ရန်ကုန်မြစ်အတွင်း စက်တပ်သမ္ဗာန် ဒိုက်ငြိ၍ တိမ်းမှောက်မှုဖြစ်ပွား ယာဉ်မောင်း အပါအ၀င် ကျား(၂)ဦး၊ မ(၁)ဦး ပျောက်ဆုံး

ရန်ကုန် ဒီဇင်ဘာ ၂၀

ရန်ကုန်တိုင်းဒေသကြီး ဒလမြို့နယ် ကမာကဆစ် ကူးတို့ဆိပ်၌ ဒီဇင်ဘာ ၂၀ ရက်နေ့ နံနက် ၄ နာရီ ၃၀ မိနစ် အချိန်က ကမာကဆစ်ကူးတို့ ဆိပ်ကမ်းနားဘက်မှ ရန်ကုန်ဘက်ကမ်းသို့ ကူးရာ၌် ကမာကဆစ် စက် သမ္ဗာန်ဆိပ်ရှေ့အနီးတွင် စက်လှေပန်ကာ (ဒိုက်) အမှိုက်များငြိ၍ အမှိုက်ဆင်းရှင်းရာ ရေစီးနှင့်အတူ မျောပါသွားပြီး မြစ်အတွင်း ကျောက်ချရပ်နားထားသော စီဘီကုန်တင်တွဲနှင့် ကန့်လန့် ခံတိုက်မိရာမှ ယာဉ်နစ်မြုပ်မှုဖြစ်ပွားခဲ့ကြောင်း မြို့နယ်အထွေထွေ အုပ်ချုပ်ရေးမှူးရုံးမှ သိရသည်။

ဒလမြို့နယ် ကမာကဆစ်ကူးတို့ သမအသင်းပိုင် စက်လှေမောင်း မောင်ဇင်မင်းသူ အသက်(၃၁)၊ (ဘ) ဦးသောင်းစိန် ၊ အမှတ်(၁၇၅)၊ ဂန္ဓမာလမ်း ကမာကဆစ်ရပ်ကွက်နေသူ မောင်းနှင်သော သမ္ဗာန်ကူးတို့ ရေယာဉ် အမှတ်-၇/၁၅ (မြင့်မြတ်သဇင်) ယာဉ်ပေါ်တွင် စီးနင်းလိုက်ပါလာသော ခရီးသည်နှင့် ယာဉ်မောင်း အပါအ၀င် ကျား(၁၁)ဦး၊ မ(၃)ဦး စုစုပေါင်း(၁၄)ဦး အနက်မှ ကျား(၉)ဦးနှင့် မ(၂)ဦးတို့အား ပြန်လည် ဆယ်ယူနိုင်ခဲ့ပြီး၊ ယာဉ်မောင်း အပါအ၀င် ကျား(၂)ဦး၊ မ(၁)ဦးတို့မှာ ယခုအချိန်ထိ ပျောက်ဆုံးနေသဖြင့် ရန်ကုန်မြစ်အတွင်း၌ ကူးတို့ သမစက်လှေအသင်းမှ တာဝန်ရှိသူများ၊ မြန်မာနိုင်ငံ ရဲတပ်ဖွဲ့နှင့် လူမှုရေးအသင်း အဖွဲ့များမှ ကယ်ဆယ်ရှာဖွေရေးလုပ်ငန်းများ ဆောင်ရွက်လျက်ရှိကြောင်း သိရသည်။

သတင်းနှင့်ဓာတ်ပုံ-နိုင်လင်းကျော်(ဒလ)
MOI Webportal Myanmar
https://www.facebook.com/MOIWebportalMyanmar