မိုင်းရှူးမြို့ ကျေးလက်တခုအတွင်း ညသန်းခေါင် လက်နက်ကြီးကျ ကားတစီးနှင့် အိမ်တလုံးပျက်

လွိုင်လင်ခရိုင် မိုင်းရှူးမြို့နယ် မိုင်းအောတ် အုပ်စုတွင် နိုဝင်ဘာလကုန်က ညသန်းခေါင်  ဒေသခံများ အိမ်မောကျနေချိန် လက်နက်ကြီး လက်နက်ငယ်များ  ရွာအတွင်းသို့ ကျလာရာ နေအိမ်တလုံး၊ ကားတစီး ပျက်စီးကာ တရွာလုံး ထိပ်လှန့်ကြသည်ဟု ဒေသခံများက ပြောသည်။

နိုဝင်ဘာလ ၃၀ ရက်က မိုင်းရှူးမြို့အရှေ့မြောက်ဘက်ရှိ မိုင်းအောတ်အုပ်စု ကိန်းတောင်းရွာအတွင်းသို့  ထိုအနီးရှိ တပ်စခန်းချနေထိုင်နေသည့် တပ်ဘက်မှ လက်နက်ကြီးငယ်များဖြင့်ပစ်ခတ်ခဲ့ကြောင်း၊  တဖက်တည်းကသာ ပစ်ခတ်နေသည့်အသံဖြစ်ပြီး တိုက်ပွဲဖြစ်ပွားခဲ့ခြင်းမရှိကြောင်း ဒေသခံများက ပြောသည်။

“ပြည်သူလူထုရဲ့အသက်အိုးအိမ်စည်းစိမ်ကို အသက်နဲ့လဲပြီးကာကွယ်ပါမယ်ဆိုတဲ့စစ်တပ်က ဘာကြောင့် လူတွေနေ တဲ့ရွာထဲကို ပစ်မှတ်ထား အကြောင်းမဲ့ ပစ်ခတ်တာလဲ ဘာရည်ရွယ်ချက်နဲ့ ဘယ်သူက အမိန့် ပေးပြီး ဘယ်သူက တာဝန်ယူမလဲဆိုတဲ့ မေးခွန်းရှိပါတယ်။ လူထုကို ကျေနပ်အောင် တာဝန်ရှိသူတွေက ပြန်လည်ရှင်းပြဖို့ လိုတယ်လို့ ပြောချင်ပါတယ်”  – ဟု မိုင်းရှူးမြို့နယ် ပြည်သူလွှတ်တော်ကိုယ်စားလှယ် စိုင်းထွန်းအေးက ပြောသည်။

မိုင်းအောတ်တွင် စခန်းချနေသည်မှာ  ခလရ ၉၉ က ဗိုလ်မှူး ဖြူကျော်စိုးဦးဆောင်သည့် အင်အား ၃၅ ယောက်ခန့်ရှိအဖွဲ့ဖြစ်ကြောင်း မိုင်းအောတ်အုပ်စုသား လုံးအွတ်ကပြောသည်။

“တိုက်ပွဲဖြစ်ရင်တော့ ၂ ဘက်ပစ်ခတ်သံကြားရမယ်လေ။ အခုက တဖက်တည်းပစ်နေတဲ့အသံ။ အရပ် ၄ မျက်နှာ ရမ်းပြီးပစ်ခတ်နေတာ။ ဝမ့်ကိန်းတောင်းရွာက စိုင်းလှယိန် အိမ်အဖီ နဲ့  ကားတစီးထိခိုက်ပျက်စီးတယ်။ ညကြီးမင်းကြီးအချိန်ဖြစ်နေတော့ အိမ်သားတွေအစုံရှိတဲ့အချိန်လေ။ တော်သေးတယ်အိပ်ခန်းထဲ တည့်တည့်မကျလို့ လူကိုတော့မထိဘူး” – ဟု ၎င်းကပြောသည်။

အဆိုပါညပစ်ခတ်ခြင်းတွင် စက်သေနတ်ဖြင့် အလုံး ၅၀ ထက်မနည်း ဆက်တိုက် ဆွဲပစ်ကြောင်း၊ လက်နက်ကြီးဖြင့်လည်း ၃ ခါပစ်ခတ်ကြောင်း၊ ဒေသခံရွာသားများ စိုးရိမ်ထိတ်လှန့် ခဲ့ကြောင်း လုံးအွတ်ကပြောသည်။

အဆိုပါဒေသသည် သျှမ်းပြည်တိုးတက်ရေးပါတီ သျှမ်းပြည်တပ်မတော် လှုပ်ရှားသည့်ဒေသဖြစ်သော် လည်း အထက် ဖော်ပြပါ နေ့ရက်နှင့်နေရာတွင် အစိုးရတပ်မတော်နှင့် တိုက်ပွဲဖြစ်ပွါးခြင်း မရှိရကြောင်း SSPP/SSA ဘက်ကပြော ပါသည်။

“ အစိုးရတပ်မတော်ရဲ့အခုလုပ်နေတဲ့ လုပ်ရပ်ဟာ လူထုကို ကြောက်လှန့်အောင်ခြိမ်းခြောက်လိုက်တာ ဘဲဖြစ်တယ်။ နယ်မြေတည်ငြိမ်အောင် လုပ်တာမဟုတ်ဘူး။ ငြိမ်းချမ်းမှု မရှိအောင်လုပ်လိုက်တာဘဲဖြစ်တယ်၊ ၂၀၁၂ ခု ကတည်းက ကျနော်တို့ကို လာတိုက်ကတည်းက အဲဒီ့ရွာအနားမှာ ကျနော်တို့တပ်မနေတော့ဘူး။ အစိုးရတပ်ဘဲလာရောက် စခန်းချတာ” – ဟု SSPP/SSA ပြန်ကြားရေး အရာရှိ ကပြောသည်။

အဆိုပါအခင်းဖြစ်ပွားသည့်ဒေသဘက်တွင် လမ်းဖေါက်လုပ်ရန်အတွက် အစိုးရတပ်မတော်မှ ဒေသအတွင်း ရှိ SSPP/SSA စခန်းများအားလုံး ဆုတ်ပေးရန် ယခုနှစ်လယ်ပိုင်းက အစိုးရတပ်မတော်မှ ညွှန်ကြားထားသည်။

သျှမ်းသံတော်ဆင့်/ဟွမ်ဟိန်း
http://burmese.panglong.org