စွမ်းဆောင်ရည်၊ အဂတိလိုက်စားမှုနဲ့ ကျန်းမာရေးကိုကြည့်ပြီး ၀န်ကြီးအပြောင်းအလဲလုပ်တာလို့ ပြော

NLD ပါတီ၊ ဗဟိုပြန်ကြားရေးကော်မတီ၊ အတွင်းရေးမှူး မုံရွာအောင်ရှင် ကို တွေ့ရစဉ်။ Photo: RFA

တိုင်းဒေသကြီးဝန်ကြီးအချို့ကို တာဝန်ကနေ နုတ်ထွက်ခွင့်ပြုတာဟာ စွမ်းဆောင်ရည်၊ အဂတိလိုက်စားမှုနဲ့ ကျန်းမာရေးအခြေအနေတွေကြောင့် ဖြစ်တယ်လို့ အင်န်အယ်လ်ဒီပါတီ၊ ဗဟိုပြန်ကြားရေးကော်မတီ၊ အတွင်းရေးမှူး မုံရွာအောင်ရှင်က ပြောပါတယ်။

နေပြည်တော်က သင်္ဂဟဟိုတယ်မှာ ဒီကနေ့ ကျင်းပတဲ့ ပြန်ကြားရေးဝန်ကြီးဌာနနဲ့ Mega Links ကုမ္ပဏီတို့ အကျိုးတူပူးပေါင်းဆောင်ရွက်တဲ့ Myanmar Digital Newspaper နဲ့ News Portal မိတ်ဆက်ပွဲအခမ်းအနား အပြီးမှာ ပြည်နယ်နဲ့ တိုင်းအချို့က ၀န်ကြီးတွေကို နုတ်ထွက်ခွင့်ပြုနေတဲ့ ကိစ္စနဲ့ပတ်သက်ပြီး မုံရွာအောင်ရှင်က အခုလိုပြောတာပါ။

အဂတိလိုက်စားမှု၊ ဆက်ဆံရေးမပြေပြစ်တာ စတဲ့အချက်တွေနဲ့ ပြည်နယ်နဲ့ တိုင်းအဆင့် ၀န်ကြီးချုပ်၊ ၀န်ကြီးတွေနဲ့ ကိုယ်စားလှယ်တွေ ၃၀ ဦးခန့်ကို တိုင်ကြားစာတွေရရှိထားတယ်လို့လည်း ပြောပါတယ်။

ယခုတိုင်ကြားစာ ၃၀ ခန့်မှာ ပြည်ထောင်စုအဆင့်ဝန်ကြီးတွေ ပါဝင်တာမရှိပေမယ့် သီးခြားကိုင်တွယ်တာ ဖြစ်နိုင်တယ်လို့ မုံရွာအောင်ရှင်က ပြောပါတယ်။

ပြီးခဲ့တဲ့ ၂၀၁၆ ခုနှစ်က စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာန၊ ဒုတိယ၀န်ကြီး ဒေါက်တာထွန်းဝင်းကို တာဝန်က ရပ်ဆိုင်းအပြီး မကြာသေးခင်ရက်ပိုင်းက ဧရာဝတီတိုင်းဝန်ကြီးချုပ် မန်းဂျော်နီ၊ ၀န်ကြီးတစ်ဦး၊ မကွေးတိုင်းက ၀န်ကြီးနှစ်ဦးတို့ကို တာဝန်က နုတ်ထွက်ခွင့်ပြုလိုက်တာပါ။

ဒါပေမယ့် တိုင်းဝန်ကြီးချုပ် မန်းဂျော်နီအနေနဲ့ ပါတီရဲ့ ဗဟိုအလုပ်အမှုဆောင်အဖွဲ့ဝင်အဖြစ်သာမက တိုင်းဒေသကြီးလွှတ်တော်ကိုယ်စားလှယ်အဖြစ်ပါ ဆက်ရှိနေမယ်လို့ မုံရွာအောင်ရှင်က ပြောပါတယ်။

RFA Burmese
http://www.rfa.org/burmese