ပလက်ဝက ဒုက္ခသည်တွေ နေရပ်ပြန်ရေး မိုးမကျခင် စီစဉ်မည်

ချင်းပြည်နယ် ပလက်ဝမြို့နယ်မှာ တပ်မတော်နဲ့ AA တို့ တိုက်ပွဲကြောင့် တိမ်းရှောင်နေကြတဲ့ ဒုက္ခသည်တွေကို တွေ့ရစဉ်/ Photo: Wai Lu Kyaw Foundation

ချင်းပြည်နယ် ပလက်ဝမြို့နယ်မှာ AA နဲ့ အစိုးရတပ်မတော်တို့ကြား ဖြစ်ပွားခဲ့တဲ့ တိုက်ပွဲတွေကြောင့် ရှင်းလက် ၀ကျေးရွာကို ထွက်ပြေးတိမ်းရှောင်နေတဲ့ ဒုက္ခသည်တွေကို မိုးမကျခင် နေရပ်ပြန်နိုင်ရေး စီစဉ်ပေးသွားမယ်လို့ ချင်းပြည်နယ် စည်ပင်သာယာရေး၊ လျှပ်စစ်နဲ့ စက်မှုလက်မှုဝန်ကြီး ဆလိုင်းအိုက်ဇက်ခင် က ပြောပါတယ်။

တပ်မတော်က နယ်မြေထိန်းချုပ်နိုင်ပြီဆိုပေမယ့် တစ်လ နှစ်လလောက် စောင့်ကြည့်ရဦးမှာမို့ မိုးမကျခင် ပြန်နိုင်အောင် စီစဉ်ပေးသွားမယ်လို့ ဝန်ကြီး ဆလိုင်းအိုက်ဇက်ခင် က ပြောပါတယ်။

"လက်ရှိအနေအထားမှာ ချက်ချင်းပြန်သွားတဲ့ကိစ္စမျိုးတော့ မဖြစ်စေချင်ဘူး၊ အခြေအနေအရ တပ်မတော်က ထိန်းချုပ်နိုင်ပြီဆိုပေမယ့် တစ်လတန်သည် နှစ်လတန်သည် စောင့်ကြည့်ပေါ့လေ၊ အကုန်လုံး အဆင်ပြေပြီဆိုရင် အမြန်ဆုံးနေရပ်ပြန်နိုင်ရေးကို စီစဉ်ပေးမှာဖြစ်ပါတယ်၊ မိုးမကျခင်တော့ ရွှေ့ပေးနိုင်မယ်"

အစိုးရတပ်မတော်နဲ့ AA အဖွဲ့တို့ကြား တိုက်ပွဲတွေဟာ ပြီးခဲ့တဲ့ အောက်တိုဘာလ ၃၁ ရက်နေ့ကစတင်ပြီး ကုလားတန်မြစ်အထက်ပိုင်း မြန်မာ-အိန္ဒိယနယ်စပ် ဂုံပြင်ရွာနားမှာ ဖြစ်ပွားခဲ့တာဖြစ်ပါတယ်။

အဲဒီ တိုက်ပွဲတွေကြောင့် ဂုံပြင်ရွာက ကျေးရွာသား ၃၀၀ ကျော်လောက်ဟာ နေအိမ်တွေကို စွန့်ခွာထွက်ပြေးနေကြပြီး ပလက်ဝမြို့နယ် ရှင်းလက်ဝ ရွာမှာ ရွှေ့ပြောင်းနေထိုင်နေကြရတာဖြစ်ပါတယ်။

လက်ရှိမှာ တိုက်ပွဲတွေ ရပ်တန့်နေပြီး တပ်မတော်ဘက်က နယ်မြေကို ထိန်းချုပ်ထားနိုင်ပြီလို့ ပြောပါတယ်။

ဒုက္ခသည်တွေကို ပလက်ဝမြို့ခံတွေ အပါအဝင် အစိုးရ၊ အရပ်ဖက်အဖွဲ့အစည်းတွေ၊ လုပ်ငန်းရှင်တွေကနေ ကူညီပေးနေတာဖြစ်ပါတယ်။

RFA Burmese
http://www.rfa.org/burmese