တရုတ်နိုင်ငံ ရွှေလီမြို့တွင် တရားမဝင်ရွှေ့ပြောင်း မြန်မာလုပ်သားများ ဖမ်းဆီးခံနေရ

တရုတ် - မြန်မာနယ်စပ် တရုတ်နိုင်ငံ ရွှေလီမြို့တွင် တရားမဝင် ရွှေ့ပြောင်းမြန်မာလုပ်သားများအား စီမံချက်ဖြင့် ဖမ်းဆီးမည်ဖြစ်သဖြင့် သတိထားကြရန် တရုတ်နိုင်ငံနှင့် နယ်စပ်ဖြစ်သည့် မူဆယ်မြို့၌ ပြီးခဲ့သည့်တစ်ပတ်ကတည်းက ကြိုတင် အသိပေးမှုများ လုပ်ဆောင်ထားသော်လည်း သြဂုတ်လ (၂၄)ရက်နေ့စီမံချက်တွင် တရားမဝင် မြန်မာလုပ်သားများ ဖမ်းဆီးခံရမှုရှိနေကြောင်း သိရသည်။

တရုတ်နိုင်ငံအတွင်း တရားမဝင်ပြည်ဝင်ခြင်း၊ တရားမဝင်နေထိုင်ခြင်းနှင့် တရားမဝင် အလုပ် လုပ်ကိုင်နေသည့် မြန်မာလုပ်သားများအား စီမံချက်ဖြင့် ဖမ်းဆီးမှုများပြုလုပ်မည့်အကြောင်းကို မူဆယ်မြို့တွင် သတိပေး ကြေညာခြင်းများနှင့် လက်ကမ်းစာစောင်များဖြန့်ဝေခြင်းများအား ပြီးခဲ့သည့် တစ်ပတ်ကတည်းက ကြိုတင် ဆောင်ရွက်နေခြင်းဖြစ်ကြောင်း သိရသည်။

“ရွှေလီဘက်က ပြည်ပဆက်ဆံရေးဌာနတွေကနေ စီမံချက်နဲ့ ဒီလိုစိစစ်ဆောင်ရွက်သွားမယ်ဆိုပြီး ကျွန်တော်တို့ကို ကြိုတင်အသိပေးထားတာရှိတယ်။ ပြီးခဲ့တဲ့တစ်ပတ်လောက်ကတည်းက နှစ်နိုင်ငံအဝင်အထွက်နေရာတွေမှာ မြန်မာနိုင်ငံသားတွေကို အသိပေးကြေညာတဲ့အနေနဲ့ လက်ကမ်းစာစောင်တွေ ဝေတာလုပ်တယ်။ ဗီနိုင်းပိုစတာတွေနဲ့လည်း ကြေညာပေးထားတယ်။ ဒါပေမဲ့ သြဂုတ်(၂၄)ရက်ညပိုင်း ရွှေလီမှာ တကယ်ဖမ်းဆီးတဲ့အချိန်မှာ မြန်မာလုပ်သားတွေဖမ်းခံရတယ်။ အရေအတွက်ကတော့ အခုထိ တရားဝင်အသိပေးလာတာ မရှိသေးဘူး” ဟု မူဆယ် ဒုတိယခရိုင်အုပ်ချုပ်ရေးမှူး ဦးဆန်းလှိုင်က တာချီလိတ်သတင်းအေဂျင်စီ သို့ ပြောသည်။

တရုတ်နိုင်ငံတွင် တရားမဝင်ပြည်ဝင်ခြင်း၊ တရားမဝင်အလုပ်လုပ်ကိုင်ခြင်းနှင့် တရားမဝင် နေထိုင်ခြင်းတို့အား ဖမ်းဆီးစစ်ဆေးရာတွင် အနည်းဆုံး တစ်ပတ်ခန့်ကြာတတ်ပြီး ဖမ်းဆီးခံရသည့် မြန်မာများအား မူဆယ်မြို့ရှိ လူဝင်မှု ကြီးကြပ်ရေးဌာနသို့ ပြန်လည်လွှဲပြောင်းပေးကြောင်း သိရသည်။

“ကျွန်တော်တို့ဘက်ကတော့ ဒီစီမံချက်နဲ့ပတ်သက်ပြီး ရွှေလီက ပြည်ပရေးရာဌာနတွေကို မေတ္တာရပ်ခံထားတာတွေရှိတယ်။ လိုအပ်လို့ရှိရင် ကျွန်တော်တို့ မြန်မာနိုင်ငံသားတွေနဲ့ ပတ်သက်ပြီးတော့ ကျွန်တော်တို့ကို ပြန်မေးဖို့၊ ပြောထားတယ်။ လိုသလိုစီစဉ်ပေးမယ်လို့လည်း ပြောထားတာရှိတယ်”ဟု ဒုတိယခရိုင်အုပ်ချုပ်ရေးမှူး ဦးဆန်းလှိုင်က ပြောသည်။

လက်ရှိတွင် စီမံချက်ဖြင့် ဖမ်းဆီးခံထားရသည့် မြန်မာလုပ်သားအရေအတွက်ကို ရွှေလီမြို့ တာဝန်ရှိသူများထံမှ အကြောင်းကြားခြင်းမရှိသေးကြောင်းသိရသည်။

“အရင်တုန်းကလည်းဖမ်းတယ်။ အခုနောက်ပိုင်း ပိုပြီးစိပ်စိပ်ဖမ်းတယ်။ မနေ့က ဖမ်းတာကတော့ စီမံချက်နဲ့ ဖမ်းတာ။ ရွှေလီမှာ ဖမ်းဆီးခံရသူတွေကို မူဆယ်ဘက် ပြန်လွှဲပေးတဲ့အခါ မူဆယ်က လူမှုကူညီရေး အသင်းတွေက အကူအညီတွေပေးရတယ်။ နေရပ်ပြန်မယ့်သူတွေကို ကားပေါ်တင်ပေးတယ်။ အခုနောက်ပိုင်းတော့ အဲဒီလို ဖမ်းခံရလည်း (၈၀)ရာခိုင်နှုန်းလောက်က ရွှေလီကိုပဲပြန်ဝင်သွားကြပြီး ပြန်အလုပ်လုပ်ကြတာဆိုတော့ အကူအညီပေးရတာတော့ သိပ်မရှိတော့ဘူး”ဟု မူဆယ်မြို့ ကရုဏာလူမှုကူညီရေးအသင်းမှ အသင်းဥက္ကဌ ဦးသောင်းထွန်းက တာချီလိတ်သတင်းအေဂျင်စီ သို့ပြောသည်။

တရုတ်နိုင်ငံ ရွှေလီမြို့သို့ မူဆယ်မြို့မှတစ်ဆင့် သွားရောက် အလုပ်လုပ်ကိုင်မှုများရှိနေပြီး တရုတ်နိုင်ငံအတွင်း တရားမဝင်နေထိုင်အလုပ်လုပ်နေသည့် မြန်မာနိုင်ငံသားများအား တရုတ်ရဲတပ်ဖွဲ့က မကြာခဏစစ်ဆေး ဖမ်းဆီးလေ့ရှိကြောင်းသိရသည်။

သတင်း - နေဖြိုးမြင့်
Tachileik News Agency
http://www.tachileik.net