လားရှိုးရှိ ရေကူးကန်အဟောင်းတွင် ပုပ်ပွနေသည့် အမျိုးသမီးအလောင်းတွေ့ရှိ

ရှမ်းပြည်နယ်(မြောက်ပိုင်း)လားရှိုးမြို့ အမှတ်(၁)ရပ်ကွက်ရှိ မြကန်သာရေကန် ကန်အမှတ်(၉)တွင် ပုပ်ပွနေသည့် အမျိုးသမီးအလောင်းကို အောက်တိုဘာလ (၃)ရက်နေ့ နေ့လယ်ပိုင်းက တွေ့ရကြောင်း သိရသည်။

“အဲဒီရေကန်က အရင်တုန်းက ရေကူးကန်ဖြစ်ခဲ့ဖူးပေမယ့် အခုနောက်ပိုင်း လူအသွားအလာ ပြတ်တဲ့နေရာတစ်ခု ဖြစ်ပါတယ်။ အဲဒီကနေ ကမ္ဘောဇလူမှုကူညီရေးအသင်းနဲ့ ကျွန်တော်တို့ ပေးသောလက်လူငယ်အဖွဲ့ သွားရောက်သယ်ဆောင်ပြီး ပြည်သူ့ဆေးရုံ အရေးပေါ်ဌာနကို ပို့ပေးထားပါတယ်။ အဲဒီကနေတစ်ဆင့် ရင်ခွဲရုံကို ပို့ဆောင်ပေးထားပါတယ်”ဟု လားရှိုးမြို့မှ ပေးသောလက်ပရဟိတလူငယ်အဖွဲ့မှ ဦးမြင့်မော်က တာချီလိတ်သတင်းအေဂျင်စီသို့ ပြောသည်။

ရေကန်အတွင်း အလောင်းတွေ့ရကြောင်း အနီးရှိ တပ်ရင်းမှ ရဲစခန်းသို့ အကြောင်းကြားခဲ့ခြင်းဖြစ်ကြောင်း သိရပြီး သေဆုံးသူအား အတည်ပြုနိုင်ရေးနှင့် သေဆုံးမှုအကြောင်းရင်းတို့အား ရဲတပ်ဖွဲ့က စုံစမ်းဖော်ထုတ်နေဆဲဖြစ်ကြောင်း သိရသည်။

လားရှိုးမြို့ အမှတ်(၂)နယ်မြေရဲစခန်းတွင် သေမှုသေခင်းဖွင့်လှစ်ပြီး စစ်ဆေးမှုများ ဆက်လက် ဆောင်ရွက်နေကြောင်း သိရသည်။

သတင်း - နေဖြိုးမြင့်
Tachileik News Agency
http://www.tachileik.net