ဒုက္ခသည် ပြန်လည်ပို့ဆောင်လက်ခံရေး သဘောတူညီချက်ရရှိတာ အောင်မြင်မှုဖြစ်ကြောင်း ဘင်္ဂလားဒေ့ရှ် ဝန်ကြီးချုပ်ပြော

မြန်မာနဲ့ ဘင်္ဂလားဒေ့ရှ် နှစ်နိုင်ငံကြား ဒုက္ခသည် ပြန်လည်ပို့ဆောင်လက်ခံရေးကိစ္စမှာ တတိယနိုင်ငံ မပါဝင်ဘဲ၊ သဘောတူညီချက်ရရှိခဲ့တာဟာ ကြီးမားတဲ့အောင်မြင်မှုဖြစ်ကြောင်း ဘင်္ဂလားဒေ့ရ်ှဝန်ကြီးချုပ် ရှိတ်ဟာဆီနာ က ပြောလိုက်ပါတယ်။

ဒါကာမြို့တော်မှာ တနင်္ဂနွေနေ့ကကျင်းပခဲ့တဲ့ သံတမန်များဆိုင်ရာ ညီလာခံတခုမှာ ပြောကြားခဲ့တာပါ။

ရခိုင်ပြည်နယ် ပဋိပက္ခကြောင့် ဘင်္ဂလားဒေ့ရ်ှကို ထွက်ပြေးခဲ့ကြတဲ့ မွတ်စလင်ဒုက္ခသည်တွေအရေးနဲ့ ပတ်သက်ပြီး ကြားဝင်ဆောင်ရွက်ပေးလိုကြောင်း တရုတ်ပြည်က ပြောဆိုခဲ့ပါတယ်။ ဒါပေမဲ့ ဘင်္ဂလားဒေ့ရ်ှဘက်က သဘောမတူခဲ့ပါဘူး။

နိုင်ငံတကာအသိုင်းအ၀ိုင်းက ဖိအားပေးနေပေမဲ့၊ အိမ်နီးချင်း မြန်မာနိုင်ငံနဲ့ ချစ်ကြည်ရင်းနှီးမှု မပျက်စေဘဲ၊ အပြန်အလှန်ဆွေးနွေးညှိနှိုင်းတာတွေကနေ အခုဆိုရင် သဘောတူညီချက်တရပ်ကိုတော့ အနည်းဆုံးရရှိခဲ့ပြီဖြစ်ပါတယ်လို့ ရှိတ်ဟာဆီနာ က ပြောပါတယ်။

ဒီအတွင်း မြန်မာနဲ့ ဘင်္ဂလားဒေ့ရှ် နှစ်နိုင်ငံကြား ဒုက္ခသည် ပြန်လည်ပိုဆောင်လက်ခံရေး သဘောတူခဲ့ကြတဲ့ကိစ္စမှာ ဘင်္ဂလားဒ့ရ်ှအစိုးရဟာ အမျိုးသားအကျိးစီးပွားကို လစ်လျူရှုခဲ့တယ်လို့ အတိုက်အခံ BNP ပါတီ အထွေထွေအတွင်းရေးမှူးချုပ် မီရ်ဇာ ဖက်ရူး က ပြောလိုက်ပါတယ်။

ဒီသဘောတူညီချက်ကို ရှိတ်ဟာဆီနာ အစိုးရရဲ့ သံရေးတမန်ရေး စွမ်းဆောင်ချက်အဖြစ် ပြောနေပေမဲ့၊ တကယ်တော့ နိုင်ငံ့အကျိုးစီးပွား ထိခိုက်သွားရတာဖြစ်ကြောင်း၊ သဘောတူညီချက်မှာ တစ်စုံတရာ ဖိအားမပါ၊ တကယ့်ပါဝင်ရမယ့် အချက်အလက်မပါဘဲဖြစ်နေကြောင်းလည်း ပြောပါတယ်။

ဒီကိစ္စနဲ့ပတ်သက်ပြီး သင့်တော်တဲ့အချိန်မှာ ပြည်သူလူထုကိုချပြမယ်လို့လည်းပြောပါတယ်။

RFA Burmese
https://www.facebook.com/rfaburmese