ဦးမင်းအောင်ကို ဝန်ကြီးတာဝန် ဆက်လက်ထမ်းဆောင်ဖို့ မသင့်ကြောင်း လွှတ်တော်ဆုံးဖြတ်

ရခိုင်ပြည်နယ်အစိုးရအဖွဲ့ စည်ပင်သာယာရေးဝန်ကြီး ဦးမင်းအောင် ကို တွေ့ရစဉ်/ Photo: Min Thein Aung/RFA

ရခိုင်ပြည်နယ်အစိုးရအဖွဲ့ စည်ပင်သာယာရေးဝန်ကြီး ဦးမင်းအောင် ဟာ လက်ရှိတာဝန်ကို ဆက်လက်ထမ်းဆောင်ဖို့ မသင့်တော်ဘူးလို့ ဒီနေ့ကျင်းပတဲ့ ရခိုင်ပြည်နယ်လွှတ်တော် အရေးပေါ်အစည်းအဝေးမှာ မဲခွဲဆုံးဖြတ်လိုက်ပါတယ်။

ပြည်နယ်လွှတ်တော်ဘက်က ပြည်နယ်အစိုးရအဖွဲ့ကို မေးခွန်းတွေ၊ အဆိုတွေ၊ ညှိနှိုင်းမှုတွေနဲ့ ထိန်းကျောင်းလို့ မရနိုင်တော့တာကြောင့် အခုလိုစွပ်စွဲပြစ်တင်ပြီး ထိန်းကျောင်းရတာလို့ ပြည်နယ်လွှတ်တော်ဥက္ကဌ ဦးစံကျော်လှ က ပြောပါတယ်။

ရခိုင်ပြည်နယ်အစိုးရအဖွဲ့ စည်ပင်သာယာရေးဝန်ကြီး ဦးမင်းအောင် ဟာ ဥပဒေအရပေးအပ်ထားတဲ့ တာဝန်တွေကို ကျေပွန်အောင် မထမ်းဆောင်တာကြောင့် တာဝန်ကနေရပ်စဲပေးဖို့ ပြည်နယ်လွှတ်တော်ကိုယ်စားလှယ် ၁၇ ဦးက  ပြီးခဲ့တဲ့ နိုဝင်ဘာ ၂၉ ရက်နေ့က ပြည်နယ်လွှတ်တော် ဥက္ကဌထံ တိုင်ကြားခဲ့တာပါ။

အဲဒီကိစ္စအပေါ် ပြည်နယ်လွှတ်တော်ဥက္ကဌ က လွှတ်တော်ကိုယ်စားလှယ် ၅ ဦးပါဝင်တဲ့ စုံစမ်းစစ်ဆေးရေးအဖွဲ့နဲ့ စုံစမ်းစစ်ဆေးစေခဲ့ပြီး ဒီနေ့ကျင်းပတဲ့ ရခိုင်ပြည်နယ်လွှတ်တော် အရေးပေါ်အစည်းအဝေးမှာ မဲခွဲဆုံးဖြတ်ခဲ့တာဖြစ်ပါတယ်။

ဒီနေ့လွှတ်တော်ကို တက်ရောက်လာတဲ့ မဲပေးခွင့်ရှိတဲ့လွှတ်တော်ကိုယ်စားလှယ် ၄၅ ဦးထဲက ထောက်ခံမဲ ၃၇ မဲ၊ ကန့်ကွက်မဲ ၈ မဲနဲ့ စွပ်စွဲပြစ်တင်မှုမှန်ကန်ကြောင်း လွှတ်တော်က အတည်ပြုဆုံးဖြတ်ခဲ့တာ ဖြစ်ပါတယ်။

စွပ်စွဲပြစ်တင်ခံရတဲ့ ပြည်နယ်စည်ပင်သာယာရေးဝန်ကြီး ဦးမင်းအောင်ဟာ ၂၀၁၅ ရွေးကောက်ပွဲမှာ တောင်ကုတ်မြို့နယ် မဲဆန္ဒနယ်အမှတ်(၂)က ပြည်နယ်လွှတ်တော်ကိုယ်စားလှယ်အဖြစ် အနိုင်ရရှိခဲ့တာဖြစ်ပါတယ်။

ဒီနေ့လွှတ်တော်ရဲ့ ဆုံးဖြတ်ချက်ကို ပြည်နယ်ဝန်ကြီးချုပ် ဦးညီပု က နိုင်ငံတော်သမ္မတထံ ဆက်လက်တင်ပြရမှာဖြစ်ပြီး အတည်ပြုချက်ရလာခဲ့ရင် လွှတ်တော်ကိုယ်စားလှယ်တစ်ဦးအဖြစ်နဲ့ NLD ပါတီ ပိုမိုအားကောင်းလာအောင် လုပ်ဆောင်သွားမယ်လို့ စွပ်စွဲခံရတဲ့ ပြည်နယ်ဝန်ကြီး ဦးမင်းအောင်က သတင်းထောက်တွေကိုပြောခဲ့ပါတယ်။

RFA Burmese
http://www.rfa.org/burmese