တိုင်းရင်းသားကျေးရွာတွေ တည်ဆောက်ပေးမည်

ကိုင်းကြီးကျေးရွာက မြိုတိုင်းရင်းသားတွေကို တွေ့ရစဉ်။ Photo: RFA

ရခိုင်ပြည်နယ် မောင်တောဒေသမှာ မြို၊ ခမီ၊ သက် ၊ ဒိုင်းနက် စတဲ့ တိုင်းရင်းသားလူမျိုးစုတွေအတွက် တိုင်းရင်းသားကျေးရွာတွေ ထပ်မံတည်ဆောက်ပေးသွားဖို့ရှိတယ်လို့ ရခိုင်ပြည်နယ် အစိုးရအဖွဲ့ အတွင်းရေးမှူး ဦးတင်မောင်ဆွေက ပြောပါတယ်။

တိုင်းရင်းသားလူနည်းစုတွေရဲ့ ရိုးရာမပျောက်ပျက်စေဖို့အတွက် တိုင်းရင်းသားကျေးရွာတွေကို ထပ်တိုး တည်ဆောက်ပေးသွားမှာဖြစ်တယ်လို့ ဦးတင်မောင်ဆွေက ပြောပါတယ်။

"ထပ်တိုးဖို့ဆိုတာက မြို၊ ဒိုင်းနက်၊ ခမီပေါ့ အဲ့မှာရှိတဲ့ လူနည်းစုတိုင်းရင်းသားတွေကို သူတို့ရဲ့ ရိုးရာယဉ်ကျေးမှုအမွေ မပျောက်ပျက်အောင် သူတို့ကို ကူညီထောက်ပံ့တဲ့အနေနဲ့ အိမ်ခြေ ၅၀ ၊ ၁၀၀ ရှိတဲ့ ကျေးရွာတွေကို ဆောက်လုပ်ပေးသွားမှာဖြစ်ပါတယ်"

မြို၊ ခမီ၊ သက် ၊ ဒိုင်းနက် စတဲ့ တိုင်းရင်းသားလူမျိုးစုတွေဟာ တောတောင်ကို အမှီပြုနေထိုင်ကြတာဖြစ်တဲ့အတွက် သူတို့နဲ့ကိုက်ညီမယ့် နေရာဒေသကို ရှာဖွေတည်ဆောက်ပေးသွားမှာဖြစ်တယ်လို့ ပြောပါတယ်။

တည်ဆောက်မယ့် ကျေးရွာအရေအတွက်ကိုတော့ အသေးစိတ်စီမံဆောင်ရွက်နေဆဲဖြစ်ပြီး ဒီနှစ်အတွင်း အကောင်ထည်ဖော်နိုင်အောင်ဆောင်ရွက်နေတယ်လို့ပြောပါတယ်။

လတ်တလောမှာ ရခိုင်ပြည်နယ်အတွင်း အစိုးရက ဖော်ဆောင်ပေးထားတဲ့ တိုင်းရင်းသားကျေးရွာ ၂၀ ကျော်ရှိတယ်လို့ သိရပါတယ်။

RFA Burmese
http://www.rfa.org/burmese