲ့အထက်အကြီးအကဲများက စီစစ်ပေးသင့်ကြောင်း လားရှိုးခရိုင်လွှတ်တော်အမတ် စိုင်းဝမ်းလျန်းခမ်းကပြောဆိုသည်။

စိုင်းဝမ်းလျန်းခမ်းနှင့်လွှတ်တော်အမတ်အဖွဲ့သည် ပြီးခဲ့သည့် ၁၃ ရက်နေ့တွင်ပင် မိုင်းကျက်ဒေသအတွင်းလူထုနှင့်တွေ့ဆုံဆွေးနွေးမှုပြုခဲ့ပါသေးသည်။

ဟွမ်ဟိန်း
Panglong(Burmese)
http://burmese.shannews.org/
လူခွန်ဟုဆိုကာ ဌာနေပြည်သူ့စစ်တပ်ဖွဲ့မှ လားရှိုး- ကျေးလက်လူထုထံပိုက်ဆံကောက် လူခွန်ဟုဆိုကာ ဌာနေပြည်သူ့စစ်တပ်ဖွဲ့မှ လားရှိုး- ကျေးလက်လူထုထံပိုက်ဆံကောက် Reviewed by THITHTOOLWIN on 22:56 Rating: 5
Powered by Blogger.