မတရားအသင်းဆက်သွယ်မှု ပုဒ်မ ၁၇ (၁) နဲ့ ဖမ်းဆီးတရားစွဲဆိုမှု ခံနေရတဲ့ မြန်မာနိုင်ငံဆိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး ABSDF ရဲ့ ဗဟိုကော်မတီဝင် ဦးမင်းဌေးကို စွဲချက်တင်သင့်ကြောင်း မိုးမောက်မြို့နယ် တရားရုံးက ဒီကနေ့မှာ ဆုံးဖြတ်လိုက်ပါတယ်။
၆ လ ကြာ ဖမ်းဆီးထိန်းသိမ်းထားတဲ့ ဦးမင်းဌေးကို ၂၁ ကြိမ်မြောက်အဖြစ် ဒီကနေ့မှာ ရုံးထုတ်ပြီး စွဲချက် တင်သင့်ကြောင်း ဆုံးဖြတ်လိုက်တာ ဖြစ်ပါတယ်။ ABSDF ဟာ အစိုးရနဲ့ နိုင်ငံလုံးဆိုင်ရာ အပစ်ခတ်ရပ်စဲရေးလက်မှတ်ရေးထိုးထားတဲ့ အဖွဲ့လည်းဖြစ်ပါတယ်။
အန်စီအေ အပစ်ရပ်လက်မှတ်ရေးထိုးမှုမှာ နိုင်ငံတကာ အသိသက်သေတွေအပြင် တပ်မတော် ကာကွယ်ရေးဦးစီးချုပ်ကိုယ်တိုင် လက်မှတ်ရေးထိုးထားတဲ့အတွက် အခုအမှုကို စွဲချက်မတင်သင့်ဘူးလို့ ယူဆမိပြီး အခုလို စွဲချက်တင်လိုက်တာကို စိတ်မကောင်းဖြစ်မိတယ်လို့ ဦးမင်းဌေးက ဘီဘီစီကို ပြောပါတယ်။
ကျောင်းသားတပ်မတော်ရဲ့ ခေါင်းဆောင် တဦးဖြစ်တဲ့ ဦးမင်းဌေးဟာ အစိုးရနဲ့ ငြိမ်းချမ်းရေး ဆွေးနွေးပွဲတွေမှာလည်း မကြာခဏပါဝင်လေ့ရှိသူဖြစ်ပါတယ်။
ပြီးခဲ့တဲ့ ဒီဇင်ဘာလအတွင်းက မိုးမောက်မြို့နယ်ထဲ ခရီးသွားနေတုန်း ဖမ်းဆီးခံခဲ့ရကာ တပ်မတော်က တရားလိုပြုပြီးပြီး တရားစွဲခဲ့တာ ဖြစ်ပါတယ်။ ဦးမင်းဌေး ခေါင်းဆောင်အဖြစ် တာဝန်ယူနေတဲ့ ကျောင်းသားတပ်မတော် မြောက်ပိုင်းရဲ့ ဌာနချုပ်ဟာ ကေအိုင်အေ ဌာနချုပ် လိုင်ဇာအနီးမှာ တည်ရှိတာလည်းဖြစ်ပါတယ်။
အန်စီအေ အပစ်ခတ်ရပ်စဲရေးအဖွဲ့တွေထဲမှာ ပါဝင်တဲ့ ကျောင်းသားတပ်မတော်ရဲ့ ဗဟိုကော်မတီဝင်ဖြစ်သူ ဦးမင်းဌေးဖမ်းဆီးခံရမှုအပေါ် ABSDF ခေါင်းဆောင်တွေက အစိုးရနဲ့ တပ်မတော် ထိပ်တန်းတာဝန်ရှိသူတွေထံတင်ပြထားတယ်လို့ ဆိုပါတယ်။
အန်စီအေ လက်မှတ်ရေးထိုးထားတဲ့ လက်နက်ကိုင်အဖွဲ့တွေကို မတရားအသင်းအဖြစ်မှ ပယ်ဖျက်ခဲ့ပြီးဖြစ်ပါတယ်။
ဦးမင်းဌေးဟာ ရမ်ဘိုရုပ်ရှင် ဇာတ်ကားမှာ မြန်မာ့တပ်မတော်ရဲ့ တပ်ရင်းမှူးအဖြစ်လည်း ပါဝင်သရုပ်ဆောင်ခဲ့သူဖြစ်ပြီး ရမ်ဘိုဇာတ်ကားထဲက သူ့ရဲ့ သရုပ်ဆောင်ချက်တွေမှာ ပြည်သူတွေကို လူ့အခွင့်ရေးချိုးဖောက်မှုတွေ ပြုခဲ့တာဟာ တပ်မတော်ကို အသရေဖျက်ရာရောက်တယ်လို့ ရုံးထုတ်စစ်ဆေးစဉ်မှာ တရားလိုတွေဘက်က ပြောဆိုမှုတွေရှိခဲ့တယ်လို့လည်း ဦးမင်းဌေးက ဆိုပါတယ်။
ဘီဘီစီမြန်မာပိုင်း
ဓာတ်ပုံ- မနှောင်း
BBC Burmese
https://www.facebook.com/bbcburmese/
ရမ်ဘိုဇာတ်ကားထဲက တပ်ရင်းမှူးကို စွဲချက်တင်သင့်ကြောင်း တရားရုံး ဆုံးဖြတ်
Reviewed by THITHTOOLWIN
on
16:24
Rating: