ရခိုင်ကော်မရှင်အပြီးသတ်အစီရင်ခံစာကို သမ္မတထံ ပေးအပ်

နိုင်ငံတော် သမ္မတ ဦးထင်ကျော်နဲ့ ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန်ကို သြဂုတ်လ ၂၃ ရက်နေ့က နေပြည်တော်ရှိ သမ္မတအိမ်တော် တွင် တွေ့ရစဉ်။ Photo: Myanmar President Office/ Facebook

ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ရခိုင်အကြံပေး ကော်မရှင်ရဲ့ အပြီးသတ် အစီရင်ခံစာကို ဒီကနေ့ နိုင်ငံတော် သမ္မတထံ ပေးအပ် လိုက်ပါတယ်။

ဒီကနေ့ မနက် ၁၀ နာရီက နေပြည်တော်မှာရှိတဲ့ နိုင်ငံတော် သမ္မတအိမ်တော်မှာ သမ္မတဦးထင်ကျော် နဲ့ ရခိုင်အကြံပေးကော်မရှင်တို့ တွေ့ဆုံချိန်မှာ အစီရင်ခံစာ ကို ပေးအပ်လိုက်တာဖြစ်တယ်လို့ နိုင်ငံတော် သမ္မတရုံး ထုတ်ပြန်ချက်မှာ ပါရှိပါတယ်။

နိုင်ငံတော် သမ္မတက အစီရင်ခံစာကို အလေးအနက်ထားစဉ်းစားမှာဖြစ်ကြောင်းနဲ့ အစိုးရရဲ့ ရခိုင်ပြည်နယ်ဆိုင်ရာ လုပ်ငန်းစဉ်တွေအတွက် အထောက်အပံ့ များစွာဖြစ်မယ်လို့ ယုံကြည်ကြောင်း ပြောကြားခဲ့တယ်လို့ ထုတ်ပြန်ချက်မှာ ပါရှိပါတယ်။

သမ္မတနဲ့ ကော်မရှင်အဖွဲ့ဝင်တွေ တွေ့ဆုံရာမှာ ပြီးခဲ့တဲ့ မတ်လအတွင်းက ကော်မရှင်က တင်သွင်းခဲ့တဲ့ ကြားဖြတ်အစီရင်ခံစာပါ အကြံပြုချက်တွေကို အကောင်အထည်ဖော်နေတဲ့ အခြေအနေတွေနဲ့ ရခိုင်ပြည်နယ်ရဲ့ လူမှု စီးပွားရေး ၊ ပညာရေး ကဏ္ဍတွေကို မြှင့်တင်ဖို့ ဆောင်ရွက်နေတဲ့ အခြေအနေတွေ ကို ဆွေးနွေးခဲ့တယ်လို့လည်း ထုတ်ပြန်ချက်မှာ ပါရှိပါတယ်။

ဒါ့အပြင် လူသားချင်း စာနာ ထောက်ထားမှု အကူအညီတွေကို လက်ခံနေတဲ့အခြေအနေနဲ့ ဥပဒေစိုးမိုးရေး၊ နယ်မြေ လုံခြုံရေး၊ မူးယစ်ဆေးဝါးပြဿနာနဲ့ ရခိုင်ပြည် နယ်တွင်းသတင်း မီဒီယာ ရယူခွင့်ကိစ္စတွေအပေါ် အမြင်ချင်း ဖလှယ်ပြီး ဆွေးနွေးခဲ့ကြတယ်လို့ သိရပါတယ်။

ကုလသမဂ္ဂအတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ရခိုင်ပြည်နယ်ဆိုင်ရာ အကြံပေး ကော်မရှင်ကို ပြီးခဲ့တဲ့နှစ် သြဂုတ်လအတွင်းက စတင်ဖွဲ့စည်းခဲ့ တာဖြစ်ပါတယ်။ ကော်မရှင်ရဲ့ ကြားဖြတ်အစီရင်ခံစာကို အခုနှစ် မတ်လအတွင်းမှာ တင်သွင်းခဲ့ပါတယ်။

ရခိုင် အကြံပေးကော်မရှင်အနေနဲ့ အပြီးသတ် အစီရင်ခံစာနဲ့ ပတ်သက်ပြီး မနက်ဖြန် ရန်ကုန်မြို့မှာ သတင်းစာရှင်းလင်းပွဲ ပြုလုပ်မှာ ဖြစ်ပါတယ်။

RFA Burmese
http://www.rfa.org/burmese