တာချီလိတ်မြို့မရဲစခန်း အချုပ်ထောင်ဖောက်ထွက်ပြေးသူ ငါးဦးအား ပြန်လည်ဖမ်းမိ

တာချီလိတ် ဇန်နဝါရီ ၈

ရှမ်းပြည်နယ်(အရှေ့ပိုင်း)၊ တာချီလိတ်မြို့မရဲစခန်းရှိ အချုပ်ထောင်အတွင်းမှ အချုပ်က တရားခံ(၅)ဦး သည် ဇန်နဝါရီ ၆ ရက်၊ နံနက် ၃နာရီ ၄၀မိနစ်ခန့် က အချုပ်ခန်းအိမ်သာပေါ်ရှိ မျက်နှာကျက်အပေါ် သံတန်းအား ဖြတ်၍ သံဇကာဆွဲခွာတက်ရောက်ပြီး အမိုးဖောက်ကာ ထွက်ပြေးလွတ်မြောက်မှုဖြစ်ပွားခဲ့ကြောင်း သိရသည်။

 အဆိုပါ ထွက်ပြေးလွတ်မြောက်သူ(၅)ဦးအနက်မှ စိုင်းမင်းသူ၊စောမျိုးအောင်၊ နေလင်း(ခ)နေမင်း တို့ကို နာရီပိုင်းအတွင်း ပြန်လည်ဖမ်းဆီးရမိခဲ့ပြီး၊ ဉာဏ်လင်း(ခ)ဉာဏ်ဝင်းအား ဇန်နဝါရီလ ၇ ရက်နေ့၊ နေ့လယ် ၁၁နာရီ မိနစ်၂၀ အချိန်မှာ ဖမ်းဆီးရမိခဲ့ကြောင်း သိရသည်။

 ယင်း ထွက်ပြေးတရားခံများမှ ကျန်ရှိသည့် ကိုသက်(ခ)မြဝင်း အား သတင်းအရ ယနေ့ ဇန်န၀ါရီလ ၈ ရက်နေ့ ၊ ညနေ ၅နာရီ ခွဲခန့်တွင် ခရိုင်ရဲတပ်ဖွဲ့မှူး ဒုတိယရဲမှူးကြီး ထိန်ဝင်း ဦးစီးသည့် တပ်ဖွဲ့ဝင်များက လိုက်လံရှာဖွေဖမ်းဆီးရာ လွယ်စတုံ ကျေးရွာ၊ တာဝေမီးစက်အနောက်ဘက်ရှိ လယ်ကွင်းအတွင်းမှ ဖမ်းဆီး ရမိခြင်း ဖြစ်ကြောင်းသိရသည်။

 တာချီလိတ်မြို့မရဲစခန်း အချုပ်ထောင်တွင် အချုပ်သားကျား(၁၀၁)ဦး၊ မ(၁၂)ဦးရှိပြီး၊ အချုပ်ထောင် ဖောက်ထွက်ပြေးသည့် စောမျိုးအောင်(တရားရုံးစစ်ဆေးဆဲ)၊ နေလင်း(ခ)နေမင်း (ထောင်ဒဏ် ၂၂နှစ်) (အပြစ်ကျ)၊ စိုင်းမင်းသူ(တရားရုံးစစ်ဆေးဆဲ)၊ဉာဏ်လင်း(ခ)ဉာဏ်ဝင်း(တရားရုံးစစ်ဆေးဆဲ)၊ ကိုသက်(ခ) မြဝင်း (ထောင်ဒဏ် ၁၆ နှစ်) (အပြစ်ကျ)တို့ဖြစ်ကြောင်း သိရသည်။

ဝေယံလင်း(ပြန်/ဆက်)
Iprd Tachileik