အင်းဒင်သုသာန်အလောင်းတွေ့မှု ရွာသားတွေနဲ့ လုံခြုံရေးတပ်ဖွဲ့လက်ချက်ဖြစ်ဟု တပ်မတော်သတင်း ထုတ်ပြန်

အင်းဒင်သုသာန်အလောင်းတွေ့မှု နှင့် ပတ်သက်ပြီး တပ်မတော် စုံစမ်းစစ်ဆေးရေးအဖွဲ့စစ်ဆေး (တပ်မတော်ကာကွယ်ရေးဦးစီးချုပ်ရုံး)

ရခိုင်မြောက်ပိုင်း အင်းဒင်ကျေးရွာသုသာန်မှာ မြုပ်နှံထားတဲ့ အမည်မသိ ရုပ်အလောင်းတွေ ဟာ ဒေသခံကျေးရွာသားအချို့နဲ့လုံခြုံရေးတပ်ဖွဲ့တွေက ပစ်သတ်ခဲ့တဲ့ ရုပ် အလောင်းတွေဖြစ်တယ်လို့ တပ်မတော်စုံစမ်းရေးအဖွဲ့ရဲ့ တွေ့ရှိချက်ကို တပ်မတော်ကာကွယ်ရေးဦးစီးချုပ်ရုံးက ထုတ်ပြန်လိုက်ပါတယ်။

အလောင်း ၁၀ လောင်းဟာ တပ်မတော်က ဖမ်းဆီးရမိတဲ့ ဘင်္ဂါလီ အကြမ်းဖက်သမားတွေဖြစ်ပြီး ၊ လုံခြုံရေးအခြေအနေ အရ ရဲဖက်ကို မလွှဲပြောင်းနိုင် တာကြောင့် သူတို့ကို သုသာန်ကိုခေါ်ဆောင်ပြီး သတ်ဖြတ်ဖို့ တာဝန်ကျ လုံခြုံရေးတပ်ဖွဲ့က ဆုံးဖြတ်ခဲ့တာဖြစ်တယ်လို့ အဲဒီ ထုတ်ပြန်ချက်မှာဖော်ပြပါတယ်။

အဲဒီနောက် စက်တင်ဘာလ ၂ ရက် မနက်ပိုင်း အင်ဒင်းကျေးရွာသုသာန်အရောက်မှာ နာကျည်းစိတ်နဲ့ လက်တုံ့ပြန်လိုတဲ့ ကျေးရွာသားသုံးဦးနဲ့ လုံခြုံရေးတပ်ဖွဲ့ဝင်တွေက အဲဒီ ၁၀ဦးကို သတ်ဖြတ်ခဲ့တာဖြစ်တယ်လို့ ဆိုထားပါတယ်။ လုံခြုံရေး တပ်ဖွဲ့ဝင်တွေ ရဲ့ စစ်မေးချက်အရအဲဒီ ၁၀ဦးဟာ ကျေးရွာတွေမှာနေထိုင်စဉ် အကြမ်းဖက် လုပ်ငန်းမှာပါဝင်ဖို့ မော်လ၀ီဆရာတွေရဲ့စည်းရုံးခံခဲ့ရသူတွေဖြစ်တယ်လို့လည်း ဖော်ပြထားပါတယ်။ စက်တင်ဘာလ ၁ ရက်နေ့ အင်ဒင်းကျေးရွာအနီးမှာ စစ်ဆေးရေးဆောင်ရွက်နေတဲ့ လုံခြုံရေးတပ်ဖွဲ့တွေနဲ့ထိပ်တိုက်တွေ့ပြီး ဖမ်းဆီးခံခဲ့ရသူတွေဖြစ်တယ်လို့ တပ်မတော်ကြေညာချက်မှာ ဖော်ပြပါတယ်။

ဒီဖြစ်စဉ်မှာ အင်းဒင်ကျေးရွာမှာ ရွာသားအချို့နဲ့ လုံခြုံရေးတပ်ဖွဲ့ဝင်တွေက သူတို့ကို သတ်ဖြတ်ခဲ့တယ်ဆိုတာ ၀န်ခံတဲ့အတွက် တာဝန်ရှိလုံခြုံရေးတပ်ဖွဲ့ဝင်တွေနဲ့ ကျေးရွာသားတွေကို ဥပဒေနဲ့အညီ အရေးယူဆောင်ရွက်သွားမှာဖြစ်သလို၊ ဖြစ်စဉ်မှာ တိုက်ရိုက်ပါဝင်ပတ်သက်မှုမရှိပေမယ့် ကွပ်ကဲရန်တာဝန်ရှိသူတွေကိုလည်း လိုအပ်သလို ဖော်ထုတ်အရေးယူသွားမယ်လို့ တပ်မတော်ကြေညာချက်မှာ ပြောထားပါတယ်။

ဗွီအိုအေ (မြန်မာပိုင်း)
https://burmese.voanews.com