သီပေါမြို့နယ်အတွင်း ပြည်ထောင်စုလမ်းမကြီးတွင် အမျိုးသားတစ်ဦးအား တိုက်မိပြီး ထွက်ပြေးသည့်ယာဉ်အား ရှာဖွေနေ

ဓါတ်ပုံ - နယ်စည်းမခြားပရဟိတအသင်း

ရှမ်းပြည်နယ်(မြောက်ပိုင်း) သီပေါမြို့နယ် ဆွတ်လန်းကျေးရွာအနီး ပြည်ထောင်စုလမ်းမကြီးပေါ်တွင် နိုဝင်ဘာလ (၄) ရက်နေ့ နံနက်အစောပိုင်းက အမျိုးသားတစ်ဦး ဦးခေါင်းကြေမွဒဏ်ရာဖြင့် သေဆုံးနေသည်ကို တွေ့ရသဖြင့် တိုက်သွားသည့်ယာဉ်အား စုံစမ်းရှာဖွေမှုများ လုပ်ဆောင်နေကြောင်း သီပေါယာဉ်ထိန်းရဲတပ်ဖွဲ့ထံမှ သိရသည်။

“သေဆုံးသူက ဆွတ်လန်းကျေးရွာမှာနေတဲ့ ဦးအိုက်ဆန် အသက် (၄၀) နှစ်ပါ။ တန်ဆောင်မုန်းလပြည့်ညမှာ အပြင်လည်ပြီး ပြန်လာတဲ့အချိန်မှာဖြစ်တာလို့ ခန့်မှန်းရတယ်။ သေဆုံးသူက ဆိုင်ကယ်မပါဘူး။ တိုက်သွားတဲ့ ယာဉ်နဲ့ ပတ်သက်လို့ ဖြန့်ကျက်စုံစမ်းမှုတွေ လုပ်နေပါတယ်”ဟု သီပေါယာဉ်ထိန်းရဲတပ်ဖွဲ့မှ တပ်ကြပ်ကြီး ဝင်းဇော်လတ်က တာချီလိတ်သတင်းအေဂျင်စီသို့ ပြောသည်။

သေဆုံးသူအား သီပေါမြို့ရှိ နယ်စည်းမခြားပရဟိတအသင်းက သီပေါပြည်သူ့ဆေးရုံသို့ ပို့ဆောင်ပေးထားကြောင်း သိရသည်။

“မနက် ၄ နာရီ ခွဲလောက်မှာ ယာဉ်ထိန်းတပ်ဖွဲ့ဆီကနေ ဖုန်းဝင်လာလို့ သေဆုံးသူကိုသွားသယ်ခဲ့ပြီး ၅ နာရီ ဝန်းကျင်လောက်မှာ သီပေါပြည်သူ့ဆေးရုံ ရင်ခွဲရုံကို ပို့ဆောင်ပေးခဲ့ပါတယ်။ ဦးခေါင်းတစ်ခုလုံးကြေပြီး ကားလမ်းပေါ်မှာ သေဆုံးနေတာကိုတွေ့ရတယ်”ဟု သီပေါ ရှိ နယ်စည်းမခြားပရဟိတအသင်းမှ ကိုမျိုး က ပြောသည်။

အဆိုပါသေဆုံးမှုအား သီပေါမြို့မရဲစခန်းတွင် ပ/၄၉/၂၀၁၇ ပုဒ်မ ၃၀၄ (က)ဖြင့် သေမှုသေခင်းဖွင့်လှစ်ထားကြောင်း သိရသည်။

သတင်း - နေဖြိုးမြင့်
Tachileik News Agency
http://www.tachileik.net