ဦးပါမောက္ခကို ပထမဆုံးအကြိမ် ရုံးထုတ်

ငြိမ်းစုစီဥပဒေပုဒ်မ ၁၉၊ နိုင်ငံတော် အကြည်အညို ပျက်စေမှု ပုဒ်မ ၅၀၅ (ခ) တို့နဲ့ တရားစွဲဆိုခံထားရတဲ့ မကွေးကျောင်းတိုက် ဆရာတော် ဦးပါမောက္ခကို ဒီကနေ့ ကမာရွတ်မြို့နယ် တရားရုံးမှာ ပထမဆုံးအကြိမ် ရုံးထုတ် ခဲ့ပြီး ငြိမ်းစုစီ ပုဒ်မ ၁၉ ကို အာမခံပေးပေမယ့် ပုဒ်မ ၅၀၅ (ခ) အမှုကို အာမခံ မပေးခဲ့ဘူးလို့ ဦးပါမောက္ခရဲ့ မိသားစုဝင် ဦးအောင်မြိုင် က ပြောပါတယ်။

ပုဒ်မ ၅၀၅ (ခ) အမှုနဲ့ အာမခံရရှိဖို့ ခရိုင်တရားရုံးအထိ ဆက်လက်တင်ပြသွားမယ်လို့ ဦးအောင်မြိုင်က ဒီကနေ့ ဆရာတော် ဦးပါမောက္ခ ရုံးထုတ်အပြီးမှာ ပြောပါတယ်။

ဦးပါမောက္ခကို ဒီလ ၁၂ ရက်နေ့က ပုဒ်မနှစ်ခုနဲ့ ဖမ်းဆီးလူဝတ်လဲခဲ့တာ ဖြစ်ပါတယ်။

လယ်သမားတစ်ဦး မြေသိမ်းခံရတာနဲ့ ပတ်သက်ပြီး မြောက်ဒဂုံမြို့နယ် ရဲစခန်းမှာ ဆန္ဒပြခွင့်လျှောက်ထားတာကို ဆရာတော်က လိုက်ပါကူညီရင်း ဖမ်းဆီးခံလိုက်ရတာဖြစ်ပါတယ်။

ဦးပါမောက္ခဟာ ပြီးခဲ့တဲ့နှစ်က အမေရိကန်သံရုံးရှေ့မှာ ရိုဟင်ဂျာဆိုတဲ့ အသုံးအနှုန်း သုံးစွဲမှုကို ကန့်ကွက်ဆန္ဒပြ ခဲ့တာကြောင့် ပုဒ်မ ၅၀၅(ခ)၊ ပုဒ်မ ၁၉ တို့နဲ့ ကမာရွတ်မြို့နယ်ရဲစခန်းက တရားစွဲဆိုပြီး တရားရုံးကို ကြွရောက်ခြင်း မရှိတာကြောင့် ဖမ်းဝရမ်းထုတ်လိုက်တာဖြစ်ပါတယ်။

အဲဒီဆန္ဒပြမှုကြောင့် ဦးပါမောက္ခအပြင် မျိုးချစ်ရဟန်းပျိုများသမဂ္ဂက ဆရာတော် ဦးသုစိတ္တနဲ့ ဦးဥာဏဓမ္မ တို့ကိုလည်း ကမာရွတ်မြို့ နယ်တရားရုံးက ဖမ်းဝရမ်းထုတ်ထားတာဖြစ်ပါတယ်။

RFA Burmese
http://www.rfa.org/burmese