နိုင်ငံတကာဖိအားကြောင့် လုံခြုံရေးလုပ်ဆောင်ရတာ အကြပ်အတည်းရှိကြောင်း ဗိုလ်ချုပ်မှူးကြီးပြော

မောင်တောမြို့၊ အောင်မြေဗောဓိ သာသနာ့ရိပ်သာမှာ နေရပ်စွန့်ခွာ ပြောင်းရွှေ့နေထိုင်နေတဲ့ ဒေသခံတိုင်းရင်းသားတွေနဲ့ စက်တင်ဘာလ ၂၁ ရက်နေ့က တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တွေ့ဆုံစဉ်။ ဓါတ်ပုံ - တပ်မတော်ကာကွယ်ရေးဦးစီးချုပ်ရုံး

မောင်တောဒေသကနေ စစ်တပ်ကိုရုပ်သိမ်းဖို့ နိုင်ငံတကာက ဖိအားပေးနေတဲ့အတွက် ဒေသလုံခြုံရေး လုပ်ဆောင်ရတာ အကြပ်အတည်းဖြစ်နေတယ်လို့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောလိုက်ပါတယ်။

မောင်တောမြို့နယ် အလိုတော်ပြည့်ကျောင်းမှာ ခိုလှုံနေကြတဲ့ ဒေသခံတွေနဲ့ ဒီနေ့မနက်ပိုင်းက တွေ့ဆုံရာမှာ ဒေသခံတွေဘက်က တောင်းဆိုချက်နဲ့ပတ်သက်ပြီး ဗိုလ်ချုပ်မှူးကြီး မင်းအောင်လှိုင်က အခုလိုပြောခဲ့တာလို့ တွေ့ဆုံပွဲ တက်ရောက်ခဲ့တဲ့ မောင်တောမြို့ခံ ဦးဝေဟင်အောင်က ပြောပါတယ်။

“စစ်တပ်ကို အချိန်အတိုင်းအတာတစ်ခုလောက် ထားပြီးတော့ ဒီနေရာကနေ မသွားဖို့ ကျနော်တို့တွေက ဝိုင်းပြီးတော့ မေတ္တာရပ်ခံတယ်။ အဲဒီမှာ သူကလည်း အထက်မှာတင်ပြပြီးတော့ ဆွေးနွေးပြီးတဲ့အချိန်မှာ သူတို့ အဲဒီဟာလေး ဆောင်ရွက်ပါ့မယ် ဆိုပြီးတော့ ကျနော်တို့ကို ပြောသွားတယ်။ အဲဒီပေါ်မှာ သူက ဘာမှတ်ချက်ပြုသလဲဆိုရင် နိုင်ငံတကာကတော့ဗျာတဲ့၊ စစ်တပ်ကို ရုတ်သိမ်းဖို့အတွက် ဖိအားတွေ ပေးနေတယ်တဲ့။ အဲဒီမှာ သူတို့ လုပ်ရကိုင်ရ နည်းနည်းကြပ်တယ်လို့ အဲဒီလောက်ပဲ ပြောသွားတယ်”

ဒေသခံတွေကလည်း နိုင်ငံတကာဖိအားတွေကို ခေတ္တဘေးဖယ်ထားပြီး လုံခြုံရေးကို မရုပ်သိမ်းဖို့ တောင်းဆိုခဲ့တယ်လို့ ဆိုပါတယ်။

ဒါ့ပြင် နယ်စပ်ခြံစည်းရိုး ခိုင်ခိုင်မာမာ တည်ဆောက်ဖို့ ဒေသခံတွေက တောင်းဆိုရာမှာ ဗိုလ်ချုပ်မှူးကြီး မင်းအောင်လှိုင်က နယ်စပ်ခြံစည်းရိုးတလျှောက် လေးလမ်းသွား ကားလမ်းမကြီး ဖောက်လုပ်ဖို့ အစီအစဉ်ရှိကြောင်း၊ အငူမော်ကနေ တောင်ပြိုအထိ ကွန်ကရစ်လမ်းနဲ့၊ စစ်တွေ- ပုဏ္ဏားကျွန်း- ရသေ့တောင်- ဘူးသီးတောင် တိုက်ရိုက်ကားလမ်းကို ပွင့်လင်းရာသီရောက်ရင် စပြီးဖောက်လုပ်သွားမယ့်အကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တယ်လို့လည်း သိရပါတယ်။

RFA Burmese
http://www.rfa.org/burmese