လဘက်ရည်ဆိုင်တွင် အလုပ်ပေးမည်ဟုဆိုကာ လူမှောင်ခိုကုန်ကူးသည့် အမျိုးသမီးနှစ်ဦးအား ဖမ်းဆီးရမိ

မိုးကောင်း သြဂုတ် ၁၉

ကချင်ပြည်နယ် မိုးကောင်းမြို့နယ် မန်ရွက်ကျေးရွာတွင် အသက် ၂၀နှစ်အရွယ်မိန်းကလေးတစ်ဦးအား လဘက်ရည်ဆိုင်တွင် အလုပ်ရမည်ဟုဆိုကာ ဖျားယောင်းသွေးဆောင်၍ လူကုန်ကူးမှုဖြစ်ခဲ့ကြောင်း သိရသည်။

ဖြစ်စဉ်မှာ ၂၀၁၆ခုနှစ် သြဂုတ်လ ၁၇ရက်က မန်ရွက်ကျေးရွာ၌ နေထိုင်သူ ဦးစိန်မောင်၏သမီး မဌေးဌေးဝင်း(၂၀)နှစ်အား တစ်ရွာတည်းနေထိုင်သူ ဒေါ်နှင်းမေ(၄၂)နှစ်၊ဒေါ်ကြည်ရွှေ(၅၇)နှစ်တို့နှစ်ဦးမှ မြစ်ကြီးနားမြို့ရှိ လဘက်ရည်ဆိုင်တွင် တစ်လလျင်တစ်သိန်းခွဲကျပ်ဖြင့် အလုပ်ရမည်ဟုဆိုကာ မိခင်ဖြစ်သူအား ကြိုတင်လစာ(၃)လစာငွေ ကျပ်လေးသိန်းခွဲပေးပြီး ခေါ်ဆောင်သွားခဲ့ကြောင်း သိရသည်။

လေးလခန့်အကြာတွင် မိသားစုနှင့်အဆက်အသွယ်မရရှိ၍ စုံစမ်းကြည့်ရာ ဒေါ်နှင်းမေနှင့်ဒေါ်ကြည်ရွှေတို့မှ မဌေးဌေးဝင်းအား မြစ်ကြီးနားသို့ခေါ်ဆောင်ခဲ့ကာ တရုပ်ပြည်နယ်စပ်တွင် အသင့်စောင့်နေသူ မန်ရွက်ကျေးရွာနေ ဒေါ်မိုးရီ(၅၅)နှစ်အားလွှဲပြောင်းပေးအပ်ခဲ့ပြီး တရုပ်ပြည်သို့ပို့ဆောင်ခဲ့ကြောင်း သိရှိရခြင်းကြောင့် မိုးကောင်းမြို့မရဲစခန်းတွင် (ပ)၇၈/၂၀၁၇ရာဇသတ်ကြီးပုဒ်မ-၃၆၅ဖြင့်အမှုဖွင့်တိုင်ကြားခဲ့သည်။

နယ်မြေခြင်းချိတ်ဆက်မှုသတင်းအရ ကသာခရိုင်မှုခင်းနှိမ်နင်းရေးတပ်ဖွဲ့မှ ရဲအုပ်အောင်အောင်သန်း ဦးစီးအဖွဲ့၊ထီးချိုင့်မြို့မရဲစခန်းမှူး ဒု-ရဲမှူးသန်းထွဋ်အောင် ဦးစီးအဖွဲ့မှ ရှာဖွေဖမ်းဆီးရာ ယမန်နေ့  သြဂုတ် ၁၇ရက် ၂၀၁၇ ညနေ ၃နာရီခွဲတွင် ထီးချိုင့်မြို့နယ် ဗန်းမော်-မန္တလေး ကားလမ်းမတွင် ဒေါ်နှင်းမေနှင့် ဒေါ်ကြည်ရွှေတို့နှစ်ဦးအား ဖမ်းဆီးမိခဲ့၍မိုးကောင်းမြို့မရဲစခန်းမှ နယ်ထိန်းခေါင်းဆောင် ရဲအုပ်ဇော်ဝင်း ဦးစီးအဖွဲ့မှသွားရောက် ခေါ်ဆောင်ခဲ့သည်။

ဖြစ်စဉ်နှင့်ပတ်သက်၍ ဒေါ်နှင်းမေနှင့်ဒေါ်ကြည်ရွှေတို့နှစ်ဦးအား မိုးကောင်းမြို့မရဲစခန်းတွင် လူမှောင်ခိုကုန်ကူးမှုဖြင့် အရေးယူထားပြီး ဒေါ်မိုးရီအား ဆက်လက်ဖော်ထုတ်အရေးယူသွားမည်ဖြစ်ကြောင်း မြို့မရဲစခန်း၏သတင်းအရ သိရသည်။

ဝင်းနိုင် - ကချင်မြေ
မိုးကောင်းသတင်းမီဒီယာ
https://www.facebook.com/mogaungnews.media/