အီရန်ဒုံးစမ်းသပ်မှု ကုလ လုံခြုံရေးကောင်စီ စည်းဝေးမည်

ကုလသမဂ္ဂ လုံခြုံရေးကောင်စီ
အီရန်နိုင်ငံက ပြုလုပ်လိုက်တဲ့ ပဲ့ထိန်းတပ် ဒုံးကျည် စမ်းသပ်မှုကို တုံ့ပြန်တဲ့အနေနဲ့ ကုလသမဂ္ဂ လုံခြုံရေးကောင်စီက ဒီကနေ့ အရေးပေါ် အစည်းအဝေး ကျင်းပမှာဖြစ်ပါတယ်။

တာလတ်ပစ်ဒုံးကျည်တစင်း အီရန်က တနင်္ဂနွေနေ့က စမ်းသပ်ပစ်လွှတ် လိုက်ပြီးတဲ့နောက် ဒီအစည်းအဝေးကို ခေါ်ယူဖို့ အမေရိကန်ပြည်ထောင်စုက တောင်းဆိုခဲ့တာပါ။

စမ်းသပ်တဲ့ ဒုံးကျည် ဘာအမျိုးအစားလဲ၊ သူ့ရဲ့ စွမ်းဆောင်ရည် ဘယ်လောက်ရှိလဲဆိုတာနဲ့ ပတ်သက်ပြီးလို့တော့ ရှင်းရှင်းလင်းလင်း မသိရပါဘူး။ နျူကလီးယား ထိပ်ဖူး တပ်ဆင်နိုင်တဲ့ ပဲ့ထိန်းတပ်ဒုံးကျည် တွေနဲ့ ပတ်သက်သမျှ Iran အနေနဲ့ ဘာမှ မလုပ်ဆောင်ဖို့ ၂၀၁၅ ကုလလုံခြုံရေးကောင်စီရဲ့ ဆုံးဖြတ်ချက်က တားမြစ်ထားတာဖြစ်ပါတယ်။

အီရန်ဘက်က သူတို့ရဲ့ နျူကလီးယား အစီအစဉ်ကို ကန့်သတ်ပြီး နိုင်ငံတကာဘက်ကလည်း အရေးယူပိတ်ဆို့မှုတွေ လျော့ပေါ့ဖို့ သဘောတူညီချက်ကို အီရန်နဲ့ ကမ္ဘာ့အင်အားကြီး ၆ နိုင်ငံတို့ ရရှိပြီးနောက် အီရန်ရဲ့ နျူကလီးယားထိပ်ဖူးတပ် ဒုံးအစီအစဉ်ကို ၈ နှစ်တာ တားမြစ်ဖို့ သဘောတူခဲ့ကြတာပါ။

အီရန် က သူတို့ နျူကလီးယား ထုတ်ဖို့ လုပ်မနေပါဘူးဆိုပြီး ငြင်းဆိုနေပေမယ့် လည်း အီရန် ရဲ့ နျူကလီးယားလက်နက်ထုတ်လုပ်နိုင်ဖို့ စမ်းသပ်နေပါတယ် ဆိုပြီးတော့ စွပ်စွဲချက်တွေထွက်ပေါ်ပြီးတဲ့နောက်မှာ ကမ္ဘာ့အင်အားကြီး ၆ နိုင်ငံက အမေရိကန်၊ ပြင်သစ်၊ ဂျာမနီနဲ့ တရုတ်တို့ က သဘောတူညီချက်ရအောင် ညှိနှိုင်းထားတာ ဖြစ်ပါတယ်။

အီရန်မှာ ဒီကနေ့ ပြုလုပ်တဲ့ သတင်းစာရှင်းလင်းပွဲမှာတော့ အီရန် နိုင်ငံခြားရေးဝန်ကြီး Mohammad Javad Zarif က ဒီဒုံကျည်စမ်းသပ်မူ လုပ်သလား မလုပ်ဘူးလားဆိုတာကို အတည်မပြုသွားသလို၊ ငြင်းလည်းငြင်းမသွားခဲ့ပါဘူး။

ဒါပေမယ့် အီရန်ရဲ့ နျူကလီးယား လုပ်ဆောင်မှုတွေဟာ နျူကလီးယား လက်နက်ထုတ်ဖို့ လုံးဝမဟုတ်ပါဘူးလို့ပဲ ထပ်ပြောသွားခဲ့ပါတယ်။

ဗွီအိုအေ (မြန်မာပိုင်း)
http://burmese.voanews.com

အီရန် ဒုံးကျည်စမ်းသပ်မှု အစ္စရေး စိတ်ဆိုး


အစ္စရေး ဝန်ကြီးချုပ် ဘင်ဂျမင် နေတန်ညာဟု က အီရန်ရဲ့ ဒုးကျည်စမ်းသပ်မှုဟာ ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်ကို ထင်ထင်ရှားရှား ချိုးဖောက်ခြင်း ဖြစ်တယ်လို့ စွပ်စွဲလိုက်ပါတယ်။

အီရန်ရဲ့ ရန်လိုတဲ့ အပြုအမူတွေ အတွက် အဖြေ တခုခု ရှာရမယ်လို့လည်း နေတန်ညာဟုက သူ့ရဲ့ လူမှုကွန်ရက် စာမျက်နှာ ဖေ့စ်ဘွတ်ခ် မှာ အသံသွင်း ပြောဆိုထားပါတယ်။ အမေရိကန် သမ္မတသစ် ဒေါ်နယ်ထရမ့်နဲ့ လာမယ့် ဖေဖော်ဝါရီလ တွေ့ဆုံမှုမှာ အီရန်အပေါ် အရေးယူ ပိတ်ဆို့မှုတွေ အသစ်တဖန် ပြန်လည် ပြုလုပ်ဖို့ ပြောမယ်လို့လည်း သူက ဆိုပါတယ်။

အီရန်ဟာ လုံခြုံရေးကောင်စီ အမြဲတမ်း အဖွဲ့ဝင် နိုင်ငံတွေ၊ ဂျာမနီ၊ ဥရောပ သမဂ္ဂ အဖွဲ့ တို့နဲ့ ၂၀၁၅ ခုနှစ် ခုနှစ်က ပြုလုပ်ခဲ့တဲ့ နျူကလီးယား သဘောတူညီမှု ရပြီနောက်ပိုင်းမှာ အရေးယူပိတ်ဆို့မှုတွေ ဖြေလျော့ခံလာရပါတယ်။

အဲဒီနောက်ပိုင်းမှာ အီရန်ဟာ အလားတူ ဒုံးကျည်စမ်းသပ်ပစ်လွှတ်မှုတွေ အများအပြား ပြုလုပ်ခဲ့ပါတယ်။

ဒါပေမယ့် ဘယ်လို အမျိုးအစား ဒုံးကျည်တွေကို စမ်းသပ်ခဲ့တယ်ဆိုတာ ရှင်းရှင်းလင်းလင်း မရှိသလို ဒါတွေဟာ ကုလ ဆုံးဖြတ်ချက်ကို တိတိကျကျ ချိုးဖောက်ခြင်း ပြုလား ဆိုတာလည်း မသေချာပါဘူး။

နေတန်ညာဟုဟာ ၂၀၁၅ အီရန် နျူကလီးယား သဘောတူညီမှုကို ပြင်းပြင်းထန်ထန် ဝေဖန်တတ်သူပါ။

အီရန်ဟာ ဂျူးလူမျိုးတွေရဲ့ အစ္စရေးနိုင်ငံကို ကမ္ဘာ့မြေပုံပေါ်က ပျောက်ကွယ် သွားစေရမယ်ဆိုပြီး ကြုံးဝါးထားဖူးပါတယ်။

ဘီဘီစီမြန်မာပိုင်း
BBC Burmese
https://www.facebook.com/bbcburmese/
 

ဦးကိုနီလုပ်ကြံခံရမှု ရဲစစ်ဆေးချက် ပေါက်ကြား


NLD ဥပဒေအကြံပေး ဦးကိုနီ လုပ်ကြံခံရမှုကို စုံစမ်းစစ်ဆေးနေတာ နှစ်ရက်မြောက်လာပေမယ့်၊ ဘာရည်ရွယ်ချက်နဲ့ ဘယ်သူက ခိုင်းစေတာလဲဆိုတာကို အစိုးရဖက် ထုတ်ပြန်နိုင်ခြင်းမရှိသေးပါဘူး။ တချိန်တည်းမှာ ရဲစစ်ဆေးချက်တွေက အင်တာနက်ပေါ် ပေါက်ကြားလာတဲ့ အပေါ်မှာလည်း လုံခြုံရေးတာဝန်ရှိသူတွေရဲ့ စုံစမ်းဆောင်ရွက်ချက်တွေ အပေါ် မေးခွန်းထုတ်လာစရာဖြစ်လာပါတယ်။ နောက်ကွယ်က တရားခံစစ်မပေါ်ပဲ သေနက်သမားဖမ်းမိမှုနဲ့ပဲ အဆံုးသတ်သွားမှာကို စိုးရိမ်နေကြတဲ့အကြောင်း ဗွီအိုအေ သတင်းထောက် မမေခ စုံစမ်း မေးမြန်း သတင်းပေးပို့ ထားပါတယ်။

တရားလွှတ်တော် ရှေ့နေ ဦးကိုနီ ကို သေနတ်ဖြင့် ပစ်ခတ် လုပ်ကြံခဲ့သူ သေနက်သမားကို ရဲစစ်မေးမှုလုပ်တာမှာ သူဖြေထားတဲ့ ဖြေဆိုချက်တွေဟာ လူမှု ကွန်ရက် မီဒီယာတွေမှာ ပေါက်ကြား ပျံ့နှံ့ခဲ့ပါတယ်။ ဒီစာရွက်စာတမ်းတွေဟာ သေနက်သမားရဲ့ ဖြေဆိုချက် အစစ်အမှန်တွေဖြစ်တယ်လို့ နိုင်ငံတော်သမ္မတရုံးပြောခွင့်ရသူက ဗွီအိုအေကို အတည်ပြုပြောပါတယ်။

ဥပဒေကြောင်းအရဆိုရင်တော့ ဒီလို ရဲစစ်ဆေးချက်တွေက အများပြည်သူကို ထုတ်ဖော်ပြသမှုကို ကန့်သတ်ထားတာပါ။ ဒီလို ရဲစစ် ဆေးချက် အချို့ပျံ့ နှံမှုက အစိုးရရဲ့ လုံခြုံရေးပိုင်းကို မေးခွန်းတွေ ထုတ်လာသလို လုံခြုံရေးတာဝန်ရှိသူတွေရဲ့ စစ်ဆေးမှုတွေကို ဝေဖန်ထောက်ပြတာတွေ ရှိလာခဲ့ပါတယ်။ ဘယ်လိုကြောင့် အွန်လိုင်းမှာ ပျံ့နှံခဲ့သလဲဆိုတာ တရားဝင် ထုတ်ပြန်ပြောဆိုတာမရှိသေးပါဘူး။

ဥပဒေပညာရှင်တဦး ဖြစ်တဲ့ တရားလွှတ်တော်ရှေ့နေ ဦးကြီးမြင့်ကတော့ ရှားရှားပါးပါး လူမြင်ကွင်းမှာ အသတ်ခံလိုက် ရတဲ့ ဒီဖြစ်ရပ်ကို အစိုးရပိုင်းဘက်က ဖိဖိစည်းစည်းကိုင်တွယ်မှုအားနည်းနေတယ်လို့ ယူဆပါတယ်။ ဒါကြောင့် တကယ့် တရားခံအ စစ်မပေါ်ဘဲ ပြီးသွား နိုင်မှာကို စိုးရိမ်မိတယ်လို့ ပြောပါတယ်။

“ဒါကတော့ အရမ်းရှုပ်ထွေးနေတယ်၊ NLD အဖွဲ့ချုပ်က ဦးဝင်းထိန်ကိုယ်တိုင်က သူတို့ ၀င်ရောက်မစွက်ဖက်ဘူး၊ ဖိအားမပေးဘူးတဲ့။ သူ့အလုပ်ကို သူလုပ်တာပဲ လုပ်ပါလိမ့်မယ်ဆိုပြီးတော့ ဦးဝင်းထိန်ကပြောထားတော့ အဲဒါက တာဝန်အရှိဆုံးလူကပြောတာဆိုတော့ ဆရာတို့က ပြောရမှာ အတော်ခက်တယ်၊ NLD ပါတီကလည်း သူတို့ခေါင်းဆောင်ကို သေမတက်ကြောက်နေရာတာ၊ သူတို့ခေါင်းဆောင် မီးစိမ်း မပြမခြင်း တုတ်တုတ်တောင်မလုပ်ရဲဘူး။ ဒေါ်အောင်ဆန်းစုကြည်က မီးစိမ်းမပြပဲနဲ့ သူ့ဆီက Green Light မပြမချင်း လွှတ်တော်က ဘာအဆိုမှ မတင်ရဲဘူး၊ ဘာကိုမှ မဆုံးဖြတ်ရဲဘူး၊ ဟိုလိုလို ဒီလိုလိုနဲ့ အဆုံးသတ်လိုက်မှာကို သိပ်စိုးရိမ်တာပဲ။ ဒီလို လုပ်ကြံမှုမျိုးက မြန်မာပြည်မှာ တခါမှ မပေါ်ဖူးဘူး။ ဒီတက်လာတဲ့ လူထုအစိုးရက လုံခြုံရေးကို လုံးဝကိုင်ခွင့်မရှိဘူး။ ရဲတပ်ဖွဲ့ကြီးက စစ်တပ်အောက်ရောက်နေတယ်၊ အဲဒီတော့ သူတို့ပေးတဲ့ သတင်းပဲရမယ်၊ သူတို့ လုပ်ချင်တာတွေ ၀င်ရောက်စွက်ဖက်လို့လည်းမရဘူး။ အဲဒါအစဉ်အလာအားဖြင့်လည်း အဲလိုလုပ်နေကြပဲ၊ စစ်အစိုးရ နှစ် ၅၀ သမိုင်းမှာတော့ အဲဒီသဘောကြီး ဖြစ်နေတယ်၊ မဟုတ်တာတွေ လျှောက်ပြနေတယ်၊ ဒါကြီးက တော်တော်သံဿယဖြစ်စရာ ကောင်းတယ်။ ဦးကိုနီနဲ့ ဘုရားဂိုဏ်းတွေလည်း ဘာမှ မဆိုင်ဘူး။”

နိုင်ငံတော်အတွက် အရေးကြီးတဲ့ ဒီလုပ်ကြံမှုဆိုင်ရာ စာရွက်စာတမ်းအချို့ အွန်လိုင်းမှာ ပျံနှံခဲ့တာဟာ နိုင်ငံရဲ့ လုံခြုံရေးစနစ်ကျိုးပေါက်တာလို့ နိုင်ငံရေးလေ့လာသုံးသပ်သူ ဒေါက်တာရန်မျိုးသိမ်းက ဝေဖန်ထောက်ပြခဲ့ပါတယ်။

“ဒီလုပ်ကြံသတ်ဖြတ်ခံရတဲ့ ဖြစ်စဉ်မှာ အစိုးရနဲ့ လုံခြုံရေး တပ်ဖွဲ့ဝင်တွေရဲ့ စုံစမ်းစစ်ဆေးမှုအပိုင်းကတော့ လက်ရှိအခြေအနေမှာ ပြောမယ်ဆိုရင် အားရ ကျေနပ်ဖွယ်မရှိဘူးလို့ မြင်တယ်။ အမူဖြစ်ပွားပြီးတော့ ဒီ ၂၄ နာရီအတွင်းမှာ ကနဦး သတင်းထုတ်ပြန်မှု အခြေအမြစ်နဲ့ မလုပ်နိုင်တာကလည်း အများပြည်သူကြားမှာ ယုံကြည်မှုကို ကျဆင်းစေတယ်ဆိုပြီး ကျနော်ကတော့ မြင်တယ်။ အရပ်ဖက် အဖွဲ့အစည်းတွေအနေနဲ့ကလည်း စောင့်ကြည့်လေ့လာဖို့ လိုအပ်တယ်လို့ မြင်တယ်။ နောက်ပြီးတော့ လွှတ်တေ်ာအနေနဲ့လည်း ကျနော့်အမြင်အရ စောင့်ကြည့်လေ့လာဖို့ လိုအပ်တယ်လို့ မြင်တယ်။ဘာဖြစ်လို့လဲဆိုတော့ လူမြင်ကွင်းမှာ လူ ၁ ယောက်ကို ဦးခေါင်းကို သေနတ်နဲ့ ပစ်ပြီးသတ်တယ်ဆိုတာကတော့ အင်မတန်မှ လူမဆန်တဲ့ ဒီလိုဖြစ်ရပ်ဖြစ်ခဲ့တယ်ဆိုတာကို အရေးတယူနဲ့ လေ့လာစောင့်ကြည့်ဖို့ လိုအပ်တယ်လို့ မြင်တယ်။

အွန်လိုင်းမှာ ပျံ့နှံ့နေတဲ့ အဲဒီစာရွက်စာတမ်းအရ ရာဇ၀တ်မှုနဲ့ထောင်ကျဖူး တဲ့ မြင့်ဆွေ ဆိုသူက ဦးကိုနီ ရဲ့ ဓာတ်ပုံကို ပြပြီး သတ်ပေးမည် ဆိုပါက ကား ၁ စီး ပေးမည်ဟုဆိုကာ ပြောဆိုခဲ့ပြီး လုပ်ကြံရာမှာ အသုံးပြုတဲ့ သေနတ် ၂ လက် ကိုလည်း ပေးခဲ့ကြောင်း ဖမ်မိထားတဲ့ သေနတ်သမားက ထွက်ဆိုထားပါတယ်။ ဒီစာရွက်တွေ ဘယ်သူ့ဆီက စတင် ပျံ့နှံ့လာတယ်ဆိုတာတော့ ယခုချိန်ထိ မသိရှိရသေးပါဘူး။

ဖမ်းမိထားတဲ့ သေနတ်သမားဦးကြည်လင်ဟာ ရှေးဟောင်းဘုရားခိုးယူရောင်းဝယ်မှုနဲ့ ထောင်ကျခဲ့သူဖြစ်ပြီး၊ သမ္မတဦးသိန်းစိန်လက်ထက် လွတ်ငြိမ်းချမ်းသာနဲ့ ပြန်လည်လွတ်မြောက်လာသူဖြစ်ပါတယ်။

 မေခ  / ဗွီအိုအေ (မြန်မာပိုင်း)
http://burmese.voanews.com

တရားခံကြည်လင်းရဲ့ထွက်ဆိုချက် ပေါက်ကြား


 ရှေ့နေဦးကိုနီကို လေဆိပ်မှာ သေနတ်နဲ့လုပ်ကြံခဲ့တဲ့ တရားခံကြည်လင်းရဲ့ ဆက်စပ်နောက်ကြောင်းကို စစ်ဆေးနေရာမှာ... ဦးကိုနီကို လုပ်ကြံဖို့အတွက် မြင့်ဆွေဆိုသူက ခိုင်းစေခဲ့တာလို့ ဒီကနေ့ လူမှုရေးစာမျက်နှာတွေကနေ ပေါက်ကြားလာတဲ့ ရဲတပ်ဖွဲ့ စစ်ဆေးချက်တွေအရ သိရပါတယ်။

 စာမျက်နှာ ၅ မျက်နှာပါရှိတဲ့ တရားခံ ထွက်ဆိုချက်မှာ... တရားခံကြည်လင်းနဲ့ ၂ဝ၁၄ ခုနှစ်နောက်ပိုင်း ထိုင်းမြန်မာနယ်စပ် မဲဆောက်မှာ တွေ့ဆုံခဲ့တဲ့ မြင့်ဆွေဆိုသူက ကားတစီးပေးမယ်လို့ ပြောဆိုပြီး ဦးကိုနီကို သတ်ဖြတ်ဖို့ စေခိုင်းခဲ့တာဖြစ်တယ်လို့ ဖော်ပြထားပါတယ်။

 တရားခံကြည်လင်းဟာ စစ်ကိုင်းတိုင်း ယင်းမာပင်မြို့နယ် စိုင်းလျားရွာဇာတိဖြစ်ပြီး ၁၉၈၅ ခုနှစ်က မန္တလေးမှာ နေထိုင်စဉ် ဘုရားခိုးမှုနဲ့ ထောင် ၂ နှစ် ၇ လ ကျခဲ့ဖူးကြောင်း၊ အဲဒီနောက် ၂ဝဝ၃ မှာ ရှေးဟောင်းဘုရားမှောင်ခို လုပ်မှုနဲ့ပဲ ထောင်ဒဏ် အနှစ် ၂ဝ ကျခဲ့ကြောင်း၊ ၂ဝ၁၄ သမ္မတဦးသိန်းစိန်လက်ထက် လွတ်ငြိမ်းချမ်းသာခွင့်နဲ့ ပြန်လွတ်လာခဲ့သူဖြစ်ကြောင်း... ထွက်ဆိုချက်မှာ ပါရှိပါတယ်။

 ဒီထွက်ချက်မှာ ရှေ့နေဦးကိုနီကို လုပ်ကြံစဉ် ကနဦးစေခိုင်းခဲ့သူ မြင့်ဆွေလည်း ပါဝင်ကြောင်း ဖော်ပြထားပါတယ်။ ဒီထွက်ဆိုချက်တွေကို ရဲတပ်ဖွဲ့ဝင် အချင်းချင်း ပေးပို့ရာကနေ အပြင်ပေါက်ကြားခဲ့တာလို့ သိရပြီး RFA အနေနဲ့ သီးသန့်အတည်ပြုနိုင်ခြင်း မရှိသေးပါဘူး။

RFA Burmese
https://www.facebook.com/rfaburmese


 

မယားအများဆုံး ယူထားသည့် တရားဟောဆရာ အိပ်ယာပေါ်တွင် အားပြတ်သေဆုံး


၃၁-၁-၂၀၁၇

နိုင်ဂျီးရီးယား နိုင်ငံ က မိန်းမအများဆုံး ယူထားသူ ဘာသာရေး တရားဟော ဆရာ မိုဟာမက်ဘယ်လို မာဆာဘာ အသက် (၉၂)နှစ်ဟာ သူနေ ထိုင်နေတဲ့ နီဂါပြည်နယ် ဘိုင်ဒါမြို့ ကနေအိမ်မှာ ရုတ်တရက် အိပ်ယာပေါ် မှာ သေဆုံးသွားခဲ့ကြောင်း ကျန်ရစ်သူ မိသားစုဝင်တွေက အတည်ပြုခဲ့ပါတယ်။

မိုဟာမက်ဟာ တရားဝင်ပေါင်းနေသည့် ဇနီး အမျိုးသမီးပေါင်း (၁၂၀) နဲ့  ကွာရှင်းခဲ့သူ (၁၀)ဦး ရှိပါတယ်။

သူသေဆုံးချိန်မှာ သားသမီးပေါင်း ၂၀၃ ယောက်နဲ့  ကိုယ်ဝန်ဆောင်ဇနီးတွေ တသီကြီး ကျန်ခဲ့ပါတယ်၊ ဘာသာရေးအရ မယားလေးယောက် ယူခွင့်ပြုထားပါတယ်။ မိုဟာမက်ကတော့ အားလုံးကိုကျော်ပြီး မဟာ မိန်းမအများဆုံးဘွဲ့ ထူးနဲ့  သမိုင်းတွင်ခဲ့ပါတယ်။


မိုဟာမက် သေဆုံးရတာနဲ့ ပါတ်သက်ပြီး သူ့ မှာဘာရောဂါမှမရှိပါဘူး၊ ဘယ် လိုဒဏ်ရာမှာလည်း မတွေ့ ရဘဲ နောက်ဆုံးယူထားတဲ့ ဇနီးနဲ့  အတူအိပ်နေရင်း အမောဖေါက်သေဆုံးသွားခဲ့တာလို့ သိရပါတယ်။

Social Action for Children and Women - SAW

သြစတြီးယားမှာ မျက်နှာပြည့် ဖုံးအုပ်ဝတ်ဆင်မှု တားမြစ်


ဥရောပတိုက်ရှိ သြစတြီးယားနိုင်ငံက အာဏာရ ညွှန့်ပေါင်းအစိုးရဟာ တရားရုံး၊ ကျောင်း အစရှိတဲ့ အများပြည်သူနဲ့ သက်ဆိုင်တဲ့ နေရာတွေမှာ တမျက်နှာလုံး ဖုံးအုပ်ထားတဲ့ ခေါင်းဆောင်း ဝတ်ရုံတွေ ဝတ်ဆင်ခွင့် ပိတ်ပင်လိုက်ပါတယ်။

ဒါ့အပြင် အစိုးရဝန်ထမ်း တွေအနေနဲ့ ခေါင်းစည်းပုဝါ အပါအဝင် အခြား ဘာသာရေး တခုခုရဲ့ အမှတ်သင်္ကေတ ပါတာတွေ ဝင်ဆင်ခြင်းကိုလည်း တားမြစ်ဖို့ စဉ်းစားနေကြပါတယ်။

အခု ညွှန်းပေါင်းအစိုးရအဖွဲ့ သဘောတူညီလိုက်တဲ့ အရေးယူဆောင်ရွက်မှုတွေမှာ ဂျီဟတ်ဒ် ဝါဒီ ဖြစ်ခဲ့ဖူးသူတွေကို အီလက်ထရောနစ် နည်းပညာ အမြဲမပြတ် ခြေရာခံ စောင့်ကြည့်ဖို့နဲ့ နိုင်ငံခြားသား အလုပ်သမား အရေအတွက်ကို ကန့်သတ်ဖို့ တွေလည်း ပါဝင်ပါတယ်။


ဒီလို အရေးယူ ဆောင်ရွက်ခြင်းဟာ လက်ယာစွန်း လွတ်မြောက်ရေးပါတီ (Freedom Party of Austria) လူကြိုက်များလာမှု အပေါ် တန်ပြန်တဲ့ လုပ်ရပ်လို့ အများက ယူဆကြပါတယ်။ လက်ယာစွန်းပါတီရဲ့ ကိုယ်စားလှယ်ဟာ ပြီးခဲ့တဲ့ လ က ကျင်းပခဲ့တဲ့ သမ္မတ ရွေးကောက်ပွဲ မှာ ကွာခြားချက် အနည်းငယ်နဲ့သာ ရှုံးနိမ့်သွားခဲ့ပါတယ်။

အခု အာဏရနေတဲ့ အလယ်အလတ်ဝါဒီ ညွှန့်ပေါင်းအစိုးရဟာ အရင်အပတ်တုန်းက ပြုတ်ကျလုနီးနီး ဖြစ်ခဲ့ပါတယ်။ အစိုးရအဖွဲ့ရဲ့ အနာဂတ် လမ်းကြောင်း မူဝါဒတွေနဲ့ ပတ်သက်ပြီး ညှိနှိုင်းမှုတွေ ပြုလုပ်ရမှာ အကျပ်အတည်းတွေနဲ့ ရင်ဆိုင်ခဲ့ရပါတယ်။

အစိုးရရဲ့ ပိတ်ပင်မှုဟာ အစ္စလာမ် ဘာသာဝင် အမျိုးသမီးတွေရဲ့ မျက်နှာပြည့် သို့မဟုတ်၊ မျက်လုံးပဲ ဖော်ထားတဲ့ ခေါင်းဆောင်း ဝတ်ရုံရှည် ဝင်ဆင်မှုအပေါ် သက်ရောက်မှာ ဖြစ်ပါတယ်။

သြစတြီးယားမှာ အဲဒီလို ဆင်ယင်မှု ရှိတဲ့ အမျိုးသမီး အယောက် ၁၅၀ လောက် ရှိမယ်လို့ ခန့်မှန်းကြပါတယ်။

ခရီးသွားလုပ်ငန်းက အရာရှိတွေကတော့ အခု ပိတ်ပင်မှုဟာ ပင်လယ်ကွေ့ ဒေသက နိုင်ငံခြား ခရီးသွား လာရောက်လည်ပတ်မှုကို အဟန့်အတား ဖြစ်စေနိုင်တယ် ဆိုတဲ့ စိုးရိမ်ချက် ရှိပါတယ်။

ဒီ တားမြစ်ချက်ဟာ ဗီယင်နာ မြို့တော် အလယ်ခေါင်နဲ့ နှင်းလျှောစီး အပန်းဖြေစခန်းတွေလည်း ပါတယ်လို့ အစိုးရရဲ့ ပြောရေးဆိုခွင့်ရှိသူက ဆိုထားပါတယ်။

ဥရောပ နိုင်ငံ အများအပြားမှာ ဒီလို မျက်နှာလုံးပြည့် ဖုံးအုပ်ထားတဲ့ ဝတ်စားဆင်ယင်မှုမျိုးကို ပိတ်ပင်ထားကြပြီး ကျန်တဲ့ နိုင်ငံတွေမှာလည်း စဉ်းစား နေကြပါတယ်။

အရင်လကပဲ ဂျာမနီ အဓိပတိ အန်ဂလာ မာကဲလ်က တရားဥပဒေ အရ ဖြစ်နိုင်တဲ့ နေရာတိုင်းမှာ မျက်နှာပြည့် ဝတ်ဆင်မှုတွေကို တားမြစ်သင့်တယ်လို့ ပြောခဲ့ပါသေးတယ်။

ဗြိတိန်မှာတော့ မျက်နှာပြည့် ဖုံးအုပ် ဝတ်ဆင်ခြင်းကို တားမြစ်ခြင်း မရှိပါဘူး။

ဘီဘီစီမြန်မာပိုင်း
BBC Burmese
https://www.facebook.com/bbcburmese

အမေရိကန်အစိုးရ ယာယီရှေ့နေချုပ် အစားထိုး ခန့်အပ်

အစားထိုး ခန့်အပ်ခံရတဲ့ ယာယီရှေ့နေချုပ်
အမေရိကန်သမ္မတ Donald Trump က သူ့ရဲ့ လူဝင်မှုကြီးကြပ်ရေးဆိုင်ရာ သမ္မတအမိန့်ကို မထောက်ခံတဲ့ ယာယီရှေ့နေချုပ် Sally Yates ကို ရာထူးက ဖယ်ရှားလိုက်ပြီး နာရီပိုင်းအတွင်းမှာပဲ တရားရေးဌာန ဝန်ထမ်းတွေအနေနဲ့ သမ္မတရဲ့ တရားဝင်အမိန့်ကို တရားဥပဒေနဲ့ အကာအကွယ်ပြုကြဖို့ သူ့နေရာမှာ အစားထိုးခန့်အပ်တဲ့ ယာယီရှေ့နေချုပ်အသစ်က သူ့ဝန်ထမ်းတွေကို ညွှန်ကြားလိုက်ပါတယ်။

သမ္မတ Trump က Dana Boente ကို ယာယီရှေ့နေချုပ် အဖြစ် ခန့်အပ် လိုက်ပြီး ရှေ့နေချုပ်တဦး အထက်လွှတ်တော်က အတည်ပြု ရွေးလို့ မပြီးမချင်း တာဝန်ထမ်းဆောင် သွားမှာ ဖြစ်ပါတယ်။ ရှေ့နေချုပ်နေရာအတွက် ပဏာမရွေးချယ်ခံထားရတဲ့ အထက်လွှတ်တော်အမတ် Jeff Sessions ကို ခန့်အပ်ဖို့ အထက်လွှတ်တော် တရားရေးကော်မတီက ဒီကနေ့ မဲပေးဆုံးဖြတ်ကြမှာပါ။

ဒီသီတင်းပတ်ကုန်ပိုင်းမှာတော့ သူ့ကို အထက်လွှတ်တော်တခုလုံးက အတည်ပြုပေးရမှာ ဖြစ်ပါတယ်။ အခုရာထူးကဖယ်ရှားခံရတဲ့ Ms. Yates က သမ္မတဟောင်း Barack Obama ခန့်အပ်ခဲ့သူဖြစ်ပြီး သူက သမ္မတ Trump ထုတ်ပြန်တဲ့ လူဝင်မှုကြီးကြပ်ရေးဆိုင်ရာအမိန့် ဟာ ဥပဒေနဲ့ ညီညွတ်တယ်လို့ မယူဆကြောင်း ပြောပြီးတော့ သူ့တရားရေးဌာနမှာ ညွှန်ကြားချက်ထုတ်ပြန်ခဲ့တာပါ။

အိမ်ဖြူတော်က Ms. Yates ကို ပြင်းပြင်းထန်ထန်ဝေဖန်တဲ့ ကြေညာချက်ထုတ်ပြန်ပြီး သူဟာ အမေရိကန်နိုင်ငံသားတွေကို အကာအကွယ်ပေးဖို့ လုပ်ထားတဲ့ သမ္မတရဲ့ တရားဝင်အမိန့်အတိုင်း ဆောင်ရွတ်ဖို့ ငြင်းဆိုပြီး တရားရေးဌာနကို သစ္စာဖောက်ခဲ့တယ်လို့ ပြောထားပါတယ်။

အရင်တပတ်မှာ လက်မှတ်ထိုးထုတ်ပြန်ခဲ့တဲ့ သမ္မတရဲ့ အမိန့်အရ ရွှေ့ပြောင်း အခြေချတဲ့ ဒုက္ခသည်တွေကို အမေရိကန်ပြည်ထောင်စုကို ဝင်ရောက်ခွင့် ရက်ပေါင်း ၁၂၀ ပိတ်ထားပြီး Syria က လာတဲ့ ဒုက္ခသည်တွေကိုတော့ ရက်အကန့်သတ်မရှိ ပိတ်ထားတာပါ။ Iraq, Iran, Libya, Syria, Sudan, Yemen နဲ့ Somalia နိုင်ငံသားတွေကိုလည်း အမေရိကန်ပြည်ဝင်ခွင့်ကို ၃ လ ပိတ်ထား ပါတယ်။

 ဗွီအိုအေ (မြန်မာပိုင်း)
http://burmese.voanews.com

မြန်မာအလုပ်သမား ၈ဝ ကို မြန်မာနိုင်ငံပြန်ပို့ဖို့ ထိုင်းတရားရုံး အမိန့်ချ

ထိုင်းနိုင်ငံမှာ နယ်မြေဖြတ်ကျော်မှုနဲ့ အဖမ်းခံရတဲ့ မြန်မာတွေကို ဇန်နဝါရီလ ၃၁ ရက်နေ့က တွေ့ရစဉ်။ Photo: Ye Min - ACC
ထိုင်းနိုင်ငံကနေ မြန်မာနိုင်ငံ ထားဝယ်မြို့မှာ နိုင်ငံကူးလက်မှတ်လုပ်ကိုင်မယ့် မြန်မာအလုပ်သမား ၈၀ ကို နယ်မြေဖြတ်ကျော်မှုနဲ့ ထိုင်းနိုင်ငံ လူဝင်မှုကြီးကြပ်ရေးနဲ့ ထိုင်းရဲတပ်ဖွဲ့က ဖမ်းဆီးထားပြီး ဒီကနေ့မှာ မြန်မာနိုင်ငံ ကို ပြန်ပို့ဖို့ ထိုင်းတရားရုံးက အမိန့်ချလိုက်တယ်လို့ သိရပါတယ်။

ထိုင်းနိုင်ငံရဲ့ ဥပဒေအရ နယ်မြေဖြတ်ကျော်တဲ့ အလုပ်သမားတွေကို မြန်မာနိုင်ငံကို ပြန်ပို့ဖို့ အမိန့်ချလိုက် တာကြောင့် အလုပ်သမားတွေ နစ်နာမှုတွေအများကြီးရှိတဲ့အတွက် ပြန်ပို့မခံရရေး ကြိုးစားနေတယ်လို့ ထိုင်းနိုင်ငံရောက် မြန်မာအလုပ်သမားတွေကို ကူညီပေးနေတဲ့ AAC မဟာမိတ်အဖွဲ့က ကိုရဲမင်းက ပြောပါတယ်။

"အဓိကက နယ်ကျော်မှုပေါ့။ သူတို့က သံရုံးထောက်ခံစာတစ်ခုတည်းပါတယ်။ အလုပ်ရှင်ထောက်ခံစာနဲ့ ခရီးသွားထောက်ခံစာ မပါတဲ့အတွက် ဖမ်းလိုက်တာပါ။ တရားရုံးကနေ အမိန့်ချလိုက် တယ် မြန်မာပြည်ပြန်ရမယ်ဆိုပြီးတော့ အဲ့ဒါကို ကျွန်တော်တို့အဖွဲ့တွေက လာညှိနိုင်းတယ်ပေါ့နော်။ ဒီအလုပ်သမားတွေကို မြန်မာပြည်မပြန်ပို့ပါနဲ့ ။ ပွဲစားတွေယူထားတဲ့ ပိုက်ဆံတွေကို ပြန်တောင်း ချင်တယ်။ ပွဲစားတွေကို ပြန်ဖမ်းချင်တယ်ဆိုတာကို အတတ်နိုင်ဆုံး ကြိုးစားနေတယ်။ အလုပ်သမား သံအရာရှိတို့က ပြန်သွားပြီ။ အလုပ်သမားသံအရာရှိတို့က နှစ်နိုင်ငံချစ်ကြည်ရေးဆိုတာကို ခေါင်းစဉ် တပ်ပြီးတော့ ဥပဒေအတိုင်းပဲ လုပ်မယ်ဆိုပြီးတော့၊ ဥပဒေအတိုင်းဆိုရင် ကျွန်တော်တို့ မြန်မာအလုပ် သမားက နစ်နာသွားပြီလေ။ ပွဲစားတွေယူသွားတဲ့ ပိုက်ဆံတွေ ပြန်မရမယ့်အပြင် မြန်မာပြည် ကိုလည်း ပြန်ရောက်မယ်။ ပန်းရောင်ဘတ်တွေလည်း ပြန်သိမ်းခံရမယ်။ သူတို့ဥပဒေအတိုင်း ဆိုရင် ထောင်လည်း ၄၈ ရက်လောက် ကျဦးမယ်"

အဲဒီအလုပ်သမားတွေဟာ ဘန်ကောက်မြို့နဲ့ မဟာချိုင်က စက်ရုံ၊ အလုပ်ရုံတွေမှာ အလုပ်လုပ်နေတဲ့သူတွေဖြစ် ပြီး မြန်မာနိုင်ငံ ထားဝယ်မြို့မှာ နိုင်ငံကူးလက်မှတ် ပြန်လုပ်ဖို့အတွက် လာတဲ့လမ်းမှာ နခွန်ပထုံရဲစခန်းကနေ နယ်မြေဖြတ်ကျော်မှုနဲ့ မနေ့က ဖမ်းဆီးလိုက်တာ ဖြစ်ပါတယ်။

နိုင်ငံကူးလက်မှတ်လုပ်ဖို့အတွက် အလုပ်သမားတွေက ပွဲစားတွေကို ဘတ်ငွေ တစ်သောင်းလောက်ပေးကြ ရတယ်လို့လည်း ပြောပါတယ်။

ဖမ်းမိထားတဲ့ အလုပ်သမားတွေဟာ ထိုင်းနိုင်ငံမှာ တရားဝင်အလုပ်လုပ်ခွင့်ရရှိတဲ့ ပန်းရောင်ကတ် သက်တမ်း မကုန်သေးတဲ့သူတွေဖြစ်ပေမယ့် ထိုင်းနိုင်ငံရဲ့ ဥပဒေအရ သတ်မှတ်ထားတဲ့ နယ်မြေထက်ကျော်လွန်ပြီး မသွားရဆိုတဲ့ သတ်မှတ်ချက်နဲ့ အဖမ်းခံရတာဖြစ်တယ်လို့ သိရပါတယ်။

RFA Burmese
http://www.rfa.org/burmese

ဂိမ်းဆိုင်ဝန်ထမ်းတွေကို အမှုဖွင့်ဖမ်းဆီးထားမှု မိသားစုဝင်တွေ ရှင်းလင်း

ဖမ်းဆီးခံထားရတဲ့ စီးတီးစင်တာ ဂိမ်းဆိုင် ဝန်ထမ်း ၁၉ ဦးရဲ့ မိသားစုဝင်တွေကို ဇန်နဝါရီလ ၃၁ ရက်နေ့က သတင်းစာရှင်းလင်းပွဲ မှာ တွေ့ရစဉ်။ Photo: Kaung Htet Kyaw/RFA
ရန်ကုန်တိုင်းဒေသကြီး ပန်းဘဲတန်းမြို့နယ်မှာ ဖွင့်လှစ်ထားတဲ့ City Center Game ဆိုင်က ဝန်ထမ်း ၁၉ ဦး ကို လောင်းကစားဒိုင်အဖြစ် အမှုဖွင့်ဖမ်းဆီးထားတဲ့အကြောင်း ဖမ်းဆီးခံထားရတဲ့ ၀န်ထမ်း ၁၉ ဦးရဲ့ မိသားစု ဝင်တွေက ဒီနေ့ သတင်းစာရှင်းလင်းပွဲမှာ ပြောပါတယ်။

ဒီနေ့ တော်ဝင်နှင်းဆီခန်းမမှာ ကျင်းပတဲ့ သတင်းစာရှင်းလင်းပွဲမှာ ဂိမ်းဆိုင်ပိုင်ရှင်နဲ့ မန်နေဂျာကို အမှုဖွင့်တာမရှိဘဲ ဆိုင်ဝန်ထမ်း ၁၉ ဦးကို လောင်းကစားဒိုင်အဖြစ် သတ်မှတ်ပြီး လောင်းကစားဥပဒေပုဒ်မ ၁၄(က) နဲ့ အမှုဖွင့်ထားတယ်လို့ ဖမ်းဆီးခံထားရသူတွေထဲက မိသားစုဝင်တစ်ဦးဖြစ်တဲ့ ကိုကျော်ခိုင်ဝင်း က ပြောပါတယ်။

City Center Game ဆိုင်ကို ရန်ကုန်တိုင်းဒေသကြီး ရဲတပ်ဖွဲ့က ဇန်န၀ါရီလ ၁၁ရက်နေ့ ညနေ ၅ နာရီမှာ ဝင်ရောက်စစ်ဆေးချိန် ဆိုင်အတွင်းရှိနေတဲ့ ကစားသူ ၄၈ ဦးနဲ့ ဆိုင်ဝန်ထမ်း ၁၉ ဦးကို ဖမ်းဆီးပြီး ကစားသူ ၄၈ ဦးကို အာမခံနဲ့ ပြန်လွှတ်ထားတယ်လို့ သိရပါတယ်။

ဖမ်းဆီးခံရသူတွေထဲမှာ ဂိမ်းဆိုင်မှာ သန့်ရှင်းရေးလုပ်ကိုင်တဲ့ ဝန်ထမ်းတွေလည်း ပါဝင်ဝပီး ၀န်ထမ်း ၁၉ ဦးကို အင်းစိန်အကျဉ်းထောင်မှာ ဖမ်းဆီးထားပါတယ်။

BBC Burmese
http://www.rfa.org/burmese

ဂျပန်မှာ အလုပ်ပိသေသူကို လျော်ကြေးပေး

 ဂျပန် လုပ်သား ငါးပုံ တပုံ အသက်သေဆုံးနိုင်တဲ့ အန္တရာယ် ရှိ
ဂျပန် နိုင်ငံ မှာ အလွန် အကျွံ အလုပ် လုပ်ရလို့ သေဆုံးခဲ့ရတဲ့ ဒိုးနတ်ဆိုင် မန်နေဂျာရဲ့ မိသားစုကို ထိခိုက် နစ်နာကြေး ဒေါ်လာ လေးသိန်း ပေးဖို့ ဂျပန် တရားရုံးတစ်ခုက ဆုံးဖြတ်လိုက်ပါတယ်။

အဲဒီ အမျိုးသားက တချိန်တည်းမှာ Mister Donut ဆိုင် နှစ်ဆိုင်ကို စီမံ ခန့်ခွဲ ရတဲ့ အတွက် တလကို အချိန်ပို နာရီ တရာကျော် ပိုလုပ်ခဲ့ရတဲ့ အတွက် ရလာတဲ့ စိတ်ဖိစီးမှုတွေ ကြောင့် သေဆုံးရတာလို့ တရားရုံးက တွေ့ရှိပါတယ်။

အလုပ်ရှင် ကုမ္ပဏီကတော့ အဲဒီလူဟာ အဝလွန် နေသူ တစ်ယောက် ဖြစ်ကြောင်းနဲ့ အလုပ်ချိန် အကြာကြီး လုပ်ဖို့ တွန်းအားပေးခဲ့တာ မရှိဘူးလို့ ပြောပါတယ်။

မကြာသေးခင်က အစိုးရ ထုတ်ပြန်ချက်မှာအလွန်အမင်း အလုပ်ချိန် အ ကြာကြီး လုပ်ကြရတဲ့ အတွက် ဂျပန်က လုပ်သား အင်အား ငါးပုံ တပုံဟာ အသက်သေဆုံးနိုင်တဲ့ အန္တရာယ် ရှိကြောင်း တွေ့ရှိရပြီး အလုပ်ချိန် လျှော့ဖို့နဲ့ အားလပ်ရက် ပိုပေးယူဖို့ အလုပ်သမားတွေကို အစိုးရက တိုက်တွန်း ပါတယ်။

BBC Burmese
http://www.bbc.com/burmese

ထီးချိုင့်တွင် ကြံခင်း အလုပ်သမားခေါင်းဆောင်အား ကြံခုတ်လုပ်သားမှ လည်ပင်း ဓားဖြင့်ခုတ်သတ်


မုံရွာ၊ ဇန်နဝါရီ ၃၁။

ထီးချိုင့်မြို့နယ်ရှိ ကြံစိုက်ခင်းတစ်ခုတွင် အလုပ်သမား ခေါင်းဆောင်အား ကြံခုတ်လုပ်သားက လည်ပင်းအား ဓားဖြင့် ခုတ်သတ်သော လူသတ်မှုတစ်ခု ဇန်န၀ါရီ ၂၈ ရက်ညပိုင်းက ဖြစ်ပွားခဲ့ကြောင်းလသတင်းရရှိသည်။

ဖြစ်စဉ်မှာ ကျော်သာကုမ္ပဏီ ကြံစိုက်ခင်းအတွင်း အလုပ်သမားခေါင်းဆောင် ကိုမောင်လှိုင်၊ ကြီးကြပ်၊ အမှတ် ၁ စံပြရပ်ကွက် ၊ထီးချိုင့်မြို့နေသူသည် တောခုတ်ရန် ခေါ်လာသော နန်လန်ရွာမှ အလုပ်သမားအဖွဲ့ကို ကျွေးရန် ၀က်တစ်ကောင်အား ၀ယ်ပြီး မီးကင်နေစဉ် အလုပ်သမားကိုဗန်တိုက ဘာမှ မပြောမဆိုပဲ ဓားဖြင့် လည်ပင်းအား ခုတ်ပိုင်းခဲ့ကြောင်း ၊ အနားရှိ လူများကိုလည်း ဘာမှ မပြောရန် ကြိမ်းဝါးပြီး အလောင်းကို ပီနံအိတ်ဖြင့် ထည့်ကာ ဆိုင်ကယ်ပေါ်တင်၍ တောထဲသို့ မောင်းထွက်သွားခဲ့ကြောင်း အလုပ်သမားများမှ ရဲစခန်းသို့ပြောကြားချက်အရ သိရသည်။

လူသတ်သမားနောက်သို့ ဆိုင်ကယ် လမ်းကြောင်းအတိုင်း ရဲတပ်ဖွဲ့မှ လိုက်ရာ ကြံစိုက်ခင်းသွား ဒိုဇာလမ်းဘေးတွင် အလောင်းကို ပုဆိုးဖြင့်အုပ်၍ ပစ်ချထားသည်ကိုတွေ့ခဲ့ရသည်။

၎င်းလူသတ်မှုအား ကြံစိုက်ခင်းကုမ္ပဏီ ဒုတာဝန်ခံမှ ထီးချိုင့်မြို့မရဲစခန်းတွင် လူသတ်မှု ၊ အလောင်းဖျောက်ဖျက်ရန် ကြိုးစားမှုတို့ဖြင့် အမှုဖွင့်ထားကြောင်း သိရသည်။

ဟိန်းလင်းသန့်
Central News Myanmar
https://www.facebook.com/CNMyanmar/

Trump လူဝင်မှုအမိန့် မြန်မာဒုက္ခသည်အခြေချမှု အခက်ကြုံ

ထိုင်း-မြန်မာနယ်စပ်ရှိ ဒုက္ခသည်တွေ
အမေရိကန်ပြည်ထောင်စုထဲမှာ လာရောက်အခြေချမယ့် ဒုက္ခသည်တွေကို သမ္မတ Donald Trump ကကန့်သတ်လိုက်တဲ့အတွက် အမေရိကန်မှာ အခြေချနိုင်ဖို့ကြိုးစားနေတဲ့ မြန်မာနိုင်ငံက ဒုက္ခသည်တွေအတွက် မျှော်လင့်ချက်နည်းသွားတယ်လို့ အမေရိကန်ကို မြန်မာဒုက္ခသည်တွေလာရောက်နိုင်ရေး ကူညီပေးနေသူတွေက ပြောလိုက်ပါတယ်။ ဘယ်နိုင်ငံက ဒုက္ခသည်မဆို အမေရိကန်ထဲ ရက်ပေါင်း ၁၂၀ အတွင်း လာရောက်ခွင့်မရှိသလို ၂၀၁၇ ခုနှစ်အတွင်း လက်ခံမယ့် ဒုက္ခသည်အရေအတွက်ကိုလည်း ၅၀ ရာခိုင်နှုန်းကျော် လျှော့ချတယ်လို့ သမ္မတ Trump ကအမိန့်ထုတ်ပြန်ခဲ့တာဖြစ်ပါတယ်။ ဒီအမိန့်ကြောင့် မြန်မာနိုင်ငံက ဒုက္ခသည်တွေအပေါ် ဘယ်လိုသက်ရောက်မှုတွေရှိလာမလဲဆိုတာကို မစုမြတ်မွန်က ဆက်လက်တင်ပြပါမယ်။

သမ္မတ Donald Trump က သမ္မတလုပ်ပိုင်ခွင်နဲ့ အမေရိကန်ပြည်ထောင်စုထဲ နိုင်ငံခြားကအကြမ်းဖက်သမားတွေဝင်လာမှာကို ကာကွယ်တားဆီးတဲ့ ဥပဒေကို January လ ၂၇ ရက် ပြီးခဲ့တဲ့သောကြာနေ့က လက်မှတ်ထိုးထုတ်ပြန်ခဲ့ပါတယ်။

အဲဒီအမိန့်အရ ဘယ်နိုင်ငံဒုက္ခသည်မဆို ရက် ၁၂၀ အတွင်း အမေရိကန်ထဲ ဝင်လာခွင့်ကို ပိတ်ခဲ့ပါတယ် ဆီးရီးယားကဆိုရင်တော့ အကန့်အသတ်မရှိဝင်လာခွင့်ကို ပိတ်ထားတဲ့အပြင် မွတ်ဆလင်အများစုရှိတဲ့ နိုင်ငံ ၇ နိုင်ငံကဆိုရင်တော့ အမေရိကန်ထဲမှာ အခြေချနေထိုင်နေသူတွေရော တရားဝင် ပြည်ဝင်ခွင့် Visa ရထားသူတွေပါ နိုင်ငံထဲကို ရက် ၉၀ အတွင်း ပြန်လည်ဝင်လာခွင့် မရှိဘူးလို့ ကန့်သတ်လိုက်ပါတယ်။

ဒါ့အပြင် ၂၀၁၇ ခုနှစ် ဘဏ္ဍာနှစ်အတွင်း အမေရိကန်က လက်ခံမယ့်ဒုက္ခသည်အရေအတွက်ကို ၁ သိန်း ၁ သောင်းကနေ ၅ သောင်းအထိကို လျှော့ချလိုက်ပါတယ်။ ခုလို အမေရိကန်ထဲဝင်လာမယ့်သူတွေအပေါ် ကြပ်ကြပ်မတ်မတ် စိစစ်နေတဲ့အပေါ် ဆန္ဒပြမှုတွေ ကျယ်ကျယ်ပြန့်ပြန့်ရှိနေချိန်မှာ အိမ်ဖြူတော်ပြောခွင့်ရသူ Sean Spicer ကတော့ အစိုးရရဲ့လုပ်ရပ်ကို တနင်္လာနေ့သတင်းစာရှင်းပွဲမှာ ခုလိုကာကွယ်ပြောကြားခဲ့ပါတယ်။

“သမ္မတလုပ်ပိုင်ခွင့်နဲ့ထုတ်ပြန်ခဲ့တဲ့ အမိန့်အတိုင်း ဆောင်ရွက်ရမဲ့ကိစ္စတွေအားလုံး အခုအချိန်မှာ ဘာမှအပြောင်းအလဲမရှိ အသက်ဝင်နေပါတယ်။ တကယ်လို့ ပြဿနာတစုံတရာရှိမယ်ဆိုရင် ကျော်လွှားနိုင်မယ်လို့ အခိုင်အမာယုံကြည်ပါတယ်။”

Trump အစိုးရသစ်ရဲ့ ပြည်ဝင်ခွင့်ကန့်သတ်ချက်တွေကြောင့် အမေရိကန်မှာ ဒုက္ခသည်အခြေချနေထိုင်ရေး အစီအစဉ်နဲ့ လာမယ့် မြန်မာနိုင်ငံက ဒုက္ခသည်တွေကိစ္စ ဘယ်လိုဆက်လုပ်ရမယ်ဆိုတာ လက်ရှိမှာမရေမရာ ဖြစ်နေတယ်လို့ ဒုက္ခသည်တွေလာရောက်နိုင်ရေး ကူညီဆောင်ရွက်ပေးနေတဲ့ အမေရိကန် မြန်မာလူမှုရေးအသင်း BACI ဘုတ်အဖွဲ့ရဲ့ ညွန်ကြားရေးမှူး ဒေါက်တာ Ro Dinga ကခုလို ပြောပါတယ်။

“အဲဒီရဲ့ သက်ရောက်မှုက ဘယ်အထိ အောက်ခြေမှာပေါ့နော် မလေးရှား၊ ထိုင်း- မြန်မာ နယ်စပ်၊ အိန္ဒိယ မြန်မာပြည် ဒုက္ခသည်တွေဆီမှာ ဘယ်လောက်အထိ သက်ရောက်သလဲဆိုတာ ကျနော်တို့တိတိကျကျ မသိရသေးဘူး။ အခုလို ရက်ပိုင်းအတွင်းမှာ အဲဒီအမိန့်က ရုတ်တရက်ကြီးထွက်လာတော့ အားလုံးကလည်း shock ဖြစ်သွားတယ်ပေါ့နော်၊ ကျနော်တို့လည်း သတင်းအချက်အလက်တွေ ဒီ State Department တို့ ကိုဆက်သွယ်လည်း တိတိကျကျ အဖြေမရသေးဘူးဖြစ်တယ်။ နောက် ဒုက္ခသည်တွေ လက်ခံဖို့လုပ်တဲ့ အဓိက State Department တို့ Homeland Security တို့က ထိပ်တန်းအရာရှိ ၄ ယောက်ကလည်း နုတ်ထွက်သွားတာ ကျနေ်ာတို့ တွေ့ရတယ်။ ကျနော်တို့ ဘက်ကလည်း ဘာဆက်လုပ်ရမလဲ၊ ဘယ်လို ပုံစံနဲ့ ချဉ်းကပ်ရမလဲဆိုတာကတော့ ကျနော်တို့ တိတိကျကျ အဖြေအခုထိ မရှိသေးဘူး ဖြစ်တယ်။ ကျနော်တို့ တတ်နိုင်သလောက်တော ကြိုးစားပြီးတော့ ပြန်ပြီးတော့ လုပ်မှာ ဖြစ်ပါတယ်။”

၂၀၁၆ ဘဏ္ဍာနှစ်အတွင်း အမေရိကန်ကိုလာရောက်အခြေချသူ မြန်မာနိုင်ငံက ဒုက္ခသည် ၁ သောင်း ၂ ထောင် ၃ ရာ ၄ ဆယ့် ၇ ယောက်ရှိခဲ့ပါတယ်။ စုစုပေါင်းလက်ခံတဲ့ထဲမှာ မြန်မာနိုင်ငံဒုက္ခသည်အရေအတွက် တတိယအများဆုံးဖြစ်ပါတယ်။

၂၀၁၇ ခုနှစ်အတွက် သမ္မတဟောင်း Barack Obama က မြန်မာနိုင်ငံက ဒုက္ခသည်စုစုပေါင်း ၁ သောင်း ၄ ထောင်ကို အမေရိကန်မှာ အခြေချနေထိုင်ဖို့ ၂၀၁၆ အောက်တိုဘာ ၁ ရက်နေ့က လက်ခံခွင့်ပြုခဲ့ပြီးတဲ့နောက် အမေရိကန်ကိုရောက်လာပြီးသူတချို့ရှိသလို လာဖို့ဆောင်ရွက်နေကြသူတွေလည်း ရှိနေပါသေးတယ်။ ဒါပေမယ့် အခုသမ္မတသစ် Trump ရဲ့ ဆောင်ရွက်မှုသစ်ကြောင့် ထိုင်း၊ မလေးရှား၊ India စတဲ့နိုင်ငံတွေမှာ ရှိနေကြတဲ့ မြန်မာနိုင်ငံက ဒုက္ခသည်တွေ အမေရိကန်ကို လာနိုင်ဖို့ မျှော်လင့်ချက် အတော်နည်းသွားတယ်လို့ ဒေါက်တာ Ro Dinga ကသုံးသပ်ပါတယ်။

“ ၂ ပိုင်းဖြစ်သွားမယ်၊ ပထမကတော့ ဒီအမိန့်ထုတ်ပြီးတာနဲ့ ၄ လအတွင်းကတော့ ဘယ်သူမှ ၀င်လို့မရဘူး၊ အဲဒါကတော့ သေချာတယ်။ ၄ လဆိုတာက Minimum ၁၂၀ ရက်ဆိုတော့ ၄ လထက် နည်းနည်းပိုရင်လည်း ပိုမယ်ပေါ့နော်၊ အဲဒီကာလမှာ သူတို့ စီစစ်မယ်၊ စီစစ်ပြီးရင် ၅ သောင်းကိုပဲ လက်ခံမယ်ဆိုတော့ အဲဒီ ၅ သောင်း လက်ခံတဲ့အထဲမှာ အမေရိကန်လုံခြုံရေးကို မထိပါးမယ့်လူတို့ ၊ အမေရိကန်အတွက် အကျိုးဖြစ်ထွန်းမယ့်လူကိုပဲ လက်ခံမယ်ဆိုပြီး စကားလုံး သုံးနှုန်းထားတာဆိုတော့၊ အရင်က သမ္မတ အိုဘားမား လက်ခံခဲ့တဲ့ ၁ သောင်း ၄ ထောင်ထက် တော်တော်ကြီးနည်းမယ်ဆိုတာကတော့ ကျနော်တို့ပြောလို့ရပါတယ်။

မေး။ ။ အဲဒီတော့ အမေရိကန်မှာ အခြေချဖို့စောင့်နေကြတဲ့ ဒုက္ခသည်တွေအနေနဲ့ သူတို့ရဲ့ အမေရိကန်နိုင်ငံထဲကို လာနိုင်ဖို့ မျှော်လင့်ထားတဲ့ မျှော်လင့်ချက်တော်တော်လေးနည်းသွားမယ်ဆိုတဲ့ သဘောပါလား။

ဖြေ။ ။ ဟုတ်တယ် တော်တော်လေးနည်းသွားမယ် ဒီစာရင်းတွေအရပေါ့နော်၊

မေး။ ။ သမ္မတ Trump လက်ခံမယ်ဆိုပြီးပြောထားတဲ့ ဒီ ဒုက္ခသည် ၅ သောင်းထဲမှာ မြန်မာနိုင်ငံက ဒုက္ခသည်အများဆုံး ပါနိုင်သမျှပါအောင်ပေါ့နော်၊ ဒေါက်တာ Ro Dinga တို့အနေနဲ့ ဘယ်လိုများ ကြိုးစားသွားဖို့ စဉ်းစားထားပါသလဲရှင့်။

ဖြေ။ ။ ကျနော်တို့အရင်ရှိပြီးသား State Department တို့၊ State Department အောက်မှ ဒီ Refugee နဲ့ ပတ်သက်တဲ့ USRAP (US Refugee Admission Program) အဲဒီက အရာရှိတွေ၊ တာဝန်ခံတွေနဲ့ ဆက်သွယ်ပြီးတော့ ကျနော်တို့ အတတ်နိုင်ဆုံး မြန်မာပြည်သားတွေ အမေရိကန်ပြည်ထောင်စုကို ခိုလှုံခွင့်ရဖို့ ကျနော်တို့ဆက်လုပ်ဖို့ အစီအစဉ်ရှိပါတယ်။”

အမေရိကန်ကလက်ခံမယ့် ဒုက္ခသည်တွေထဲမှာ လူနည်းစု ခရစ်ယာန်ဘာသာဝင်တွေ အထူးသဖြင့် ဆီးရီးယားက လူနည်းစုခရစ်ယာန်ဘာသာဝင်တွေကို ဦးစားပေးမယ်လို့ သမ္မတ Trump ကရုပ်သံဌာနတချို့နဲ့ မေးမြန်းခန်းမှာ ပြောခဲ့ပါတယ်။ ဒီလိုပြောခဲ့တာက အရှေ့အလယ်ပိုင်းမှာ ဖိနှိပ်ခံနေရတဲ့ ခရစ်ယာန်ဘာသာဝင်တွေကိုပဲပြောတာလား အာရှက လူနည်းစုခရစ်ယာန်ဘာသာဝင်တွေရော ပါသလားဆိုတာကို စောင့်ကြည့်ရဦးမှာဖြစ်တယ်လို့ ဒုက္ခသည်တွေ အမေရိကန်မှာ လာရောက်အခြေချနိုင်ရေး ကူညီဆောင်ရွက်ပေးနေတဲ့ ဒေါက်တာ Ro Dinga က ပြောပါတယ်။

စုမြတ်မွန်  / ဗွီအိုအေ (မြန်မာပိုင်း)
http://burmese.voanews.com

ချီလီ နိုင်ငံ တွင် တစ်နိုင်ငံလုံး အနှံ့ တောမီး လောင်ကျွမ်းမှုကြောင့် သေဆုံး သူ ၁၁ ဦးအထိ ရှိလာ

ချီလီ နိုင်ငံတွင် တောမီး လောင်ကျွမ်းနေသည် ကို မြင်တွေ့ရစဉ်(ဆင်ဟွာ)
  ဆန်ဒီရာကို ၊ ဇန်နဝါရီ ၃၁ ရက် (ဆင်ဟွာ)

    ချီလီ နိုင်ငံ တွင် တစ်နိုင်ငံလုံး အနှံ့ တောမီး လောင်ကျွမ်းမှု သည် လက်ရှိချိန်တွင် သေဆုံးသူ ၁၁ ဦးရှိကာ တောမီးလောင်ကျွမ်းမှု ဧရိယာ သည် ၃၆၆,၅၀၀ ဟက်တာ (Hectare) ရှိကြောင်း ချီလီ နိုင်ငံ သမ္မတ Michelle Bachelet က ဇန်နဝါရီ ၃၀ ရက်နေ့က ပြောကြား ခဲ့သည်။

Bachelet က ပြည်သူလူထု အားလုံးကို မစိုးရိမ်ကြရန် နှင့် ဘေးဒုက္ခခံရသူများ ပြန်လည် ထူထောင်ရေး လုပ်ငန်း များကို ကူညီသွားမည် ဖြစ်ကြောင်း ပြောကြား ခဲ့သည်။

ဇန်နဝါရီ ၃၀ ရက်နေ့ နေ့လယ်ပိုင်း အထိ ချီလီ တစ်နိုင်ငံလုံးတွင် မီးလောင်ကျွမ်းသည့် နေရာ ၅၅ နေရာကို ထိန်းချုပ်နိုင်ခဲ့ပြီး ၁၁ နေရာကို မီးငြိမ်းသတ် နိုင်ခဲ့သည်။ မီးလောင်ကျွမ်းနေဆဲဖြစ်သည့် ၅၈ နေရာကို ထိန်းချုပ်နိုင်ရန် ဆောင်ရွက်နေဆဲ ဖြစ်ကြောင်း သိရှိရသည်။


လက်ရှိချိန်တွင် လေယာဉ် နှင့် ရဟတ်ယာဉ်ပေါင်း ၃၉ စင်း သည် ဘေးဒုက္ခ ကျရောက်နေသည့် နေရာများ၏ ကောင်းကင်ယံ တွင် လုပ်ငန်းဆောင်ရွက်မှု များ အဆက်မပြတ်ဆောင်ရွက်နေပြီး မြေပြင်တွင်လည်း မီးသတ် အင်အား ၇၀၀၀ နီးပါးမှာ လုပ်ငန်းဆောင်ရွက်မှု များပြုလုပ်နေသည်။မီးငြိမ်းသတ်ရန် ဆောင်ရွက်နေသည့် အဖွဲ့များတွင် မီးသတ်တပ်ဖွဲ့အပြင်  စစ်တပ် ၊ မြို့နယ် နှင့် ခရိုင် အစိုးရ ဝန်ထမ်း များနှင့် ပုဂ္ဂလိက လုပ်ငန်း မှလူများလဲ ပါဝင်ဆောင်ရွက် နေကြောင်း သိရသည်။

ချီလီ အစိုးရ သည် တောမီးဘေး အဆိုးရွားဆုံး ခံခဲ့ရသည့် Maule နှင့် Bío Bío ဒေသ များတွင် ကယ်ဆယ်ရေး စခန်း ၄၂ ခုဆောင်ရွက်ခဲ့သည်။ ထို့ပြင် ပြန်လည်ထူထောင်ရေးလုပ်ငန်းတွင် ချီလီ အစိုးရ က စာသင်ကျောင်း စသည့် အခြေခံအဆောက်အအုံ များအတွက် လိုအပ်သည့် ငွေကြေးများကို ထောက်ပံ့သွားမည် ဖြစ်ကြောင်း သိရသည်။

Bachelet က " ဘေးဒုက္ခခံခဲ့ရသည့် ဒေသ က ကလေးငယ်တွေ ၃ လအတွင်း ပုံမှန် ကျောင်းပြန်တက်နိုင်မယ် ဆိုဒါကို ကျွန်ုပ် တို့အာမခံမှုပေးရမယ် " ဟုပြောကြား ခဲ့သည်။

ချီလီ သမ္မတ က လက်ရှိချိန်တွင် နိုင်ငံတော်သည် အရေးပေါ် အခြေအနေ သို့ရောက်ရှိနေသည် ဟု ကြေညာ ခဲ့ပြီး အချို့ ဒေသတွေကို ဘေးဒုက္ခ အခြေအနေ သို့ရောက်ရှိနေသည့် ဒေသဟုကြေညာခဲ့သည်။ထို့ပြင် ယခု အဖြစ်အပျက် သည် ချီလီ သမိုင်းကြောင်း တစ်လျှောက် အဆိုးရွားဆုံးသော မီးဘေးဒုက္ခ ဟုလည်း ပြောကြား ခဲ့သည်။

(Xinhua)
http://xinhuamyanmar.com

ယခုနှစ် ကာကွယ်ရေး အသုံးစရိတ်ကို ယမန်နှစ်ထက် လျှော့ချ တောင်းခံထားသည်ဟု ဆို

ကာကွယ်ရေး ၀န်ကြီးဌာန ဒုတိယ ၀န်ကြီး ဗိုလ်ချုပ် မြင့်နိုင် လွှတ်တော်သို့  ရှင်းပြနေစဉ်။
    နေပြည်တော်၊ ဇန်န၀ါရီ ၃၁ ရက် (ဆင်ဟွာ)

    ၂၀၁၇ -၂၀၁၈ ဘဏ္ဍာနှစ်အတွက် ကာကွယ်ရေးဝန်ကြီးဌာန၏ အရ အသုံး ခန့် မှန်းခြေ ငွေစာရင်း ကို ယမန်နှစ်ကထက် လျှော့ချ တောင်းခံထားသည်ဟု ကာကွယ်ရေး ၀န်ကြီးဌာန ဒုတိယ ၀န်ကြီး ဗိုလ်ချုပ် မြင့်နိုင်က ယနေ့ ကျင်းပသည့် ပြည်ထောင်စုလွှတ်တော် အစည်း အဝေးတွင် ပြောကြားခဲ့သည်။

“ကာကွယ်ရေး ၀န်ကြီးဌာနရဲ့ ၂၀၁၇ - ၁၈ ဘဏ္ဍာနှစ်၏ ရ သုံး မှန်းခြေ ငွေစာရင်းမှာ --- ရငွေ စုစုပေါင်း ကျပ် ၇၃ ဒသမ ၁၁၁ ဘီလျံ၊ သုံးငွေ တွေက သာမန်အသုံးစရိတ်  ၁၆၅၄ ဒသမ ၃၃ ဘီလျံနှင့် ငွေလုံးငွေရင်း အသုံးစရိတ် ၁၂၅၀ ဒသမ ၈၆၆ ဘီလျံ  --- စုစုပေါင်း ၂၉၀၅ ဒသမ ၁၉၅ ဘီလျံ လျာထားပါတယ်၊ ဘဏ္ဍာရေးနှစ် သုံးနှစ်အတွက် နှိုင်းယှဉ်ချက်များအရ -- ၂၀၁၇ - ၁၈ ဘဏ္ဍာငွေ တောင်းခံမှုဟာ ယခင် နှစ်နှစ်ထက် လျော့နည်းတာတွေ့ ရမှာ ဖြစ်ပါတယ်” ဟု ယနေ့ ကျင်းပ သည့် ဒုတိအကြိမ် ပြည်ထောင်စု လွှတ်တော် စတုတ္ထ ပုံမှန် အစည်းအဝေး ၏ ၂၀၁၇ - ၁၈ ဘဏ္ဍာငွေ အရ အသုံး ခန့် မှန်းခြေ ငွေစာရင်းများအပေါ် ပြည်ထောင်စု အဆင့်  ဌာန အဖွဲ့ အစည်း အသီးသီးက လွှတ်တော်သို့ တင်ပြကြရာတွင် ၎င်းက ကာကွယ် ရေး ၀န်ကြီးဌာန ကိုယ်စား ရှင်းလင်း တင်ပြခဲ့ခြင်း ဖြစ်သည်။

 “တပ်မတော် ကြည်းရေလေ တပ်ဖွဲ့ များကို Standard Army, Standard Navy, Standard Air Force ဖြစ်လာ စေရန်အတွက် အင်အား တောင့်တင်းပြီး စွမ်းရည် ထက်မြက်သည့် ခေတ်မီ မျိုးချစ် တပ်မတော် တည်ဆောက်ရန် စသည့် ရည်မှန်းချက်များကို အခြေခံ၍ နှစ်ရှည် စီမံကိန်း များကို ရေးဆွဲထားပါတယ်၊ ဘတ်ဂျက် ရေးဆွဲရာမှာ လုံခြုံရေး အခြေအနေ၊ ဘဏ္ဍာရေး အခြေ အနေ တို့ ကို ချင့်ချိန်၍ ခန့် အပ်မည့် လူ၊ လိုအပ်သော လက်နက်ပစ္စည်း၊ ဆက်စပ် အဆောက် အအုံများ၊ ဆက်စပ်လုပ်ငန်းများကို နှစ်အလိုက် ထည့်သွင်း၍ ရေးဆွဲရပါတယ်” ဟုလည်း ကာကွယ်ရေး ဒုတိယ ၀န်ကြီး ဗိုလ်ချုပ် မြင့်နိုင်က ရှင်းပြခဲ့သည်။

(Xinhua)
http://xinhuamyanmar.com

မြစ်ဆုံစီမံကိန်းအပါအဝင် ဆည်စီမံကိန်း ၇ခုကို ရပ်ဆိုင်းဖို့ မြစ်ကြီးနားမှာ ဆန္ဒပြတောင်းဆို

( ဧရာဝတီမြစ်ဆုံ၊ မြစ်ညှာ၊ မြစ်ဝှမ်း ရေအားလျှပ်စစ်စီမံကိန်းများ လုံးဝရပ်ဆိုင်းရေး မြစ်ကြီးနားမြို့ စီတာပူရပ်ကွက်က Palm Spring Hotel ရှေ့မှာ ၂၀၁၇ ခုနှစ် ဇန်နဝါရီ ၃၁ ရက်နေ့က တန်ဖရဲ-မြစ်ဆုံ ဒေသခံတွေ စုပေါင်းဆန္ဒပြကြစဉ်။ )Photo: Kyaw Myo Min/RFA
ဧရာဝတီမြစ်ဆုံ မြစ်ညှာ မြစ်ဝှမ်း ရေအားလျှပ်စစ်စီမံကိန်း အားလုံးကို ရပ်ဆိုင်းပြီး မူလနေရပ်မှာ အမြန်ဆုံးပြန်လည်နေထိုင်လိုကြောင်း တန်ဖရဲ၊ မလိယန် စတဲ့ မြစ်ဆုံဒေသခံ ၂၀ ကျော်က မြစ်ကြီးနားမြို့ Palm Spring Hotel ရှေ့မှာ ဒီကနေ့ ဆန္ဒပြတောင်းဆိုကြပါတယ်။

မြစ်ဆုံရေကာတာ စီမံကိန်းကို တိုက်တွန်းတဲ့ အစည်းအဝေးလုပ်နေတာကြားလို့ ဆန္ဒပြတာဖြစ်ကြောင်း ဧရာဝတီမြစ်ဆုံ စီမံကိန်းကြောင့် အောင်မြင်သာကျေးရွာမှာ ပြောင်းရွှေ့ခံထားရတဲ့ တန်ဖရဲရွာသူ ဒေါ်ဂျာခေါန် က ပြောပါတယ်။

နိုင်ငံတကာငွေကြေးကော်ပိုရေးရှင်း IFC က ဦးဆောင်ပြီး ဧရာဝတီမြစ်ဝှမ်းဒေသ ဘက်ပေါင်းစုံမှာ ပါဝင်ပတ်သက်နေသူတွေရဲ့ အခြေခံတိုင်းတာချက်တွေအပေါ်မှာ ဆန်းစစ်ခြင်းဆိုင်ရာ အလုပ်ရုံဆွေးနွေးပွဲကို Palm Spring Hotel မှာ ဒီနေ့ ကျင်းပနေတာဖြစ်ပါတယ်။

အဲဒီအလုပ်ရုံဆွေးနွေးပွဲဟာ မြန်မာနိုင်ငံမှာရှိတဲ့ ရေအားလျှပ်စစ်ကဏ္ဍရဲ့ မဟာဗျူဟာမြောက် သဘာဝပတ်ဝန်းကျင်ဆိုင်ရာ ဆန်းစစ်ချက် SEA ကို ဖွံ့ဖြိုးစေဖို့အတွက် ဆိုတဲ့ ခေါင်းစဉ်နဲ့ ဆွေးနွေးကြတာလို့ သိရပါတယ်။

ဆန္ဒပြသူတွေက ဧရာဝတီမြစ် ထာဝစဉ်လွတ်လပ်စွာစီးဆင်းရေး၊ ဒေသခံများမူလနေရာ လွတ်လပ်စွာနေထိုင်ခွင့်ရရှိရေး၊ ဧရာဝတီမြစ်ဆုံ၊ မြစ်ညှာ၊ မြစ်ဝှမ်း ရေအားလျှပ်စစ်စီမံကိန်း လုံးဝရပ်ဆိုင်းရေး စတဲ့ ကြွေးကြော်သံတွေနဲ့ တောင်းဆိုခဲ့ကြတာပါ။

မြစ်ဆုံစီမံကိန်းကို ဘယ်လိုအခြေအနေမျိုးမှာပဲဖြစ်ဖြစ် ဆက်လုပ်ဖို့ မစဉ်းစားသင့်ကြောင်း အဲဒီအလုပ်ရုံဆွေးနွေးပွဲကို တက်ရောက်ခဲ့တဲ့ အစိမ်းရောင်အလင်းတန်းများအဖွဲ့က ဦးဘရန်အောင် က ပြောပါတယ်။

မေခ နဲ့ မလိခပေါင်းဆုံတဲ့ ဧရာဝတီမြစ်ဆုံမှာ တည်ဆောက်မယ့် ရေကာတာကြီးတစ်ခု နဲ့ မေခ၊ မလိခ မြစ်လက်တက်တွေက ဆည်တွေအပါအဝင် စုစုပေါင်း စီမံကိန်းခုနှစ်ခုလုံးကို လုံးဝ ဖျက်သိမ်းပေးဖို့ တောင်းဆိုနေတာဖြစ်ပါတယ်။

RFA Burmese
https://www.facebook.com/rfaburmese

ဦးကိုနီ နဲ့ ဦးနေဝင်း သေဆုံးမှု မဘသ ဝမ်းနည်းကြောင်း ကြေညာချက်ထုတ်


ဇန်န၀ါရီလ ၂၉ရက်နေ့က လုပ်ကြံသတ်ဖြတ်ခံလိုက်ရပြီး သေဆုံးခဲ့တဲ့ အမျိုးသားဒီမိုကရေစီအဖွဲ့ချုပ်ပါတီ ဥပဒေအကြံပေး ဦးကိုနီနဲ့ အငှားယာဉ်မောင်း ဦးနေဝင်း တို့အတွက် ဝမ်းနည်းကြောင်းနဲ့ အကြမ်းဖက်မှုတွေကို ကန့်ကွက်ရှုတ်ချကြောင်း အမျိုး၊ ဘာသာ၊ သာသနာစောင့်ရှောက်ရေးအဖွဲ့ (ဗဟို) က ဒီနေ့ ကြေညာချက်ထုတ်လိုက်ပါတယ်။

လူသားတိုင်းဟာ မိမိအသက်ကို တန်ဖိုးထား မြတ်နိုးကြသူတွေသာဖြစ်တဲ့အတွက် လူသားတိုင်းရဲ့ အသက်ကို တန်ဖိုးထားလေးစားရမှာဖြစ်တယ်လို့ မဘသအဖွဲ့ (ဗဟို)က ဆရာတော် ဒေါက်တာ ဦးတေဇနိယ က မိန့်ပါတယ်။

"လူသားတိုင်း လူသားတိုင်းဟာ အသက်ကို တန်ဖိုးထားကြတယ်။အဲဒါကြောင့် လူသားတွေအားလုံးအနေနဲ့ ဗြဟ္မစိုရ်တရား လက်ကိုင်ထားပြီးတော့ သူတပါးကို နှိပ်စက်တာတွေ၊ ညဉ်းပန်းတာတွေ၊ အကြမ်းဖက်တာတွေ မလုပ်ပါနဲ့။ အကြမ်းဖက်တာတွေလုပ်တဲ့ ပုဂ္ဂိုလ်တွေကိုလည်း ပြင်းပြင်းထန်ထန်ရှုတ်ချတယ်။ အကြမ်းဖက်ခံရတဲ့ မိသားစုတွေဘက်ကလည်း သူတို့တွေနဲ့ထပ်တူ ဦးဇင်းတို့တတွေ ဝမ်းနည်းတယ်ပေါ့နော်။ အဲဒါပဲ။ "


အကြမ်းဖက်သမားတွေရဲ့ လုပ်ရပ်တွေဟာ လက်ရှိအစိုးရ လျှောက်လှမ်းနေတဲ့ ဒီမိုကရေစီလမ်းကြောင်းအတွက် ခလုတ်ဆူးငြှောင့်တွေဖြစ်တဲ့အတွက် တိုင်းပြည်တည်ငြိမ်အေးချမ်းရေးကို ပျက်ပြားအောင် ရည်ရွယ်ချက်ရှိရှိ လုပ်ဆောင်နေတယ်လို့ မှတ်ယူကြောင်းနဲ့ ဗုဒ္ဓ၀ါဒနဲ့ ဆန့်ကျင်ဘက်ဖြစ်တဲ့ ဘယ်အကြမ်းဖက်လုပ်ရပ်မျိုးမဆို ကန့်ကွက်ရှုတ်ချတယ်လို့ ကြေညာချက်မှာ ပါရှိပါတယ်။

NLD ဥပဒေအကြံပေး ဦးကိုနီနဲ့ တက္ကစီယာဉ်မောင်း ဦးနေ၀င်း၊ ကချင်ပြည်နယ် ဖားကန့်ဒေသမှာ ကျောင်းဆရာ ဦးအောင်ဇင်ထွန်း၊ မလေးရှားနိုင်ငံမှာ မြန်မာနိုင်ငံသား ၅ ယောက်၊ ရခိုင်ပြည်နယ် ကျီးကန်းပြင် အမှတ် ၁ ၊ ငါးခူရရဲစခန်းနဲ့ ကိုးတန်ကောက်ရဲစခန်းက ရဲအရာရှိအပါအ၀င် ရဲသား ၉ ယောက်၊ မင်္ဂလာဒုံမြို့နယ်မှာ ဦးစိုးနောင်အပါအ၀င် မိသားစု ၄ ယောက်တို့ဟာ အကြမ်းဖက်သမားတွေရဲ့ လူမဆန်စွာ သတ်ဖြတ်တာကို ခံခဲ့ရတာဖြစ်တယ်လို့လည်း ပါရှိပါတယ်။

RFA Burmese
https://www.facebook.com/rfaburmese

ကျောက်ဖြူမြို့ မူလွန်ကျောင်းတစ်ခုအတွင်း မူးယစ်ဆေးသုံးစွဲနေသူ ကျောင်းသားတစ်ဦးဖမ်းမိ


နိရဉ္စရာ၊ ဇန်န၀ါရီ ၃၁

ကျောက်ဖြူမြို့၊ စေတီတောင်ရပ်ကွက် အမက မူလွန်ကျောင်းအတွင်းဝင်ရောက်ပြီး မူးယစ်ဆေးဝါးသုံးစွဲနေသူ ကျောင်းသားလူငယ်တစ်ဦးကို ဇန်န၀ါရီလ ၂၇ ရက် ညနေ ၆ နာရီခန့်က ဖမ်းဆီးရမိကြောင်းသတင်းရရှိသည်။

ဖမ်းဆီးခံရသောလူငယ်မှာ စေတီတောင်ရပ်ကွက်၊ ဘုရားကြီးလမ်းတွင်နေထိုင်သူ အထက(၂)ကျောက်ဖြူမှ န၀မတန်းတွင် တက်ရောက် ပညာသင်ကြားနေသော အသက်(၁၇)နှစ် အရွယ် ကျောင်းသား တစ်ဦးဖြစ်ကြောင်းသိရသည်။

တတိယတန်း စာသင်ခန်းအတွင်း ခုံတန်းလျားပေါ်၌ WY စာတန်းပါ ပန်းရောင်စိတ်ကြွရူးသွပ်ဆေးပြား(၁)ပြားအား ခဲပြားစက္ကူပေါ်တွင်တင်လျက် ဂတ်စ်မီးခြစ်အပြာနှင့် မီးအပူပေးကာထွက်လာသောမီးခိုးငွေ့အား ပလပ်စတစ်(အအေးစုတ်)ပိုက်ငယ်ဖြင့် နှခေါင်းမှရှူလျက် ဖမ်းဆီးရမိကြောင်း ကျောက်ဖြူမြို့မရဲစခန်းမှပြောသည်။

သတင်းအရ ရဲအုပ်ရဲထွန်း ဦးစီးပြီး မူးယစ်အထူးတပ်ဖွဲ့စုမှ(၄၈)မှ ရဲတပ်ကြပ်ကြီး ကျော်ဝင်း၊ စေတီတောင်ရပ်ကွက် အုပ်ချုပ်ရေးမှူး ဦးသန်းလှိုင်၊ စေတီတောင်ရပ်ကွက် အမက မူလွန်ကျောင်းအုပ်ဆရာကြီး ဦးမောင်ထွေး တို့မှ ၀င်ရောက်ဖမ်းဆီးခဲ့ခြင်းဖြစ်သည်။

၎င်းအမှုအား ဥပဒေအရ ရဲအုပ်ရဲထွန်းမှ တရားလိုလုပ်တိုင်တန်း၍ မမစ(ကဖ)မယ(ပ)၁/၁၇၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ - ၁၅/၁၆(ဂ)အရ အမှုဖွင့်အရေးယူထားပြီး ဒုရဲအုပ် အောင်မင်းသန်းမှ စစ်ဆေး၍ အမှုကွင်းဆက်တရားခံအား စစ်ဆေးလျက်ရှိကြောင်းသိရသည်။

ကျော်ဝင်း၊ ကျောက်ဖြူ
Narinjara
https://www.facebook.com/Narinjara

ယိုးတရုတ်တိုက်နယ်ဆေးရုံလူနာတင်ကား လမ်းဘေးလျှော်ကျပြီး လူ ၃ ဦးဒဏ်ရာရ


ဇန်နဝါရီ ၃၁ / DMG

ယနေ့(ဇန်နဝါရီလ ၃၁ ရက်နေ့)၊ နေ့လည်ပိုင်းက ပုဏ္ဏားကျွန်းမြို့နယ်၊ ယိုးတရုတ်တိုက်နယ်ဆေးရုံ လူနာတင်ကားသည် ယိုးတရုတ်မှ ပုဏ္ဏားကျွန်းမြို့သို့သွားရာ၌ ကြံခင်းကျေးရွာအနီးတွင် လမ်းဘေးလျှော်ကျပြီး ကားတွင် ပါလာသည့် လူ ၃ ဦး ထိခိုက်ဒဏ်ရာ ရရှိသွားကြောင်း သိရသည်။

“ ယိုးတရုတ်တိုက်နယ်ဆေးရုံနဲ့ ပတ်သတ်ပြီး အမှုတစ်ခုရှိနေပါတယ်။ ဒါကြောင့် ဆေးရုံကော်မတီတွေဟာ လူနာတင်ကားနဲ့ ပုဏ္ဏားကျွန်းကို သွားပါတယ်။ ကြံခင်းရွာအနီးမှာ ကားလမ်းဘေးလျှော်ကျသွားပါတယ်။ လူ ၃ ဦး ထိခိုက်ဒဏ်ရရှိသွားပါတယ်။ ဦးဘထွန်းဆိုတဲ့ သူကတော့ သိပ်စိုးရိမ်ရတဲ့အတွက် စစ်တွေဆေးရုံကို ပို့ဖို့စီစဉ်နေပါတယ် ” ဟု နေ့လည် ၁၂ နာရီအချိန်က ယိုးတရုတ်အ.ထ.က မှ ကျောင်းဆရာ ဦးမောင်ထွန်းက ပြောသည်။

ဒဏ်ရာရရှိခဲ့သူ ၃ ဦးအနက် ဦးဘထွန်းဆိုသူမှာ ထိခိုက်ဒဏ်ရာပြင်းထန်စွာ ရရှိခဲ့သဖြင့် စစ်တွေဆေးရုံးသို့ ပို့ဆောင်ရန် စီစဉ်နေကြောင်း သိရသည်။

ဓာတ်ပုံ - ဝင်းသိန်း
Development Media Group
https://www.facebook.com/dmgnewsagency

ထရမ့်ရဲ့ မူဝါဒကို ဝေဖန်တဲ့ ရှေ့နေချုပ် အထုတ်ခံရ


အမေရိကန် သမ္မတ ဒေါ်နယ်ထရမ့် ထုတ်ပြန်ခဲ့တဲ့ လူဝင်မှုကြီးကြပ်ရေး ကန့်သတ်မှု မူဝါဒရဲ့ တရားဝင်မှုကို မေးခွန်းထုတ်ခဲ့တဲ့ ယာယီ ရှေ့နေချုပ် ဆယ်လီရက်စ် တယောက် အလုပ်ကနေ အထုတ်ခံလိုက်ရပါတယ်။

ဆယ်လီရက်စ်ဟာ ဒီရာထူးကို အရင် သမ္မတ အိုဘားမား လက်ထက်က ရရှိခဲ့တာပါ။

သမ္မတသစ် ထရမ့်ရဲ့ သမ္မတ အခွင့်အာဏာနဲ့ အသစ်ထုတ်ပြန်ထားတဲ့ မူဝါဒတွေကို ကျင့်သုံးခြင်းမရှိဖို့ တရားရေးဌာနက ရှေ့နေတွေကို ဆယ်လီရက်စ်က အစောပိုင်းမှာ ညွန်းကြားခဲ့ပါတယ်။

ဆယ်လီရက်စ် က သူမ ရှေ့နေချုပ် ရာထူး တာဝန် ထမ်းဆောင်နေသရွေ့ ဒီ မူဝါဒသစ်ကို မကျင့်သုံးစေရဘူးလို့ ထုတ်ပြန်ချက် ထုတ်ပြီးနောက် နာရီပိုင်း အတွင်းမှာပါ ထရမ့်က သူမ ကို ရာထူးက ထုတ်ပယ်လိုက်တာပါ။

အိမ်ဖြူတော် သမ္မတရုံးက ထုတ်ပြန်ချက်မှာ ဆယ်လီရက်စ်ဟာ သူ့ဌာနအပေါ်မှာ သစ္စာဖောက်ခဲ့တယ်လို့ အကြောင်းပြထားပါတယ်။

ပြည်ထောင်စုရဲ့ ယာယီ ရှေ့နေချုပ်အဖြစ် ဗာဂျီးနီးယား ပြည်နယ် အရှေ့ပိုင်းခရိုင် ရှေ့နေ ဒေနာဗွန်တီ ကို ထရမ့်က ခန့်လိုက်ပါတယ်။

သမ္မတ ထရမ့်ရဲ့ လူဝင်မှုဆိုင်ရာ မူဝါဒ အသစ်တွေကို အကောင်အထည် ဖော်ဖို့ ဒေနာဗွန်တီက သူ့ဌာနကို ညွှန်ကြားထားပြီး ဖြစ်တယ်လို့ သိရပါတယ်။

ထရမ့်ရဲ့ မူဝဒါအသစ်မှာ မွတ်ဆလင် အများစုရှိ နိုင်ငံခုနှစ်နိုင်ငံက နိုင်ငံသားတွေရဲ့ အမေရိကန်ပြည်ဝင်ခွင့်ကို ယာယီ ပိတ်ပင်ထားပါတယ်။

ဒီကန့်သတ်မှုကို တန်ပြန် ဆန့်ကျင်တဲ့ ဆန္ဒပြပွဲတွေလည်း အမေရိကန်ပြည်ထောင်စု တဝှမ်းနဲ့ နိုင်ငံရပ်ခြားက လမ်းမတွေပေါ် ဖြစ်ပေါ်နေပါတယ်။

BBC Burmese
https://www.facebook.com/bbcburmese/

ဒေါ်နယ်ထရမ့်၏ လူဝင်မှုကြီးကြပ်ရေးအမိန့် ကို ထောက်ခံမှုမပြုသည့် ရှေ့ နေချုပ် ရာထူးမှ ဖယ်ရှားခံရ

အမေရိကန်နိုင်ငံ ရှေ့ နေချုပ် Sally Yates အားတွေ့ ရစဉ်(ဓာတ်ပုံ-အင်တာနက်)
    ဝါရှင်တန်၊ဇန်နဝါရီ ၃၁ ရက် (ဆင်ဟွာ)

    အမေရိကန်နိုင်ငံသမ္မတဒေါ်နယ်ထရမ့်က နိုင်ငံ၏ ရှေ့ နေချုပ် Sally Yates အား ဇန်နဝါရီလ ၃ဝ ရက် ညပိုင်းက ရာထူးတာဝန်မှ ဖယ်ရှားလိုက်ကြောင်း သိရသည်။

အမေရိကန်နိုင်ငံတစ်ဝန်းဆန္ဒပြမှုများ နှင့် ကမ္ဘာကပါ ဝေဖန်မှုများ ဖြစ်စေခဲ့သော ထရမ့်၏ လူဝင်မှုကြီးကြပ်ရေး နှင့် ဒုက္ခသည်လက်ခံမှုတားဆီးရေးအမိန့် များ အပေါ် ထောက်ခံကာကွယ်မှုမပြုရန် Sally Yatesက တရားရေးဌာနသို့ အမိန့် ထုတ်ခဲ့ပြီး နာရီပိုင်းအတွင်း  ယခုကဲ့သို့  ရှေ့ နေချုပ် တာဝန်မှ ရပ်စဲခံလိုက်ရခြင်းဖြစ်သည်။

(Xinhua)
http://xinhuamyanmar.com

တက္ကစီဆရာ ဦးနေ၀င်း၏ ဈာပနကို ပြည်သူအများအပြား လိုက်လံပို့ဆောင်


ရန်ကုန်တိုင်းဒေသကြီး အစိုးရ အစီအစဉ်ဖြင့် ယနေ့ ဇန်န၀ါရီ ၃၁ ရက် နံနက် ၁၁း၃၀ နာရီက ရေဝေးသုဿန်တွင် ပြုလုပ်သော အငှားယာဉ်မောင်း ဦးနေ၀င်း၏ ဈာပနကို လူအများအပြားလိုက်လံပို့ဆောင်ကြကြောင်း သတင်းရရှိသည်။


အငှားယာဉ်မောင်း ဦးနေ၀င်းသည် ရန်ကုန်အပြည်ပြည်ဆိုင်ရာလေဆိပ်၌ ဇန်နဝါရီ ၂၉ ရက်နေ့က မသမာသူတဦးက တရားလွှတ်တော်ရှေ့နေ ဦးကိုနီအား ပစ်သတ်လုပ်ကြံရာတွင် ကျုးလွန်သူကို ကူညီဖမ်းဆီးရင်း အသက်ဆုံးရှုံးခဲ့ရခြင်းဖြစ်သည်။

ထို့ပြင် ဦးနေ၀င်း၏ဈာပနကို ရန်ကုန်လေဆိပ်အသင်းဝင် Taxi အစီးရေအများအပြားလည်း လိုက်လံပို့ဆောင်ကြကြောင်း သိရသည်။


အသက်(၄၈)နှစ်အရွယ် ဦးနေ၀င်းသည် မင်္ဂလာဒုံမြို့နယ် ကြံခင်းစုရပ်ကွက်၊ မြတောင်ညို(၁) လမ်းမှာ နေထိုင်သူဖြစ်ပြီး ကွယ်လွန်ချိန်တွင် ဇနီးအပါအ၀င် အသက်(၇)နှစ်၊ (၄)နှစ်နှင့် (၄၅)ရက်သားအရွယ် သား(၃)ဦး ကျန်ရစ်ခဲ့သည်။

ကိုခက်
News Watch
https://www.facebook.com/NewsWatchJournal/

ဦးကိုနီကို ပစ်ခတ်လုပ်ကြံသူ ထောင်ထွက်ရာဇဝတ်သားဟု ထုတ်ပြန်


တရားလွှတ်တော်ရှေ့နေ ဦးကိုနီ ကိုသေနတ်နဲ့ ပစ်ခဲ့သူဟာ စစ်ကိုင်းတိုင်း ယင်းမာပင်မြို့နယ် စိုင်လျား ကျေးရွာမှာ နေထိုင် သူတဦးဖြစ်တယ်ဆိုတာကို စစ်ကိုင်းတိုင်းအစိုးရက အတည်ပြုလိုက်ပါတယ်။ တရားခံမိသားစုဝင်တွေဟာ အဲဒီရွာမှာနေထိုင်နေ ပြီး တရားခံဟာ လွန်ခဲ့တဲ့ ၆လလောက်ကစပြီးအဲရွာကထွက်သွားလို့ မိသားစုတွေအနေနဲ့က သူဘယ်မှာလဲဆိုတာမသိဘူးလို့ ထွက်ဆိုထားပါတယ်။တရားခံဟာ ဘုရားခိုးမှုနဲ့ နှစ်ရှည်ထောင်ကျခဲ့သူ ဖြစ်ပါတယ်။ တရားခံဆီကနေတွေ့ရှိခဲ့တဲ့ မှတ်ပုံတင်အရ မန္တလေးလိပ်စာဖော်ပြထားပေမယ့် မန္တလေးမှာ နေထိုင်သူမဟုတ် သလို မန္တလေးသားလည်းမဟုတ်ကြောင်း၊ မန္တလေးတိုင်းရဲမှုးက အတည်ပြုပေးထားပါတယ်။ နောက်ဆုံးရသတင်းကို ဗွီအိုအေ မြန်မာပိုင်းက မေခကဆက်သွယ်မေးမြန်းထားပါတယ်။

အာဏာရ NLD အမျိုးသားဒီမိုကရေစီအဖွဲ့ချုပ်ရဲ့ ဥပဒေအကြံပေးလည်းဖြစ်၊ ရှေ့နေ့ကွန်ယက်ရဲ့ ဦးဆောင်သူတဦးလည်းဖြစ်သူ တရားလွှတ်တော်ရှေ့နေ ဦးကိုနီဟာ မနေ့ညနေပိုင်းက ရန်ကုန်လေဆိပ်မှာ သေနတ်နဲ့ လုပ်ကြံပစ်ခံရပြီး သေဆုံးသွားခဲ့ပါတယ်။ တရားခံကို အခင်းဖြစ်နေရာမှာ အဌားယာဉ်မောင်းတက်စီဒရိုင်ဘာတွေနဲ့ ပြည်သူတွေဝိုင်းဖမ်းပေးလို့ လက်ရဖမ်းဆီးနိုင်ခဲ့ပါ တယ်။ နောက်ဆုံးသိရချက်ကတော့ တရားခံဟာ စစ်ကိုင်းတိုင်း ယင်းမာပင်မြို့နယ် စိုင်လျား ကျေးရွာမှာ နေထိုင် သူတဦးဖြစ် ကြောင်း စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်က အခုလိုအတည်ပြုလိုက်တာဖြစ်ပါတယ်။

“မှန်တယ် လွန်ခဲ့တဲ့ ၆လလောက်ကလည်း နေခဲ့တယ်။ အခုတော့ သူမနေတော့ဘူး။ သူ့အမေကြီးနေတယ်လို့တော့ ကြားသိရတယ်၊ မန္တလေးမှာ နေတယ်ဆိုပြီးတော့ မန္တလေးမှာတော့ သူတို့ သဲသဲကွဲကွဲရှာလို့မရသေးဘူး ၂၀၀၃ ခုနှစ်က ဘုရားခိုးမှုနဲ့ သူအဖမ်းခံရဖူးတယ်။ သူ့ကို ခိုးမှုဆိုတော့ ၂၇ နှစ် ကျတယ်လို့ ကြားသိရတယ်။ အဲဒါကို ၁၁ နှစ်လောက်နေပြီးတော့ လွှတ်ငြိမ်းချမ်းသာခွင့်နဲ့ လွှတ်လာတယ်လို့သိရတယ်။”

စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်ကအတည်ပြုပေမယ့် မေးမြန်းစုံစမ်းနေဆဲဖြစ်တာမို့ တခြားဘာအကြောင်းအရာကိုမှ ထပ်မံအတည်ပြုပေးလို့မရကြောင်း၊ တရားခံဟာအမြဲတမ်းနေသူမဟုတ်ဘဲ လွန်ခဲ့တဲ့ ၂နှစ် ထောင်ကထွက်လာမှသာပြန်လည် ရောက်ရှိလာသူဖြစ်ကြောင်း ပြောပါတယ်။

မနေ့က ဖမ်းဆီးရမိချိန် တရားခံဆီကနေတွေ့ရှိခဲ့တဲ့မှတ်ပုံတင်အရ တရားခံနာမည်ဟာ ဦးကြည်လင်းဖြစ်တယ်လို့ ရဲမှတ်တမ်းတွေမှာဖော်ပြထားပါတယ်။မှတ်ပုံတင်ပါမှာ မန္တလေးလိပ်စာကိုဖော်ပြထားတာကြောင့် မန္တလေးတိုင်းဒေသ ကြီးဘက်က မှတ်ပုံတင်ပါလိပ်စာကနေတဆင့် လိုက်လံ စစ်ဆေးခဲ့ပေမယ့် တရားခံဟာ မှတ်ပုံတင်ပါလိပ်စာမှာနေသူမဟုတ်သလို မန္တလေးသား လည်း မဟုတ်ကြောင်း ဒီကနေ့နေ့လည်ပိုင်းက မန္တလေးတိုင်းရဲမှုး ဦးဟန်ထွန်း ကမီဒီယာတွေကိုတွေ့ဆုံကာအတည်ပြုခဲ့ပါတယ်။

“သူဟာ ဒီရပ်ကွက်မှာနေထိုင်ခဲ့သူမဟုတ်ဘူးဆိုတာကို ကျနော်တို့ သိရှိခဲ့ရပါတယ်။ အဲဒီမှာ ကျနော်တို့က ထပ်မံစုံစမ်းချက်အရ အဲဒီမှာ နေထိုင်တဲ့ လွန်ခဲ့တဲ့ နှစ်ပေါင်း ၂၀- ၃၀ ကတည်းက နေထိုင်တဲ့ ဒေသခံတွေ၊ နေခဲ့တဲ့ လူတွေရဲ့ ပြောချက်အရ ဒီလူကို အဲဒီရပ်ကွက်ထဲမှာ မြင်ဖူးတယ်လို့၊ တွေ့ဖူးတယ်လို့ ပြောတာမရှိပါဘူး။ မှတ်ပုံတင်ကို ကြည့်တဲ့အခါမှာ မှတ်ပုံတင်စတင်လုပ်စဉ်ကာလတုန်းက ကျနော်တို့ နှစ်ကာလအပိုင်းအခြားနဲ့ ပြောမယ်ဆိုရင် ၁၉၉၉- ၂၀၀၀ ခုနှစ်တုန်းက လုပ်တဲ့ မှတ်ပုံတင်အမျိုးအစားဖြစ်ပြီး အဲဒီကာလမှာ လုပ်သွားတယ်လို့ ယူဆတယ်။ ကျနော်တို့ ပြောနိုင်တာ တချက်ကတော့ ဒီလူက မန္တလေးသားမဟုတ်ပါဘူး။”

တရာခံကို စစ်မေးနေတဲ့ရန်ကုန်တိုင်းရဲတပ်ဖွဲ့ဘက်က စစ်မေးမှုနဲ့ပတ်သတ်လို့ ဘာမှမထုတ်ပြန်သေးပါ ဘူး။ နိုင်ငံတော်ပြုပြင် ပြောင်းလဲရေး လုပ်နေချိန် ဖွဲ့စည်းပုံ အခြေခံဥပေဒအပိုင်းမှာ ထိရောက်တဲ့ အကြံပေးချက်တွေလုပ်ခဲ့တဲ့ ရှေ့နေကြီး ဦးကိုနီကို ဘာရည်ရွယ်ချက်နဲ့ အခုလို လုပ်ကြံ သတ်ဖြတ် ရတာလဲဆိုတဲ့အဖြေဟာအခုချိန်ထိ တရားခံက မပြော သေးပါဘူး။

နိုင်ငံတော်သမ္မတရုံးကနေ ဒီကနေ့ထုတ်ပြန်လိုက်တဲ့ ထုတ်ပြန်ချက်မှာတော့ ကနဦးစစ်ဆေးချက်အရ နိုင်ငံတော်အတွင်းတည် ငြိမ်အေးချမ်းမှုပျက်ပြားစေရန် ရည်ရွယ်ဆောင်ရွက်ခြင်းဖြစ်နိုင်ကြောင်း ဒီလုပ်ကြံမှုအပေါ် သုံးသပ်ထားပါတယ်။

တပ်မတော်ဘက်ကလည်း ဥပဒေအကြံပေး ဦးကိုနီ သေဆုံးမှုနဲ့ပတ်သက်ပြီး ဖြစ်စဉ်မှန်ပေါ်ပေါက်ရေး၊ ပြစ်မှုကျူးလွန်သူတွေကို အမြန်ဖမ်းဆီးရမိရေး အတွက် လုံခြုံရေးအဖွဲ့အစည်းတွေနဲ့ ပူးပေါင်းဆောင်ရွက်သွားမယ်လို့ သတင်းထုတ်ပြန်ထားပါတယ်။

မနေ့ကပစ်ခတ်မှုကြောင့် ဦးကိုနီအပြင် တရားခံကို ကူညီဖမ်းပေးခဲ့တဲ့ တက်စီဒရိုင်ဘာ ကိုနေဝင်းပါ သေဆုံးခဲ့ရပါတယ်။ ဒီကနေ့ မှာတော့ ဦးကိုနီကို ရေဝေးမှာ ဂူသွင်း သင်္ဂြိုဟ် ပါတယ်။ ကိုနေဝင်းကိုတော့ မနက်ဖြန်မှ တိုင်းအစိုးရအစီအစဉ်နဲ့ သင်္ဂြိုဟ် မှာပါ။ ဒီကနေ့နေ့လည်ပိုင်းမှာတော့ ရန်ကုန်စစ်တိုင်းမှုး ဗိုလ်ချုပ် မျိုးဇော်သိန်းက ဦးကိုနီအိမ်နဲ့ ကိုနေဝင်းအိမ်တို့ကို သွားရောက်နှစ်သိမ့် ပေးခဲ့ပါတယ်။

 မေခ /  မသိင်္ဂီထိုက်   / ဗွီအိုအေ (မြန်မာပိုင်း)
http://burmese.voanews.com

ဦးကိုနီ ရဲ့ အင်ဒိုနီးရှား ခရီးစဉ် အကြောင်း


ရှေ့နေ ဦးကိုနီရဲ့ နောက်ဆုံးနိုင်ငံရေးခရီး က အင်ဒိုနီးရှား မှာ လုပ်တဲ့ Senior Leadership Program ကို သွားရောက်ခဲ့တာပါ။ အဲဒီခရီးစဉ် က ဇန်နဝါရီ ၂၂ ရက် ကနေ ၂၉ ရက်အထိ ကြာမြင့်ခဲ့ပြီး ပြန်ကြားရေး ဝန်ကြီး ဦးဖေမြင့်က ဦးဆောင် ခဲ့သလို ပြည်ထဲရေးနဲ့ နယ်စပ်လုံခြုံရေးတို့ က ဒုဝန်ကြီးတွေလည်း ပါဝင်ပါတယ်။

ရခိုင်ပြည်နယ် ANP ပါတီက လွှတ်တော်ကိုယ်စားလှယ်တွေလည်း ပါသလို ရခိုင်ပြည်နယ် ဘက်က မွတ်ဆလင် အသိုင်းအဝိုင်း က သူတွေလည်း ပါဝင်တာပါ။ အဲဒီ ခရီးစဉ် အကြောင်းနဲ့ ဦးကိုနီ ရဲ့ ခရီးစဉ်မှာ ပါဝင်ခဲ့တဲ့ သူ့ရဲ့ နောက်ဆုံးပုံရိပ် တွေ အကြောင်း ဒီခရီးစဉ်မှာ ပါဝင်ခဲ့တဲ့ ၈၈ မျိုးဆက် ကျောင်းသားခေါင်းဆောင်တယောက် ဖြစ်တဲ့ ကိုမြအေးကို ကိုရင်မောင် က ဆက်သွယ်မေးထားပါတယ်။
BBC Burmese
https://www.facebook.com/bbcburmese


တရားခံ ကို ဖမ်းပေးခဲ့တဲ့ သူရဲ့ ကျန်ရစ်သူ မိသားစု အားပေး ကူညီ


NLD ပါတီ ရဲ့ ဥပဒေ အကြံပေး တရားလွှတ်တော် ရှေ့နေ့ ဦးကိုနီ အသတ်ခံရမှု မှာ တရားခံ ကို အသက်နဲ့ ရင်းပြီး ဖမ်းပေး ခဲ့တဲ့ တက္ကစီ မောင်းသူ ကိုနေဝင်း ရဲ့ ကျန်ရစ်သူ မိသားစု ဝင်တွေကို လူအများအပြား က သွားရောက် အားပေးမှုတွေ လုပ်ခဲ့ကြပါတယ်။

အကြမ်းဖက်မှုကို ရပ်ကြည့် မနေဘဲ တာဝန်သိ ပြည်သူ တစ်ယောက် အနေနဲ့ တရားခံ ကို ဖမ်းဆီး ပေးခဲ့တာကြောင့် ဂုဏ်ပြုလိုတဲ့ အတွက် မိသားစု တွေကို အားပေး စကားပြောကြားခဲ့တယ်လို့ ဗကသ ကျောင်းသား ခေါင်းဆောင် တစ်ယောက် က ပြောပါတယ်။

ကွယ်လွန်သူ ကိုနေဝင်းမှာ ဇနီးသည် နဲ့ သား သုံးယောက် ကျန်ရှိခဲ့ပြီး ကလေးတွေ အတွက် ပညာရေး ဆုံးခန်း တိုင်တဲ့ အထိ တာဝန်ယူ ပေးသွားမယ်လို့ ရန်ကုန် နာရေး ကူညီမှု အသင်း တာဝန် ရှိသူ တစ်ဦး က ပြောကြား ခဲ့ပါတယ်။
BBC Burmese
https://www.facebook.com/bbcburmese

ဦးကိုနီ အသတ်ခံရမှု Harvard တက္ကသိုလ်ပူးတွဲကြေညာချက် ထုတ်ပြန်

Harvard တက္ကသိုလ် ကြေညာချက်
NLD ပါတီရဲ့ ဥပဒေအကြံပေးလည်းဖြစ်၊ အထင်ကရ ရှေ့နေကြီးတဦးလည်းဖြစ်တဲ့ ဦးကိုနီ အင်ဒိုနီးရှားနိုင်ငံက အပြန် ရန်ကုန်မြို့ လေဆိပ်မှာ လုပ်ကြံ သတ်ဖြတ်ခံလိုက်ရတဲ့အတွက် အထူး ၀မ်းနည်း ကြေကွဲကြောင်း Harvard တက္ကသိုလ် Ash Center ဒီမိုကရေစီအုပ်ချုပ်ရေးဌာန၊ အင်ဒိုနီးရှားနိုင်ငံ Habibie ဌာနနဲ့ Kemitraan အစိုးရပြုပြင်ပြောင်းလဲရေး ပူးပေါင်းဆောင်ရွက်မှု ဌာနတို့က ပူးတွဲ ကြေညာချက် ထုတ်ပြန်လိုက်ပါတယ်။

အင်ဒိုနီးရှားနိုင်ငံက အပြန်မှာ ဦးကိုနီ ရုတ်တရက် အကြမ်းဖက် သတ်ဖြတ်ခံလိုက်ရတဲ့အတွက် ၀မ်းနည်း ကြေကွဲရကြောင်း Harvard တက္ကသိုလ် Ash Center ဒီမိုကရေစီအုပ်ချုပ်ရေးဌာနက ပြောခွင့်ရ Daniel Harsha က အခုလို ပြောပါတယ်။

“Harvard မှာရှိတဲ့ ကျနော်တို့အနေနဲ့ ဒီ ကြေကွဲဘွယ် အဓိပ္ပါယ်မဲ့ သတ်ဖြတ်မှုအတွက် ၀မ်းနည်းပြီး အံ့သြ တုံလှုပ်ဖြစ်ကြပါတယ်။ ဦးကိုနီဟာ Harvard တက္ကသိုလ်၊ Ash Center က ကြီးမှူး ကျင်းပတဲ့ အင်ဒိုနီးရှားအနေနှင့် ဘာသာရေး အကြမ်းမှုပြဿနာကြီးကို ဘယ်လို ဖြေရှင်းကြသလဲဆိုတဲ့ သင်တန်းကို တက်ရောက်ခဲ့တာ ဖြစ်ပါတယ်။ သူ့အနေနဲ့ ဒီသင်တန်းတက်ပြီး အာရှမှာ တခြားနိုင်ငံအနေနဲ့ ဘာသာရေး ပဋိပက္ခကို လူ့အဖွဲ့အစည်းမှာ ဘယ်လို ဖြေရှင်းသလဲဆိုတာ လေ့လာပြီး မြန်မာပြည်အပြန် အခုလို အသတ်ခံတရတဲ့အတွက် ပြင်းပြင်းထန်ထန် ပြစ်တင် ရှုတ်ချပါတယ်။ ဒီပြစ်မှု ကျူးလွန်သူတွေကို တရားဥပဒေအရ ထိထိရောက်ရောက် အရေးယူဖို့လဲ တိုက်တွန်းပါတယ်။ တချိန်ထဲမှာပဲ မြန်မာနိုင်ငံမှာ ဒီမိုကရေစီ ဖော်ဆောင်ဖို့ ဦးကိုနီရဲ့ ကြိုးပမ်းမှုကို ဆက်လက် ဖော်ဆောင်သွားဖို့လည်း တိုက်တွန်းပါတယ်။”

အဲဒီ အစီအစဉ်ကိုတော့ အင်ဒိုနီးရှားနိုင်ငံ၊ ဂျကာတာမြို့မှာ ဇန်န၀ါရီလ ၂၃ ရက်နေ့ကနေ ၂၅ ရက်နေ့အထိ ကျင်းပခဲ့တာ ဖြစ်ပါတယ်။ ၃ ရက်ကြာ ကျင်းပတဲ့ အဲဒီ အစီအစဉ်အတွင်း ၁၉၉၉ ခုနှစ်ကနေ ၂၀၀၄ ခုနှစ်အကြား အင်ဒိုနီးရှားနိုင်ငံ၊ Maluku ကျွန်းမှာ လူမျိုးရေး၊ ဘာသာရေး အဓိကရုန်းတွေ ဖြစ်ပေါ်ခဲ့တဲ့ Ambon ရပ်ကွက်ကို ခေါ်သွားပြီး သူတို့ရဲ့ အတွေ့အကြုံတွေကို ကိုယ်တွေ့ လေ့လာခွင့် ရနိုင်အောင် အင်ဒိုနီးရှား အစိုးရက စီစဉ်ပေးခဲ့ပါတယ်။

 ဗွီအိုအေ (မြန်မာပိုင်း)
http://burmese.voanews.com

ဦးကိုနီလုပ်ကြံခံရမှု အဖြစ်မှန်ဖေါ်ထုတ်ပေးဖို့ နိုင်ငံတကာ တောင်းဆို


အာဏာရ NLD အမျိုးသားဒီမိုကရေစီအဖွဲ့ချုပ်ရဲ့ ဥပဒေအကြံပေးလည်းဖြစ်၊ ရှေ့နေ့ကွန်ယက်ရဲ့ ဦးဆောင်သူတဦးလည်းဖြစ်သူ တရားလွှတ်တော်ရှေ့နေ ဦးကိုနီ တနင်္ဂနွေနေ့က ရန်ကုန်လေဆိပ်မှာ သေနတ်နဲ့ လုပ်ကြံ သတ်ဖြတ်ခံလိုက်ရတဲ့ကိစ္စကို ပြစ်တင် ရှုတ်ချကြောင်း ကုလသမဂ္ဂက ပြောပါတယ်။

အမေရိကန်ပြည်ထောင်စု နိုင်ငံခြားရေးဌာနကလည်း ဦးကိုနီ လုပ်ကြံခံရတဲ့အတွက် ၀မ်းနည်းရကြောင်း ပြောပါတယ်။ သတ်ဖြတ်ခံရမှုအတွက် မြန်မာအစိုးရအနေနဲ့ စုံစမ်းစစ်ဆေးပြီး တာဝန်ရှိသူတွေကို ဥပဒေနဲ့အညီ အရေးယူဖို့လည်း တိုက်တွန်းလိုက်ပါတယ်။ အပြည့်အစုံကိုတော့ ကိုဇော်ဝင်းလှိုင်က တင်ပြပေးပါမယ်။

တရားလွတ်တော်ရှေ့နေကြီး ဦးကိုနီဟာ အင်ဒိုနီးရှား ခရီးစဉ်ကပြန်လာပြီး ရန်ကုန် လေဆိပ်အပြင် လူမြင်ကွင်းမှာ သေနတ်သမားက အနီးကပ်လုပ်ကြံ သတ်ဖြတ်ခြင်း ခံလိုက်ရတဲ့အပေါ် ကုလသမဂ္ဂအပါအ၀င် နိုင်ငံတကာက ပြစ်တင် ရှုတ်ချမှုတွေ ထွက်ပေါ်လာတာပါ။

ဦးကိုနီဟာ မြန်မာနိုင်ငံ ပြုပြင်ပြောင်းလဲရေး လုပ်နေချိန် ဖွဲ့စည်းပုံ အခြေခံဥပေဒအပိုင်းမှာ ထိရောက်တဲ့ အကြံပေးချက်တွေ လုပ်ဆောင် ပေးနေသူ တဦးဖြစ်တဲ့အပြင် ရှေ့နေများ ကွန်ယက် ဖွဲ့စည်းနိုင်ရေးအတွက် အဓိကအခန်းကဏ္ဍက ပါဝင်သူ တဦးဖြစ်သလို ၂၀၀၈ ဖွဲ့အစည်းပုံ အခြေခံဥပဒေ ပြင်ဆင်ရေးအတွက်လည်း ဦးဆောင် ဟောပြောနေသူတဦး ဖြစ်ပါတယ်။

ဦးကိုနီ အခုလို ရုတ်တရက် လုပ်ကြံသတ်ဖြတ်ခံလိုက်တဲ့အတွက် မြန်မာနိုင်ငံအတွင်းမှာသာမက နိုင်ငံတကာမှာပါ အံ့သြ တုန်လှုပ်စရာ ဖြစ်သွားခဲ့ပါတယ်။

ရန်ကုန်မြို့ လေဆိပ်မှာ တရားလွတ်တော် ရှေ့နေကြီး ဦးကိုနီ ရက်ရက်စက်စက် လုပ်ကြံ သတ်ဖြတ်ခံလိုက်တဲ့ကိစ္စအပေါ် ပြင်းထန်စွာ ကန့်ကွက် ရှုတ်ချကြောင်း မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် Ms. Yanghee Lee က ဇန်န၀ါရီလ ၃၀ ရက်နေ့ ရက်စွဲနဲ့ ကြေညာချက် ထုတ်ပြန် ပြောကြားလိုက်ပါတယ်။

ကုလသမဂ္ဂကလည်း ဦးကိုနီ လုပ်ကြံ သတ်ဖြတ်ခံလိုက်ရတဲ့အပေါ် ပြစ်တင် ရှုတ်ချကြောင်း တနင်္လာနေ့က ကုလသမဂ္ဂမှာ ကျင်းပတဲ့ ပုံမှန် သတင်းစာရှင်းလင်းပွဲအတွင်း အတွင်းရေးမှူးချုပ်ရဲ့ ပြောခွင့်ရ Stephane Dujarric က ပြောပါတယ်။

“NLD ပါတီရဲ့ ဥပဒေအကြံပေးလည်းဖြစ်၊ အထင်ကရ ရှေ့နေကြီးတဦးလည်းဖြစ်တဲ့ ဦးကိုနီ ယမန်နေ့က လုပ်ကြံ သတ်ဖြတ်ခံရမှုအပေါ် မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် နည်းတူ ကုလသမဂ္ဂအနေနဲ့ ပြစ်တင် ရှုတ်ချပါတယ်။ ဦးကိုနီ ကွယ်လွန်သွားတဲ့အတွက် မိသားစု၊ မိတ်ဆွေအပေါင်းအသင်းတွေ၊ လုပ်ဖော်ကိုင်ဖက်တွေနဲ့အတူ ထပ်တူ ၀မ်းနည်း ကြေကွဲရပါကြောင်းလည်း လူ့အခွင့်အရေး အထူးကိုယ်စားလှယ်က ပြောထားပါတယ်။ ဒါ့အပြင် ဦးကိုနီ ဘာကြောင့် လုပ်ကြံ သတ်ဖြတ်ခံရတယ်၊ သေနတ်သမားရဲ့ နောက်ကွယ်မှာ ဘယ်သူတွေ ရှိတယ်ဆိုတာကို အစိုးရအနေနဲ့ အသေစိတ် စုံစမ်း စစ်ဆေးဖို့ လိုအပ်ကြောင်းလည်း အထူးကိုယ်စားလှယ်က တိုက်တွန်းထားပါတယ်။”

အမေရိကန်နိုင်ငံခြားရေးဌာနကလည်း ဦးကိုနီ အခုလို လုပ်ကြံ သတ်ဖြတ်ခံရတဲ့အတွက် ၀မ်းနည်းရကြောင်း အရှေ့အာရှဌာနက တာဝန်ရှိသူတဦးက အခုလို ပြောပါတယ်။

“အထင်ကရ ရှေ့နေကြီးတဦးဖြစ်တဲ့ ဦးကိုနီ ရန်ကုန် နိုင်ငံတကာ လေဆိပ်မှာ လုပ်ကြံ သတ်ဖြတ်ခံရတဲ့အတွက် အမေရိကန်ပြည်ထောင်စုအနေနဲ့ ၀မ်းနည်း ကြေကွဲပြီး စိုးရိမ်မှု ဖြစ်ရပါတယ်။ သူကွယ်လွန်သွားတဲ့အတွက် သူ့ရဲ့ မိသားစုဝင်တွေ၊ မိတ်ဆွေတွေနဲ့ လုပ်ဖော်ကိုင်ဖက်တွေကို ၀မ်းနည်းကြောင်း ပြောကြားလိုပါတယ်။ လူ့အခွင့်အရေးနဲ့ ဒီမိုကရေစီ အရေးကိစ္စတွေအတွက် တစိုက်မတ်မတ် လုပ်ဆောင်ခဲ့သူ တဦးဖြစ်တာကြောင့် မြန်မာနိုင်ငံအတွင်းက လူတွေတင်သာမကပဲ ကမ္ဘာကပါ လေးစားရသူ တဦး ဖြစ်ပါတယ်။ သူ သတ်ဖြတ်ခံရမှုအတွက် မြန်မာအစိုးရအနေနဲ့ စုံစမ်းစစ်ဆေးပြီး တာဝန်ရှိသူတွေကို ဥပဒေနဲ့အညီ အရေးယူဖို့ အမေရိကန် ပြည်ထောင်စုက တိုက်တွန်းပါတယ်။”

ဦးကိုနီဟာ အင်ဒိုနီးရှားနိုင်ငံမှာ Harvard တက္ကသိုလ်နဲ့ အင်ဒိုနီးရှား အစိုးရတို့က ပူးတွဲ ကျင်းပတဲ့ အင်ဒိုနီးရှား ဒီမိုကရေစီ အသွင်ကူးပြောင်းရေး အတွေ့အကြုံတွေ မျှဝေတဲ့ အစီအစဉ်ကို တက်ရောက်ပြီးအပြန် ရန်ကုန်လေဆိပ်အရောက်မှာ လုပ်ကြံ သတ်ဖြတ် ခံလိုက်ရတာ ဖြစ်ပါတယ်။

ဒါကြောင့်လည်း သူတို့နိုင်ငံကအပြန်မှာ ဦးကိုနီ လုပ်ကြံသတ်ဖြတ်ခံရတယ်ဆိုတဲ့ သတင်းကြားရတဲ့အတွက် ၀မ်းနည်း ကြေကွဲကြောင်း အင်ဒိုနီးရှား နိုင်ငံခြားရေးဌာန ပြောခွင့်ရ Arrmanatha Nasir က ပြောပါတယ်။

“ပထမဆုံးအနေနဲ့ သူ အခုလို သေဆုံးသွားတဲ့အတွက် ကျန်ရစ်သူ မိသားစုနဲ့အတူ မြန်မာအစိုးရကို ၀မ်းနည်း ကြေကွဲကြောင်း ပြောကြားလိုပါတယ်။ အခု သေဆုံးသွားသူဟာ အင်ဒိုနီးရှားနိုင်ငံရဲ့ ဒီမိုကရေစီ အသွင်ကူးပြောင်းရေး အတွေ့အကြုံတွေကို မျှဝေဖို့ Harvard တက္ကသိုလ်ရဲ့ ငြိမ်းချမ်းရေးနဲ့ ဒီမိုကရေစီဌာနနဲ့ အင်ဒိုနီးရှား အစိုးရတို့က ပူးတွဲ ကျင်းပတဲ့ အစီအစဉ်တခုကို တက်ရောက်ခဲ့သူ ဖြစ်ပါတယ်။ ဒါဟာ အင်မတန် အင်မတန် အံ့သြ တုန်လှုပ်စရာကောင်းတဲ့ သတင်းဆိုး တခုပါ။ ဒီဖြစ်ရပ်ကြောင့် မြန်မာအစိုးရနဲ့ မြန်မာပြည်သူတွေ ကြိုးစား လုပ်ဆောင်နေတဲ့ ဒီမိုကရေစီအသွင်ကူးပြောင်းရေ၊ ပြုပြင်ပြောင်းလဲမှုနဲ့ အမျိုးသားရင်ကြားစေ့ရေး လုပ်ငန်းစဉ်တွေကို နှောင့်နှေး ကြန့်ကြာမှု မဖြစ်ပါစေနဲ့လို့ ကျနော်တို့ မျှော်လင့်ပါတယ်။”

Harvard တက္ကသိုလ် ငြိမ်းချမ်းရေးနဲ့ ဒီမိုကရေစီဌာနကလည်း ဦးကိုနီ အခုလို ရုတ်တရက် လုပ်ကြံ သတ်ဖြတ်ခံလိုက်ရတဲ့အတွက် အံ့သြ တုန်လှုပ်မိကြောင်း၊ ပြစ်မှု ကျူးလွန်သူတွေကို တရားဥပဒေနဲ့အညီ အရေးယူဆောင်ရွက်ဖို့ တိုက်တွန်းကြောင်း ကြေညာချက် ထုတ်ပြန်ပါတယ်။

ဒေါ်အောင်ဆန်းစုကြည်နဲ့ NLD ပါတီရဲ့ ဥပဒေအကြံပေးဖြစ်သူ ရှေ့နေကြီး ဦးကိုနီ လုပ်ကြံ သတ်ဖြတ်ခံရတဲ့အတွက် အထူး ၀မ်းနည်းရပါကြောင်း APHR လို့ခေါ်တဲ့ အာဆီယံ လွှတ်တော်အမတ်များ လူ့အခွင့်အရေးအဖွဲ့ရဲ့ ဥက္ကဋ္ဌ မလေးရှားလွှတ်တော်အမတ် Charles Santiago က ဇန်န၀ါရီလ ၂၉ ရက်နေ့ ရက်စွဲနဲ့ ကြေညာချက် ထုတ်ပြန်ပါတယ်။

ဦးကိုနီ ကွယ်လွန်သွားတာဟာ အာဆီယံအဖွဲ့ကြီးအတွက်ရော မြန်မာနိုင်ငံအတွက်ပါ ကြီးမားတဲ့ ဆုံးရှုံးမှုကြီးဖြစ်ကြောင်း၊ သူဟာ မြန်မာ့ ဒီမိုကရေစီအရေး လှုပ်ရှားမှုမှာ ပါဝင်ခဲ့တဲ့ ၀ါရင့် ပုဂ္ဂိုလ် တဦးဖြစ်သလို လူ့အခွင့်အရေးအတွက် မားမားမတ်မတ် ရပ်တည်ခဲ့သူ ဖြစ်ကြောင်း၊ သူ အခုလို ကွယ်လွန်သွားတဲ့အတွက် မိသားစုဝင်တွေ၊ မြန်မာ ပြည်သူတွေနဲ့အတူ အထူး ၀မ်းနည်း ကြေကွဲရပါကြောင်း၊ သူ့အတွက် ၀မ်းနည်း ပူဆွေးနေသူတွေနဲ့အတူ ရပ်တည်ပါကြောင်း APHR ဥက္ကဋ္ဌ Santiago ရဲ့ ကြေညာချက်မှာ ဖော်ပြထားပါတယ်။

အလားတူပဲ ကမ္ဘာ့တ၀ှမ်းမှာရှိတဲ့ ရိုဟင်ဂျာ အဖွဲ့အစည်းတွေကလည်း ဦးကိုနီ လုပ်ကြံသတ်ဖြတ်ခံရမှုကို ပြစ်တင် ရှုတ်ချကြောင်း ကြေညာချက် ထုတ်ပြန်လိုက်ပြီး - ဦးကိုနီဟာ ၁၉၈၈ ခုနှစ် ဒီမိုကရေစီ အရေးတော်ပုံကြီးမှာ ပါဝင်ခဲ့သူ တဦးဖြစ်ကြောင်း၊ မြန်မာမွတ်ဆလင် ရှေ့နေများအဖွဲ့ကို စတင် တည်ထောင်ခဲ့သူတဦးဖြစ်တဲ့အပြင် မြန်မာနိုင်ငံအတွက် သူကျွမ်းကျင်ရာ ဥပဒေပညာနဲ့ အလုပ်ကျွေး ပြုခဲ့သူဖြစ်ကြောင်း၊ သူဟာ ငြိမ်းချမ်းရေး၊ ဘာသပေါင်းစုံ သဟဇာတ မျှတစွာ နေထိုင်နိုင်ရေးတို့အတွက် ဦးဆောင် လုပ်ကိုင်ခဲ့သူ ဖြစ်တဲ့အတွက် သူ ကွယ်လွန်သွားခြင်းဟာ တိုင်းပြည်အတွက် အစားထိုးမရနိုင်တဲ့ ဆုံးရှုံးမှုဖြစ်ကြောင်းလည်း ကြေညာချက်မှာ ဖော်ပြထားပါတယ်။

ကိုဇော်ဝင်းလှိုင်   / ဗွီအိုအေ (မြန်မာပိုင်း)
http://burmese.voanews.com

သမ္မတ အစီအစဉ်ကို မလုပ်နိုင်ရင် အလုပ်ထွက်လို့ အိမ်ဖြူတော် ဆို

 မြို့ အတော်များများမှာလည်း ဆန္ဒပြမှုတွေ ဖြစ်ပွား
မွတ်ဆလင် ၇ နိုင်ငံ က လူတွေ အမေရိကန် ထဲ လာရောက်ခွင့် ကန့်သတ်မှု အစီအစဉ် ကို မကျေမနပ် ဖြစ်ခဲ့ကြတဲ့ အမေရိကန် သံဝန်ထမ်း တွေ အနေနဲ့ အစီအစဉ် ကို အကောင်အထည် ဖော်မလား ဒါမှမဟုတ် အလုပ်ထွက် မလားလို့ သမ္မတ ပြောရေး ဆိုခွင့် ရှိသူ ရှောင် စပိုက်စာ က ပြောကြားလိုက်ပါတယ်။

သမ္မတ ထရမ့် ရဲ့ အမိန့်ကြောင့် အမေရိကန်ကို လာရောက် လည်ပတ်မဲ့ ခရီးသွား၂ သန်း ကို ထိခိုက်မှုတွေ ရှိနေပြီး အကြမ်းဖက် သမား အနည်းငယ် ကို ထိန်းချုပ် ချင်တဲ့ ကိစ္စက အလုပ်မဖြစ်ဘူးလို့ သံတမန် တွေက မကျေမနပ် ပြောကြား ခဲ့တာ ဖြစ်ပါတယ်။

အိမ်ဖြူတော်က အစည်းအဝေးမှာ ဒီ အစီအစဉ် က နိုင်ငံ ကို လုံခြုံစေပြီး သမ္မတ ရဲ့ အစီအစဉ်ကို အလွန်အကျွံ ဝေဖန်မှု တွေကို သတင်းဌာန တွေက လုပ်နေ တာ ဖြစ်ကြာင်း သမ္မတ ရဲ့ ပြောရေး ဆိုခွင့် ရှိသူ ရှောင် စပိုက်စာ က ကာကွယ် ပြောကြား ခဲ့ပါတယ်။

အမေရိကန် နိုင်ငံခြားရေး ဌာနက သံတမန်တွေ နဲ့ အရာရှိ တွေ က သမ္မတ ထရမ့် ရဲ့ ယာယီ ပြည်ဝင်ခွင့် ကန့်သတ် အမိန့်ကို ဝေဖန်တဲ့ စာမူကြမ်းဟာ နိုင်ငံခြားရေး ဌာနမှာ ပျံ့နှံ့နေပါတယ်။

စာပါအကြောင်းအရာ တွေအရ မစ္စတာ ထရမ့် ရဲ့ အမေရိကန် လူမျိုးတွေကို အကြမ်းဖက်သူတွေ ရန်က ကာကွယ်ရေး ရည်ရွယ်ချက်ဟာ တန်ပြန် အကျိုးသက်ရောက်မှု ရှိနိုင်တဲ့အကြောင်း ဖော်ပြ ထားတာကို ဘီဘီစီက ဖတ်ရှုခွင့် ရခဲ့ပါတယ်။

ဒီစာပါ အချက်အလက်ကိုလည်း ရာနဲ့ချီတဲ့ ဝန်ထမ်းတွေက သဘောတူ လက်မှတ် ရေးထိုးထားတာပါ။ အခုလိုမျိုး ဝန်ထမ်းတွေ ဘက် က အစိုးရ ရဲ့ မူဝါဒ တွေ အပေါ်မှာ သဘောမတူနိုင်တဲ့ စာတွေ ကို သီးသန့် လမ်းကြောင်းကနေ ပေးပို့ခွင့် ရှိရာမှာ ကြောက်စရာ မလိုသလို၊ အရေးယူလည်း မခံရပါဘူး။

ဒါပေမယ့် ထရမ့် လက်ထက်မှာတော့ ဒီလိုပုံစံ မဆောင်တဲ့ ပြင်းထန်တဲ့ တုံ့ပြန်မှု အသွင် ပြခဲ့ပါတယ်။ သမ္မတ အစီအစဉ် ကို ပုံကြီးချဲ့ ပြောခဲ့တယ် ၂၄ နာရီ အတွင်းမှာ တခြားနိုင်ငံ က လူပေါင်း သုံးသိန်း ကျော် ဝင်နေတာ ကို ပြောနေကြတယ်။

သမ္မတ ရဲ့ အစီအစဉ် က နိုင်ငံ ၇ နိုင်ငံ က လူတွေကို ပိတ်ပင် ခဲ့တာ ပါလို့ အိမ်ဖြူတော် ပြောရေး ဆိုခွင့် ရှိသူ ရှောင် စပိုက်စာ က ပြောပါတယ်။ ပြီးတော့ နိုင်ငံခြားရေး ဌာနက ဝန်ထမ်းတွေ မကျေနပ်ရင် အလုပ်က ထွက်ပါလို့လည်း စိန်ခေါ်စကား ပြောကြား ခဲ့ပါတယ်။

မွတ်ဆလင် နိုင်ငံ ၇ နိုင်ငံ က လူတွေ အမေရိကန် ထဲ လာရောက်ခွင့်ကို ယာယီ ပိတ်ပင်ဖို့ ဆုံးဖြတ် ခဲ့တဲ့ သမ္မတ ဒေါ်နယ် ထရမ့် ကို ဆန့်ကျင်ပြီး ဆန္ဒပြမှု တွေ နိုင်ငံ နေရာ အတော်များများ မှာ ဖြစ်ပေါ် နေပါတယ်။

အခု ထုတ်ပြန်ခဲ့တဲ့ သမ္မတ ညွှန်ကြားချက် က အမေရိကန် စံတန်ဖိုးတွေ နဲ့ လွဲချော် နေပါတယ်။ ဒါဟာ ခွဲခြား ဆက်ဆံမှု တစ်ခု ဖြစ်ပြီး ဒါကို လက်ခံလို့ မရပါဘူးလို့ ဝါရှင်တန် ပြည်နယ် အစိုးရ ကလည်း သမ္မတ အမိန့်ကို ရပ်တန့် ဖို့ ကြိုးစားမယ်ဆိုတဲ့ အကြောင်း ပြည်နယ် အုပ်ချုပ်ရေးမှူး ဂျေး အင်စလီ က ပြောပါတယ်။

သမ္မတ ထရမ့် ရဲ့ အမိန့် ကို ဆန့်ကျင် ဆန္ဒ ပြသူတွေ ဟာ ခွဲခြား ဆက်ဆံမှု ကို မလိုလားတဲ့ နိုင်ငံကြီး သားတွေ ဖြစ်ကြောင်း သမ္မတဟောင်း အိုဘားမား က အားပေး ချီးကျူး တဲ့ ကြေညာချက် တစ်စောင် ထုတ်ပြန်ခဲ့ ပါတယ်။

ကိုးကွယ်တဲ့ ဘာသာတရား အပေါ် အခြေခံပြီး လူတစ်ဦးစီ ကို ခွဲခြား တဲ့ ဆက်ဆံ မှုတွေကို အိုဘားမား က နည်းနည်းလေးမှ လက်သင့် မခံဘူးလို့ သမ္မတ ဟောင်းရဲ့ ပြောရေး ဆိုခွင့် ရှိသူ ကယ်ဗင် လူးဝစ် က ပြောပါတယ်။

အမေရိကန် နဲ့ စံတန်ဖိုးတွေ ကျဆင်း လာမှာကို စိုးရိမ်လို့ ဆန္ဒပြသူတွေ ဟာ အခြေခံဥပဒေ နဲ့ အညီ တောင်းဆို နေတာ ဖြစ်ပြီးတော့ နိုင်ငံ အုပ်ချုပ် နေသူတွေ ဟာလည်း၊ ဆန္ဒပြသူတွေရဲ့ အသံကို နားထောင် သင့်ကြောင်း အိုဘာမား ရဲ့ ထုတ်ပြန်ချက်မှာ ဖော်ပြထားပါတယ်။

BBC Burmese
http://www.bbc.com/burmese

ယာခင်းထဲတွင် လောင်းကစားပြုလုပ်သူများအား ဆိုင်ကယ် ၁၀၂ စီး၊ ယာဉ်တစ်စီးနှ့် အတူဖမ်းမိ


ပွင့်ဖြူ  - ဇန်နဝါရီ ၃၀

မကွေးတိုင်းဒေသကြီးရဲတပ်ဖွဲ့၊ မင်းဘူး ခရိုင်နှင့် ပွင့်ဖြူမြို့နယ် တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဇန်နဝါရီ ၂၉ ရက် မွန်းလွဲ ၂ နာရ်ီက ပွင့်ဖြူမြို့နယ် ကျောင်းကုန်းကြီးကျေးရွာ နေ ဦးဝင်းဦး၏ ယာခင်းအတွင်းရှိ သစ်ပင်များအောက်၌ ပွင့်ဖြူမြို့နယ် ကျောင်းကုန်းကြီး ကျေးရွာနေ ကျော်လင်းခိုင် ဦးစီးပြုလုပ်သော တရားမဝင် လောင်းကစားဝိုင်းများကို ဝင်ရောက်ဖမ်းဆီးခဲ့ရာ လောင်းကစား ပြုလုပ်သူများနှင့် သက်သေခံပစ္စည်းများအား ဖမ်းဆီးရမိခဲ့ကြောင်း တိုင်းဒေသကြီး ရဲတပ်ဖွဲ့က သိရသည်။

အဆိုပါ ဝင်ရောက်ဖမ်းဆီးမှု တွင် လောင်းကစားဒိုင်အဖြစ်ပြုလုပ်သူ ကျော်လင်းခိုင်မှာ ထွက်ပြေးလွတ်မြောက် သွားခဲ့ပြီး ၎င်းနှင့်အတူ လောင်းကစား ဒိုင်ပြုလုပ်သူ ချောက်မြို့နယ် သံဘိုအုပ်စု ကန်ရေလေးကျေးရွာနေ အောင်မိုးနှင့် လောင်းကစားပြုလုပ်သူ ၁၉ ဦး ၊ လေးကောင်ဂျင် လောင်းကစား ပြုလုပ်ရာတွင် အသုံးပြုသော ပစ္စည်း ကိရိယာများ၊ လောင်းကြေးငွေကျပ်ကျပ် ၂၀၅၀၀၀ ၊ Honda Odyssey ယာဉ် တစ်စီး၊ ဆိုင်ကယ် ၁၀၂ စီးနှင့် စက်ဘီးတစ်စီးတို့ကို လည်းကောင်း၊ ဆက်လက်၍ ခြောက်ကောင်ဂျင်ဝိုင်း ပြုလုပ်သူ အေးနိုင် ကျောင်းကုန်းကြီး ကျေးရွာ ပွင့်ဖြူမြို့နယ်နေသူအား လောင်းကစားပြုလုပ်သော ပစ္စည်း ကိရိယာများနှင့်လည်းကောင်း၊ စိုးသန်း ပေတောကျောင်းကုန်းရွာ ပွင့်ဖြူမြို့နယ် နေသူနှင့် ကျော်ဆန်းလှိုင် အုတ်ဖို ကျေးရွာ ပွင့်ဖြူမြို့နယ် နေသူတို့အား ခြောက်ကောင်ဂျင် လောင်းကစား ပြုလုပ်သော ပစ္စည်းကိရိယာများ၊ လောင်းကြေးငွေကျပ် ၉၇၇၀၀ များနှင့် လည်းကောင်း၊ ဆက်လက်၍ ကျော်ဆန်းမိုး၊ ကျောင်းကုန်းကြီး ကျေးရွာ ပွင့်ဖြူမြို့နယ်နေသူအား ခြောက်ကောင်ဂျင် လောင်းကစားပြုလုပ် သော ပစ္စည်းကိရိယာများနှင့်လည်း ကောင်း သိမ်းဆည်းရမိခဲ့ခြင်း ဖြစ်သည်။

ယင်း သိမ်းဆည်းရမိခဲ့မှုနှင့် ပတ်သက်၍ ကျော်လင်းခိုင်၊ အောင်မိုး နှင့် လာရောက်လောင်းကစားပြုသူများ ဖြစ်ကြသည့် တင်ထွန်းပါ ၁၉ ဦး၊ လေးကောင်ဂျင်ကစားဝိုင်းကို ယာခင်း အတွင်းပြုလုပ်ရန် ခွင့်ပြုသူ ဝင်းဦးနှင့် အေးနိုင်တို့အား ပွင့်ဖြူမြို့နယ် မြို့မရဲစခန်း က အမှုဖွင့်အရေးယူထားကြောင်း သိရသည်။

ကျော်ဇေယျ
MOI Webportal Myanmar
https://www.facebook.com/MOIWebportalMyanmar

မောင်တောမှာ ဖမ်းဆီး ခေါ်ဆောင်မှု နဲ့ သတ်ဖြတ်မှုတွေ ဖြစ်ပေါ်

သတင်းသမားတွေ နဲ့ စကားပြောခဲ့သူ ရွာသားလည်း ဒီဇင်ဘာ ၂၃ ရက်နေ့ က သတ်ဖြတ်ခံခဲ့ရ
ရခိုင်ပြည်နယ် အနောက်ဘက် နယ်စပ် မောင်တောမြို့နယ် အတွင်း တိုက်ပွဲ ဖြစ်ပွားတာတွေ မရှိတော့တဲ့ အတွက် တည်ငြိမ်မှုတွေ ရှိနေတယ်လို့ ထင်ရပေမယ့် ဖမ်းဆီးခေါ်ဆောင်မှုတွေ သတ်ဖြတ်မှုတွေ အများအပြား ပေါ်ပေါက်နေပြီး အနည်းဆုံး အစိုးရနဲ့ ပူပေါင်းဆောင်ရွက်နေသူ မွတ်ဆလင် ၁၀ ခန့် အသတ်ခံခဲ့ရပြီး ဖြစ်တယ်လို့ သိရပါတယ်။

မောင်တောမြို့နယ် အတွင်း အခုအခါ ကျေးရွာသားတွေကို အမည်မသိသူတွေက ဖမ်းဆီး ခေါ်ဆောင်မှုတွေရှိနေသလို လုပ်ကြံသတ်ဖြတ်တဲ့ ဖြစ်စဉ်တွေ အများအပြား ပေါ်ပေါက်နေပါတယ်။

ဒီလ ၂၈ ရက်နေ့ကလည်း မောင်တောမြို့နယ် ကြက်ရိုးပြင်ကျေးရွာ ခေတ္တ အုပ်ချုပ်ရေးမှူး ဇော်ကီမူဟာမတ် ရွှံ့နွံအိုင်ထဲ၌ မှောက်လျက် သေဆုံးနေတာကိုတွေ့ရှိခဲ့ရပါတယ်။

ဇန်နဝါရီ ၂၁ ရက် နေ့မှာတော့ ပဒကား ကျေးရွာသစ် အနောက်ဘက် မီတာ ၅၀၀ ခန့်အကွာမှာ မာမတ်ရှော်ဖီး ၊ စွန်တာအာမတ်၊ မာမတ်စူပိုင် တို့အား သုံးလောင်းပြိုင် ထပ်ပြီး မြှုပ်နှံထားတာကို တွေ့ခဲ့ရပါတယ်။

အခုလောလောဆယ်မှာလဲ ရွာညိုးတောင် မွတ်ဆလင်ကျေးရွာက ရွာသားတစ်ဦးနဲ့ ဆင်သေပြင် အရှေ့ရွာက အီဗရာဟင် ၅၅ နှစ်တို့ ပျောက်ဆုံးနေတဲ့ အတွက် မိသားစုတွေက နယ်ခြားစောင့်ရဲစခန်းမှာ အမှုလာဖွင့်ထားတယ်လို့ သိရပါတယ်။

အစိုးရနဲ့ ဆက်စပ်မှု ရှိတဲ့ သူတွေကို အကြမ်းဖက်သမားတွေက သတ်ဖြတ်နေတာ ဖြစ်တယ်လို့ ရခိုင်ပြည်နယ် ရဲမှူးကြီး က ပြောပါတယ်။ ဒီလိုသတ်ဖြတ်ခံနေရတဲ့ မောင်တောမြို့နယ်က လုံခြုံရေး မရှိတဲ့ မွတ်ဆလင် ကျေးရွာ တွေမှာ စိုးရိမ်မှုတွေ ဖြစ်ပေါ် နေပါတယ်။

ရခိုင်ပြည်နယ် ရဲမှူးကြီးကတော့ အန္တရာယ်နဲ့ ရင်ဆိုင် နေကြနေရတဲ့ မွတ်ဆလင် မိသားစုတွေ အနေနဲ့ ရဲတပ်ဖွဲ့ဆီမှာ လာရောက် တိုင်ကြားပြီး ပူးပေါင်း ဆောင်ရွက်ဖို့ တိုက်တွန်းသွား ခဲ့ပါတယ်။

လက်တွေ့မှာတော့ အခုလို ဆောင်ရွက်ရင် ပိုပြီး အန္တရာယ်ကြီးတဲ့အတွက် လူတွေ ကတော့ ရဲကို သွားရောက် မတိုင်ကြားရဲကြဘူးလို့ ပြောဆိုနေကြ ပါတယ်။

ခုလို လူတွေ စိုးရိမ်မှု တိုးပွားနေချိန်မှာ ၂၀၁၂ ခုနှစ် တုန်းက ရဲတပ်ကြပ် အောင်ကျော်သိန်း အသတ်ခံခဲ့ရတဲ့ မောင်တောမြို့နယ် ဒုချီးရားတန်းမြောက်ရွာမှာ ဒီလ ၂၉ ရက်နေ့က ည (၁၁)နာရီခန့်က အိမ် တစ်လုံး မီးလောင်ခဲ့တဲ့ အတွက် လူတွေ အကြားမှာတော့ စိုးရိမ်မှုတွေ ပိုမို ဖြစ်ပေါ် နေပါတယ်။

BBC Burmese
http://www.bbc.com/burmese

ရိုဟင်ဂျာဒုက္ခသည်တွေကို ကျွန်း မှာ ရွှေ့ပြောင်းထားဖို့ Bangladesh စီစဉ်


မြန်မာနိုင်ငံဘက်ကရောက်လာတဲ့ ရိုဟင်ဂျာမွတ်ဆလင် သောင်းနဲ့ချီကို ဘင်္ဂလားဒေရှ့်အစိုးရက ဝေးလံတဲ့ကျွန်းတခုဆီပို့ဆောင်ဖို့ စီစဉ်နေပါတယ်။

ဘင်္ဂလားပင်လယ်အော်ထဲမှာရှိတဲ့ Thengar Char ကျွန်းကို ရိုဟင်ဂျာတွေကို ပို့ဖို့အတွက် အစိုးရက ကော်မတီတရပ်ဖွဲ့ပြီးဆောင်ရွက်နေတယ်လို့ The Indian Express သတင်းစာမှာဖော်ပြထားပါတယ်။

ကော်မတီအနေနဲ့ ဒုက္ခသည်အဖြစ် မှတ်ပုံတင်ထားသူတွေရော မှတ်ပုံမတင်ရသေးသူတွေကိုပါ Noakhali ခရိုင်ထဲက Thengar Char ကျွန်းကို ပို့ဆောင်နိုင်ရေးကူညီဆောင်ရွက်မှာဖြစ်တယ်လို့ ဝန်ကြီးဌာနများဆိုင်ရာရုံးက ပြီးခဲ့တဲ့ သီတင်းပါတ်မှာ ကြေညာချက်ထုတ်ပြန်ခဲ့တယ်လို့ ရေးထားပါတယ်။ Meghna မြစ်ဝနားမှာတည်ရှိတဲ့ အဲဒီကျွန်းဟာ ရိုဟင်ဂျာတွေ လက်ရှိခိုလှုံနေကြတဲ့ နေရာကနေ ၉ နာရီကြာသွားရမှာဖြစ်တယ်လို့ သတင်းထဲမှာ ဖော်ပြပါတယ်။

မြန်မာနိုင်ငံကနေ လတ်တလောရောက်လာကြတဲ့ ရိုဟင်ဂျာ ၆ သောင်းခွဲအပြင် အရင်ထဲက ဘင်္ဂလားဒေရှ့်မှာ မှတ်ပုံတင်ထားပြီးသားရော မတင်ရသေးတာပါ စုစုပေါင်း ရိုဟင်ဂျာ ၂ သိန်း ၃ သောင်းကျော်ရှိပြီး အများစုဟာ Cox’s Bazar က ဒုက္ခသည်စခန်းတွေမှာ ခိုလှုံနေကြတယ်လို့ The Indian Express ရဲ့သတင်းမှာ ပြောထားပါတယ်။ သီးခြားသီတင်းကတော့ ရခိုင်ပြည်နယ်အကြံပေးကော်မရှင်အဖွဲ့ဝင်တွေဖြစ်ကြတဲ့ ကုလမဂ္ဂအတွင်းရေးမှူးချုပ် အထူးအကြံပေးဟောင်း Ghassan Salame၊ ဦးဝင်းမြနဲ့ ဦးအေးလွင်တို့ဟာ ပြီးခဲ့တဲ့ စနေ တနင်္ဂနွေရုံးပိတ်ရက်အတွင်း Cox's Bazar ခရိုင်ကိုသွားရောက်ပြီး ရိုဟင်ဂျာဒုက္ခသည်တွေကို တွေ့ဆုံမေးမြန်းခဲ့ပါတယ်။

Daily Star သတင်းမှာဖော်ပြချက်အရ ရခိုင်အကြံပေးကော်မရှင် အဖွဲ့ဝင်တွေဟာ ရိုဟင်ဂျာ ၁၉ ယောက်ကို သီးသန့်တွေ့ဆုံခဲ့ပြီး တွေ့ဆုံခဲ့ကြသူတွေက သူတို့ မြန်မာနိုင်ငံမှာ ဘယ်လိုနှိပ်စက် ဖိနှိ်ပ်ခံရတယ်ဆိုတဲ့ အကြောင်းတွေကို ပြောခဲ့ကြတယ်လို့ဆိုပါတယ်။ အကြံပေးကော်မရှင်အဖွဲ့ဝင်တွေဟာ ဖေဖော်ဝါရီ ၁ ရက်နေ့ မြန်မာနိုင်ငံကို မပြန်ခင် Dhaka မြို့တော်မှာ နိုင်ငံခြားရေးဝန်ကြီး AH Mahmood Ali နဲ့လည်း တွေ့ဆုံကြမှာဖြစ်ပါတယ်။

ရခိုင်ပြည်နယ်အတွင်း လုံခြုံရေးတပ်တွေရဲ့ နယ်မြေရှင်းလင်းရေးလုပ်စဉ်အတွင်း လူ့အခွင့်အရေးချိုးဖောက်မှုတွေ ရှိတယ်ဆိုတဲ့ စွပ်စွဲချက်တွေနဲ့ ရိုဟင်ဂျာတွေ ဘင်္ဂလားဒေရှ့်ဖက်ကို ထွက်ပြေးခဲ့ကြတာဖြစ်ပါတယ်။

ဗွီအိုအေ (မြန်မာပိုင်း)
http://burmese.voanews.com

ပြည်ဝင်ခွင့် ပိတ်ပင်မှု ဝေဖန်ခံရမှု Trump အစိုးရ ခုခံ

အိမ်ဖြူတော်သတင်းစာရှင်းပွဲ
မွတ်ဆလင်အများစုနေထိုင်တဲ့ နိုင်ငံ ၇ ခုကသူတွေကို အမေရိကန်ပြည်ထောင်စုထဲကို ဝင်ရောက်ခွင့်ကို ပိတ်ပင်ခဲ့တဲ့ သမ္မတ Donald Trump ရဲ့အမိန့်ကို အိမ်ဖြူတော်က တနင်္လာနေ့မှာ ကာကွယ်ပြောကြားခဲ့ပါတယ်။

သမ္မတရဲ့ အမိန့်ထုတ်ပြန်ခဲ့တဲ့ သောကြာနေ့ထဲက အမေရိကန်ပိုင်နက်တွေထဲကို ဝင်ရောက်လာသူ အနည်းငယ်အပေါ်မှာသာ သက်ရောက်မှုရှိခဲ့တယ်လို့ အိမ်ဖြူတော်ပြောခွင့်ရသူ Sean Spicer ကတနင်္လာနေ့က သတင်းစာရှင်းပွဲမှာ ပြောကြားခဲ့ပါတယ်။

တားမြစ်ချက်ထုတ်ပြန်ပြီး ၂၄ နာရီအတွင်း နိုင်ငံခြားသား ၃ သိန်း ၂ သောင်း ၅ ထောင်မှာ ဝင်ခွင့်ပိတ်ပင်ခံရသူ ၁၀၉ ယောက်သာ ရှိခဲ့တယ်လို့ Mr. Spicer ကပြောပါတယ်။ အဲဒီ ၁၀၉ ယောက်အနေနဲ့ ယာယီအဆင်မပြေမှုတွေကို ရင်ဆိုင်ခဲ့ရပြီး၊ အမေရိကန်ပြည်သူတွေရဲ့ လုံခြုံရေးအတွက် ဒီလိုအရေးယူဆောင်ရွက်မှုဟာ အသေးအဖွဲ့ဖြစ်တယ်လို့ လေဆိပ်တွေမှာ ယာယီထိန်းသိမ်းခံခဲ့ရမှုတွေကို သူကဖော်ပြပြောဆိုခဲ့ပါတယ်။

ဘယ်နိုင်ငံကဒုက္ခသည်မဆို အမေရိကန်ထဲ ရက် ၁၂၀ အတွင်း ဝင်ခွင့်ပိတ်ထားတဲ့အပြင် ဆီးရီးယားနိုင်ငံကဆိုရင် ကန့်သတ်ချက်မရှိပိတ်ပင်ခဲ့တဲ့ သူ့ရဲ့အမိန့်ကို သမ္မတ Trump ကတနင်္လာနေ့ Twitter လူမှုကွန်ယက်ပေါ်ကနေ ကာကွယ်တုံ့ပြန်ခဲ့ပါတယ်။

အဲဒီအမိန့်အရ အီရန်၊ အီရတ်၊ လစ်ဗျား၊ ဆီးရီးယား၊ ဆူဒန်၊ Yeman နဲ့ Somalia နိုင်ငံက အမြဲတမ်းနေထိုင်ခွင့်နဲ့ ပြည်ဝင်ခွင့် Visa ရှိထားပြီးသူတွေကိုပါ နိုင်ငံထဲဝင်လာခွင့် ၃ လ ပိတ်ပင်ထားပါတယ်။ ဒီပိတ်ပင်မှုဟာ မွတ်ဆလင်ပြစ်မှတ်ထားတဲ့ လုပ်ရပ်မဟုတ်ဘဲ အမေရိကန်နိုင်ငံ လုံခြုံရေးအတွက်ကြိုတင်ကာကွယ်ဆောင်ရွက်တဲ့ ခြေလှမ်းတွေဖြစ်တယ်လို့ သမ္မတ Trump က အလေးထား ဖော်ပြခဲ့ပါတယ်။

ဒါပေမဲ့ ဒါဟာ မွတ်ဆလင်တွေကို ဖယ်ထုတ်တဲ့အမိန့်ဖြစ်တယ်လို့ American-Islamic ဆက်ဆံရေးကောင်စီ အကြီးအကဲက ဖော်ပြပြောကြားခဲ့ပြီး သူတို့အဖွဲ့က ဒီအမိန့်ကို စိန်ခေါ်ဖို့ အမှု ၂ ခုနဲ့တရားစွဲမယ်လို့ ပြောကြားခဲ့ပါတယ်။

 ဗွီအိုအေ (မြန်မာပိုင်း)
http://burmese.voanews.com

အချိုးအစားမကျသော ဗိုလ်ချုပ်ရုပ်ထု နှင့် facebook ပေါ်မှ ရိုက်ခတ်သံ


၃၀.၁.၂၀၁၇

ရွှေဘိုခရိုင်၊ ဆင်အင်းကျေးရွာ၊ အခြေခံပညာ အထက်တန်းကျောင်းဘေးရှိ ဘောလုံးကွင်းအတွင်း မြန်မာနိုင်ငံ၏ လွတ်လပ်ရေးခေါင်းဆောင် ဗိုလ်ချုပ်အောင်ဆန်း အား ဂုဏ်ပြုနိုင်ရန်အတွက် ရုပ်တုထုလုပ်ထားခြင်း ဖြစ်ကြောင်းသိရပါတယ်။

တမင်တကာ ရည်ရွယ်လို့လုပ်တာမဟုတ်သလို ပန်းပုဆရာ (ပန်းရံဆရာ) ၏ အားနည်းချက်ဖြစ်သောကြောင့် အချိုးအစားမကျသော ဗိုလ်ချုပ်ရုပ်ထုအား ပြန်လည်ဖျက်ဖို့ ဒေသခံ ပြည်သူတွေက တောင်းဆိုမှုတွေ ရှိလာတယ်လို့ သိရပါတယ်။

ဇန်န၀ါရီလ (၃၀) ရက်နေ့ ဒီနေ့ မှာတော့ အဆိုပါ အချိုးအစား မကျသော ဗိုလ်ချုပ်ရုပ်ထုအား ပြန်လည်ဖျက်ကာ ရန်ကုန်မှ ပညာရှင်အကူအညီဖြင့် အသစ်ပြန်လည် ဆောက်လုပ်သွားမည်ဟုသိရတယ်။

ဓါတ်ပုံ - facebook
by သစ်ထူးလွင်


ပြည်ဝင်ခွင့် ဗီဇာပိတ်ပင်ကန့်သတ်မှု Trump ခုခံ ပြောဆို


ဒုက္ခသည်တွေနဲ့ မွတ်ဆလင်အများစုနေထိုင်တဲ့ နိုင်ငံခုနစ်နိုင်ငံကလူတွေကို အမေရိကန်နိုင်ငံထဲဝင်ခွင့် ပိတ်ပင်ကန့်သတ်ထားတဲ့ အမိန့်နဲ့ပတ်သက်ပြီး သမ္မတ Donald Trump က ဆက်ပြီးတော့ ခုခံကာကွယ် ပြောဆိုနေပါတယ်။ ဒီအမိန့်အပေါ် ဥပဒေကြောင်း အရ ရင်ဆိုင်သွားမယ်လို့ လူ့အခွင့်အရေးအဖွဲ့တွေက အခိုင်အမာပြောထားပြီး နိုင်ငံတ၀န်းမြို့ကြီးတွေမှာ ထောင်ပေါင်းများစွာ သောလူတွေ ဆန္ဒပြကန့်ကွက်နေကြသလို ဒီမိုကရက်တွေကလဲ အမိန့်ကိုတားဆီးရေး ဥပဒေပြဌာန်းနိုင်ဖို့ ပြင်ဆင်နေကြပါတယ်။

ပြဿနာတွေမရှိသလောက် အားလုံးအဆင်ချောနေတယ်လို့ အမိမြေလုံခြုံရေးဌာန၀န်ကြီး John Kelly က သူ့ကိုပြောတယ်လို့ ဒီကနေ့မနက်မှာ Twitter ကနေ မစ္စတာ Trump က အတော်များများ ရေးထားပါတယ်။ လေဆိပ်တွေမှာဖြစ်တဲ့ ပြဿနာကြီးတွေ က Delta လေကြောင်းလိုင်းရဲ့ ကွန်ပြူတာစနစ် ချို့ယွင်းတာကြောင့် ဖြစ်တာလို့လဲ မစ္စတာ Trump ကရေးပါတယ်။

သောကြာနေ့က လက်မှတ်ရေးထိုးထုတ်ပြန်တဲ့ အမိန့်အရ ဒုက္ခသည်တွေလက်ခံတာကို ရက်ပေါင်း ၁၂၀ ဆိုင်းငံ့ထားပြီး အီရတ်၊ အီရန်၊ ဆီးရီးယား၊ ဆိုမာလီယာ၊ ဆူဒန်၊ လစ်ဗျားနဲ့ ယီမင်နိုင်ငံတွေက လူတွေကို အမေရိကန်ထဲဝင်ခွင့်မပေးဖို့ ရက်ပေါင်း ၉၀ ပိတ်ပင်ထားပါတယ်။

ဒီအမိန့်အရလုပ်တာမှာ အထူးသဖြင့်တော့ အမေရိကန်လေဆိပ်တွေမှာ ရှုပ်ထွေးေ၀၀ါးကုန်ကြပါတယ်။ တချို့ဖြစ်ရပ်တွေမှာဆိုရင် အမေရိကန်မှာ တရားဝင်နေထိုင်ခွင့်ရထားတဲ့ Green Card လို့ခေါ်တဲ့ အမြဲတမ်းနေထိုင်ခွင့်လက်မှတ် ရထားသူတွေကို ပြန်ဝင်ခွင့် မပြုခင် ထိန်းသိမ်းပြီးတော့ နောက်ထပ် စစ်ဆေးမေးမြန်းတာတွေ တောင်မှ လုပ်ခဲ့ပါတယ်။

ဗွီအိုအေ (မြန်မာပိုင်း)
http://burmese.voanews.com

အငြင်းပွားဖွယ် မူးယစ်စစ်ဆင်ရေး ဖိလစ်ပိုင် အဆုံးသတ်


ဖိလစ်ပိုင်နိုင်ငံရဲ့ အငြင်းပွားဖွယ် မူးယစ်ဆေးဝါး နှိမ်နင်းရေးစစ်ဆင်မှုကို ဖိလစ်ပိုင်ရဲတပ်ဖွဲ့က အဆုံးသတ်လိုက်ပါပြီ။ တောင်ကိုရီး ယား စီးပွားရေးလုပ်ငန်းရှင်တဦး မူးယစ်တိုက်ဖျက်ရေး တာဝန်ရှိသူတွေရဲ့လက်ချက်နဲ့ သေဆုံးသွားပြီးတဲ့နောက် အခုလို ရပ်ဆိုင်း လိုက်တာပါ။

ဖိလစ်ပိုင်ရဲချုပ်ရဲ့အဆိုအားဖြင့် ဆိုးသွမ်းသူတွေလို့ဆိုတဲ့ အကျင့်ပျက်ခြစားတဲ့ ရဲတပ်ဖွဲ့တွေကို ဖယ်ရှားဖို့အတွက် ရဲတပ်ဖွဲ့တွင်း ရှင်းလင်းသန့်စင်ရေး အစီအစဉ်တခုကို မူးယစ်နှိမ်နင်းရေးတပ်ဖွဲ့က လုပ်ဆောင်မယ်လို့ ရဲချုပ် Roland Dela Rosa က ပြောပါတယ်။

ရဲတပ်ဖွဲ့ဝင် ၄၀% ထိဟာ အကျင့်ပျက်ခြစားသူတွေဖြစ်တယ်လို့ သမ္မတ Rodrigo Duterte က ပြောင် စွပ်စွဲပြီး နာရီပိုင်းအတွင်း မှာပဲ ရဲချုပ် Dela Rosa ရဲ့ ကြေညာချက်ထွက်လာတာပါ။ ပြီးခဲ့တဲ့နှစ် အောက်တိုဘာလက ကိုရီးယားစီးပွားရေးလုပ်ငန်းရှင် Jee Ick-joo မနီလာမြို့တော်မှာ သေဆုံးသွားရတဲ့ဖြစ်ရပ် နောက်ဆက်တွဲအခြေအနေတွေကို သမ္မတဒူတာတေး ရင်ဆိုင်နေရတာပါ။ Jee သေဆုံးမှုအတွက် သံသယရှိတဲ့ ရဲတပ်ဖွဲ့ဝင်တွေကို ပြန်ပေးဆွဲပြီး ငွေတောင်းမှုနဲ့ စွပ်စွဲထားပါတယ်။

ပြီးခဲ့တဲ့နှစ် ဇွန်လမှာ သမ္မတ ဒူတာတေး အာဏာရလာချိန်ကတည်းက မူးယစ်ဆေးဝါး ရောင်းဝယ်ဖောက်ကားမှုကို ရက်ရက်စက်စက် နှိမ်နင်းဖြိုခွဲတာကနေ လူပေါင်း ၇ ထောင်ကျော် သေဆုံးရပြီးပါပြီ။ သေဆုံးသူတွေဟာ တရားနည်းလမ်းတကျ ရင်ဆိုင် ခွင့်မရကြဘူးလို့ လူ့အခွင့်အရေးအဖွဲ့တွေကပြောပေမဲ့ ရဲတပ်ဖွဲ့ကတော့ အဲဒီသေဆုံးမှုတွေဟာ ရဲတွေအနေနဲ့ ကိုယ့်ကိုယ်ကို ခုခံကာကွယ်ရင်း ဖြစ်ရတာလို့ ချေပထားပါတယ်။

ဗွီအိုအေ (မြန်မာပိုင်း)
http://burmese.voanews.com

ဖိလစ်ပိုင်နိုင်ငံ တောင်ပိုင်း Basilan ကျွန်းတွင် ဗုံးပေါက်ကွဲ၊ ကလေး နှစ်ဦး သေဆုံး

ဗုံးပေါက်ကွဲမှု ဖြစ်ပွားသည့် Basilan ကျွန်းနေရာအား မြင်တွေ့ရစဉ် (ဓာတ်ပုံ-အင်တာနက်)
    မနီလာ၊ ဇန်နဝါရီ ၃၀ ရက် (ဆင်ဟွာ)

    ဖိလစ်ပိုင်နိုင်ငံ တောင်ပိုင်း Basilan ကျွန်းတွင် ဇန်နဝါရီလ ၃၀ ရက် နံနက်ပိုင်းက အိမ်တွင်းလုပ် ဗုံးတစ်လုံး ပေါက်ကွဲခဲ့ရာ အသက် ၂ နှစ်အရွယ်နှင့် ၅ နှစ်အရွယ် ကလေး နှစ်ဦး သေဆုံးခဲ့ပြီး လူ ၃ ဦး ဒဏ်ရာ ရရှိခဲ့ကြောင်း စစ်တပ် ပြောခွင့်ရပုဂ္ဂိုလ် တစ်ဦးက ပြောကြားခဲ့သည်။

ဒဏ်ရာရရှိသူ သုံးဦးအနက် အသက် ၄ နှစ်အရွယ် ကလေးနှစ်ဦးနှင့် အသက် ၂၅ နှစ်အရွယ် အမျိုးသမီး တစ်ဦးတို့ ဖြစ်ကြောင်း၊ ကလေးငယ် လေးဦး ဆော့ကစားနေစဉ် ဗုံးပေါက်ကွဲခဲ့ခြင်း ဖြစ်ကြောင်း ဒုတိယ ဗိုလ်မှူးကြီး Franco Raphael Alano က ကြေညာချက်၌ ပြောကြားထားသည်။

အဆိုပါ ဗုံးပေါက်ကွဲမှုနှင့် ပတ်သက်၍ မည်သည့်အဖွဲ့ကမျှ တာဝန်ရှိကြောင်း ပြောကြားထားခြင်း မရှိသေးသော်လည်း စစ်တပ်ကမူ အဘူဆာရတ်အဖွဲ့ စစ်သွေးကြွများက ယင်း ပေါက်ကွဲမှုအား လုပ်ဆောင်ကြောင်း စွပ်စွဲထားသည်။

၂၀၁၆ ခုနှစ် ဒီဇင်ဘာလကလည်း Al-Barka ကျွန်း Piyang ကျေးရွာတွင် အိမ်တွင်းလုပ် ဗုံး ပေါက်ကွဲခဲ့ရာ ကလေး နှစ်ဦး သေဆုံးခဲ့ကြောင်း စစ်တပ်က ပြောကြားခဲ့သည်။

ထို့ပြင် အဘူဆာရတ်အဖွဲ့အား ဖိအားပေး နှိမ်နင်းရန် ဖိလစ်ပိုင်နိုင်ငံ သမ္မတ ရိုဒရီဂို ဒူတာတေးက ပြီးခဲ့သည့် နှစ် ဇွန်လမတိုင်မီက ညွှန်ကြားထားကြောင်း သိရသည်။

အဘူဆာရတ်အဖွဲ့သည် ဖိလစ်ပိုင်းတောင်ပိုင်း၌ ပြန်ပေးဆွဲခြင်းများ၊ လူသတ်ခြင်းနှင့် ဗုံးဖောက်ခွဲခြင်း စသည့် အကြမ်းဖက် လုပ်ရပ်များအား လုပ်ဆောင်နေသော အစွန်းရောက်အဖွဲ့ တစ်ခု ဖြစ်သည်။

စစ်တပ်၏ အဆိုအရ Basilan ကျွန်းအနီးတဝိ်ုက်နှင့် စူလူးပြည်နယ်တွင် အဘူဆာရတ်အဖွဲ့က ကျူးလွန်ခဲ့သော ပြစ်မှုပေါင်း ၄၀၀ ခန့်ရှိကြောင်း သိရသည်။

ဖိလစ်ပိုင်နိုင်ငံက အဘူဆာရတ် စစ်သွေးကြွများကို ၂၀၀၂ ခုနှစ်ကတည်းက နှိမ်နင်းနေခဲ့ခြင်း ဖြစ်သည်။

(Xinhua)
http://www.xinhuamyanmar.com
အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

သင်ရဲ့မိတ်ဆွေတွေ ဘာတွေဖတ်သလဲ စိတ်ဝင်စားသလဲ

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ

သတင်းစာနှင့် ဂျာနယ်များ