မြေငူကျွန်း (ဆံတော်ရှင်ကျွန်း) ပင်လယ်ပြင်တွင် ငါးဖမ်းလှေတစ်စီးအား သင်္ဘောတစ်စီး၏ ဝင်တိုက်မှုကြောင့် လူသေဆုံးမှုဖြစ်ပွား
Photo ။ ။ စက်လှေနစ်မြုပ်မှုကြောင့် ဒဏ်ရာရှိကာ ဆေးကုသမှုခံယူနေသူ |
ရခိုင်ပြည်နယ်၊ ပေါက်တောမြို့နယ်၊ မြေငူကျွန်း(ဆံတော်ရှင်ကျွန်း)၊ ပြိုင်းတောင်ကျေးရွာမှ ငါးဖမ်းလှေတစ်စီးသည် ဇန်နဝါရီ (၁၄) ရက်နေ့၊ နေ့လည် ၁နာရီ ၄၅ အချိန်ခန့်၌ ပင်လယ်ပြင်ကို ငါးဖမ်းထွက်နေစဉ် ကုန်သင်္ဘောတစ်စီးမှ ငါးဖမ်းလှေအားဝင်တိုက်ရာမှ ငါးဖမ်းစက်လှေ ပျက်စီးကာ လူသေဆုံးမှု ဖြစ်ပွားခဲ့ကြောင်း သိရသည်။
"ငါးဖမ်းလှေက သင်္ဘောနင်းလို့ နှစ်ပိုင်းပိုင်းသွားခဲ့ပါတယ်။ လှေပေါ်မှာ လူစုစုပေါင်းက (၂၄)ဦးပါပါတယ်။ အဲ့ဒီထဲက (၂)ဦးကတော့ အလောင်းကိုရှာတွေ့ထားပါပြီ။ (၃)ဦးကပျောက် နေတာမတွေ့သေးပါဘူး။ လှေပိုင်ရှင်ဖြစ်တဲ့ ဦးလှရွှေသန်းကတော့ ခြေထောက်ဒဏ်ရာ အပြင်းထန်ရရှိ
သွားပါတယ်။ ကျန်တဲ့လူတွေကတော့ ဒဏ်ရာအနည်း ငယ်ရရှိသွားပါတယ်။ ˝ ဟု လှေပိုင်ရှင်နှင့် ငါးလုပ်ငန်းလုပ်ဖော်ကိုင်ဖက်ဖြစ်သည့် ဦးမောင်သန်းလှိုင်မှ ရခိုင်ဂေဇက် သို့ ပြောသည်။
အဆိုပါလှေအား တက်နင်းခဲ့သည့် သင်္ဘောမှာ ကုန်တင်သင်္ဘောဖြစ်ပြီး သင်္ဘော၏အမည်ကို မမှတ်မိလိုက်ကြောင်း ကို အသက်ရှင်၍ ပြန်လာသူများထံမှသိရသည်။
ယင်းသေင်္ဘောတွင် ပဲ့ကိုင်သူမှာ အိပ်ငိုက်ပြီး ၄င်းတို့ လှေကို ဝင်နင်းမိခဲ့ခြင်းဖြစ်နိုင်ကြောင်း ဒဏ်ရာရရှိကာ စစ်တွေဆေးရုံသို့ လာရောက်ကုသမှုခံယူနေသူ တစ်ချို့ထံမှသိရသည်။
အဆိုပါဖြစ်စဉ်ကြောင့်သေဆုံးသွားသူမှာ ယာတိုက်ကျေးရွာနေ ဦးအောင်စိန်မြ အသက် (၅၀)ကျော် ဖြစ်ပြီး ကျန်တစ်ဦးမှာ ပြိုင်းတောင်ကျေးရွာနေ ဦးခင်မောင်ဦး အသက် (၃၀)ကျော်ဖြစ်ပြီး ဦးအောင်စိန်မြ၏ အလောင်းကို လှေနစ်ပြီး ခဏအကြာတွင် ဆယ်ယူရှိခဲ့ပြီး ဦးခင်မောင်ဦး၏အလောင်းကို လှေနစ်ပြီး မိုးလင်းမှ ရကြောင်း ဦးမောင်သန်းလှိုင်မှ ဆိုသည်။
ယခုလက်ရှိ ငါးဖမ်းစက်လှေပိုင်ရှင် ဦးလှသန်းရွှေမှာ စစ်တွေမြို့ဆေးရုံကြီးတွင် ဆေးကုသမှုခံယူလျှက်ရှိပြီး အဆိုပါသင်္ဘောအားလောလော ဆယ်တွင် သက်ဆိုင်ရာကိုတိုင်ကြားထားခြင်း
မရှိသေးဟု ဦးလှသန်းရွှေ၏ မိသားစုဝင်တစ်ဦးမှ ပြောသည်။
ငါးဖမ်းစက်လှေ နစ်မြုပ်မှုကြောင့် ယခုလက်ရှိနှစ်ဦးသေဆုံးကာ ပျောက်ဆုံးနေသူ သုံးဦးအားယခုအထိ ရှာဖွေမရရှိသေးကြောင်း သိရသည်။
ဆောင်းဇာခြည်
Rakhine Gazette
https://www.facebook.com/RakhineGazetteJournal/
မြေငူကျွန်း (ဆံတော်ရှင်ကျွန်း) ပင်လယ်ပြင်တွင် ငါးဖမ်းလှေတစ်စီးအား သင်္ဘောတစ်စီး၏ ဝင်တိုက်မှုကြောင့် လူသေဆုံးမှုဖြစ်ပွား
Reviewed by THITHTOOLWIN
on
18:36
Rating: