စစ်တွေလယ်သမားများ သိမ်းဆည်းမြေ ပြန်ရရေး (၅) ကြိမ်မြောက် ဆန္ဒဖော်ထုတ်

စစ်တွေ၊ နိုဝင်ဘာ ၂၇

စစ်တွေမြို့နယ်မှ လယ်သမား ၂၀၀ ခန့်သည် စက်မှုဇုန်စီမံကိန်းပျက်သွားပြီ ဖြစ်သဖြင့် သူတို့ထံမှ စက်မှုဇုန်တည်ဆောက်ရန်အတွက် သိမ်းဆည်းသွားခဲ့သည့် လယ်ယာမြေများအား ပြန်လည် ရရှိရေး အတွက် ရည်ရွယ်ပြီး (၅) ကြိမ်မြောက် ဆန္ဒထုတ်ဖော် တောင်းဆိုပွဲကို စစ်တွေမြို့တွင် နိုဝင်ဘာ ၂၆ ရက်နေ့က ပြုလုပ်ခဲ့ကြသည်။

၎င်းဆန္ဒထုတ်ဖော်ပွဲကို စစ်တွေ မြို့လယ်ရှိ ဝင်္ကဘာကွင်းတွင် နေ့လယ် ၁ နာရီမှ စတင် ပြုလုပ် ခဲ့ကြပြီး ပိုစတာများ၊ ဆိုင်းဘုတ်များကို ကိုယ်စီကိုင်ဆောင်ကာ ကြွေးကြော်သံများ ကြွေးကြော်ပြီး ဆန္ဒဖော်ထုတ်ခဲ့ကြသည်။

'' ကျွန်တော်တို့ လယ်မြေတွေကို ၁၉၉၃ ခုနှစ်ကတည်း က စက်မှုဇုန် စီမံကိန်းအတွက် ဆိုပြီး သိမ်းယူသွားတာပါ။ သိမ်းယူသွားပေမယ့် အခု အချိန်ထိ ဘာစက်မှုဇုန်မှ မလုပ်ဘူး။ လက်ရှိ သိရတာကတော့ စက်မှုဇုန်စီမံကိန်းလည်း ပျက်သွားပြီလို့ သိရပါတယ်။ စက်မှုစီမံကိန်း ပျက်သွားတော့ ဒီလယ်မြေတွေကို ကျွန်တော်တို့ကို ပြန်ပေးရမယ့်အစား အစိုးရ တာဝန်ရှိသူတွေ၊ နိုင်ငံရေးသမားတွေ၊ စစ်တွေက နာမည်ကြီး လူပုဂ္ဂိုလ် တစ်ချို့က ခွဲဝေယူထားကြတယ်လို့ သိရပါတယ်။ ဒါကြောင့် ကျွန်တော်တို့ဆီက သိမ်းထားတဲ့ လယ်တွေကို ကျွန်တော်တို့ ပြန်ပေးဖို့တောင်းဆို ဆန္ဒဖော်ထုတ်ရတာ ဖြစ်ပါတယ်” ဟု မင်းဒြားချိတ်ရွာမှ လယ်မြေသိမ်းခံရသူ လယ်သမား ဦးမောင်ထွန်းသိန်း က ပြောသည်။

ယခုလို ဆန္ဒဖော်ထုတ် တောင်းဆိုမှုကို ၂၀၁၆ သြဂုတ်လတွင် ပထမအကြိမ် စတင်ပြုလုပ်ခဲ့ပြီး ယခု ဆန္ဒဖော်ထုတ်ပွဲနှင့်ပါဆိုလျှင် ( ၅) ကြိမ်တိတိ ရှိခဲ့ပါပြီဟု ဦးမောင်ထွန်းသိန်းက ဆက်လက် ပြောကြားသည်။

သိမ်းဆည်းခံထားရသည့် လယ်ယာမြေ စုစုပေါင်းမှာ ဧက ၂၈၀၀ ကျော် ရှိပြီး ၎င်းလယ်မြေများ၏ မူလပိုင်ရှင်များမှာ စစ်တွေမြို့နယ်မှ ဆတ်ရိုးကျ ၊ မင်းဒြားချိတ်၊ မောင်နီပြင် ၊ ပါဒလိတ် များမှ စသည့် ရွာများမှ ဖြစ်ကြသည်ဟု သိရသည်။

“ ယခုအချိန်ထိ ဒီလယ်မြေတွေနဲ့ ပတ်သက်ပြီး ပြည်နယ် အစိုးရဆီက ပြတ်သားတဲ့ ဆုံးဖြတ်ချက်မျိုးထွက်မလာသေးဘူး။ လျော်ကြေးပေးမယ်ဆိုပေမယ့် လက်ရှိ တန်ဖိုးထက်နည်းရင် ကျွန်တော်တို့ လက်ခံမှာ မဟုတ်ဘူး။ ကျွန်တော်တို့ကတော့ ကိုယ့်လယ်မြေ ကိုယ်ပြန်လိုချင်ပါတယ်” ဟု သူက ပြောကြားသည်။

သိမ်းဆည်းခံ လယ်မြေများ ပြန်လည်ရရှိ ဒို့ အရေး၊ လယ်ယာမြေများတရားမဲ့ ရယူထား သူများအား အရေးယူပေးရေး ဒို့ အရေး စသည့် အချက် များကို ဆန္ဒဖော်ထုတ် တောင်းဆိုခဲ့ကြသည်ဟု သိရသည်။

ဆန္ဒဖော်ထုတ်သူများသည် စစ်တွေ ဝင်္ကဘာကွင်းမှ စတင်၍ ကျောင်းတက်လမ်း၊ လမ်းမကြီး၊ နေလ ခွဆုံ၊ ကုန်သွယ်လမ်း၊ စက်ရုံစု ၊ ပုသိမ်းလမ်း ၊ဝင်္ကဘာကွင်းထိ ဆန္ဒထုတ်ဖော်ခဲ့ကြသည်။

မဘုကေ
Narinjara
https://www.facebook.com/Narinjara