၁၉၈၂ ဥပဒေကို ပြင်ဆင်ဖို့ ကိုဖီအာ နန်ကော်မရှင် အကြံပြုချက်ကို စစ်တွေမြို့မှာ ကန့်ကွက်ဆန္ဒပြ

၁၉၈၂ ဥပဒေကို ပြင်ဆင်ဖို့ ကိုဖီအာနန်ကော်မရှင် အကြံပြုချက်ကိုကန့်ကွက်ကြောင်းကို စက်တင်ဘာလ ၂၄ ရက်နေ့က ရခိုင်ပြည်နယ် စစ်တွေမြို့မှာ ဆန္ဒပြစဉ်။ Photo: Min Thein Aung/ RFA

မစ္စတာကိုဖီအာနန်ဦးဆောင်တဲ့ ရခိုင်ပြည်နယ်ဆိုင်ရာအကြံပေးကော်မရှင်ရဲ့ အစီရင်ခံစာမှာပါတဲ့ ၁၉၈၂ ခုနှစ် မြန်မာနိုင်ငံသားဥပဒေကို ပြင်ဆင်ဖို့ အကြံပြုချက်ကို ကန့်ကွက်ကြောင်း စစ်တွေမြို့မှာ လူ ၂၀၀ ကျော်လောက် ဒီနေ့ ဆန္ဒပြခဲ့ကြပါတယ်။

ရခိုင်ဒေသမှာ အကြမ်းဖက်သမားတွေရဲ့အန္တရာယ်ကို ကာကွယ်နိုင်ဖို့အတွက် လက်ရှိ ၁၉၈၂ ခုနှစ် မြန်မာနိုင်ငံသားဥပဒေကသာ အဓိကကျတာကြောင့် ဒီဥပဒေ ကို ပြင်ဆင်ဖို့ မလိုလားဘူးလို့ ဆန္ဒပြပွဲဦးဆောင်တဲ့ ဒေါ်ကျော့စိန် က ပြောပါတယ်။

ဆန္ဒပြသူတွေဟာ အကြမ်းဖက်လူမျိုးကို အလိုမရှိ၊ မြန်မာနိုင်ငံဥပဒေကိုလေးစားဖို့နဲ့ အစိုးရက ၁၉၈၂ ခုနှစ် မြန်မာနိုင်ငံသားဥပဒေပါအတိုင်း အမြန်ဆုံး စီစစ်ဆောင်ရွက်ပေးရေး စတဲ့အချက်တွေနဲ့ ကြွေးကြော်ဆန္ဒပြခဲ့ကြတာ ဖြစ်ပါတယ်။

အကြမ်းဖက်တိုက်ခိုက်မှုတွေကြောင့် နေရပ်စွန့်ခွာထွက်ပြေးခဲ့ကြရတဲ့ ဌာနေတိုင်းရင်းသားတွေ နေရပ် အသီးသီးကို ပြန်ကြတဲ့အချိန်မှာ သူတို့ရဲ့လုံခြုံရေးကို အစိုးရက ထိထိရောက်ရောက်ဆောင်ရွက် ပေးဖို့လည်း ဆန္ဒပြပွဲ ဦးဆောင်သူတွေက ပြောပါတယ်။

ဆန္ဒပြပွဲကို စစ်တွေမြို့အခြေစိုက် အလင်းတံခါးတက်ကြွလှုပ်ရှားသူများအဖွဲ့က ဦးဆောင် ပြုလုပ်ခဲ့တာဖြစ်ပြီး စစ်တွေမြို့နယ် ကျေးရွာအချို့က ဒေသခံတွေလည်း ပါဝင်ခဲ့ကြပါတယ်။

RFA Burmese
http://www.rfa.org/burmese